خيانة زمن

21

مساء المحبه ..
رجعت وياكم من جديد اسفه على تأخيري الكم وانتظاركم وشوقكم ولهفتكم

البارحه رجعت بعد العصر للبيت وتعب الطريق مخلاني افكر اكتب
اليوم كملت الكم كتابه مع انو عند ابني امتحانات وصارعت الوقت حتى اكدر اكتبلكم بارت قريب لل 3000 كلمة

شكراً الكم والسعة صدوركم

…………………… ..

حسين ..

بعد حادث ماهر صار شغلنه الشاغل نعرف ياهو الوراه ردنه طرف للخيط نعرف الوراه هو متأكدين مقصود ومو حادث عرضي لان متعني عليه والسياره اصلا مابيها ارقام حسب كلام الشهود
بهذا الوكت صرت اراقب سيف وين يروح وبيمن يلتقي وماهر گال اكيد مراقبني لو مخلي عينه عليه اسوي روحي ماشاك بأحد وانسى السالفه كلها

مرت اشهر وصرت اعرف كل تحركاته واكو جماعه شاك بيهم لأن كل فتره يجون يطلبون منه شي ويرحون اشهر يختفون ويرجعون وهم مو مناه مبيين من غير مناطق
اجه ابالي اعرفهم واعرف علاقته بيهم

هذا صار شغلي زائد گيعانه ومرات گاع ماهرالي صارت المكينه البيها مسيطره على الكيعان وكل الي يردون سگايه الگاعهم صارو يكروها بفلوس وهالشي فاد ماهر وخلاه يفكر يشتري ويوسع گيعانه اكثر خاص بعد مارجعله گيعان ابوه الي خله بيها نص من الفلح القديمين ونص غيرهم  مرات اروح اشرف اذا هو ماموجود يوصيني لأن الفلح بعدهم جدد ورايدلهم واحد يشوف ياهو اليفيد وهمه الكاع ياهو المايفيد بيهم
وهيج مخلص وكتي حتى ماافكر يجيني الليل وغصب عني تصير هي گبال عيوني صوتها مرات يتراوالي اسمعه ..

واتخيل اسمع اسمي بصوتها واحلم تصير تحبني لو تتقبلني ع الأقل وتصير ابيتي واشوفها غلاها وقيمتها عندي

وعدت روحي ابتعد وبأبتعادي صرت اقترب بتفكيري بيها  اكثر
وعدت روحي انسى ونسيت وعدي ومانسيتها

صرت اروحلهم كل يوم مرات اكتفي بمعرفة وجودها قريب مني هذا يكفيني ومرات اركز واشغل كل حواسي بس حتى اسمع صوتها حتى لو هالصوت چان موجه البتها

گبل جنت اسمع دارميات عن العشاگ شلون يحبون اولاد الحبيبه ع محبتها  وتالي انه صرت منهم واتمنى الي بكلبي يطلع حتى لو ابيات اكدر انظمها
اشكي بيها العلتي المحد عارفها غيري وغيرها

بتها صارت دوه الروحي من احضنها احس حاضن  شي منها
وكبرت احلامي وصرت اتخيل يجي يوم وتتقبل وبتها تصير بنتي وصرت اتصرف على هذا الأساس.
كل جيه الي اجيبلها شي بسيط صارت تفرح من تشوفني واحسها تعلقت بيه مثل مامتعلق بأمها

حن گلب بتها عليه وگلبها اقسى من الحجر
طفله وگدرت تميز محبتي بگلبها وروحها وگلب امها قافلته
وروحها حابسته الشخص غالي عليه مو بس عليها التفكير بي يأذيني بكدها واكثر شلون احب مرته وليش هي بالذات.  واقنع  روحي واكول بس هو توفى والحياة گدامها وهي اولى تعيشها براحه وتفك حزنها وتترك ذكرياتها المره حتى  بوكت أفراحها