لمن خلصنا اكل.. ايهاب طلب لي حلو و عصير..
قلتا ليهو:( ايهاب.. م بقدر علي ده كلو..م بحب الحلو كتير انا)
ايهاب:( لا تاكلي.. )
قلتا ليهو:( كفايا والله)
ايهاب:( لا بتقدري.. يلا...احكي لي عن نفسك)
قلتا ليهو:(طيب..انا قريت اداره اعمال جامعه القاهره.. و لمن اتخرجتا قريب سنه كده،، نزلتا مع ابوي الشركه بقي بعلمني الشغل.. شويه شويه بقيت بعرف الشغل.. و بقيت ماسكه معاهو الشغل)
ايهاب:( و تاني?)
قلتا ليهو:( بس)
ايهاب:( حياتك تاني كيف? صحباتك و علاقاتك و كده) قلتا ليهو:( ايام الجامعه كانو عندي صحبااات كتاار.. بس لمن خلصنا.. اغلب صحباتي عرسو.. و فيهم السافرو و كده.. بقينا بنتكلم مره مره...كل وحده في مشغولياتها.. عندي معاي في الشغل زميلاتي بس برضو علاقتي معاهم م قوويه كده.. الشغل اصلا بياخد وقتي كلوو م بلقي فرصه اني اطلع و الاقي ناس و كده.. )
ايهاب:( صح.. الشغل بياخد وقت الزول كلو.. و تاني?)
ضحكتا قلتا ليهو:( بس...من وفاه امي.. بقيت ماسكه البيت انا... برجع بدري بحضر الغدا و كده.. عندي خالاتي و بنات خالتي.. بس بعيدين مننا شويه.. بمشي ليهم في الاسبوع مره.. او هم بجوني برضو مره مرتين في الاسبوع.. بس)
ايهاب:( كويس)
قضيت مع ايهاب وقت ظريف.. بقي يحكي لي و كده .. جد طلعني من جو الزهج و الزعل الكنت فيهو..
رجعنا البيت انا و ايهاب قبل م انزل البيت.. ايهاب اداني فلاش فيهو اغاني سودانيه.. قال لي دي الاغاني المفضله عندي..اسمعيها.. شلتا الفلاش و نزلنا .. جينا داخلين لقيت مياده واقفه في البلكونه بتعاين لينا.. دخلتا علي البيت و ايهاب طلع بالسلم الخارجي علي بيتهم..
مياده وقفت لايهاب في السلم.. من جا ..
مياده:(كنتو وين انت و ياسمين?)
ايهاب:( كنت بفسحها عشان زهجانه)
مياده:( مالك و مالها تفسحا ليه? ماف غيرك?)
ايهاب:( في شنو ي مياده?)
مياده:( م تفسحا م ليك دعوه بيها)
ايهاب:( دي اوامر?)
مياده:( ايهاب.. انت عارف كويس.. صح?)
ايهاب:( عارف شنو?)
مياده:( انا بحبك)
ايهاب سكت ساااي.. م ردا ليها..
مياده:( انت عارف كده.. م تعمل روحك اتفاجئتا.. عشان كده ابعد من ياسمين دي)
ايهاب:( مياده... انتي ذي اختي.. انتي و زهره عندي وااحد احنا متربيين مع بعض.. عشان كده...)
قاطعتو مياده..
مياده:( عشان كده انا بحبك.. عشان من قمتا و شايفاك انت قدامي.. كبرنا مع بعض..عشان كده اتعلقتا بيك و حبيتك)
ايهاب:( مياده... م عارف اقول ليك شنو...بس.. )
مياده:( م شرط تحبني اسي.. اخد وقتك.. بس ابعد من ياسمين...عشان انا بكرههها)
ايهاب استغرب
ايهاب:( بتكرهيها ليه?)
مياده:( بس كده م بحبها ياخ)
و مشت دخلت شقتهم..
ليلي جات ل محمد في الغرفه.. كان بقرا في جريده.. ليلي قعدت جمبو...
ليلي:( محمد.. اهو اخوك عمل الفي راسو.. و م عبرك.. و سفر خالتو زهره.. حتعمل شنو?)
محمد:(الفي يدي كلو عملتو.. و م نفع.. اعمل شنو تاني?)
ليلي:( اخوك بقي م معبرك.. عامل هو الكبير.. و م بسمع ليك كلمه.. لمن يرجع لازم تتفاهم معاهو و تخلي يرجع محل م كان.. م يجي هنا تاني)
محمد:( اصلا هو حارجع ماف حاجه بتخليهو يقعد هنا )
ليلي:( يمكن يقعد.. شنو الضمنك!! المهم ي محمد خلص الموضوع ده اول من يرجعو)
محمد:( طيب ي ليلي)
