خيانة زمن

2

..أنت دومك فايدني شنهي الي ابالك هسه

..ندخل سلف احسن مانجمع يوميات انجمع مبالغ شتگول

..ماادري بس هم خوش حل اهم شي مضمونين وملتزمين تره انه مشلوع گلبي وحدي ماعايز شلعان گلب

..لا ماندخل وي ياهو الچان بيناتنه انه واخواني واولاد عمي
اخوي بسام هسه فتحله محل وحده ومحل جبير من مبالغ السلف وكالي هيج احسلك انه عاد گلبي ماينطيني استفاد وانت مو وياي

..بعد اخوك هذا هوو الي تشوفه ..انت ماتدري انه الوكت يمر عليه طويل اريد اثبت أرجولي وارد مثل گبل واكثر مامييت ع الجاه الله يشهد بس اريد اشوفهم مو انه الينكسر

تدري البارحه العصريه عرس واحد من عمامنه المطرفين ولازم اوصلهم بأسم ابوي امي انطتني اعگال البسه واكشخ بي گتلها ماالبسه الا من اشوف روحي گدها صدگ والبسه مو كشخه البسه وانه اشوف استاهل ينحط ع راسي

..انت مكبرها ماهر انت شيخ ابن شيخ لو لبسته محد يجيب طارييك

..وسام الشيخه مو كشخه وكلمن لبس اعگال گال انه الشيخه اتصدر للوادم اسمعها واعينها واشوف هذا واواصل ذاك اذا انه روحي ماعاينها وحگي مامطلعه وماعندي القدرة التخليني اواصل احد ايدي شحيحه والعوز ماخذ مني هواي
اضحك ع روحي انه

انت لو تشوف احلامي شنهي

..ترجع تترأس عشيرتك

..لايخوي ماهمني هسه وبعد الي اترأسها ماهو احسن مني الدليل الوادم ملت نص من عمامي بدو يطلعون من جوه ايده وصار كل جبير بيت متشيخ ع اهله
مابيهم اليحل الطلابه كفيلك الله ملتهين بسياراتهم وونستهم عمامي وولدهم الدنيا خذتهم بيهم الزين صح بس الروج اخذه حالهم حال ذولاك

الي يهمني مو رئاسة العشيرة اليهمني تشوفني الناس انه رجال وخير خلف الأبوي وهذا الي يصير وتشوف بعينك كل الي اتخلو عني بعد اسنين تلكاهم حدر هدمي

..وانه وياك الذاك اليوم واكون ذراع الك وروحي ترخص الروحك خلها ابالك هاي مايوم اعوفك ابد

..كفوو انت غير هدية الله ودعوة امي الي

بيومها رحنه لأخوانه واتفقنه ع السلفه وظليت انه الشغلي ودوامي
وصدگ بديت اسوي سلف واستلمت اسمي وضميته وضيقت ع روحي كلش وسويت ثاني بمجموعه ثانيه وزيدت وكت شغلي تعبت بس ابالي احصل ثمرة هالتعب
لما مرت الايام بتعبها وشدتها صار عندي مبلغ زين دخلت بي وي حسام اخوو وسام شريك
واتغيير وضعي
امي فهمتها الي ابالي وفهمت ليش بديت اقلل مصرف ع البيت وطلبت منها تتحملني فترة السادس بس لأن شغلي قل بي التهيت ادرس والوارد اليجيني من حسام اصرف ربع منه ع البيت والباقي اوفره شهريه داخل سلف
اصعب فترة مرت عليه
ابالي هواي اهداف اريد احققها وودي الزمن يركض ركض بيه
وساعات اريد هذي المرحله اطوول حته ابني نفسي اكثر واقارن التغيير الي بشخصيتي بين قبل من جنت مرتاح وبين هسه من شفت العوز والشده
مرات المصايب تشد وظلت يم الشخص يريد يتعلم متها ويكسرها لو يكسر روحه ويستسلم وانه شفت بهاي السنين كسرت المصايب ماكسرني