خلايا الحب

15

والله بكيت بكااا لمن مصاريني ديل وجعوني ، قلت ليها هي مالها يعني عيانه ؟
قالت لي لالالا لقوها مضروبه ومتهجمين عليها وغرقانه في دمها انا هنا انصدمتا شنو الذنب العملتو يوصلا للمرحله دي ، لا اله الا الله يا رب يمكن في كدة كانت محتاجه لي ، قعدت بس قدام بابهم دا وبكيت لمن جسمي سخن ما قمت الا علي تلفون امي اني اتاخرتا و دي ما عوايدي ، قلت ليها انا جايه علي البيت ، راجعه علي بيتنا تاني شفت محمد انا في اللحظة ديك حالتي كانت تصعب علي الكافر ، عاينت ليهو و كنته متاكدة 100%
حيسألني يا ريان مالك ، بس توقعاتي في محمد ابتدت تتساقط يوم ورا التاني ، وصلت البيت لقيت عاطف استغربت لانو خالد سافر ، سلمت و جيت امشي قالي ريان مالك ؟
زي الكنت محتاجه سبب ، ما قدرت ارد بس قعدتا ابكا بكا لمن البيت كلو اتلما فيني ، امي جاتني قالت لي ريان مالك في شنو حاصل بس ببكي اصلو ما رديت عليها الا لمن قالت لي ريان انا ضغطي حيعلا عليك الله في شنو في زول شاكلك في شنووو ، قلت ليها يمة مشيت ازور نازك لانو طولت ما شفتها المرة الساكنه في نص بيتهم قالت لي قالو ماتت يا يمة و في زول داقيها يا يمة وااااي يا يمة كلمتني اتصلت علي قالت لي محتاجه ليكي يا ريان وانا طنشتها و كلمتها بطريقه كعبه يا يمة وحات الله ندمااانه هدي ليها راحت راحت ونحنا زعلانين من بعض راحت ولا شالت معاها حاجه من الدنيا دي يا يمة انا ليه عملت كدااا يا يمة وووواااي يا حرقة قلبك علي صحبة عمرك يا ريان الدنيا دي فيها شنو لمن نزعل من بعض عمرنا ما اتفارقنا يا يمة حتي الجامعه دخلناها سوا ااااااااخ يا قلبي و يا حرقة قلبي و يا وجعك يا ريان الله ياخدني انا ، الله ينتقم مني يوم احتاجت لي ما لقتني جمبها الله ياخدني استتتغفر الله يا رب استغفر الله ، يا ريان انتي زوله متعلمة و مؤمنه بقضاء ربنا ما ممكن تكوني ضعيفه كدا دا كيس دايم ومنو الدايم في الدنيا دي كلنا ليها و بنوصل بعض ، بدل تبكي زي دا شوفي رقم اي زول من اهلها خلينا نمش نعمل الواجب ، ما عارفه يا يمة راسي شاطب و م متزكرة رقم زول يوصلني ليها اااخ يا الله سامحني ياااا الله ، انا اتزكرتا يا امي يوم كنا راحعين من الجامعه ساقتني بيت حبوبتا ام انها في الكلاكلات انا متزكرة بيتهم يا يمة عليك الله ارح ليهم يمكن تكون لسه عايشه ، هي يا ريان عايشه كيف مش قلتي ماتت ، ما بعرف ما بعرف بس المرة قالت لي ما معروف حيه ولت ميته و تاني جات قالت لي بتكون ماتت لامو حالتا كانت صعبه ، يمة انتي بس ارح معاي عليك النبي يا يمة
عاطف قال لامي اللبسي توبك انا بسوقكم العربيه معاي ، قلت ليها شفتي عاطف حيودينا اللبسي توبك عليك الله ، قالت لي طيب طيب ، عشرة دقايق ما تميناها و كنا في العربيه جات معانا مي اختي ، مشينا وانحنا من بيتنا للكلاكلات مشوار ، بعد ساعه الا ربع و لفلفه لمن استحضرت البيت حتي وصلنا ، جريت علي الباب بقيت بخبط في الباب ، فتحت لي وحدة قلت ليها دا بيت حبوبة نازك ؟ قالت لي في حبوبة اسمها نازك ؟ قلت ليها عليك الله ما وقت ظرافتك ، البيت دا فيهو منو غيرك ، قالت لي انا الغساله و ناس البيت بهناك ف الحوش التاني ، لزيتا و دخلتا و امي لحقتني وعاطف وقف برا و مي جات ، خشيت لقيتهم قاعدين حبوبتا لنازك و خالتا و شاب كدا ، بعد شويه جات ام نازك مارقه من المطبخ ، لساني اتربط خايفه اسألها وتقول لي ايوة ماتت ولو ماتت طيب هما عادي كدا ما متاثرين بالوضع ،
هي من شافتني اتخلعت ، قالت لي ريااان !! انتي جيتي هنا كيف ؟ قلت ليها يا خاله نازك وينا ؟ سكتت ، قلت ليها عليك الله نازك وين ؟ قالت لي نازك مرقدنها في المستشفي و .... قلت ليها ووو شنو حمدلله عايشه صح يا خالتي ؟ قالت لي ايوة عايشة بس حالتا ميؤس منها ، قلت ليها كيف يعني هو حصل شنو احكي لي ، قالت لي انا ما عارفه حاجه يا ريان ، كنت عند جارتنا مشيت اشرب معاها جبنة ، جيت راجعه قريب المغربيات كدي ، لقيت الاسعاف و الهيلمانه واقفه قدام بابنا والشفع والخلق ديل ملموين ، قلت ليها كل دا وانحنا جبرانكم ما عندنا خبر ؟ قالت لي انا قلت بتكون جارتي المقاسمانا البيت بكون راجلا جاتو الذبحه تاني وساقو ، بس للاسف ما شفت الا نازك غرقانه في الدم و شايلنها في النقاله ، و لينا اسبوع علي امل تصحا و نفهم الحصل انا والله يا بتي تعبتا و ناس المسنشفي قالو ما منها امل و كل يوم عاملين مشاكل دايرين يطلعوها من الغرفه و يدخلو في مكانا مريض تاني ، قالو ما بتعيش و العلاجات غاليه علي يا بتي ، و زي ما عارفه ابوها ... م تكملي يا خالتي
اديني اسم المستشفي قالت لي ( ....) ّو الروشته وين حقت العلاجات ؟ قالت لي خليتا للصيدلي مشيت عشان اجيب ليها علي الاقل شريط بدل علبه وحقنه واحدة لقينهم غالين ، خليت الروشته و طلعتا ، قلت ليها طيب ي خالتي انا بمشي اديني خاطرك ..

