بعد الغدا.. قعدنا كلنا نتونس.. الشغاله جابت صواني الشاي و القهوه و الحلو..
قمتا انا و زهره بقينا نصب الشاي و القهوه.. زهره ادت عماتي و البنات.. و انا اديت الرجال.. ختيت ل إيهاب فنجان القهوه قدامو..شالو اخد منو بق..
إيهاب:( ممكن تذيدي لي السكر)
قلتا ليهو:( حاضر)
ذدتا ليهو السكر.. و شلتا فنجاني و قعدتا جمب البنات سلافه شويه شويه بقت تتونس معاي.. اما مياده خالص م بتتكلم معاي.. بتكشر لي بس.. م عارفه مشكلتها شنو معاي..
ابوي تلفونو ضرب.. شال تلفونو و مشي يتكلم بعييد..
ليلي نظراتها لي برضو كعبه.. و عمو محمد خااالص م بتكلم معاي.. شكلها هي و راجلا مقتنعين بموضوع الورثه ده عشان كده م بحبوني..
عماتي( امنه و سميه) برضو كلامهم محدود جدا معاي.. م عارفه اخليهم يحبوني ككييف...
ابوي خلص مكالمتو و جا قعد..
عبدالرحمن:( ي امي)
حبوبه:( ايوا)
عبدالرحمن:(شفتا دكتور كويس شديد في الاردن... و قال نجي هناك عشان نفحص ليك و يشوف لو بتحتاجي عمليه وله لا)
عمو محمد كشر وشو...
حبوبه:( ي عبدالرحمن ي ولدي.. الموضوع م بستاهل... اصلا العمليه ددي م مقتنعه بيها.. اسي انا اهو كويسه الحمدلله)
عبدالرحمن:( ي امي.. عليك الله اسمعي كلامي بس.. لو لقينا م محتاج بنجي راجعين)
عمو محمد طوالي قام مشي..
عبدالرحمن:( ي امي.. انا من زمان مقصر معاك.. و حاسي بالذنب شدييد نحيتك.. عليك الله خليني ارضي ضميري لو مره.. خليني احس اني عملتا ليك حاجه.. م داير احس بالذنب ي امي)
حبوبه:( م بتقصر ي عبدالرحمن والله.. عارفاك ي ولدي)
عبدالرحمن:( خلاص ي امي.. عليك الله وافقي.. و نحجز نمشي.. سميه وامنه منو البتمشي معانا?)
امنه:( م عندنا مشكله.. الدايرا انت بتمشي معاك)
عبدالرحمن:( انا م عندي مشكله.. اتفقو مع بعض و الدايره تمشي معاي اهلا وسهلا بيها)
قلتا ليهو:( و انا ي ابوي? )
عبدالرحمن:( لالا انتي حتقعدي هنا م حتسافري معانا)
اميره:( ااي عليك الله اقعدي معاي.. عشان م اقعد براي)
قلتا ليهو:( بس انا دايره امشي معاك ي ابوي)
عبدالرحمن:( لالا خليك هنا احسن)
زهره:( ااي عليك الله اقعدي معانا)
م اقتنعتا بفكره اني اقعد هنا بدون ابوي... خوفتا عدييل.. بس ابوي م كان دايرني امشي معاهم م عارفه ليه..
إيهاب:( يلا ي سامي)
سامي:( يلا اتاخرنا..)
زهره:( ماشين عقد آمين?)
إيهاب:( ايوا.. انتو م ماشين?)
زهره:( بنمشي العرس انا و اميره)
سامي:( اي عشان هاله بتزعل)
اميره:( تمشي معانا ي ياسمين?)
قلتا ليهم:( م بعرفهم انا)
اميره:( احنا بنعرفهم.. اصحابنا شديد.. و آمين صاحب ناس سامي..و هو ذاتو العريس اخو هاله صحبتنا.. )
حبوبه:( امشي معاهم م حصل حضرتي عرس سوداني انتي)
قلتا ليهم:( ان شاءالله)
إيهاب و سامي طلعو مشوو..
المساء قاعدين.. انا و زهره و اميره.. اميره جاها تلفون مشت تتكلم... بقينا قاعدين انا و زهره برانا..
زهره:( مليت.. ماف موضوع)
قلتا ليها:( اي والله.. تعالي نحضر التليفزيون)
قالت لي:( بايخ ياخ)
قلتا ليها:( بجيبو افلام اسي ظريفه)
زهره:( انا عندي افلام ظريفه في لابتوبي فوق... يلا نطلع نحضرا)
خوفتا من طلعت شقتهم فوق.. عشان ليلي و محمد..
