خطوة نحو الجحيم 3 ( باللهجة التونسية)

الحلقة 93

الحلقة 93 :
أمير؛ ابكي اليف ...موش باش نقولك حبس البكا ..ابكي متهربش للدوا ...فرغ وجيعتك ..احكي  زادة هكا ترتاح ..
اليف؛ تاعبة من كلشي أمير حبيتوا منعرش كيفاه اما في فترة قصيرة والفتوا لين منجمتش نعيش بلا بيه دقيقة .. فالتالي رجع لخطيبتوا و عايش معاها علاش انا يصرالي هكا .. اللي نحبوا يخليني أولها حبيتك و خليتني و زادة أوس..رجعلها كات يقولي اللي هو ينتقملها كهو
جبدت روحها تكات عالحيط ،.تمسح في دموعها وتحكي ..
اليف؛ فلخر طلعت خاسرة كلشي ... كيم هديل ..كرهوني خاطرني من عايلة المالكي .. في بالهم لعبت عليهم.. شنوة ذنبي .. موش غايضتني منهم قد ما غايضتني من أوس ..تي ماو يعرفني .. وصلت نحي كليتي على جالوا فلخر .. يطلع هكا .. علاش يكرهني أنا اه .. تسما كان يلعب عليا ... عمرو ما حبني فالتالي عدا معايا وقت كيف أي **** و طيشني ..
هزت يدها تمسح فالدموع .. غزرتلها وجعني قلبي عليها ...
اليف؛ كنت ديما نقول اللي انا معنديش الزهر اما توا تاكدت .. سيرين هي اللي طلعت محظوظة من هاد الشي الكل .. خاطرها غابت عليه 3 سنين و فالتالي مزالوا يحبها ... و رجعلها حتى و هي مغتصبة و بولد .. و انا للي سلمت في روحي ليه طيشني علا جالها ... ناقمة عليه برشا .. نحب نقتلوا و نتهنا ...
سكتت شوي و مبعد غزرت للبعيد .،
اليف؛ اما تعرف منجمش نعملها خاطرني ضعيفة قداموا ... خاطر كل مرة يكون قدامي ... نغرق فيه كثر .. في كل شي فيه ،،،كل تفصيلة فيه خلاتني نعشقوا .. نضحي باي شي .. جيست باش يكون هو فرحان .. و اذاكا اللي موجعني توا ...
قعدت فلرض قدمت قعدت قدامها .. تكات راسها عالحيط ..
اليف؛ من عام علمتني كيف نتعلم نحب روحي و نتقبلها اما معلمتنيش انوا لازم نحب روحي كهو خاطر واحد ما يستاهل ... كلهم أنانيين ...
تلفتت غزرتلي
اليف؛ علاش ما علمتنيش ما ناثقش فالحب خاطروا أكثر مجازفة يمكن نعملها في حياتي ...
أمير؛ الحب ميشاوركش وقت يجي .. مفماش هوني باب باش تقفل في وجهو ..
اليف؛ ههه فالتالي اليف المالكي خسرت اكبر صفقة في حياتها شرفها حب حياتها
أمير؛ اششش اسكت 
اليف؛ ههه الحقيقة أمير  هاذي اللي لازم نفهم روحي بيها توا .. صعيبة وقت ما يبدا عندك حتى شي تعيش على جالوا ... عايش خاطرك عايش كهو ..
أمير؛ ديما كاين سبب باز نعرفوه باز لا .. اما فما حكمة من معيشتنا ...
اليف؛ علا واش عايش انتا ؟
أمير؛ يجي النهار و تعرف
اليف؛  زعما انتا حبيت .. تنجم تحس واش راني نحس توا ..
أمير؛ باز وجيعتي كثر منك
اليف؛ هه لا مفماش كيف وجيعتي ..
أمير؛ كل حد باش يشوف روحو متوجع كثر على الثاني ..
اليف؛ حكاياتنا  محيرة عاللخر .. خاطر كل مرة باش يطلع شي جديد يقلب الموازين .. و حقيقة يمكن تغير كلشي .. 
أمير؛ اي الحقائق توجع اما تريح ،، خاطر يبانلك كلشي قداك عينك و الوهم اللي كنت عايشة فيه يتبدد .. تتألم و تدمر فلول اما مع الوقت تولي واعية .. كثر و تنجم تتصرف بعقلانية كثر.،،لين توصل لمرحلة يولي الشي اللي يوجعك تتقبلوا تبكي و مبعد تتجاوزو.. وقت توصل لأكا المرحلة ... تتأكد انو انتي مبقيتيش اكا الطفلة الصغرونة في مخها اللي تجري للدوا .. و للموت باش تتعدا الشي اللي يصرالها ...
تلفتت غزرتلوا ... اللي يقول فيه صحيح حياتي الكل نجري ورا حلول واهية.. مؤقتة.. جامي لا وقفت نواجه فيها .. على هذاكا اللي انا هوني مدمرة و نبكي .. هزيت يدي مسحت دموعي .. من كل الحكاية اللي صراتلي مع أوس تعلمت شي واحد .. انو كان شخصية آنجل اللي تخرج عليا .. المرا القوية اللي حد ما ينجم يأثر فيها بالساهل .. و موش أي شي يبكيها ... اللي تحبوا توصل عليه .. و اللي طيشوا محال تولي ليه ..تركزت على يديا و قمت .. غزرتلوا .. باقي يغزرلي يستنا في ردة فعلي .. رميتلوا يدي باش يقوم .. حكم فيا و قام .. قدمت ليه طلعت على طراطش صوابعي ... بستوا في جبهتوا .. و جبدت روحي .. حل عينيه غزرلي
اليف؛ نعزك برشا أمير يمكن كان موش انتا توا راني منجمتش نوقف تي باز راني ميتة .. اما بعد عام هاك وليت و قويتني .. اللي عملتوا اليوم موش باش ننساه جملة مرسي عزيزي
أمير؛ هاذي اليف اللي حابك تكون عليها و متشكرنيش خاطرني حكيت كهو انتي اللي عملت
اليف؛ اممم اليف بعقلية آينجل
أمير؛ يعني ؟
اليف؛ ههه انسا ميجيش تكمل معروفك  و تديني ناكل حوت مشوي
أمير؛ ههههه باش تجلطني بطلباتك متاع الليل هاذي موش قبيل تعشيت فالحفلة
اليف؛ منجمتش ناكل على راحتي ،.. كل ما نجي ناكل يجي صحفي يصور .. أصلا مكانش فما حوت هونيك
أمير؛ هههه هيا فما واحد الحوت عندو ما يتشبعش مزية ما يقفلش حتى للربعة كانت تترصالي نصيد في نص الليالي
اليف؛ هههههه عيشو اللي يدللني انا ..
⏩⏩⏩⏩⏩⏩⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم