خطوة نحو الجحيم 3 ( باللهجة التونسية)

الحلقة 99

الحلقة 99 :
الين؛ أميييير جيت ياخي
أمير؛ اممم صافا
سلمت عليه ...
الين؛ مليحة عيشك و انتا
أمير؛ حمد الله
الين؛ شمجيبك توا موش من عوايدك تجي فهاذ الوقت
أمير؛ جبتلك مفآجأة
الين؛ بالرسمي شنوة هي
هزيت راسي وقت ريتها دخلت ...تصدمت ...باقية نغزر لأمير و نغزرلها .. قدمت شوي .. وليت بخطوة للتالي .. نزلت راسها تبسمت و غزرتلي ...
اليف؛ شبيك متحبش تسلم على ختك في بالي توحشتيني
الين؛ اختتتتي !!
تلفتت غزرت لأمير ..تسال فيه بعينيها .. هزلها براسو ايه ...غزرتلي ..قدمت عندها عنقتها ...احساس ندرا كيف ...حسيت قطعة مني رجعت ... اول مرة نحس هكا ... تي كانوا فراغ رجع تلم .. لفت يديها عليا ..كبشت فيها كثر .. دموعي نزلوا
الين؛ عايشة انتي اختي موش هكا ...
غمضت عينيا ... و هزيتلها براسي باهي من غير ما نبعد ..هزيت راسي وقت جا أمير و قابلني ... تبسمتلوا ... لاح يدو مسح دموعي ... تبسم .. لحظات و جبدت روحي حطيت يديا على وجهها .. تاعبة علخر ... تغزرلي كانها موش مصدقة .. عديت يدي على وجهها ... نسخة مني موش نورمال .. تبسمت ... يمكن الحياة عوضتني باختي ... السنين هاذي الكل ... تغزرلي مزهبلة
اليف؛ موش مصدقة
الين؛ اممم ي ي يعني عايشة تي حوسنا عليك لين يأست تكوني حية و و توا واقفة قدامي ت ت تبانلي حلمة باش نصحا منها
اليف؛ لا يا روحي الحقيقة هاذي ،.. هاي الدنيا جمعتنا من جديد و موش باش تفرقنا ..
الين؛ تييييي
نطرت ليا عنقتني بقوة .. ضحكت .. أمير واقف يغزرلنا كهو
الين؛ وين كنت المدة هاذي الكل و وو علاش مرجعتش .ووكيف كنت عايشة درت اخت خلاف من غيري
اليف؛ ههههه بلعقل عليا جيت من سفرة توا خاطرك
بعدت شوي و غزرت لامير
الين؛ انتا اللي لقيتها
أمير؛ اممم انا و سراج
نطرت ليه تضرب فيه على سدروا
الين؛ هااامل علاش مخبرتنيش حتى بتيليفون سخطة الا ما نوريك
أمير؛ هههههه يزي اركح
اليف؛ هههه الين اللي يهم توا انوا احنا مجتمعين باهي باش نعوضوا اللي فاتنا بالأحسن
الين؛ اممم ايجا فما برشا حوايج كنت نخمم نحكيهملك
جبدتني من يدي قعدنا فوق السرير ..
أمير؛ صار طلعت برا الحساب انا توا
اليف؛ ههههه أمير حكايات بنات راهو
أمير؛ باااااهي بنات قلتلي هاني لتحت احكيو حكايات البنات تي جامي تفهم النسا عندهم 24 سنة متلقاوش فيسع طلعوا حكايات
الين؛ ههههههههه
خرج ... هزيت راسي غزرتلها
الين؛ امير حكالك موش هكا
اليف؛ اممم شوي اما نحب تحكيلي اختي ... لازم نعرف كلش
الين؛ باهي و انتي زادة
اليف؛ أوكي
بدات تحكيلي ... كل تفصيل صرالها حكاتوا ...تحكي و تعاود ترجع تحكملي يدي .... كأنها تتاكد الللي انا قدامها و راني نسمع فيها ... تكينا للتالي .. كملت تحكي على كلشي كيف حبت سام ... و عشيرتها وكلشي حكاهولي أمير... رغم اللي تعدا عليها اما الين .... مزالها كيف الطفلة الصغيرة في تصرفاتها .. في كلشي ... طانوا برائتها تخطفت منها وقت عملت اكا الشي و عاودت ولات .. غاصت عينها و رقدت ... عديت يدي على شعرها ..
اليف؛ بونوي يا روحي
هزيت الغطا حطيتوا عليها ... تفكرت أمير .. نزلت لقيتوا فالصالة يتكيف ... قدمت قعدت قدامو ... طفا الدخان و حطوا ...ريحتوا بنينة علخر و مخلطة بالبارفان متاع أمير ... تشهيتوا علخر ...
أمير؛ رقدت هكا ؟
اليف؛ امممم
أمير؛ وانتي علاش مرقدتش
اليف؛ أمير تعرف اللي نحبك ياخي
أمير؛ من التالي شنية تحب ديناصور
اليف؛ هههههه ماسط لا
أمير؛ ههه مالا
اليف؛ ڨارو كيف متاعك هذا نحب نشم ريحتوا بنينة علخر
أمير؛ شنننوة هبلت !! لا اليف محال
اليف؛ امااان أمير
أمير؛ اليف لا باش يضرك
اليف؛ كي هكا علاش تتكيف فيه انتا تحب تنظر ...
هزيت راسي غزرتلها كيف تڨحرلي ...
اليف؛ ففف باهي
جيت باش نوقف جبدني من يدي ... جيت قاعدة .. غزرتلوا .. طلقني و تلفت شعل ڨارو تكيفوا ... اما ريحتو مبدلة .. قدمت فكيتو من يدو
أمير؛ اليييف
اليف؛ تي اركح باش نطفيه راني ريحتوا خايبة
أمير؛ شنوووة شكون كان يحب عليه ..
ضربت في خشمي الريحة تي من البارفان متاعو اللي مخلطة بريحة الدخان ..غزرتلوا و ضحكت ....ضيق عينيه ... قدمت لين معادش فما مسافة بيناتنا و عنقتوا ...
أمير؛ اليف صافا ماو !!!
اليف؛ اممم عجبتني ريحتك محلاها
أمير؛ باهي تو نمدلك تحط منها
اليف؛ هأه عجبتني مع الدخان بنينة موش نورمال ..
سكت ... شوية و طلعت راسي ... نزل راسو غزرلي ..باقية نغزرلوا ... مزيان برشا أول مرة نثبت فيه هكا.. حطيت يدي على لحيتوا نعدي فيها ...منعرش علاش نتصرف هكا...باقي يغزرلي و كهو.. نزلت يدي حطيتها على قلبوا ...
اليف؛ مرسي أمير
أمير؛ على شنوة
اليف؛ على كل مرة نطلب منك شي و تعملوا و حتى اللي منطلبوش ..
طلعت راسي بستوا على خدو بوسة مرصوصة ... و جبدت روحي .. تبسمتلوا و طلعت نرقد طنب الين ⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم