دفعت 💔ثمن انتقامك💔🌷

part14

#دفعت_ثمن_انتقامك
#للكاتبه_الهميل_الشارد

الحلقه 14 :

في يوم تعب عليهم باتها ابراهيم وشالوه للمستشفى وبعد طلع عليهم الدكتور قال: المريض جاته جلطه قويه وحاليا هو في غيبوبه . حنديرو اللي علينا والباقي على الله .
حور : لالالا ماتقولهاش يادكتور الا باتي ارجوك .. ساعده.😢
الدكتور: انشاءلله خير .انديرو اللي علينا والباقي عالله
حور قعدت تبكي ومنهارة وخالطه عليها باتها من هنا ووضعها مع امجد من هنا ..وقمعزت عالكرسي اللي في الانتظار وجتها فجريه اللي سمعت كل كلمة قالها الدكتور وقمعزت جنب حور وهي اتشوف لحور وقالت : شن يعني غيبوبه ? يعني معش اينوض ولا كيف ?
حور ببكاء : بعيد السو ..انشاءلله ينوض وايعاود طيب واحسن من قبل ..وانا حنوقفلا ومش حنسيبه .😢
فجريه لوت فمها وقالت: انشاءلله ..ونحن شن بودنا يعني ..لكن الدكتور قال جلطه زعما انشل ?
حور وهي تبكي : اللهم لا اسألك رد القضا ولكني اسألك اللطف فيه..😢 يارب اشفيلي باتي يااارب 😢
ومشا اول اليوم علي عيلت الحاج ابراهيم نكد وزعل ومرعي طبعا عرف باللي صار لباته وعلي طول جا للمستشفى وسأل الدكاتره علي حالت باته ونفس الأجوبه عطوهن له وجا لحور اللي مقمعزه قدام العنايه وباين عليها الارهاق والتعب وقاللها : حور هيا لنروح بيك للحوش قعدتك مش حتزيد شي علي حالت باتي ...ومستحيل ايخلوك اتشوفيه في للعنايه .😔
حور بتعب: مانقدرش مرات يحتاجو شي ويبو حد من هله كيف بنعلمو .😳
مرعي : لا ماتخافيش الدكتور نعرفه وعطيته رقم فوني ..وخليت رقمي عند الأستعلامات هيا بس ,
ووافقت حور وروحت مع خوها وهي خاااايفه علي باتها و وصلها للحوش القي امجد في سيارته  قدام الباب دوبه واصل لحوشهم وكان الوقت الليل عالتسعه وطبعا كان عنده موعد مع ابراهيم بات حور وتفاجا بحور ومرعي نازلين من التاكسي فتوجهلهم بعد نزلو واعيونه علي حور اللي فاتاته وخشت للحوش ,وسأل وهو يسلم علي  مرعي : لاباس وين كنتم ?
مرعي وهو يسلم عليه : كنا في المستشفى ..باتي تعب علينا .
امجد : لاباس عليه وكنه ,?
وحكاله مرعي اللي صار للحاج ابراهيم وامجد قال لمرعي : اولا انشاءلله لاباس عليه عمي وانشاءلله يرجا طيب ..وثانيا يامرعي قبل عندي موعد مع عمي علي موضوعي انا وحور ونبي انرجعها معايا اذا تسمح وصدقني مش حنقصر مع عمي ولو كل يوم بتمشي انشيلها ..
مرعي شافله وقال: شوف ياأمجد بالرغم مش عارف اللي ساير بيناتكم وحور عليما سألتها مابت تحكي شن صاير بيناتكم وهضا من حقها لأنه موضوع بينك وبينها بس انا نعرف اختي ماتسكر راسها علي شي الا وهي زعلااانه ومظلومه وهالشي نحس بيه قبل ماتقوله ليا حور ...ولكن حنكلمها مرة ثانيه ونحاول معاها بس اكثر من هكي مانقدرش نوعدك .
امجد حس بغصه في قلبه وقال : باهي ممكن اتكلمها ليا نبي نحكي معاها ,
مرعي : حاضر اشويه بس ,
ومشا مرعي لاخته اللي في المطبخ تغسل في ماعين العشا واللي مالقت منه حاجه 😒 وحكالها ان امجد يبي يحكي معاها في الاول رفضت وبعد اصرار من مرعي وافقت وكانت لابسه جلابية حوش نص كم ورديه مخططه بالأبيض بالعرض وعليها رسمة قلبين ورافعه شعرها ذيل حصان وخشت للمربوعه وامجد أول ماشافها وقف وابتسم عالخفيف ومرعي طلع وخلاهم علي راحتهم وحور مابتش اتشوف لامجد اللي باين عليه الشوق والحب وقلبه يتقطع علي شكلها اللي بادي ذابل واعيونها محلقات ومحمل روحه ذنب اللي سايرلها وقال : كيف حالك ياحور ?
حور : من ربي بخير .الحمدلله .
امجد : لاباس علي باتك ..انشاء يرجعلكم طيب .
حور : انشاءلله .
امجد بشوق : حور ..سامحيني ارجوكي ..والله متندم روفي بحالي .
حور شافتلا بعتاب وقالت : لكن انت مارفتش بحالي لما ضربتني وحبستني ..
امجد : والله كنت نتعذب اكثر منك ياحور بس مش مني من غيرتي . هيا ياحور حني عليا وارجعي واللي تبيه انفذه لكي .غير قولي .
حور حبت تستغل موقفه  وقالت : انا مستحيل نرجعلك الا بالشروط اللي نبيهن وافقت رجعتلك ..رفضت نطلقو وكل حد يمشي في حاله .
امجد فرح انها عطاته امل بالرجوع له وقال : اامري ياست البنات ..ونا نفذلك .
حور : نبي نشتغل ..انا بشهادتي كيف ماتعرف ونبي نشتغل بيها ..ها شن قلت ?
امجد بابتسامه : حااضر ياستي ولو ان مافيش داعي للشغل اللي تبيه انجيبه لكي لعندك .
حور : هضا شرطي الاول موافق ?
امجد : تم والثاني ?
حور : شرطي الثاني نبي نتعلم السواقه .
امجد شافلها بصدمه وقال : سواااقه ?! وعليش ?
حور : شن قلت ?
امحد : تم .بس انا اللي انعلمك راه .
حور. باستهزاء : ماتفرقش ..المهم نتعلمها ..وشرطي الثالث والأهم ......
امجد قاطعها : وفي ثالث ? كم شرط ياحور ?
حور : هضا الاخير والاهم واحد فيهم .
امجد شافلها بقرنت حواجب وقاللها : شنو هو ?
حور نزلت اعيونها لوطا وقالت : لو رجعتلك ماتجبرنيش علي شي انا مش موافقه عليه ..
امجد بحيره : زي شنو ?
حور : يعني ....قصدي ماتجبرنيش عليك ..فهمت ولا لا ?
وامجد بعد فهم عليها وقف وقمعز جنبها ومسك يدها وقاللها : مستحيل نجبرك علي شي ياحور وحنكسب قلبك وحبك وانخليك اتعاودي اتحبيني زي مانا انموت فيك ..وحتشوفي .
وقفت حور وكرت يدها من بين ايديه وتبي تخش وسبقها امجد وقال : خلاص متفقين وهيا جهزي دبشك نرجا فيك ترجعي معايا الليله .
علي خشت مرعي وقالت حور : لا مش اليوم ..باتي في العنايه ولازم انكون معاه .
امجد : ونا مش حنمنعك عليه ..حنشيلك ونجيبك ..ولازم ننقلوه لعياده خاصه اكويسه عشان ايحصل علاج مناسب وتقدري تقعدي معاه طول اليوم وتروحي تباتي في حوشك .
مرعي : لا مافيش داعي اتعب روحك ياامجد وصيت عليه دكاتره ممتازين وانشاءلله ايكون اكويس .
وحكا امجد علي شروط حور لخوها الا الشرط الاخير طبعا خلاه بينه وبين حور.
ومرعي فرح ان امجد وافق وشاري اخته ومايبيش ايفارقها لان مرعي عارف معاناة حور مع فجريه وروحت حور مع راجلها وفجريه تقزمط عليها وتدعي ..وليه تبيلها كرينتو يلعب فيها 😠
وروحت حور ووصلو للفيلا وفرحو كل اللي في الفيلا برجوع حور لامجد وغزاله كانت متحشمه ترفع راسها قدام حور وحور فهمتها انها مش ذنبها وحضنتها وابتسمت حور لغزاله وتاسفتلها غزاله علي صار لحور من ورا سبب امها وحور ماخذتش موقف من غزاله ولا من باقي خواتها. وطبعا غاده في دارها مابتش تطلع وغدير تاسفت لحور الشي اللي خلا غزاله ونجاة يتفاجان بيها وفرحن بيه في نفس الوقت ..والحاج بدر تأسفلها وهو منحرج من عمالت مراته وحتى ولده اللي ظلمها وعذبها وحور انحرجت من عمها ومارضيت فيه الذله ووقفت باست راسه ويده وفرح بيها عمها بدر وهدرزت مع العيله وبعدها خشت لغرفة نوم امجد لقت امجد يطلع في لبسه له بيدوش وخش للتواليت وهي رتبت دبشها في مكانه وطلعت لبسه لروحها وقمعزت عالكنبه وقعدت اتفكر كيف تنتقم من امجد وهي ناويتلا عالبغدد 😆
وطلع امجد من التواليت وخشت بعده حور وهي تعمدت انها ماتشوفلش وهو عيونه عليها فرحان بيها وانها واخيرا رجعتلا وقمعز اينشف في شعره وهو ايفكر كيف بيكسب قلبها من.جديد ويراضيها ..
المهم عند مرعي بات في مربوعتهم لان داره عطتها فجريه لولدها فايز وشي ماتبي حد مفيت عويلها ..ورقد ياروحي بلا عشاء .
وعند رحمه تحرق وتحلف وتوعد لحور ولامجد انها ماتسيبهم ولازم تنتقم منهم ..
وثاني يوم رن فون مرعي شاف للرقم القيه من المستشفى وطول ناض وغسل وجه وصلى وطووول مشا للمستشفى وبعد وصل قابله الدكتور وهو طالع من العنايه وخبره ان باته عطاه عمره وتوفى انصدم مرعي وتفاجاء وقمعز عالكرسي وهو حاط راسه بين ايديه وهو مخنوق بالعبره وبكا واتصل بامجد وخبره وامجد انقهر بالخباره وقال لحور ان مرعي قاللها باتها تعب ويبيها اتجي بسرعه وفعلا لبست وطلعت مع امجد وماحكالها شي نين وصلت للمستشفى وحكالها مرعي اللي حضنها وهي انهاااارت دموع وبكا وعياط 😭 وفعلا كان يوم اسود لانهم تيتمو بكل ماتحمل الكلمه من معنى.. وانصدمو في واحد وقف مع الدكتور وكان طويل ومليان وبكتوفه وشخصيته حلوة وباين عليه انه موجوع ومتأثر والدموع في عيونه ولف جيهت حور ومرعي وقرب منهم واول ماشافوه عرفوووه وحضنوووه وهم يتباكو وامجد مستك فيهم والغيره لعبت فيه كيف حور تحضن راجل وقبل بيهجم ويلعب فيه بس مسك روحه تي ماصدق قنع الغندورة حور ترجعلا وسأله من انت ..ورد الراجل .: انا احمد خوهم الكبير وامبارح وصلت للمستشفى .
مرعي : ياريت باتي شافك يااحمد كان مشتاقلك .😢
احمد : ماهو نا وصلت امبارح وجيت للمستشفى لاني علمت ان باتي فيه .
حور وهي حاضنته : ومن قالك ? 😢
احمد وهو يمسحلها في دموعها : رقمي عند باتي وبعد فاق من الغيبوبه عطاه للدكتور وهو اتصل بيا وجيت علي اول طياره .
وامجد معش تحمل حور في حضن خوها كرها من ذراعها وهمسلها : خلااص سادك تضبيط الناس اتشوفلك قعدو .😠
حور وهي منصدمه فيه.  وشن دخلني في الناس هضا خويا !! 😒
امجد بهمس : بس الناس ماتعرفش انه خوك ..خيرلك راه .😒
حور طرمت شورابها عليه ومسكت في ذراع خوها احمد ومازالت تبكي لانها مشتاقتلا اولا وحبت تقهر امجد ثانيا ..ياخياتي يستاهل 😂
وتعرف احمد علي امجد وطبعا روح امجد ومرعي وحور لان احمد اصر يكمل اجراءات الدفن وبعد روحو خبرو اللي ماتسما وامجد اتصل بمتاع التشاركيه ونصبو الخيمة ومايغباكن في اجواء العزوات بعيد عنكم ..ومرن الايام وحور في حوش باتها وفجريه منهاره .😭.مهما كان سندها وراح وفي يوم حور كانن عندها خوات امجد ونجاة وفي الليل يبن يروحن اتصل بيهن امجد وطلعن الا غزاله اللي تحكي مع حور وبعد طلعت خبطت في واحد بيخش للقوراج بعد شافتلا لقاته مرعي انحرجت عزاته وطلعت تجري وهو مبتسم وكلم حور انه بيروح للجامعه بكره لان امتحاناته قربن وحور شجعاته ووصاته علي روحه وطلب منها مرعي اتجهزله شنطته وفعلا خشت جهزتها له وهي تذكر في باتها وامها وكيف ان الدنيا تظلم فيها وفي خوها.. وماتبي شي الا ان ربي يوفقه وينجح و يشتغل ويتجوز وتتهنا عليه ..
