خلايا الحب

3

قلت ليها طووووالي انتي تطلبي عيوني ، قالت لي ليهو يومين بحنس فيني عايز يلاقيني وانا رافضه بس بالجد مشتاقه اشوفو واقعد معاهو ، اهااااا
قالت لي تجي معاي اقابله ، قلت ليها انااااا!!
قالت لي ايوة ، قلت ليها بري بري بري
اخس عليكي يا ريان انا لي سنين بنتظرك لمن تمشي لمحمد بتاعك دا اسي لمن جا دوري ترفضي ، حسيت بالذنب فعلااا كلامها صح
خلاص يا نازك انتي مش قلتي معانا في الجامعه خلي ينتطرك في البينشات جمب الكافتيريا ، قالت لي انتي عويرة ، لا طبعا الجامعه كلها بتعرفني لالالا ما بقدر ، قلت ليها خلاص برا دي مستحيله لو محمد ولا خالد شافوني دي فيها كسر رقبه انتي بتهظري ولا شنو ؟ قالت لي اليوري خالد ومحمد شنو ما تصعبيها عليكي الله ، وحنمشي في مكان عام ، قلت ليها نص ساعه يا نازك زياده عن نص ساعه انا حجرك ونمشي وما تلوميني ، قالت لي وووووب منك يا ريان جبانه ياخ
هوي لا جبانه لا شي بس الخوفه من الله وبس كلمي انه يجي بعد ساعه في حديقه الازهري ، قالت لي كمان حددتي؟
ايوة حددتا مكان مضمون وعام و فيهو اسر قالت لي طيب ، اتصلت عليهو و وافق و بعدها بنص ساعه انحنا اتحركنا و من ضمن الايام اليوم دا انتهينا من محاضراتنا بدري ،
مشينا ولقيناهو قاعد ومعاهو صحبوو ، قلت ليها وينو الزول دا ؟
قالت لي داك ليهو معاهو صحبو ، قلت ليها جاري صحبو معاهو مالو بخاف يجي براهو ، شوفي انا بنتظرك هنا ، قالت لي والله ما تنتظري هنا بطلي مساخه كيف تقيفي هنا براكي ، قلت ليها نازك شوفي اولاً م عندي قروش اقعد في تربيزة واطلب حاجه ، تانياً انتي حتقعدي مع الزول دا و صحبو دا انا اتبالا بيهو ، وانتي عارفه الكلام دا م حينفع معاي ، في اللحظة دي هو شافنا و جا علينا قلت ليها امشي قبل يصل علينا واتحرج ، قالت لي ابييييييييت والله شميتا في اللحظة دي ، جا و مد يدو سلم عليها و سلم علي اتخيلو بس عصر علي يدي شديييييد وطول في السلام و عينو دي بكل بجاحه جوة عيوني ، الا سحبت يدي واتوترت شديد و من اللحظة دي عرفتو انسان وسخ ..
قالينا ارح نقعد انا خلاص شيطاني مرق وندمت اني سلمت و جيت اساساً ، المهم مشيت معاهم صحبو سلم مديت يدي بالطرف وسحبتها خفتا العملو داك يتكرر لي تاني مع دااا ، في اللحظة دي اتصل علي محمد قال لي وين انتي ؟ قلت ليهو في مشوار مع نازك ، قال لي طيب مالك ما كلمتيني قبل تمشي ، قلت ليهو لمن ارجع بفهمك ، قال لي طيب انتبهي علي نفسك ، قلت ليهو حاضر وانت كمان ، وقفلنا ، و الولد دا عينو ما نزلت من علي لا هو لا صحبو ، بس بقيت قاعده مدنقرة وبهبش في التلفون وبعاين للزمن بس دايرة امشي و في نفس الوقت لو اتكلمت خايفه ازعج نازك ، طبعا الشي البديهي الحيحصل انه الجركانه الجايبه معاهو دا يتظارف و يخافف في دمو و انا قاعده ومتوقعه اي مبادرة ، بس طول الوقت زول نازك دا بعاين لدرجة خفت نازك تحس فكان لازم اتصرف ، قلت لي نازك بي هزار عشان م تتحسس ، فضل عشر دقايق انا حقوم اتصل علي امي اطمنا تكون قلقت و بنتظرك قدام ما تتاخري علي ، عليك الله
