جات زهره بتبكي..
زهره:( حبوبه دخلوها العنايه المكثفه.. حالتها خطره)
انا و ايهاب قلنا:( ربنا يستر)
قلتا ليهم:( يلا نشوف حبوبه)
ايهاب:( يلا)
لبسنا انا و زهره عبايات و طلعنا بعربيه ايهاب مشينا..
دخلنا المستشفي.. لقيناهم كلهم واقفين برا في حوش المستشفي.. من شفتا ابوي جريت عليهو و انا ببكي.. طوالي ابوي حضني عليهو،، كان الزعل باين عليهو...
محمد و امنه كانو جوه في المستشفي..
قعدنا في مكانا للصباح.. جات دلال و راجلا سالو من حبوبه و مشو..
الصباح ابوي دخل لدكتور... و جا طالع شال مفتاح عربيه سامي و مشي بدون م يقول حاجه...
جات سميه:( ي جماعه قعادكم هنا م منو فايده تعب سااي...امي م حتطلع الليله...امشو ارتاحو في البيت احسن)
زهره:( صح ..احنا من بليل هنا بدون فايده)
سميه:( انا حاقعد مع امي...يلا امشو)
قمنا كلنا مشينا.. عدا محمد و سميه قعدو مع حبوبه...
رجعتا البيت نمتا من التعب..
صحتني اميره..
اميره:( قومي اكلي ي ياسمين.. من بليل م اكلتي حاجه) قلتا ليها:( م دايره)
اميره:( ليه كده? عشان كلام محمد تزعلي مننا كلنا)
قلتا ليها:( م زعلانه.. بس م دايره اقعد هنا يوم وااحد تاني ابوي لمن يجي حاكلمو...حامشي اقعد مع خالاتي لمن هو يجي)
اميره:(حرام عليك ي ياسمين.. ليه كده... تعالي معاي)
مسكتني من يدي و نزلنا تحت.. دخلنا المطبخ.. قعدتا في الصفره و هي طلعت اكل ختتو في الصفره قدامي..
اميره:( انا م اكلتا معاهم.. مستنياك.. لو م اكلتي والله م باكل.. عشان خاطري بس اكلي)
م حبيت احرج اميره و اكلتا معاها شويه..
قلتا ليها:( ابوي جا?)
اميره:( ايوا جا و طلع تاني)
قلتا ليها:( مشي وين?)
اميره:( م قال)
بعد اكلنا شلتا تلفوني دقيت لابوي رد علي،،
قال لي:( جاي علي البيت)
استنيتو ...جا تعباان و دخل استحما.. حضرتا ليهو الاكل.. ابا ياكل.. بعد تحانيس اكل شويه.. و رقد داير ينوم..
قلتا ليهو:(ابوي .. انا دايره ارجع مصر.. )
ابوي عاين لي باستغراب..
قلتا ليهو:( م دايره اقعد هنا انا.. بمشي بقعد مع خالاتي لحدي م انت ترجع)
عبدالرحمن:( ياسمين.. م وقت الكلام ده.. لمن ارجع من الاردن حنرجع مع بعض)
اتخلعتا..
قلتا ليهو:( لالا م دايره اقعد هنا)
عبدالرحمن:( ياسمين.. عليك الله راسي جايط و م ناقص ااي جوطه تاني...اجلي ااي حاجه لمن نرجع.. تمام?)
قلتا ليهو:( لالا)
عبدالرحمن:( اقفلي لي النور ده خليني انوم)
و اتغطا.. قمتا قفلتا النور و طلعتا..
طلعتا مشيت الحديقه قعدتا جمب الحوض زعلااانه و ببكي.. حسيت روحي بكره السودان و بكره كل الناس الفيهو.. بقيت م طايقه ااي زول و زعلتا من ابوي.. عشان لسه مصر يسفر حبوبه...و يخليني هنا براي.. اقعد مع عمو محمد كيف براي...
جات اميره قعدت جمبي و سالتني ليه زعلانه ابيت ارد عليها.. تاني جات زهره...و جات سلافه... و سامي.. كلهم اتلمو فيني بحاولو يهدوني و اني م ازعل و م اساافر..
