خطوة نحو الجحيم 3 ( باللهجة التونسية)

الحلقة 90

الحلقة 90 :
أوس يحكي :
حليت عينيا ..راسي يوجع عاللخر .. تقعدت في سريري .. تاعب عاللخر ..غزرا للساعة لقيتها ال 21  ...مفقتش كيف رقدت 6 سوايع ... أصلا بسيف مجاني الرقاد .. نحيت المريول .. السخانة برشا .. نزلت للتحت نسمع في صوت ضحكاتهم ..تبسمت
جود؛ ماما ياخي عمو هاذاك ثبيه يبان ثرير
سيرين؛ شكون ؟
جود؛ هذاكا أوث
سيرين؛ لا يا روحي موش شرير هو
جود؛ مالا ثبيه يثوق هكاكا و محكاث معايا ذملة (جملة)
سيرين؛ مقعدش كهو عندو خدمة
جود؛ تي الكبار ديما واحلين فالخدمة نحب نبقا ثغير
سيرين؛ هههههههه
أوس؛ انا شرير
هرب يجري طلع فوق الفوتاي ...تخبا في حضن سيرين ...ضحكت بالوقت ..
سيرين؛ هههههههه جود شبي ولدي
جود؛ خوفني
أوس؛ ايجا هوني
جود؛ هأه
أوس؛ موش انتا راجل و انا نعرف انو الرجال ميخافوش
جبد روحو شوي غزرلي
جود؛ اي بالطبيعة
نزل جا عندي هزيتوا
أوس؛ خايف مني انتا
جود؛ هأه اما نحنا موث  ثحاب على هاذي
أوس؛ ممم توا نوليو صحاب  باهي
جود؛ باهي اما بثرط
أوس؛ هههه فرخ و تشرط زادة شنوة شرطك
جود؛ نحب يكونو عندي كيف هاذو .. مرثومين ياخي نتا كيف عملتهم
أوس؛ هههه العضلات بالسپور و انتا صغرون تو كي تكبر تعملهم
جود؛ كبير راني عامين و ثهر و نحب نكون قاوي باث نحامي على ماما ..و تولي متبكيث كل ليلة
هزيت راسي غزرتلها .. دورت عينيها
سيرين؛ جود هيا ترقد ماما
جود؛ تي ماما اتو وين قعدت مع ثاحبي
سيرين؛ تاعب هو و انتا زادة وقت النوم غدوة تحكي معاه باهي
جود؛ أوكي ماماتي ..
نزل راح حكم يدها ..
جود؛ بونوي ثاحبي
أوس؛ بونوي
سيرين؛ البيتزا متاعك راهي فالميكروويف تصبح بخير
أوس؛ مرسي سيرين بونوي
دوب تبسمتلي حملت جود و طلعت ،، احسن شي انو هديل مدتلها بيت اخرى .. وقفلت بيت اليف ..عالأقل نخمم شباش نعمل ..رحت للكوجينة .. شعلت الميكروويف .. غزرت للبيتزا .. كيف ما نحبها بالفرماج .. و الفطر ... تبسمت ..لتوا متفكرة شنحب و واش نكره ...حطيتها قدامي ناكل و نتبنن ... نوقز تيليفوني بالوقت .. جبدتو من الشورت ...لقيتوا الجنرال ... هزيت
أوس؛ وي
الجنرال؛ فيسع حل البيسي فما فيديو اون لايف لازم تشوفو
أوس؛ باهي
علقت عليه .. حطيت الطرف متاع البيتزا .. و رحت للصالة هزيت البيسي ..حليت الواتس آب ... وصلني بالوقت ... دوب ما حليتوا ... تصدمت ... الييييف
تشطح في سلو ... وصلني ميساج وراها اللي هذاكا أمير المالكي البوس متاع الsanza frontiere و اللي هي من عايلة المالكي و خوها زادة سينيور سراج المالكي .. غزرتلها ياسر فرحانة.. حاطة ظهرها على سدرو ...يديه على يديها ..منسجمة معاه عاللخر ..زاد وصلني ميساج بلي هاذ الحفلة على شرفها ... يعني ملول هذيك موش عايلتها ... كلش صحيح ..حبها خلاني نتعما على الحقيقة ..تي الطفلة شايخة و في حفلة .. وانا نخمم و نعاود فيها ...هزيت البيسي خبطتوا على طول يدي .. هزيت الباكو متاع الدخان و خرجت ...قاعد فالجاردان تكيت على الشجرة نرحي فالدخان ... كلش كذبة ..فالتالي رجعت لحياتها و عايلتها ...وواش من عايلة المالكي ضربة وحدة ...تشطح و تضحك عاملة جوهت ..هزيت يدي خبطتها ..
سيرين؛ أووووس شعملت ياخي !!
هزيت راسي غزرتلها
أوس؛ سيرين برا لبيتك
سيرين؛ محال نخليك هكا تي اغزر ليدك حليتها هيا فيسع أوس لازم نحبسو الدم أمانك
أوس يحكي :
تفكرت اكا المرة وقت جات تصحح الورق متاع الصفقة..كي جرحت يدي و عقمتهالي ... اذاكا اول مرة نضعف قدامها هكاك .. نقمت كثر.. ما حسيت كان بيدين سيلا كي طبست تمسحلي فالدم بالروب متاعها .. حكمتها من كتافها و طلعتها ...غزرتلي الدموع على وجهها ..رميت الڨارو ..هزيت يدي مسحتلها دموعها
أوس؛ يزي من البكا .. يكفي اللي عشت ف جحيم سنين بسبتي ..باز كون مدخلتش لحياتك راك توا عايشة خير ... بربي سامحني سيرين
هزتلي براسها لا نزلوا دموعها كثر ...
سيرين؛ لا متلموش روحك انتا أحلى شي صرا في حياتي ..اذاكا مكتوب كهو..يكفي اللي انتا تعيش فرحان اذاكا المفيد
أوس؛ انتي اللي خسرت كلشي فينا .. الجحيمةحاوطك كان انتي ..
قدمتها  عندي نمسح في دموعها ...غزرتلي عينيها حمر دم .. فالتالي لقيتها كان هي ..
أوس؛ سامحني
مخليتهاش ترد غطست فشفافها .. بين عينيا منظرها و هي في حملتوا تشطح و تضحك ... وهو زادة ...اليف المالكي .. اللي نجمت تخربلنا حياتنا و تترجع تحتفل عادي بانتسابها لعايلة المالكي .. فالتالي عرفت روحي بلي رميت سيرين للجحيم ... و أنا زادة عملت خطوة ليه
⏩⏩⏩⏩⏩⏩⏩⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم