خطوة نحو الجحيم 3 ( باللهجة التونسية)

الحلقة 103

الحلقة 103 :
خذيت المفاتح من عند واحد من الرجال .،، تلفتت غزرت لأمير . طمني بعينيه .. ركبت الكرهبة ... خدمتها و الديراكسيون الفيلا متاعو .. لحظات كهو تفصلني عليه ... احساس تملكني منجمتش نفهموا تعدا برشا وقت ... اماا الشي اللي منجمش نكذب على روحي ... اني مزلت نحبوا ...توا نحب عليه أكثر .. يمكن لوحم و يمكن ولدوا يحب عليه ... الشي اللي مواسيني انو باش نشوفوا الفترة هاذي... عالاقل نصبر روحي ... متوقعة كلشي ...اصلا انا أكثر وحدة ... يمكن يصير معاها أي شي ...وصلت للفيلا ... غزرتلها... كلشي بدا من هوني كل خطوة عملتها كانت بدايتها هنا ... جيت باش ندخل ريت كرهبة هديل خارجة ... هزت راسها غزرتلي ... متوقعتش نراها ... اصلا معنديش خلاق باش نواجه حتى حد... ريت معاها طفل صغير ... نزلت من كرهبتها ... فهمتها نزلت زادة .. قدمت بخطوات لعندي ... غزرتلها ...طبقت يديها
هديل؛ علاه جيت اليف شمزال معملتوش !
اليف؛ نحب نحكي مع أوس
هديل؛ هههه بربي اليف جاية توا تحب تحكي معاه ..
اليف؛ هديل موش ناقصة جملة
هديل؛ علاش اليف عملت فيها اكاكا ماك طفلة  و تنجم تحس بيها .. و أوس ماو حبك لتوا موش منجمة نصدق
اليف؛ فما حوايج لازم يبقاو بلا تفسير ... على اذاكا رغم معزتك موش باش نفسرلك أي شي ...باز يجي نهار و تفهمني
هديل؛ كيف ما تحب اصلا فات الفوت على تفسيراتك كلش ولا لبلاصتوا توا ...
اليف؛ شتقصد ؟
هديل؛ تعرف بلي أوس و سيرين ليوم عرسهم ... اغزر هوكا ولدها خسر دبشوا فالعرس ...جيت نبدلهولوا و نرجع ...
رجعت بخطوة للتالي مهما توقعت .... مجاش في بالي يعرس بيها ... حطيت يدي على كرشي ... ناخوا فالقوة من عند ولدي .. رمشت بقوة نحكم في دموعي ... بلعت ريقي ...و غزرتلها
هديل؛ موجوعة موش هكا
قدمت عندها بخطوات .. حسيت بيها كي تصدمت ... توا متاكدة بلي خاطيها اكا الشي ... رغم كل الدلائل اللي تثبت عليها .. حطت يديا على كتافها .. نزلت راسها ... و نزلت دمعة منها ... عنقتها ...لفت يديها عليا و باقي تبكي
هديل؛ موجوعة اليف اما كان لازم تعرف ... متأكدة موش انتي اللي عملت هاذ الشي حتى و لو ريت الف دليل ..
جبدت روحي شوي ... غزرتلها ..
هديل؛ خبر أوس بالصح ...مزال يحبك وراس عزيزتي مزال تزوجها تعويض و كهو
اليف؛ كان جا ميحبهاش ميتزوجش بيها هديل.... اوس و نعرفوا
جود: طاطا هيا تو يخلث العرث و منثطحث ( منشطحش) ثكونها هاذي المذيانة ؟
حطيت يدي على شعرو محلاه .. تبسمتلوا و هزيت راسي غزرتلها ..
هديل؛ اركب جود تو نجي
جود؛ باهي
هديل؛ العرس فالآثار القديمة متاع *********
اليف؛ علاش تخبرني هديل وفا كلش توا
هديل؛ باز تعمل الصح .. و تجي تخبروا حتى لو كتبوا صداقهم اما القدر متقلب اليف
حطت يدها على كتفي تواسي فيا ...دوب تبسمتلها ..ركبت كرهبتها و راحت ..هزيت يدي حطيتها على فمي نحاول نكتم شهقاتي .. وجيعة موش نورمال ... اللي تحبيه عرس بوحدة اخرى ... و انا كي الدغفة جاية نخبروا اللي انا حامل واش يفيد توا .. تكيت عالكرهبة وقت حسيت بالدوخة .. حتى ولدي متوجع كيفي .. لفيت راسي نغزر للفيلا .. مشيت بخطوات متثاقلين ليها .. العساسين ما حكاو شي أصلا منظنش في بالهم باللي صرا ... حلت البون الباب ...تعديتها غزرت للصالة ...الكوجينة وقت كان يسيب بلادتو عليا ..
البون؛ مدموزال صافا علاش تبكي ؟؟
غزرتلها  منجمتش حتى نحكي ...طلعت لفوق لبيتوا ...دوب ماحليت الباب قلبي خبط ... هوني بالذات ...كان كلشي ..زعما سيرين رقدت هوني .. زعما عاملها كيما انا .. قعدت على حرف السرير ...قابلني مريولو لبيض ...مطيش عالسرير...رميت يدي هزيتوا ...قدمتوا لخشمي ...ريحتوا ...قلبي ولا يخبط عاللخر ..بعدتوا نمسح في دموعي .. كان فما امل ... اما توا تأكدت اللي أنا خسرت أوس للخر .. وقفت عديت عينيا عالبيت .. غزرت للكوافوز لدبوزة الپارفان متاعوا ..هزيتها عبيت المريول بيها .. يمكن هاذي آخر ذكرى ..ننجم ناخوها ..خرجت من الفيلا ... منحبش نروح خاسرة ...رحت لمقر الحفلة...وصلت فما برشا عباد  يشطحو منجمتش نلقاه ... اصلا منحب حتى حد يشوفني .. حسيت بيد تحطت عليا ..تلفتت لقيتها هديل شارتلي اللي هو هونيك .. مشيت بخطوات قلبي باش يحبس .. غزرتلوا كيف عاطي بالظهر ..قدام الپيانو يغني ... اول مرة نعرف اللي صوتو مليح .. توا ولا متزوج ...دوب ما حبس ..قدمت عندو و باقية نصفق ..جيت واقفة قدام البيانو ..غزرلي متفآجأ اليف؛ ألف مبروك زواجك أوس بن مالك
⏩⏩⏩⏩⏩⏩⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم