يحدث أن ينكمش الكون الواسع
برحيل احدهم
حتى لاتجد فيه موضع شبر يحتويك !
……… ...
چنت رابع اعدادي
والدنيا زاهيتلي كلشي اريده واصلني گبل لا اطلبه
چنت مدلل ابوي الي كل مايشوفني يذكر اخواني فاخر وسامر وطاهر الله يرحمهم
فاخر وسامر راحو بحادث سير
ابوي چان مكلفهم بشغله خارج المحافظة
وبالطريق اندعموو
ظل
ابوي من يشوفني يخاف يفگدني بيوم ويريد يعوض النقص بيه
جان ابوي مامرتاح ويلوب ليله ونهاره بعد اخواني
فاخر جان يحب بنت الفلاح
وابوي معارض زواجه يريدله بنت عمي وهوه مايريد غيرها ظل مصر على رايه الحد مامات وهيه بنفسه
وابوي يتمنى يرجع يوم ويكله اخذها
چان يكلي كلشي تريده گول امر يتنفذ
بس حيل مقيدني وده يسجني من خوفه عليه
وهالشي خلاني احتار بغيابه كلشي علي جديد الدنيا مو هاي الجنت بيها
ماخلاني اطلع واشوف الناس واميز بين ابو وجوه عده وابو گلب ثابت
خلاني مثل جاهل متيه امه ويچلب بذيال كل عباه ايشوفها
ماچنت ادري اذيال عباه امي وحضنها تختلف عن غيرها
چلبت بذيال عباة اعمامي وتلوها حيل عني وبتلتهم انخلع متني مو بس ايدي
حسيت روحي اعضب ايد وحده
ورجلين مايعينني بدرب مامعبد وعثراته هواي
بيوم الجابو خبر ابوي مسوي حادث وهوه المسبب سكره مرتفع وهوه يسوق وداعمله عايله وكلهم ميتين
فاجعة الموت ملاحگنه وبنفس الطريقه الخلاف اخواني اندعموو مو هم الدعموو
بيومها انعاد علينه مصابهم فاخر وسامر جنهم طاحو اليوم وي طيحة ابوي
حسيت روحي غصن يابس ضعيف بسرعه ينكسر
حته الهوه يدولب بي
وين انه وين صفه وكتي وين اخيواني
گبل اربع سنين ماتوو بعمر 25 و24
ومن دارت سنتهم وره شهر روج الماي اخذ طاهر رغم جان سباح وشاطر
چانت كسره النه كلنه
امي چانت رغم حزنها مقويتنه كل ماشافت ابوي ينهار تقوي باحاديث وقصص تخلي يخجل من قوتها
وبيوم الي يشوف ضعفها يكعد هوه يمها يقويها ويصبرها
ومرت ايامنه الحد يوم الي راح خيمتنه
چنت اسمع يگولون الأبوو خيمه
بس حسيت بي بعد مافاركته
صرنه مكشفين للرايح والراد يتصرف بينه
چنت زغير مدلل ماعندي خبره للحياة بره المضيف والكاع والفلح والناس الي ملونه وجوها
خلص العزه وانطينه فصل العايله الدعمها ابوي وجان بوكته مبلغ ثگيل كلش ومبالغ بي بزياده
صار وكت المحاسب شنهي الالنه والعلينه
اكتشفنه
ماكو شي النه
عمامي تلاثه كعدو كلهم وشرطوو علي
الهسه اتذكر نبرة صوتهم واتذكر اول طعنه انطعنت بيها وجرت بعدها طعنات
أنت تقرأ
خيانة زمن
Chick-Litللخيانه عدة انواع منها خيانة الاخ والصديق والحبيب لكل واحده منهن وجع لكن خيانة الزمن تجمع كل الاوجاع عندما يخونك زمانك توقع خيانة اقرب الناس اليك القصه تتكلم عن عزيز قوم خانه زمانه وتقاوا عليه اقرب الناس اليه عندها يبدأ مرحلة صراع الزمن وا...