وانتي عارفه برنامج خالد اخوي ، قالت لي سمح .. و قمت مشيت بقيت واقفه منتظراها بعد لحظات سمعت صوت من وراي اتلفتا لقيتو صاحب مالك ( زول نازك) ، قال لي للدرجة دي ما حابه القعده معانا ؟
قلت ليهو م بتفرق معاي بس عشان خاطر عين تكرم مية عين ، قالي كيف يعني ؟ قلت ليهو انا جايه هنا لسبب والسبب نازك انما الجو دا ما لي فيهو عن ازنك ، زحيت خطوتين منه وعملت مسكول لنازك قفلت فيني ، طبعا دا واقف يعاين وانا كرهتي زول يبحلق فيني كدا ، جاني تاني قال لي انتي مالك عصبيه كدا ؟ عاينت ليهو ونفختا بالجد م طايقه اشوفو قدامي ، قال لي لا ومفتريه بس الصراحه بي حقك ما لاقيت وحدة جميله كدا وزياده علي كدا ثقتك في نفسك ، قلت ليهو هييي هييي اقيف قبلك انت قايل نفسك منو عشان تقيمني و ما تتكلم معاي انا ما بعرفك عشان تتكلم معاي ، طبعا ردة فعل غريبه وبالجد اول مرة انا الاقي اولاد كدااا محند دا اول واخر ولد انا عرغتو واكتفيت بيهو وبعدو خالد اخوي وابوي ديل الرجال الدخلو حياتي ،
قال لي طيب براحه حتطقي ، عايزة ارد شفت نازك والزول دا معاها ، طوالي سكت عشان م اسبب ليها اخراج واقفه وبضرب برجلي الارض (حركة توتر)
(بقلم / سحر سمير ) .. جا و طوالي انا اتقدمتا عشان م يعاين لي ولا انه نازك تلاحظ لحاجه ، المهم جات لاحقاني اتلفت لقيتهم لسه واقفين و بيتوسوسو قلت ليها ديل مالهم لسه ما واقفين قالت لي والله يا ريان لكن عملتيها معاي واضحه المهم يا ستي دايرين يوصلونا رايك شنووو ؟
قلت ليها بصوت عالي انتي طاير ليكي ولا شنو لا انا لا انتي ما حتركبي وكفاييه كدا جريتا و ماشه ، قالت لي ريان انتي بتعملي كدا ليه من قبيل انا قاعده و ما مركزة مع مالك محرجة من تصرفاتك الطفوليه دي ، قلت ليها نازك لو سمحتي انحنا بنات و الشي الحاصل دا غلط وانا بتعامل معاكي زي ما بتعامل مع نفسي لو انتي عينك ضيقه و ما قادرة تشوفي حولك فانا شايفه بوضوح وانا عيونك في اللحظات دي ،
بس وقفت في نص الشارع وجرت يدها من يدي و بقت تكورك فيني ، انتي طبعا ما بيهمك استصغرتيني قدام انسان انا ماصدقتا لقيتو انتي ما حيفرق معاكي احساسي يا ريان لانو انتي عندك محمد و ما بيهمك انا حاسه بشنو اتعاملتي بعقل زياده عن اللزوم كل البنات بتحب و بتقابل و بتطلع و بتمرق اشمعنى انا ، ليه انتي كداا عايشه عمر اكبر من عمرك و قافله حياتك دي كلعا علي محمد وبس ، انتي كلها كم شهر حتتخرجي و تبقي دكتورة و تأسسي حياتك
لكن تقدري توريني محمد دا حيعرسك بشنو ؟ بي قدرة الفول الواقف يبيع فيها دي ما بتدخل 30 جنيه في اليوم ، وانتي زوله متعلمة وهو شهاده ما عنده .... قاطعتها

استككانه🏃💙~

يتبع .......