بلعتا بندول و رقدتا ،، بعد نص ساعه سمعتا صوت ايهاب بناديني:( ياسمين،، ياسمين)
جا دقي الباب..
قلتا ليهو:( ادخل ي ايهاب)
جا داخل مخلوع..
ايهاب:( مالك? تعبانه? )
قلتا ليهو:( مصدعه ي ايهاب ،، م قدرتا اتحمل الحفله و الجوطه جيت راجعه)
ايهاب:( ليه م كلمتيني?)
قلتا ليهو:( م دايره اقلق بيكم قلتا اخليكم تتمو العرس)
ايهاب:( صداعك ده م طبيعي ،، قومي البسي نمشي المستشفي)
قلتا ليهو:( لالا م محتاج.. )ايهاب قاطعني..
ايهاب:( يلا ي ياسمين م داير كلام كتير.. حاطلع اغير و اجي م ممكن امشي كده المستشفي)
و طلع طوالي...
قمتا لبستا و سمعتو بناديني...طلعتا و مشينا الدكتور..
عملتا فحص عاام م لقينا ااي شي ،، ناس البيت كلهم ضربو لينا و قلقو ايهاب طمنهم.. جينا راجعين..
بدا التجهيز ل عرسي..كل يوم في حاجه و التجهيزات كتييره و جايطه شديد ،، بس من جواي م مرتاحه مقلقه شدييد ،، لمن فضل يومين للعرس كنت خلااص القلق وصل بي الحد و حسيت اني م دايره اعرس و لا دايره ايهاب و لا بحبو ولااا ااي شي...
مشيت فتشتا ابوي لقيتو في الصاله معاهو ضيوف ،،ناديتو جاني.. دخلنا غرفه حبوبه و قفلنا الباب..
قلتا لابوي:( اقعد دايراك)
ابوي قعد..
عبدالرحمن:( في شنو?)
قلتاليهو:( ي ابوي انا م دايره اعرس)
ابوي اتخلع شدييييد ..
عبدالرحمن:( نعم?)
قلتا ليهو:( ي ابوي انا مقلقه شديد و م متطمنه م عارفه في حاجه م كويسه، ، المهم اجل العرس ده شويه او اتصرف بس انا م دايره اعرس بعـد بكرا)
ابوي بقي يجوط فيني..
عبدالرحمن:( ياسمين انتي جنيتي? انتي بتلعبي? ده عرس.. م لعب ولا هظار، ، كيف تلقي العرس قبل يومين انتي دايره الناس يقولو علينا شنو?)
قلتا ليهو:( م لي دعوه بالناس، ، انا م دايره اعرس و م دايره ايهاب ده )
عبدالرحمن:(والله شكلو دلعي و حبي ليك خلاك تبقي كده تلعبي بالناس و مصايرهم.. انتي عارفه اسي انا لو طلعتا قلتا الكلام ده لناس الناس دي ممكن تحصل ليها شنو? خليك من الناس، ، ايهاب ممكن يحصل ليهو شنو?? انتي ليه انانيه م بتفكري الا في روحك.. فكري ممكن يحصل شنو لناس دي.. ايهاب دافع دم قلبو ليك.. كيف تلغي ااي حاجه بين ثانيه و التانيه?? اسمعي هنا.. انا م صدقتا المشاكل خلصت و بقيت مرتاح.. العرس حاتعمل في وقتو فاهمه? و بعدين تتفاهمي مع ايهاب براحتك)
و قام طلع
دخلتا غرفتي زعلانه و ببكي ،، ابوي االاكتر زول في الدنيا بفهمني و بحبني م فهمني ،، اكلم منو، ، ايهاب? اكيد م حيفهمني و حيزعل و يجوط ،، و ممكن تحصل مشكله ذي م قال ابوي ،، الباب دقي ،، قمتا فتحتا لقيتها زهره ،،
زهره بخلعه:( في ششنو ي ياسمين? ابوك جاني قال لي ياسمين زعلانه شوفيها)
قلتا ليها :( ادخلي و اقفلي الباب)
دخلت و قفلت الباب و قعدنا...
زهره:( احكي في شنو?)
بقيت بحكي ليها و انا و انا ببكي.. اني زهجانه و متضايقه و مقلقه و م حاسه نفسي دايره اعرس بس ماف زول داير يفهمني..
زهره:( والله ي ياسمين ماف شي، ، انتي براك مقلقه من العرس، ، صدقيني ده خوف من العرس بس)
قلتا ليها:( العرس يتاجل بس)
زهره:( ياسمين، ، بسم الله ،، ما حاجه اسمها العرس يتاجل بعد ده الناس تقول شنو)
كوركتا قلتا ليها:( كلكم همكم الناس بس ماف زول شايل همي انا)
زهره:( طيب خليك من الناس.. م فكرتي في ايهاب? م فكرتي ممكن يحصل ليهو شنو? ياسمين ايهاب بحبك شديد و انتي عارفه كده، ، و الله ممكن يحصل ليهو حاجه لو اجلتي العرس بعد ده.. ايهاب مبسوط شديد بالعرس م ممكن تجي تخزليهو كده.. ياسمين خلي العرس في وقتو و لو بعـد العرس القلق و الخوف ده م راح انا بشوف ليك الحل البريحك.. طيب?)
سكتا...
زهره مدت يدها مسح لي دموعي..
زهره:( قومي اتوضي و اقري قران شويه .. انا حامشي اعمل عصير و اجي ،، طيب?)
هزيت ليها راسي..
زهره طلعت ...
مشيت اتوضيت و جيت دايره اقرا قران.. جاتني ام ايوب قالت لي :( حبوبه قالت ليك.. البت حقت الكوفير جاتك)
قلتا ليها:( طيب)
و مشيت نزلتا معاها...
