خيانة زمن

27

ماهر..

گعدت احتاريت شسوي انه عندي ورقه تثبت انو هم ماالهم علاقه بيها بس الورقه عشائريه والي يتكفلها لازم ابو حسين وابو حسين الفتره الاخيره مدري شجاه وگلب عليه بس هذا حق الله واكو شهود مو بكيفه يتبرا

تعبان وراحه ماكوو احس عقلي وگف هاي السالفه مالها حله منا لمن تكبر البنيه يلله نخلص منهم ويمكن مانخلص

اخذت تليفوني ورحت للديوان خابرت الي يسمونه عمي

بدون سلام وكلام سألته

..هاي السالفه جديده سالفة الحضانه من الاخير انت شرايد احجي وخلينه نفهم

اجاني صوته الصرت اكرها اكثر من كلشي مكروه بالدنيا ياربي البشر مايتعض مايگول كافي ادري حوبتنه شخلت بيك خسرت بيتك ولدك واحد مات واحد سجن واحد شارد
كيعانك الاخذتهن بالحرام راحت صحتك كاعد تروح شويه شويه بعد بيمن متكبر انت

حجه وانه انتظر جوابه

..اختك تريد تعرس بعد مالها حق بالبنيه

..اتعرس ماتعرس انه اتفقت وياك البنيه عندي وانه الاتكفلها

..اذا رايده العرس خل ترضا بعلي عم البت يتكفلها

..انت تحجي صدگ مامليت من الطلايب يعني كل عقلك انه انطيك سرور اردود لو اسلمك بتها
الحضانه الها واريد اشوف واحد ياخذها
لعبه بيدكم هي يوم سيف يوم علي والله اضفرها مايشوفونه

..شوف بدال المحامي انحط عشره مو احنه الي انخلي اعراضنه بيد غير ازلام اختك رايده اتعرس ونست زلمتها بهالسرعه بالعافيه عليها خل تولي بس بتنه لا

..الورقه العندي اتحگك ماالك حگ علينه

..الورقه نگعها واشرب مايها شيخك ابو حسين الشيخته انت عليه بنفسه گالي ماتاكل عندي

الدنيا افترت بيه ذوله متفقين من وراي واكيد ابو حسين ماراضي بخطبة حسين وهو البلغهم
يصير خير اثنينكم انه اراويكم مو انه التنلوي ذراعي

..ليش ماتكتبون هذا رايكم  وتنگعونه انتم وتشربون مايه غير ابو حسين عندي هواي شهود وشيوخ العشاير والفرايض الكبار تحكم بينه وبينكم والمحكمه انسه سالفتها عيب عليك توگف ارملة ابنك محاكم اتقي الله وراك گبر كافي

..هذا العندي تاخذ علي تظل بنتها عدها ماتاخذه تظل ماتاخذ غيره

..وهي هم مافكره بعرس والگلك مخطوبه مايدري هي رفضت عيب عليكم يوميه مثل سدره وهازينها
بتكم شگد راح يصير عمرها راح تصير سنتين اشهر وتقبط السنتين اكو واحد منكم يوم سأل عليها تعرفون شكلها ليش ماتخافون الله انتم
حوبتنه گبل شخلت بيكم يلله بعد رادين ع هاليتيمه الطفله

..انتم الحرمتونه منا
تعيرني بموت ابني انت عود هاي حوبتك

..منعناك نوبه بس انت شسويت درت وجهك وارتاحيت بعد ماهمك لو رايدها صدك تحاول وبالنسبه الابنك
هو حرامات خيرة اولادك راح بيها ..الموت مابي عار وشماته اذكرك مااعيرك انه ولد مات ولد شارد ولد مسجون بعد شتريد بنيه مطلگه بعد شتريد اكثر من هيج مو بيتك بيدك هجمته