زهره:( احنا بنحبك و اتعودنا عليك.. كيف تخلينا و تمشي?) سامي:( م تخلي ااي زول يآثر فيك... قضي اجازتك و انبسطي و ارجعي بلدكم.. م تشتغلي بزول)
سلافه:( انتي م تبقي حساسه كده.. م تشتغلي بيهم.. علي قول اهلك ،، كبري دماغك)
بقو يضحكو في كلام سلافه..
اميره:( والله لو اشتغلتي بكل حاجه كده حتتعبي سااي..)
جات مياده سالت:( في شنو? )
زهره:( ياسمين زعلانه دايره تسافر)
مياده لوت خشمها و قالت:( دلع) و مشت..
م اشتغلتا بيها..
بعد شويه جا ايهاب.. برضو سال في شنو? حكو ليهو..
ايهاب:( م جاده طبعا... بدل تقيفي معانا و مع ابوك.. دايره ترجعي مصر?)
قلتا ليهم:( انا جد زهجتا و دايره ارجع...بقعد مع خالاتي لمن ابوي يجي)
ايهاب:(لا لا.. تقعدي هنا لمن ناس عمو عبدالرحمن يجو..و ماااف ااي زول حاقدر يزعلك)
زهره:( ي جماعه تعالو نعمل الليله برنامج ل ياسمين عشان تفك الزعله دي)
سلافه:( برنامج شنو?)
زهره:( نتلما المساء هنا و نعمل شاي و حلويات و نتونس)
سامي :( اي والله فكره..)
ايهاب:( انا ذاتي بكون معاكم)
زهره:( انت شخصيا ماشاءالله والله..)
اميره:( خلاص الساعه 7 نكون هنا.. يلا امشو اجهزو و كل زول يجيب حاجه.. زهره اشرفي علي الموضوع ده.. انا ماشه المستشفي و جايه)
مشيت مع اميره المستشفي شوفنا حبوبه.. قالو حالتها مستقره.. بس مانعين منها الزياره...و رجعنا البيت..
لقيت زهره و سلافه بحضرو في الصفره في الحديقه و خاتين شاي و حلو..
مشيت استحميت و غيرتا و جينا قعدنا كللنا..الا مياده.. بقو يتونسو..الا انا م قدرتا اتونس معاهم كنت لسه زعلانه... بحكو لي قصص حصلت ليهم.. و مواقف مضحكه.. شويه شويه بقيت بضحك و بتونس معاهم..بعد شويه مياده جات قعدت و مكشره.. م عبروها..
زهره:( سامي يلا سمعنا حاجه ياج)
سامي:( الجيتار فوق)
اميره: ( امشي ي سلافه جيبيهو)
سلافه مشت جابتو..
مسك سامي الجيتار:( اغني ليكم شنو?)
زهره:( ليله ..اغنيه عبدالرب ادريس)
سامي:( حاااضر)
و بدا يعزف و يغني.. و احنا بنسمع بككل حواااسنا... و مبسوطيييين...
لقيت إيهاب بعاين لي.. عاينتا ليهو ،، ابتسم لي.. ابتسمتا ليهو.. لمن خلص كللللنا قمنا صفقنا ليهو.. و الاولاد صفرو ليهو.. و كوركنا...
اميره:( اسكتو خلاص.. عيب.. محمد لو سمعنا حاطردنا)
قعدنا.. بقينا نشرب في الشاي و ناكل في الحلويات..
مياده قعدت جمب إيهاب.. بتتونس معاهو..
بعد خلصنا تاني سامي غني لينا.. و بقينا نغني معاهو... و احنا مبسوووطيين شديييد...
فجاه لقينا عمو محمد واقف قدامنا و مكشر..
كلنا اتخلعنا.. سكتنا..
محمد:( ده شنو الكلام الفارغ ده?)
سكتنا م ردينا..
محمد:( ده شنو ي سامي? بتغني?)
سامي:( تسليه بس..)
محمد:( بتتسلو? عاملين شاي و حلويات و غني? م بتخجلو و حبوبتكم راقده في المستشفي بين الحياه و الموت.. يخس عليكم)
اميره:(مشينا لامي و اتطمنا عليها و رجعنا منها قبل شويه) محمد:( برضو.. ماف داعي لحركات دي.. سامي تاني م اشوفك شايل الجيتار ده.. فاهم? بلا تسليه بلا كلام فاضي)
و مشي دخل البيت...
كلنا بقينا ساكتين.. و مكشرين.. خرب لينا مزاجنا..
نتلاقي
