قطار العمر

البارت الثاني والثلاثون

قطار العمر
البارت الثاني والثلاثون
للكاتب غزوان علي

موگد العشگ ليش انته بيه تعيل
تجبرني اعله حبك وانته مو گده
حسبالك لعب وبس كلمه تنگال
لا ارجع يخايب لاتمس حده
ماعندك وفه چا گلي ليش تگول
انته أول عشگ والماضي والبعده
ماعندك مشاعر انته مامجبور
تعلق واحد بيك تالي وتهده
ما گالو جبر ولا لازم تحبون
موگد حبي انته  غيرك الابده

من تحب انسان اكثر من روحك ومن اهلك ومن كولشي بلدنيا وتخلي هو الهوا مالتك وتضحي بكولشي اله وفجأه تشوفه راح وعافك من كثر متحبه مراح تتقبل اعذار منه حتى لو الي سواه صح ومن مصلحتك راح تحسه خاين غدار جرحك أذاك دمرك وبكد حبك اله يتحول حقد وكراهيه واحياناً تدعي عليه بالاذيه من كثر متأذيت وتكول بس اشوفه اطلع ضيم گلبي بيه بس اشوفه أذي مثل مأذاني واحسسه بأن اني نسيته وانتهى من حياتي مسحته مثل ما مسحني من ايامه وفجأه يطلع هذا الشخص كدامك وتشم عطره وتسمع انفاسه وتحسهم شون كعد يلامسون وجهك وانفاسك هذا الاحساس راح يكدر الگلب عليه راح يكدر من يشوف حبيبة يصير قاسي عليه بهاي اللحظه راح تنهار كل دفاعاتك وكل المشاعر القويه الي كنت ناويه تظهرها ويبقى الگلب هو المتحكم بهاي الدقايق هذا حالي ويه سالم يوميه اكول بس اشوفه العب بيه طوبه بس اشوفه اهينه واراويه اني شكد كارهته ونسيته واصير قويه واكوله شوف مامتت وراك وراح اعيش مثل متعيش
بس من شفته وكال شونج تفاحتي ااااااه ياگلبي شتتحمل بعد

باوعت عليه والدمعه خانتني وبقت تتراقص بعيوني واني اتوسلها متنزل حتى لتحسسه بمدى انهياري بعده
دنجت مكدرت اباوع بعيونه اكثر وكتله
من رخصتك اريد افوت
سالم .. ليش نزلتي عيونج لهاي الدرجه متكدرين تباوعين بوجهي زين مشتاقيتي 
ولاء .. صوتي يرجف وجسمي ثلج صار اكثر من سنه مشايفته ولا سامعه صوته احس اذني وكل الحواس تريد تنهزم منه حتى لتنهار واشمر روحي بحضنه
لا وخر من طريقي رجاءاً
سالم .. جذابه من صوتج اعرفج من رجفتج بله ورفعت راسها بيدي دفعت ايدي بقوه
ولاء .. لتلمسني اياك سالم
سالم .. شوفي العيون هي الوحيده الي متكذب عليه
ولاء .. شتريد مني مكافي
سالم .. من شفت ابوج جاي كمت ارجف تمنيت تكونين جايه حتى لو اشوفج من بعيد وكفت قريب الباب ذاك ولمحتج  طلعتي لسياره ابوج مصدكت عيوني خفت اجي وتنهزمين دخلت وكلت انتظرج هنا
ولاء .. وانتظرتني وشفتني وبعدين
سالم ..شبيج تحجين هيج ويايه
ولاء .. لعد شتريد اخذك بالاحضان من اشوفك واكولك مشتاقه الك
سالم .. لا بس
ولاء .. لا بس ولا شى انت تعرف كولش زين الي بينا انتهى وانت هسه رجال متزوج واب صدوك شنو اسم ابنك مدري بتك
سالم .. شلج بهذا الحجي
ولاء .. جاوبني ابو منو هسه انت
سالم .. كافي ولاء اني جيت بس ردت اشوفج واطمن عليج ماله داعي هيج ترجفين
ولاء .. واني ما اريد اشوفك ولا اريد اسمع صوتك ولا اعرف اي شى عنك
جان يلزم ايدي سحبتها حيل منه احس من يطخني يخليني انهار بلزايد تعبت دقايق واكفه واحسهن عمر خايفه لا انهار دخيلك ربي
ممكن افوت
سالم .. لا
ولاء .. رفعت عيني بعيونه وحجيت بعصبيه
شتريد هاا شتريد تشوفني شون مرتاحه ابشرك مرتاحه وسعيده وعال العال ونسيتك
وحياتي هادئه وكولشي تمام ارتاحيت دفعته وداافوت جان يجرني حيل من ايدي انطخيت بصدره
سالم .. جذابه والله جذابه مستحيل تنسيني اني هنا وهنا اشر على گلبها وعقلها وهنا واشر شرايين ايدها ولازم ايدها وعاصرها
اني بداخلج ومراح تنسيني العمر كله واراهنج على هذا الشى