خلايا الحب

14

يومنا دا انتهي بس ما بنكر اني بفكر في نازك مهما كان انحنا بينا عشرة ، صحيت تاني يوم عادي مشيت الجامعه و كالعادة يومي كان مع ندا و مافي حاجه تذكر ، غير ان دكان محمد ما زال مقفول والبيت مطبل و قلبي واجعني بس دوستا عليهو ، اما المشغل ما مشيت اتصلت علي السكرتيرة اديتا موافقتي ، و تاني يوم حبدأ الشغل ، و طبعا من ناس بيتنا م كان في زول عارف ولا حيعرف ، وحاولت اماطل في موضوع الشغل دا لمن خالد يسافر ، و فعلاا في اول يوم دوام لي هالد كان مسافر المساء ف اجلت المواعيد بعدها بيوم ، ، قلبي والله ماكلني بعد دايرة اتصل علي نازك تاني غيرت راي ان اشوفا في الجامعه ، يوم سفر خالد كان يوم عادي واكتر زول كان متاثر نداا ، واليوم دا كانت معاي و في صمت عجيب ، المهم بحمدالله عاطف وصلو المطار و لمن وصل طمنا حمدلله ..
تاني يوم مشيت خلصت محاضراتي و سوقتا ندا و مشيت الشغل ، كانت جلسة تصوير ودا الشي المخوفني بس قويت قلبي ، مكيجوني و لبسوني لبس اول مرة اشوفو ، اكتر من ساعتين شاغلين تصوير و تغير ملابس ، ادوني 2000ج ، فرحت فرح ما عادي ، ودي كانت زي اختبار الاعلان دا ، بقيت يوم في يوم الشغل بتطور يوم ملابس يوم شعر يوم مكياج يوم فساتين ، اتعمقت شديد و كنت اكتر وحدة مرغوبه وحتي جاتني عروض من مشاغل تانيه و القروش جرت في يدي ، وكل همي بقي شغلي بس م قصرت من قرايتي ، ابتديت اشوف ف البيت مروحة خربانه تلاجه صغيرة كدا بقيت حابه اصلح وضعنا بس كيف اهلي ما عارفين ، في اليوم القررت احكي غيهو لامي ، ما كان عندي شغل كنت راجعه من الجامعه علي البيت ، بصراحه اتغيرتا زمان كنت بقول القرش ما بغير بس جربتو في نفسي و كانت المفاجأة هنا : ماشه علي شارع بيتنا صادفت محمد طالع من بيتهم ماشي علي الجامع ، جا ماري من جمبي قال سلام عليكم و مشا ، الزول دا ليه انا ماقادرة اكرهو وكيف مش رحلو هو الجابو شنو ، مليون سوال في راسي ..
عاينت ليهو وهو ماشي قلت دا شنو الابسو دا عراقي ، و دقن جايط و حالتك حالة يا محمد والله انا كنته مضروبه علي راسي يوم كنت بحبك ، ومشيت باستهتار شديد ..
قبل اصل بيتنا اتزكرتا نازك اتصلت عليها م ردت فلت كدي اوصلا البيت من الشارع كدا ، مششششيت ، اخبط الباب مافي زول بيفتح هما بيتهم مقسوم نص ، فتحت الباب جارتهم الساكنه في النص التاني ..
قالت لي شفتك ةين قبل كدا ؟ قلت ليها انا صحبه نازك اسمي ريان ، قالت لي الله يرحما انتي كنتي عايزة شنو ي ريان ؟
قلت ليها يرحم منو ؟ قالت لي كيف يعني ؟
بس عليت فيها صوتي ، قلت ليها يرحم منو انتي مجنونة ولا شنوووو (بقلم/سحر سمير)
قالت لي يعني انتي صحبتا و ما بتعرفي
قلت ليها ياخاله الله يرضي عليكي اعرف شنو و نازك وين براحه كدااا فهميني ،و دموعي ديل ملو وشي ، زي لمن مرات بنسمع حاجه و عشان نكذبا بنحاول نوشوش تفكيرنا و نعتقد انها ما حصلت ، قلت ليها احكي لي
قالت لي نازك دي من اسبوع لقوها مجدوعه في البيت في البقولو ماتت و في البقولو بين الحياة و الموت و اهلها شالوها برا الخرطوم م معروف حاجه عنها ... بس بركت في الارض دي وبقيت اندب واكورك و شلت اللوم كلو وكبيتو فوق راسي ، يمكن لو رديت عليها ولا مشيت ليها كان ساعدتها يمكن فعلا هي كانت محتاجه لي ،
والله بكيت بكااا لمن مصاريني ديل وجعوني ، قلت ليها هي مالها يعني عيانه ؟
قالت لي لالالا لقوها مضروبه ومتهجمين عليها وغرقانه في دمها ....

استككانة😪~

يتبع .......