خلايا الحب

5

. الشي الما كان في الحسبان ولا المتوقع ان اتفاجأ بخالد اخوي داخل علينا
....... و من هنا ابتدت قصتي ( بقلم/سحر سمير) .. الشي البحير انه طوالي جا داخل المخزن انا شفته خلاص عرفت اني ميته ميته مافي مفر ، محمد وقف قدامي من شاف خالد و بقيت انا وراهو مغطيني ، والشي المريب ان خالد كان في قمة هدؤه قال لمحمد لو سمحت ، محمد قاليهو انا عارف الشي الحاصل دا غلط كبير انا لو ما ظروفي جابراني والله اجي اعقد عليها ، خالد قاليهو ممكن تزح من قدامي ؟
محمد لسه بيحاول يهديهو و خالد هادي ، قاليهو خالد عليك الله ما تمد يدك عليها والداير تعملو سوي فيني انا ، وانا منهارة بس ببكي ما كان ناقصني خالد ما كفايه كلام محمد عني للحظة حسيت اني خسرتو زي الفي زول ملا لمحمد راسو تجاهي ، بس قعدت ابكي و بالجد كان هدوء خالد ، الهدوء الذي يسبق العاصفه ومتوقعه اكعب من الكعب ، بس للحظة خالد دا دفر محمد و نهرو قاليهو انا قلت ليك زح من وشي وما تعمل لي فيها راجل ، لانك لو راجل كان وصلتني البيت وكلمتني بالواضح و لو لقيتني ما وقفت معاك انا الحكون ما رجل ، بس وجراني من يدي بقوة ما لاحقة علي خطواته جرر اتعترتا اكتر من مرة ورجليني اتظلطت ما عندي صلاحيه افتح خشمي بكلمة وانا غلطانه ، لمن وصلنا البيت ابوي وعاطف كانو في الصالون و مخلوعين في منظري ، بس جاريني لحد البيت جوة عبير واخواني ديل مخلوعين وامي تقول ليهو خالد بسم الله مالك جاري اختك دي كدااا ، حاولت تحررني من يدو ما قدرت وانا بس ببكي ، دخلني جوة غرفتي و شال تلفوني اول حاجة و قفلني بالمفتاح من برااا ، دايرين الجد ؟ اتوقعت الاسوأ
سامعه صوت امي تبكي ما صح البتعملو في اختك دا يا خالد من متين بتعصي لي كلمة افتح الباب دا مهنا كان الغلط العملتو دا ما حل ولا عقاب افتح الباب دا ، قاليها رضاكي بهمني بس بتك غلطت وانا اخوها ولي حق في عقابا ، ابوي جااا خبط بي عصايتو الباب ، قاليهوووو جاك خبر موتي متين ؟
من متين بتتعامل مع اخواتك بالطريقه دي ولا متين ربيناك بالطريقه دي ، مهما كان الشي الخاصل تجي تقعد تقول لي يا ابوي حصل كذا كذا كذا ، و امشي افتح الباب دا ، قاليهو يا ابوي ريان غلطت و كسرت رقبتنا قدام ناس الحله ، قاليهو ريان بتي و ما بتعمل عيب ، بس طوالي خالد مرق و ما سمعتا الا رزعة الباب ، بس قاعده ابكي بي حسس ، اولاً خالد دا عمرو ما بشتري حاجه من دكان محمد دا ، لو داير يجيب حاجه بيجيبا من السوق لو في اي مرسال بيرسلو معاذ اخوي راسي داير يطرشق ، بس سامعه صوت امي بتكورك افتحو لي الباب دا .. فتحتو ليها عبير و جاتني داخله وقفلت الباب ، قعدت جمبي قالت لي احكي سامعاكي ،، طبعاً امي عاي رغم انها ما قرت بس عقليتا متحضرة و متفهمه شديد وعمرها ما مدت يدها علي وحدة فينا ، قلت ليها يمة والله انا ما سويت غلط انتي عارفه تربيتك بس كل الحصل انا غلطتا ، قالت لي كيف يعني يا ريان ما عملتي حاجه غلط و في نفس الوقت غلطتي !!
قصدي ما عملتا حاجه تكسر رقبتكم زي ما قاليكم خالد ، كل الحصل يا امي اني بريد لي واحد من زمان و هو رايدني بس الظروف منعتو يجيكم بالباب محمول وحملو تقيل من بعد وفاة ابوهو ، و خالد لقاني معاهو واقفه و الباقي انتي عارفاهو ، بس يا يمة انا ماعارفه خالد عرفني كيف ، انتي عارفاهو لو عايزين سكر ولا شاي بيرسل معاذ ،
شوفي يا ريان اكبر من كدا غلط مافي و ما تقولي لي ظروف ولا غيرو انتي بت ناس مافي حاجه توقفك معاهو دابرك يشد حيلو ويصلك وبيتنا دربو فاتح ، تمرقي اسي تبوسب راس ابوكي و خالد و توعديهم الغلط دا ما حيتكرر وانا ما بقدر احكي لابوكي الكلام دا فهمتي ، اناي عارفه اخوكي كان صمم بمنعك من قرايتك دي واظن تعب سنين ما بينفع تضيعي عشان واحد ما معروف دايرك ولالا .. (بقلم / سحر سمير )
والله يا امي محمد كويس وخو دايرني و .... قاطعتني قالت لي ريان سمعتيني قلت شنو ؟ ما تخليني اضطر احلفك مصحف انك ما تلاقي الزول دا تاني ، قدامك سمسترين دايرك يشد حيلو ويوصلك غير كدا لالا و توعديني ما تتكلمي معاهو ولا تلاقيهو مفهووووم ؟؟

استككانة🐒~

يتبع .......