الظهر جا ايهاب.. لقاني راقده في غرفتي..
ايهاب:( ياسمين .. انتي نايمه?)
رفعتا راسي و فتحتا النور..
ايهاب عاين لي باستغراب..
ايهاب:( مالك? كنتي نايمه?)
قلتا ليهو:( لا)
جا داخل قعد جمبي في السرير..
ايهاب:( الليله م عاجباني.. مالك?)
قلتا ليهو:( م عارفه.. من صحيت متضايقه و قلبي مقبوض.. م عارفه في شنو)
ايهاب:( بسم الله.. مقلقه من حاجه? بتفكري في حاجه?)
قلتا ليهو:( لالا)
ايهاب:( مقلقه عشان العرس قرب?)
قلتا ليهو:( لا.. م اظن.. م عارفه)
ايهاب ابتسم:( عادي التوتر القبل العرس ده.. م تركزي معاهو...يلا قومي اجهزي عشان نمشي )
قلتا ليهو:(لازم الليله? م ممكن ناجلو بكرا?)
ايهاب:( لالا لااازم الليله..يلا قومي.. طالع البيت فوق و اجي القاك جهزتي)
قلتا ليهو :( طيب)
طلع مشي...
قمتا اجهز...
دخلنا انا و ايهاب محل كبيير من تلاته طوابق فيهو جمييع انواع العفش،، بقيت بتفرج بدون ااي نفس.. ايهاب كان مبسووط شديد و بعلق بفرح..
ايهاب:( عايني.. اللون البيج ده حلو كيف.. شوفي الازرق ده رهيب.. بس نعمل ليهو جداعات ملونه...شوفي الغرفه البنيه دي جميله كييف!! و نعمل ديكور في الحيطه تبقي رهيبه.. صح?)
هزيت ليهو راسي ب ( نعم)
ايهاب عاين لي باستغراب..
ايهاب:( مالك ي ياسمين?)
قلتا ليهو :( مصدعه)
ايهاب:( خلاص نخلص و نطلع)
قلتا ليهو بزهج :( لا دايره اطلع اسي.. م دايره اختار حاجه)
و طوالي طلعتا علي الباب.. و ايهاب جا لاحقني..
ايهاب:( ياسمين.. ياسمين.. مالك حبيبتي?)
قلتا ليهو:( ماف شي.. بس رجعني البيت)
ايهاب:( حاضر.. اركبي)
ركبنا العربيه و اتحركنا..
ايهاب:( اجيب ليك قهوه?)
قلتا ليهو:( ممكن)
وقفنا في محل...نزل جاب لي كبايه قهوه كبيره ،، و جاب لي بندول و مويا.. بلعتا البندول ،، بقيت بشرب في القهوه و انا ساكته ،، ايهاب شغل لي اغاني رومانسيه و ابتسم لي و انا سااكته..
رجعنا البيت.. دخلنا.. لقينا ،، حبوبه و عمتو سميه و اميره قاعدين في الصاله..
سميه:( ليه رجعتو سرعه?)
ايهاب:( اتفرجنا شويه و طلعنا عشان ياسمين مصدعه)
اميره:( سلامتك)
قلتا ليهم:(الله يسلمكم ،، ماشه ارتاح فوق، ،عن اذنكم)
حبوبه:( اتفضلي)
طلعتا فوق خليت ايهاب قاعد معاهم...
تاني يوم جاتني اميره في غرفتي..
اميره:( ياسمين...في وحده عندها تياب تجنن.. ماشه اجيب منها.. ارح جيبي)
قلتا ليها بكل برود:( م دايره)
اميره:( ليه? والله تياب حلوه شديد م بتلقي ذيها تاني.. يلا م تضيعي الفرصه)
قلتا ليها بزهج:( م عايزه ي اميره.. امشي جيبي انتي)
اميره:( ياسمين.. انتي م طبيعيه.. في شنو?)
قلتا ليها:( ماف شي.. بس مصدعه و تعبانه)
اميره:( صداعك ده م بروح.. طيب امشي الدكتور)
في اللحظه دي جا ايهاب داخل..
اميره:( ايهاب.. ودي ياسمين الدكتور)
ايهاب:( مالا?)
اميره:( ليها كم يوم بتشتكي من الصداع ده.. وديها الدكتور عشان تبقي كويسه و تمشي تتم حاجاتها.. البت دي عندها تجهيزات كتيره م عملت منها اي حاجه)
ايهاب جا وقف جمبي..
ايهاب:( قومي البسي ارح الدكتور)
قلتا ليهو بزهج:( كويسه انا خليني بس)
ايهاب:( ياسمين!! مالك? )
اميره:(انا ماشه حابقي اصور ليك.. يلا) و طلعت...
ايهاب قعد جمبي..
ايهاب:( ياسمين.. في شنو? انتي والله م طبيعيه)
قلتا ليهو بزهج:( ايهاب عليك الله خليني م طايقه اتكلم مع زول)
ايهاب:( من متين بتتكلمي معاي كده?)
قلتا ليهو:( ايهاب اطلع و اقفل لي الباب نتفاهم بكرا)
ايهاب عاين لي باستغراب و قام طلع زعلان ،، م اشتغلتا بيهو..
مرا يومين و انا في حالتي دي ،، لا بتكلم مع زول لا اي شي.. حبوبه و عماتي جو سالوني قلتا ليهم تعبانه و مصدعه..
يوم شلتا التلفون ضربتا ل بابا..ردا لي..
قلتا ليهو:( بابا)
عبدالرحمن:( ياسمين.. عروسنا السمحه)
قلتا ليهو:( بابا انت جاي متين?)
عبدالرحمن:( لسه ي بابا ،، عندي اجراءات م خلصت.. احتمال اجي يوم عرس اميره و احضر عرسك و ارجع تاني اتم باقي الاجراءات)
قلتا ليهو:( انا دايره اجي مصر)
عبدالرحمن:(تعالو في شهر العسل هنا)
قلتا ليهو:( لالا.. دايره اجي اسي)
ابوي اتخلع..
عبدالرحمن:( ليه? )
قلتا ليهو:( م عارفه.. بس دايره اجي،، متضايقه م دايره اقعد هنا)
عبدالرحمن:( بسم الله ي بابا ،، حصل شنو? في زول ضايقك?)
قلتا ليهو:( لالا)
عبدالرحمن:( بالجد? لو في شي احكي لي)
قلتا ليهو:( والله ي بابا ماف زول مضايقني ،، بس انا زهجانه و متضايقه م قادره اقعد هنا)
عبدالرحمن:( انتي مقلقه ساي ،، ماف شي اتطمني ،، لمن تلقي روحك مضايقه اقري قران و سبحي بتبقي كويسه)
قلتا ليهو:( طيب)
عبدالرحمن:( يلا حبيبتي بعدين بكلمك اسي انا داخل اجتماع)
قلتا ليهو :( طيب.. باي)
و قفلتا.. ختيت التلفون و دموعي في عيوني..
نتلاقي😊
