خيانة زمن

23

ماهر ..

امس تأكدنه هذا النذل متفق وي ذوله ع دعمتي واذيتي بعد ما جايينه ومامنطيهم اليردوه لأن العار مفلس
الانذال مثل شاكلته بعد ماشردوو اتصلو بيه وفهموني ياهو الوره الحادث مالتي وليش
وانو هم هاي شغلتهم عصابات مأجوره
صرت نار اريد احركهم حرك
حسين الليل كله يوصي بيه لاتتسرع النذل ماهو عند اهله لاتخسر خلينه ناخذ حگنه عدل

وهو صدگ ماجان هنا
ثاني يوم طلعت اجيب احتياجات لأولادي مالي خلگ وطالعه الدنيا من عيني وحتى اهل بيتي مايعرفون بالسالفه

احس بركان نار بيه ماتخمد ياربي شيردون مني مو دمروني ماكافي هالحقد هذا ادري شراضعين ماكو واحد بيكم حن گلبه ع دمه مهما يكون انه ابن عمكم
اشكال شفت منهم اذيه مااتمنيت الهم الموت ابد
تالي هو يريد يموتني والله ماانطيته سرور عمت عيني اذا خليته يشوف اضفرها النذل هذا

خلوني حتى اشك بحوادث ابوي واخواني لو مااخواني ناس الداعمتهم واجو فصلوو وابوي بحياته طيح فصلهم كالهم هذا قدر وابنكم هم مييت بعد الفصل ماله داعي جا كلت هم ورا موتتهم

طاهر اخذته روجة الماي وكدام جماعته ومحد بيهم لحگ بي يطلعه جانت الروجه قويه ولفته وحتى من دورناه بطينه واحنه مالاكينه الحد ماايسنه وطلعتله امي نادته المغرب يلله طوف

وابوي اجته غيبوبة السكر وهو يسوق وصار الي صار

يارب كل مااريد انسى واكول كافيني هموم وقهر والراحو يم ربهم هو اليتكفلهم ويتكفلني
تطلعلي سالفه تخليني اتمنى اكومهم بيدي من گبورهم واشد ظهري بيهم

مية فكره ابالي ساعه ودي اهجم بيتهم عليهم ساعه اكول اكتله خلص وهو البدا والبادي اظلم وساعه أگول اولادي يتيهون بعدي وامي ومرتي واختي ياهو الهن وسيف مايستاهل يضيع عمري من وراه اكسر رجله واشيلهم واخلص من جورتهم للابد ومااريد شي يربطني بيهم

تعبت ع ماوصلت المكان القاصده ماادري شلون وشوكت وصلت اخذت الاريده ورجعت السيارتي برجعتي للبيت واشوف سيارة اباب بيتنه وصلت قريب الها شكيت بيها شايفها هالسياره وصلت قريب اله من شافني ارتبك وشخط سيارته حيل

شياطين الدنيا كلها اتجمعت براسي نزلت حتى الغراض مانزلتهن طبيت دفرت الباب حيل طلعت الكنتوري كبل اخدت سلاحي وسحبته وانه بالبيت
اسمع هوسه وصياح امي وزينب واشوف سرور مجلبه بيه ماواعي الكلشي دفعتها حيل وطلعت وانه اتوعدلهم واغلط بصياح

صعدت سيارتي وابابهم رميت وانه اصيح

..وينه هذا النذل سيف اطلع موتك ع ايدي ياجبان ولك عار تروح فدوه للمره هم لو عاركت تسوي التكدرله تصيح تغلط تخرمش ماتأجرلها ناس يكتلون تريد تكتلني تعال گابلني

وينكم انذال والله الليله ماتليل ومنكم نفر ظال بهالبيت الا اهجمه ع روسكم

بعدني اصيح واحجي ولا واحد منهم طلع بس صياح النسوان اسمعه واجاني بعدين صوت ابوو الي هو عمي وهو يصيح