قلتا ليها:( لالا جيبي هنا.. ناس ابوك قاعدين)
زهره:( ابوي المسا ده م بقعد خاالص.. طوالي بطلع مع اصحابو... و امي مشت ناس حبوبه.. البيت فوق فاضي)
قلتا ليها:( متاكده?)
قلتا ليها:( اي يلا مالك خايفه ييااااخ)
و مسكتني من يدي طلعنا من الصاله لقينا اميره قاعده في الحديقه بتتونس بالتلفون..
زهره:( اميره خلصي و تعالي لينا فوق)
اميره:( حاضر)
طلعنا بيتهم... شقتهم كبيييره و حلوه...ذي البيت التحت... دخلنا غرفه زهره..كبيره و حلوه و مليانه صورا و صور فنانين .. و الحيط كل حيطه لون... ضحكتا،،
قلتا ليها:( ده شنو في زول بضرب كل حيطه لون براهو و كل لون بعيد من التاني ماااف صله بينهم)
ضحكت ..
زهره:( ااي والله.. جن مني ساااي.. بس عملتا كده.. ااي زول بعلق لي عليهم بس برضو م حاغيرهم)
قعدنا في السرير.. طلعت اللابتوب..
زهره:( تعالي نعمل فشار وله حاجه)
قلتا ليها:( ممكن)
مشينا المطبخ.. طلعت شيبس و بيبسي... زهره سمعت تلفونها ضرب مشت.. بقيت بعمل في الفشار.. فجاه حسيت بزول جاي علي.. قلتا دي زهره فجاه زول لمسني من ظهري ..
قال لي:( بتعملي في شنو)
اتخلعتا و صرختا و قبلتا عليهو لقيتو إيهاب.. الاتنين اتخلعنا... من الخلعه ضربتا حله الفشار بيدي.. و يدي اتحرقت بحله الفشار و القشار اتدفق في الارض...
إيهاب:( اسف.. كنت قايلك زهره)
سكتا ..
إيهاب:( انتي كويسه?)
كشرتا وشي.. و مسكتا يدي..
إيهاب:( اسف.. حرقتك?)
قلتا ليهو بزعل:( انت شايف شنو?? )
ايهاب:( تعالي كبي فيها مويا بارده)
شال كبايه مويا و مشينا علي الحوض كبا لي فيها مويا..
إيهاب:( تعالي اعمل ليك فيها برهم)
مشيت معاهو علي الصاله.. قعدتا في
الصاله.. جات زهره سالت بخلعه..
زهره:( في شنو?)
ايهاب:( اتحرقت بالحله)
زهره جات جاريه علي عاينت ل حرقه في يدي..
زهره:( اتحرقتي كيف?)
قلتا ليها:( سرحتا بس)
ايهاب عاين لي باستغراب.. و فتح الدولاب جاب برهم..
ايهاب:( لمي الفشار من الارض ي زهره)
زهره:( حاضر)
و مشت
ايهاب:( ليه م قلتي ده انا الخلعتك و حصل ليك كده?)
قلتا ليهو:( م عارفه ،، م مشكله)
إيهاب:( اسف والله م قصدي،، قايلك زهره)
قلتا ليهو و انا مكشره:( حصل خير)
مسح لي البرهم و لفاها لي ب شاش..
زهره شالت و الفشار و الشيبس و البيبسي ودتهم الغرفه.. ايهاب:( خليها ملفوفه كده لبكرا)
قلتا ليهو:( طيب)
و قمتا مشيت ل زهره...
بقينا بنحضر في الفيلم ..و جاتنا اميره.. بس كل شويه بسرح بفكر في ايهاب.. م عارفه ليه بفكر فيهو.. صح هو حلاتو و وجيه.. اسمر و طويل.. و جسمو عريض... عكس امجد اللونو ابيض شويه شايل لون امو و ملامحها.. بس إيهاب اسمر علي ابوهو و بابا.. و شايل ملامحهم،، سامي اسمر برضو..و بلبس نظارات...
خلصنا الفيلم و جايه انزل البيت تحت لاقيت إيهاب في السلم..
ايهاب:( يدك بقت كيف?)
قلتا ليهو:( كويسه)
ايهاب:( مؤلماك?)
قلتا ليهو:( شويه)
ايهاب:( اوديك الدكتور?)
قلتا ليهو:( لا م بستاهل)
ايهاب:( جد والله.. ارح)
قلتا ليهو:( لالا للصباح بتبقي كويسه.. عن اذنك)
و مشيت خليتو واقف.. كنت برد عليهو بمسااخه... اصلو ابيت اديهو وش..
نتلاقي😊