وثاني يوم روح مرعي للداخلي واحمد بيسافر لشغله وحكاله انه متجوز وعنده ولدين وفرحتلا حور واااجد وحضناته وهي تدعيلا ربي ايدوم راحته وهناه وشافت صور اولاده في فونه وتهبببببلت عليهم ووعدها احمد بيجيبهم زياره لها وحتزورهم وقعد يوم وثاني يوم روح ووصا امجد علي حور وامجد في عقله مغير اتروح مانزعلها وتقعد قدام اعيوني بس نشبع بيها 😍
وطبعا فات شهر العزاء وهي المده اللي قعدتها حور في حوش باتها وفجريه تلوي في وجهها عليها وتعزق في الدوة تحساب حور بتشاركها في الفيلا وطبعا حطتها فجريه للبيع وبعد علمت حور سالتها فقالت فجريه : ياحنه هذي فيلتي باتك سجلها بأسمي من زماااان وعندي اوراق يثبتن هالشي ..وانتي كثرتي في قعدتك يالله ياماما مش رديتي علي راجلك هاوينا ياحنه معش بيني وبينك حاجه .
حور بدموع : الله يسامحك ياخالتي ..عليش التجريح والاهانات توا ..انا ماعمري ركزت علي رزق دنيا وحقي وحق خوتي عند الله .😢
فجريه : كلمي راجلك وروحي كثرت دوه مانبيش .. بيني وبينك باتك ومات .😒
واشويه ويرن عليها امجد وردت حور والعبره خانقتها خنق وحكتلا انها بتروح وطبعا عمتكن فجريه معاها هلها امها وخواتها وصبايا خوتها مزروعين في فيلا ابراهيم اللي ضحكت عليه اول ماجابتلا العيل وخلاته يكتبها لها بأسمها وهضا الشي اللي خلاه ديما مكسور قدامها ...المهم روحت حور وقعدت في دارها ديما زعلانه وموجوعه وتكلم في خوتها تطمن عليهم ديما وكل جمعه تعزم في خوها مرعي عالغداء حتى بعد يرفض متحشم مايبي ايكثر عليها وعلي عربها الحاج بدر وامجد ايجيبو فيه بالغصب ويبوه ايحس روحه في حوشه ومايديرش ريبه وطبعا غزاله تفرح بعد مرعي يجيهن وتقعد اتفتلك عاد عالغداء وادير في حفاظه مليانه شي ياما حلويات او موالح ..وحور ركزت عليها وفهمتها بس اسكتت ودعت ربها ان ايصير اللي في بالها ...وعمها بدر حصلها عقد عمل في عياده مش بعيده علي فلتهم وقعدت تمشي يوميا وامجد منقهر وفرحان خالطه عنده وحور تشتغل في الصبح وايشيل فيها امجد وايروح بيها ويوم الخميس يعلم في حور السواقه وهضا الشي الوحيد اللي حور تكون قريبه منه ومركزه علي كلامه وامجد بيطير من الفرحه بس يوراي .😒 المهم حور بدت تتعلم وبدت نفسيتها تتحسن ومرعي دار امتحاناته ونجح وقعد لاهي في مشروع التخرج وعمكن صلاح خطب غدير من عمه ووافق بدر وامجد ساند راي باته وغدير جت بترفض باتها هزبها وقاللها : ولد عمك اولالك من الغريب يابال هضا ولد خوي ومربيه علي يدي ..لا مانسمعهاش منك فاااهمه 😒
وطلع وهي منقهرة تبي صاحبها بس صاحبها فايتها وانجبرت انها توافق وجهزو للخطبه وبم ان صلاح يتيم العيله و منهم وفيهم فجو عماته واقاربهم وحور وغزاله جتتن مزينه في الحوش نفس المزينه اللي زينت غدير اللي لبست فستان ذهبي كت ومن قدام قصير ومن خلف ايكر ورفعت شعرها بتسريحه حلوة وراقيه ومايكب خفيف وغزاله لبست فستان ازرق داكن بلمعه ودارت شعرها فلو ومايكب بناتي خفيف وحور طلعت بفستان احمر داااكن روووعه مقتول عليها وطلقت شعرها اللي دارته فلو االواسع ومايكب خياااال وتعطرت وطلعت بتمشي لدارها واتشوفلكن امجد ..................💖

قراءة ممتعه ..💋