خلايا الحب

8

بس واقفه وماسكة الحديده في يدي و متوقعه منه ردة فعل ، و سبحان الله ما كنت حاسة بذرة خوف جواي ، لمن لبست قلت ليها اطلعي قدامي ، طلعت و انا ماسكه الحديده و راجعه لورا لمن طلعت من المكان دا و حصلتا نازك ، وقفنا امجاد اديتو العنوان و اتحركنا ، ونازك قاعده تبكي ، اقوليكم حاجه بصراحه بقيت ما طايقه نازك اي صحبتي بس انا كرهتي التصرفات الما مفهومة و زول يتغير علي من غير سابق انذار .. اصلو خشمي دا و عندي لا سالتها لا اتكلمت معاها خليت بتاع الامجاد نزلنا قدام بيتها و انا نزلت و مشيت علي بيتنا برجولي ، والله حرف ما نطقنا مع بعض ، و اغرب شي لاقيت محمد في الشارع ، ودا ما شارع بيتو ولا شارع الدكان ، عاين لي و عاينت فيهو زي الما بعرفو ، لمن وصلنا البيت وطبعا متاخرة بس في مواعيدي الاساسيه ، خشيت سلمتا عليهم و غيرنا ملابس و بقيت شغاله في البيت بغضب زي البفضي غضبي ف النضافه ، حاسه بكل حاجه في حياتي اتغيرت و كل حاجه بقت باهته و ماليها لون .. لحد ما خلصتا وحو الضيوف مشيت استحميت و غيرتا وقعدتا ف الغرفه ، الا بعد شويه القي مي جايه داخله ،، بتفتش في حاجه ، قلت ليها مي قالت لي نعم , قلت ليها تعالي اقعدي جمبي ، قالت لي حاضر ،
قلت ليها انا شفتك الصباح و م تقاطعيني اسمعيني للاخر ، الشي البتعملي فيهو دا غلط و كوني زي ما امي وابوي ربوكي ، و الحصل معاي ماعايزة يحصل معاكي ، كفايه انا زعجتهم و زعجت خالد ، فااا ارجوكي حافظي علي الشي دا ، قالت لي تمام و تلفوني رن ، رقم غريب ، رديت لقيت صوت بت قالت لي ريون ي غلا سلامات الخبر شنو ، قلت ليها تمام والله ما عرفتك و في نفس الوقت صوتك مألوف ، قالت لي شكلك قبيل مع اللخمة نسيتي تسجلي رقمي ، قلت ليها ندا صح ؟ قعدت تضحك قالت لي ايوة ندا اها طمنيني الحاصل شنو ؟
قلت ليها والله يا ندا كلامك صح ولولا ستر ربنا الله اعلم كان حصل شنو ، قالت لي حمدلله خلي بالك منها و وعيها ، قلت ليها لا انا اكتفييييت يا ندا ، انا عملت العلي و زيادة انا ما عندي مخ زياده ، زي العندها عندي ، قالت لي خير حبيبه ولا يهمك ، قالت لي عندك صفحه علي الفيس ؟ قلت ليها والله ولا بعرف ليهو لكن اسي بعمل اصلا النفسيه محتاجه روتين جديد ، قعدت تضحك بعدها سمعت صوت واحد بتكلم معاها ، تكوي لي و ما تكوي لي ، قلت ليها شوفي برنامجك ، لمن تخلصي ارجعي لي ، قالت لي سمح و قفلت ، انحنا عندنا كمبيوتر مشيت فتحتو بس ما عرفت النت دا اشغلو كيف غلبني كلو كلوو ، لمن جا معاذ اخوي ، سالتو شغلو لي
قال لي دايرة تعملي شنو اول مرة اشوفك قاعده فيهو ؟ قلت ليهو الفيس دا شنو سمعت بيهو كتير عايزة لي واحد ، قعد يضحك و عمل لي صفحه و شرح لي ، وفات خلاني ، ابتديت اتفرج واشوف والزمن سرقني ، لمن لقيت لي صفحه مكياجات و فساتين دايرين بنات يشتغلو ، انا هنا طبعاً قلبي دا لمن قال شح ، طوالي شلت العنوان والرقم ، صراحه من الصور ظاهرة الفخامة ، انا نسيت ندا اصلااا ، لحد الساعه 9 الضيوف قاعدين ، رجعت رقدتا و ما عارفه مقلقه و متوترة رغم اني مرهقه لكن ما قادرة انوم نهائي بس بتقلب ، لمن اتصلت علي نازك تلقائياً صريت وشي ، رديت عادي ..
*الوووو نازك كيفك
قعدت تضحك (هههههههههه)
*قلت ليها تدوووم
قالت لي يا خاينه
*قلت ليها انا يانازك ؟
قالت لي في منو غيرك هناا
* قلت ليها كدا بتشكريني ولا زعلانه يمكن اكون قطعت ليكم صفاكم
قالت لي اللحظة دي انتي كنتي بتتمنيها و ساعيه ليها من وراي و لمن ما قدرتي حاولتي تنكديها علي الظاهر فراق محمد موثر فيكي شديد ..
*اناي شنو شابكاني محمد محمد مدخلاهو لي في اي نقاش حاصل بينا حتي لو هزار تجيبي لي محمد ، محمد سالك ولا انا ، وبعدين عارفه كان نفسي اقوليكي خاينه في شنو لكن مجرد السوال ساي بيقلل من قيمتي
و انا كان خاينه فاا انتي غبيه و خليكي علي كدااا يلااا ...... قفلت السكة
جاتني امي داخلة ، انتي الوداكي المكان دا شنو ؟ ( المكان الحصلت فيهو نازك) ..
انا هنا انصدمتا واتاكدت ان في طرف خفي و في حاجه مراغباني عايزة اجن حياتي بقت عبارة عن لغز .............

استككانة🍹🍟~ قالو ان كترت المواقف بتغير الزول لكن الله اعلم اذا حتاثر علي ريان ولا لا ......... و يتبع