امي ومي اتأثرو شديد ، طلعنا
قلت لعاطف عندك شنو اسي ؟ قالي ولا حاجه قلتا ليهو توديني المستشفي ؟ قال لي جداً امي كوركت فيني قالت لي ارجعي البيت ارتاخي و نمشي ليها بكرة كلنا ، قلت ليها اعفي لي يمة والله ما بقدر انا لازم امشي الليله و بكرة وكان لقيت طريقه ببيت معاها ،
قالت لي عاطف بتكون معاها ؟ قاليها اكيد يا خالتي دا كلامك ..
مشينا وصلناهم علي البيت و طلعنا انا وعاطف علي المستشفي حسب العنوان بتاع ام نازك .. وصلنا و لاسف مشيت الغرفه القالتا لي ، لقيت مريضه تانيه ، و حولها اهلاا استغربت ، و مشيت الغرف الجمبها بفتش مافي ، سالت ممرضه ، قالت لي المريضه دي نزلوها العنابر تحت ، قلت ليها يعني فاقت ؟ قالت لي لا المستشفي عايزة تكاليف واهل المريضه ماقدرو يسدوها ، قلت ليها لا حول ولا قوة الا بالله دي مستشفي دي ؟ هاا عاملنها ليه فندق خمس نجوووم المعاهو قروش يقعد و الما معاهو يموووت صح ؟ عاطف بيقول لي روقي ، قلت ليهو اروق كيف بس فهمني اروق كيف .. والبت منططة عيونا و بتعاين لي ، و نادت زميلتا و بقو يعاينو لي بتعجب ، قلت ليهم " بي نهرة" مالكم شفتو جني ! ردو لي الاتنين مع بعض
مش انتي ريان 😳😳😳 ؟؟؟

استككانة😒~

يتبع .... هي صحي نسيت😰 بقلم /سحر سمير 😝
😂😂😂😂 خلاص امشوو ّالحلقه البعدها
👊👊