خطوة نحو الجحيم 3 ( باللهجة التونسية)

الحلقة 95

الحلقة 95 :
اليف تحكي :
قمت كيف العادة خلاقي دايرة .. مفهمتش شبيني ليام هاذي الكل ..غسلت وجهي .. و نزلت خذيت كاس متاع جي .. و خرجت للجاردان .. امير مفماش تي ماو هبلتوا البارح بالحوت ..لين كليتوا .. تكيت للتالي نغزر للسما .. برشا حوايج صراو في شهور كهو ..زعما هو فرحان توا .. رشفت من الكاس متاع الجي.. شبيني كل مرة نرجع نخمم فيه ..تعدا نهار عادي .. أصلا جبتو غير ماكلة و رقاد .. فطنت على 19 ..راسي يوجع علخر تي ماو رقدت العشية و كثرت ..تقعدت غزرت لساشي عند رجليا .. جبدتها لعندي ...حليتها طرت من الفرحة.. تشكيلة متاع الشوكولا اللي نحبها ..nutella ... Lindt ... Milka...zara ...  Fererro rocher .. بالأذواق اللي نحب زادة .. حليتهم الكل .. كل مرة ناكل من وحدة ...تبلبزت بكلي .. اما goût موش نورمال بنان علخر .. هزيت راسي وقت ريتوا متكي عالحرف متاع الباب يغزرلي ..
سراج؛ هاك بلبزت روحك كيف الصغار
اليف؛ انتا اللي جبتهم
سراج؛ اممم في بالك حد خلاف
اليف؛ ههه أمير
سراج؛ ههه موش هو اللي يدللك كهو معنديش منك عشرة راو
اليف؛ عيشو خويا انا حببك
سراج؛ انا زادة اما واش نقولك عشا متاع اليوم غير متراطيهش
اليف؛ ههه فما حاجة سبيسيال
سراج؛ اممم التقليدي يا روحي متوحشتوش
اليف؛ تي متقوليش كسكسي و شخشوخة نموت راني
سراج؛ اممم فما زادة طواجن
نطرت من بلاصتها تنقز ...سنين تعداو .. اما لتوا مزالت اليف الصغرونة ... اللي تحب المفآجآت ..
اليف؛ هيا ننزلوا
سراج؛ هههه برا اغسل حالتك سع
اليف؛ ههه باهي تو نلحقك
سراج؛ أوكي
خرج عديت لساني على شفافي .. مزلت نحب ناكل منها ،.. اما توحشت الماكلة متاع الدار .. رحت لبيت البانو غسلت يديا و وجهي ... بدلت دبشي لبست روب خفيفة متاع دار ... شعري لميتوا طوماطيشة و نزلت .. دوب ما دخلت للكوجينة..قابلتني ماريا ..هزتني و حطتني ... سراج زادة ...قاعد أمير مفماش ...قعدت بدات تحطلنا البون الماكلة ... ناكل ساعة على ساعة ..نفدلك أنا وسراج ..لين كملت ...طلعت لبيتي ..نرتاح خاطر ...بقات طان الطابلة و السحون ما كليتهمش ...شهيتي مفتوحة موش نورمال..سيرتو ليام هاذي... هزيت تيليفوني حطيت غناية .. متاع Felices los 4 .. باقي ندندن و نغني معاها .. مجانيش الرقاد ..خاطر رقدت العشية ...ما خليت شي ما عملتوا .. لعبت كلشي ..دخلت لليوتيوب ..باقي نتفرج فيلم متاع رعب .. و يا ريت معملتهاش .. جمدت في بلاصتي .. باقي غير نغزر قدامي .. و اكاكا و مزلت نتفرج و ناكل فالشكلاط..اللي بقا ..دوب ما كمل الفيلم...رحت للتوالات ...مع خرجت تخبطت فيه .. عيطت فرد وقت حط يديه على فمي ...باش نحبس لعياط ..مبعد جبد روحو ..غزرتلوا ..
اليف؛ فجعتني يا هم
أمير؛ ههه كنت باش نطبطب نطمن عليك و نروح نرقد .. شكون باش يجيك
اليف؛ للشبح متاع الفيلم
أمير؛ هههه تقوليش تفرجت فيلم متاع خوف و توا ... على هذا خايفة ههههه
اليف؛ يزي من الضحك ..جيت تعمل عليا جو ..
أمير؛ شبيك مبلبزة هكا
اليف؛ كنت ناكل فالشكلاط
أمير؛ شمن شعور عندك انتي خايفة و تاكل
اليف؛ اذاكا من التوتر اصلا بنينة برشا
غزرتلها كيف تحكي بيديها ..شفافها مبلبزين بالشكلاط .. للحظة بداو يدورو في بالي ...أفكار منحرفة ..جبدت روحي للتالي تعدات قدامي ..تحكيلي فالحكاية متاع الفيلم ..
أمير؛ باهي اليف ارقد توا
جيت نتعدا خبطتني على كتفي .. رجعتني للتالي ..غزرتلها
اليف؛ سخطة من قبيل نحكيلك باش تحس تقوم تقولي ارقد .. كان نجمت نرقد كون منتفرجش اكا الفيلم اصلا ..واش داني نرقد فالنهار
أمير؛ هههه باش تتربا من طبايعك العجيبة هاذي ..
اليف؛ بربي خسرت عليا هاذي
أمير؛ هههه ايجا
حكمت يدها .. قعدت على طرف السرير ... و هي طلعت .. خليتها شوي لميت .. لي بوات و الساشيات متاع الشكلاط .. تبسمت رجعت قعدت ..حطت راسها فوق حجري ..باقي نعدي في يدي على شعرها
اليف؛ وينك نهار الكل مبنتش
أمير؛ واحل مع الخدمة ...
اليف؛ اممم باهي ..تعرف شنية في بالي توا
أمير؛ تقوليش تحب تاكل كاش حاجة .. وراسك غير تاعب علخر
اليف؛ ههههه لا اطمن في بالي نعدي  يدي على التاج اذاكا
أمير؛ اللي في رقبتي
اليف؛ اممم
أمير؛ هههه باهي يا لالة
تقعدت قربت مني شوي ..حطت يدها على رقبتي تكهربت .. تي بسيف ماني حاكم روحي ..زادت عليا ..هزيت عينيا غزرتلها ..كيف تغزر للوشم ..نزلت لشفافها..غمضت عينيا ..كون نزيد دقيقة ..نغلط فاها ..
أمير؛ اليف نروح نرقد تاعب علخر
اليف؛ باهي محلاه التاتو متاعك ميجيش ندير كيفو
وقفت تبسمتلها ..
أمير؛ هههه ميجيش ريض
اليف؛ ههه بونوي
أمير؛ بونوي
⏩⏩⏩⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم