صحيت بليل بكوابيس و حيوانات جاريه وراي و انا جاريه و بكورك ،، صحيت من النوم بكورك و لقيت روحي عرقانه و جسمي مسخن.. بقيت بستغفر .. و حاولتا انوم تاني..
الصباح حكيت ل زهره الحلم..
زهره:( انتي شكلك خايفه من العرس شديد)
قلتا ليها:( م خوف.. م عارفه.. بس مقلقه شديد و متضايقه)
زهره:( ماف حاجه بتخليك مقلقه ،، ايهاب بحبك و شايلك في عيونو ،، ماف سبب بخليك تقلقي.. الشيطان بلعب بيك ساي)
قلتا ليها:( في حاجه م طبيعيه)
زهره:( ماف شي.. اقري قران بس لمن تقلقي بتبقي كويسه و استغفري كتير)
حاولتا افهم زهره الانا حاساهو بس م فهمتني.. سكتا خليتها..
جا ايهاب لقانا قاعدين انا و زهره..
ايهاب:( ياسمين.. قومي اجهزي ماشين نختار العفش)
قلتا ليهو:( م الليله ي ايهاب)
ايهاب:( ياسمين الزمن مشي و م في صالحنا.. يلا قومي سرعه)
زهره:( صح يلا قوومي)
قمتا لبستا و مشينا..
م كان عندي مزاج اختار ااي حاجه و شايفه العفش ده كلوو شين شديد ولا عاجبني..
ايهاب بقي بختار و انا بقول ليهو ااي حلو عشان امشيهو بس عشان نخلص من موضوع العفش ده..
خلصنا اختيار العفش،، كلو كان بزوق ايهاب و طلعنا ..
في السكه..ايهاب كان مبسسوط..
ايهاب:( العفش حلو شديد صح?)
قلتا ليهو:( اي حلو شديد)
ايهاب: ( و مع الديكور حق البيت جد حتطلع شقتنا تجنن)
قلتا ليهو:( اي صح)
كنت برد ببرود عكس ايهاب..
ايهاب باستغراب:( ياسمين انتي م طبيعيه)
قلتا ليهو:( ماف شي )
ايهاب:( والله م طبيعيه،، في زول ضايقك? )
قلتا ليهو:( ماف شي ي ايهاب)
مدا يدو مسك يدي جريت منو يدي بزهج..
كوركتا فيهو:( انتبه لشارع قدامك)
و ربعتا يديني...
ايهاب عاين لي باستغراب و كشر وشو ..
لمن وصلنا ضربتا لابوي قلتا ليهو دايره اجي راجعه م دايره اقعد هنا.. ابوي سالني في شنو و كده..
قلتا ليهو:( ماف شي بس دايره ارجع..)
ابوي حنسني و هداني قال لي:( انا الحاجي و بنتفاهم.. )
قلتا ليهو :( طيب) ...
ايهاب قاعد في مكتبو شغال في اللابتوب.. تلفونو دقي عاين لقي رقم ابوي..ردا
عبدالرحمن:( السلام عليكم)
ايهاب:( و عليكم السلام ي عمي.. كيفك?)
عبدالرحمن:( كويس الحمدلله.. انت كيفك? و ابوك بقي كيف?)
ايهاب:( كويسين الحمدلله)
عبدالرحمن:( الحمدلله... ي ايهاب.. ياسمين مالا? في حاجه مضايقاها?)
ايهاب:( والله ي عمي ماف اي زول سالها.. بس م عارفها مالا.. الايام دي متغيره شديد.. بقت طوالي زهجانه و متضايقه ،، حتي انا بقت م طايقاني)
عبدالرحمن:( غريبه شديد ،، ياسمين عمرها م عملت كده)
ايهاب:( والله ي عمي انا ذاتي مستغرب فيها ،، بسالها في شنو بتقول ماف شي)
عبدالرحمن:( عارف كل يوم بتضرب لي تقول دايره ترجع مصر هنا)
ايهاب استغرب..
ايهاب:( ترجع? )
عبدالرحمن:( اي ،، والله جد قلقت بي ،، ايهاب عليك الله شوف لو في حاجه مزعلاها ،، و خلي بالك منها لحدي م انا اجي)
ايهاب:( والله ي عمي خاتيها في عيوني)
عبدالرحمن:( عارفك م بتقصر ي ولدي.. يلا في امان الله)
ايهاب:( مع السلامه)
ايهاب قلق شديد بعد مكالمه ابوي...خلي الشغل و قام طلع..
ايهاب جا البيت لقاني واقفه في المطبخ بعمل في عصير ،، ايهاب:( ياسمين.. تعالي دايرك)
قلتا ليهو:( طيب)
ايهاب:( يلا سرعه)
قلتا ليهو بزهج:( كويس جايه)
طلع قعد في الصاله ،، طلعتا شايله كبايه العصير قعدتا .. ايهاب كان زعلان شديد..
ايهاب:( في شنو ي ياسمين? شنو البخليك تقولي لابوك دايره ترجعي)
سكتا..
ايهاب:( ياسمين.. ممكن تكوني صريحه معاي ،، في زول ضايقك?)
قلتا ليهو:( م عارفه بس متضايقه شديد م عارفه في شنو)
ايهاب:( خوف و قلق يعني? وله شنو? انا م فاهم)
قلتا ليهو بزهج:( ياخ م عارفه م تسالني)
ايهاب:( من متين انتي بتكوركي فيني كده)
قلتا ليهو بزهج:( وريتك م عارفه م تسالني كتير ياخ)
ايهاب بقي مستغرب فيني..
قلتا ليهو:( عن اذنك مصدعه م متحمله شي)
و قمتا مشيت فوق..
ايهاب تاني م سالني ولا اتكلم معاي خاالص ،، ابوي جا و جا عرس اميره و البيت كلو مشغول معاها و في كميه ضيووف ...
حضرتا لي فستان مع البنات.. لبسنا لون وااحد مع بعض ،، العرس كان حلو شديد و اميره طلعت تجنن.. و الناس كلها مبسووطه.. الا انا، ، حاولتا اكون مبسوطه م قدرتا ،، ايهاب جا قعد جمبي و اتونس معاي جاملتو بس شويه.. تاني قام مشي يسلم علي ناس ،، كنت قاعده براي في الطربيزه ،، جات مياده قعدت جمبي..
مياده:( مالك مكشره?)
قلتا ليها:(ماف شي)
مياده:( لسه مع الصداع انتي?)
قلتا ليها:( اي م راح م عارفه مالو)
مياده سكتت و ابتسمت..
م ركزتا معاها.. م كنت متحملا اي زول بالذات هي..
كنت سايقه عربيه اميره ،، و الصداع مع الحفله تعبني شديد ،، اخر الحفله م قدرتا اتحمل قمتا طلعتا برا ،، لاقاني امجد برا..
امجد:(ماشه وين? )
قلتا ليهو:( البيت، ، مصدعه شديد)
امجد:( م حتحضري الجرتق?)
قلتا ليهو:( لالا يلا)
و طلعتا رجعتا البيت.. م كنت فاهمه ااي حاجه في عرس اميره ولا قدرتا
انبسط مع الناس..
نتلاقي😊
