خلايا الحب

10

يا امي وترتيني مالهم يعني اسرة ليها احتراما وجيرانا من سنين ما سمعنا عنهم كلمة شينة ، و بعدين اساساً البت دي ما بتشبهني و انا لسه مشوااااري طويل يا امي ، بت جامعيه و ملها شهرين و تبقي دكتورة و صفها ملان تب انا ووووين وهي وين يا يمة ، اي نعم وضعهم زي وضعنا لكن برضو النفوس والناس ما بتريح ، كدي اقيف قبلك ماتطربق ساي اقولك شاي يا محمد لو كان معاك مال قارون بتعرفو يلا بس مالك قارون دا كان معاك ما بتعرس البت دي اها وقع ليك ؟
يا امي بغض النظر عن وضعنا بس داير اعرف قصتك شنو مع ناس عبدالدايم و بتها مالها ؟ شوف يا محمد ما تسالني لا مالهم لا بتاع انا العندي قلتو ، داير تسافر وتتغرب عشان اخواتك ديل كان بها ، داير تتغرب عشان بت الناس ديك ما تتعب روحك ساي و انساها لي غديل وشيلا من بالك من غير ليه ، قوم علي حيلك خلينا ناكلنا لقمة ،
طبعاً محمد كان مخلوع من ردة فعل امو كانت هجوميه و عدائيه بصورة ما عاديه بس ما خلت ليهو مجال انه يسأل و لا يعرف حاجه ...
(اما في جانب نازك )
بتتكلم تلفون مع مالك و النقاش الدار كالأتي :
*مالك انا العندي قلتو بخصوص الموضوع دا
_ عارفه حتفضلي طول عمرك شخصيتك ضعيفه اسي دا الربنا قدرك عليهو هه اتصلتي بيها بكل سخافه زي الشافعه ، انا بحكي ليكي انتي في داعي تتصلي بيها و تكلميه .
* انا بعد الكلام القلتو لي والله ما قدرت امسك نفسي يا مالك و اتعصبتا شديد ..
- طيب يا عيون مالك ما ناويه تحني و تجيني ولا صحبتك اثرت علي عقلك
* صحبتي انتهت بالنسبه لي بس كمان يا مالك العملتو معاي ما صح ولا كان اتفاقنا
- طيب تعالي واوعدك ما اعمل شي يضايقك
*خلاص نتلاقي في مكان عام
- اووووف تاني حترجعي تقولي لي مكان عام وزفت اناي لمن ما غندك ثقه فيني مرتبطه بي مالك و تاعبه لي قلبي معاكي و ثم تانياً انتي كلك علي بعضك بالنسبه لي حاجه خاصه و ومستحيل اقعد معاكي في مكان عام انا خصوصياتي ما بتكلم فيها ، ف مكان عام ، يلا زاتو تصبحي علي خير ، لمن تعرفي تثقي فيني بعدين بتعرفي سكتي ، سلااام
* مالك لالا انتطر لحظة براحه في شنو اسي هجت فيني كداا ، خلاص روق
- لا ما بروق انتي بتقولي كلام يضايق و تجي بكل برود تقولي لي مالك رووق بالحد ما تتخيلي حتت انك ما بتثقي فيني دي كاتلاني عديل من جوة وانا البحبك وافديكي بروحي *تسلم لي روحك يا روحي ، خلاص م تزعل مني علي تلفون بكرة قبل اخر محاضرة بديك تلفون
-شكلك بتمشيني لكن تمام يا نازك بكرة ما بعيده
*معقوله امشيك حبيبي ، يلا زي ما اتفقناا بس انت ما تزعل مني ما بستحمل زعلك
- لا يا روحي معقول ازعل من حبيبتي و مصدر سعادتي ، اسمعيني ي روحي بصراحه في حاجه انا كنت متردد اقولها ليكي خايف تزعلي بس طالما اصلا قاطعتي صحبتك حأقولها ليكي ،
*صحبتي منو وحاجه شنو ؟
-ياخ صحبتك دي اسمها منو رررر ررريم لالا ررر بحرف الراء كدا يااخ رندة صح لالا
*اهاااا قصدك ريان مالك نسيت اسما !
- وانا البخليني احفظ اسمها شنو ؟
*اها مالها زفته ؟
- بس اوعديني ما تزعلي عليكي الله
* مالك اتكلم ، حرقت لي روووحي
- خلاص حتكلم ، بصراحه في رقم بيرسل لي ليهو فترة وشاكي انها ريان بس ما حابي كنت اعمل مشاكل (بقلم/سحر سمير)
* رساااايل و ريان حتجيب رقمك من وين ؟
- ما عارف بس اكيد من اي زول من دفعتي في الجامعه وفعلا صحبي كان كلمني قال في وحدة جات شالت رقمي منوو بنفس مواصفات ريان ، مش رقم ريان 091 ...الخ نهايتو 88
* لحظة اتأكد يا مالك ..... رقما لا ما دا
رقما 0912...... الخ
- ما سمعتك ي روحي قلتي شنو الصوت كان بيقطع ..
*قالت ليهو الرقم المعاك غلط رقم ريان 0912....... الخ
- اهااا حبيبتي تمام اكيد م حتكلمني من رقما عشان عارفه حسالك بتكون من رقم تاني
.... و بكدا رقمي بقي عند مالك و نازك اتصرفت بكل سذاجة و قدر يشيل منها رقمي بأسلوبو وخبرتو في البنات ، بعد مالك قفل من نازك ضحك ضحكة انتصار مليانة خباثة
و رسل رساله لرقم مكتوب فيها :
* الفار قرب يدخل المصيدة * ....

استككانة🍟~

يتبع .....