بليل جهزنا ماشين العرس.. انا و زهره و اميره.. ايهاب و سامي مستنيين في الحديقه جينا طالعين ليهم..
سامي:( ماشاءالله.. تلاته اقمار مره وحده)
بقينا نضحك..
اميره:( بطل بكش يااخ)
ايهاب قال بتريقه( يلا ي قمرات.. اتاخرنا)
بقينا نضحك..
ركبنا مع اميره.. و سامي و ايهاب مشو بعربيه سامي..
دخلنا مع بعض.. قعدنا.. الحفله كانت رهيبه.. الناس كلها بترقص .. قعدتا في نص ايهاب و اميره...
بقو يعلقو و يتكلمو مع بعض.. بس انا ساكته بعاين بس.. كان اول مره احضر عرس سوداني...في مصر كنت بعرف سودانيين اصحاب ابوي بس م حصل حضرتا اعراسهم.. ابوي و امي كانو بمشو و انا بقول م عايزه امشي..
شويه قامو سامي و زهره و اميره مشو يباركو و يجاملو العرسان.. بقيت انا و ايهاب بس..
ايهاب:( قومي امشي معاهم)
قلتا ليهو:( لالا )
ايهاب:( بتعرفي الاغاني السودانيه دي?)
قلتا ليهو:(بعرف كم اغنيه بس.. اغاني مصطفي سيد احمد.. ابوي كان بشغلا في البيت و العربيه طوالي.. بس الباقين م بعرفهم)
ايهاب:( احنا عندنا اغاني و فنانين..تقول لمصريين ديل انتو شنو)
ضحكتا قلتا ليهو:( كويس طيب)
ايهاب:( تحبي اعرفك عليهم?)
قلتا ليهو:(الفنانين?)
ضحك..
ايهاب:( لا طبعا.. الاغاني السودانيه)
قلتا ليهو:( اوكي .. ممكن)
قال لي:( طيب)
بقي كل م الفنان يغني اغنيه.. بقول لي اسم الاغنيه و الفنان الاصلي حقها..
العريس اصرا علي سامي في نهايه الحفله انو يغني اغنيه.. سامي في الاول رفض.. بس اصحابو شجعوهو..وافق يغني جزء من اغنيه..
وقف مع الفنان.. الفنان غني مقطع.. وسامي غني مقطع.. ياااخ جد صوتو اجننننن.. لمن خلص المقطع الناس دي كلها صفقت ليهو و كوركت.. انا و ايهاب وقفنا مع الناس بقينا نصفق ليهو..
راجعين في العربيه..
اميره:( ياخ سامي ده جد صوتو دماار)
قلتا ليها:( ااي والله.. قلتا ليهو غني.. بس قال لا)
زهره:( بخاف من ابوي...ابوي م بحب الغناء و كده)
قلتا ليها:( و ابو سامي برضو برفض?)
اميره:( ابو سامي قااعد في اوربا.. عندو الحاجات دي عاديه م معقد ذينا هنا.. م اظن يرفض)
قلتا ليها:( خلاص يقول ل عمو محمد ابوي موافق بس)
اميره:( محمد م برضي بعمل ليهو مشاكل سااي.. و امنه اختي م بترضي تزعل محمد اصلا)
قلتا ليها:( و الله خساره يضيع صوتو ساي يااخ.. م شرط يعمل حفلات و كده.. بس يكون في اغاني مسجلا بصوتو )
اميره:( ي ريت والله)
رجعنا البيت.. لقيت ابوي مافيش.. لقيت عمو محمد قاعد تحت في الصاله و مكشر... حسيت في حاجه.. طلعتا غرفتي غيرتا و رقدتا...
بعد شويه سمعتا صوت ناس جايطين.. سمعتا صوت ابوي بينهم.. قمتا جريت نزلتا.. لقيت ابوي و عمو محمد واقفين بجوطو و بكوركو مع بعض.. و عمتي اميره و حبوبه واقفين..
عمو محمد:( اسمع ي عبدالرحمن.. كلامي م بعيدو..انا حجزتا لامي و حتعمل العمليه بعد يومين هنا و خلاص)
عبدالرحمن:( امي م بتعمل عمليه هنا.. انت زعلان ليه? كل مصاريف السفر و العمليه علي انا...انت دخلك شنو?)
محمد:( كيف دخلي شنو? انا كبير البيت ده و كلمتي تتسمع.. لو م داير اهو الشارع ارجع من محل م جيت) حبوبه:( محمد.. م تتكلم مع اخوك كده)
عبدالرحمن:( ده الانت دايرو.. دايرني ارجع.. م راجع ي محمد...م حاخلي ليك البيت تاني... انا قااااعد هنا و حانقل شغلي هنا و حاعيش هنا.. كفايا زمان حرشتا علي ابوي بعد م كان موافق علي عرسي خليتو يرفض.. انت قايلني م عارفك عملتا شنو...بس عشان انا ساكت)
محمد:( ابوي براهو م بحب المصريين و رافض انا م لي دعوه... انت ماشي تجيب لينا حلبيه من الشارع عايز تعرسا و تدخلا بيتنا و تشيل اسمنا)
انا اللحظه ديك صرختا بدون م احس.. دايره ارد عليهو.. لقيت ابوي رفع يدو داير يدي محمد كف.. محمد ثبت ليهو يدو... انا و اميره بقينا نصرخ.. و حبوبه بتبكي.. جو جارين امجد و ايهاب.. و سامي.. ابوي و محمد بقو يتضاربو مع بعض.. انا انهرتا من الموقف.. قعدتا علي السلم و بقيت ببكي... اميره واقفه بتهدي فيني...و الاولاد بحجزو في ابوي و عمي... فجاه حبوبه وقعت علي الارض.. كلهم صرخو و جرو عليها... انا حيلي برد م قدرتا اقوم..
محمد و امجد و ابوي و سامي.. رفعو حبوبه و جرو علي الشارع.. و اميره معاهم.. جو نازلين سميه و امنه برضو جرو علي برا.. زهره قعدت جمبي حضنتني و بقت تهدي فيني.. ايهاب طلع علي بيتهم فوق يجيب مفتاح عربيتو.. انا حاولت اقيف علي حيلي جيت واقعه م وعيت بحاجه.. زهره بقت تصرخ..
زهره:( ايهاب.. الحق ياسمين)
ايهاب جا جاري رفعني... دخلني غرفه تحت..
ايهاب:( جيبي ريحه ي زهره)
زهره مشت...
ايهاب:( ياسمين.. ياسمين اصحي)
زهره جابت ريحه شممني ليها حتي وعيت..
بقيت ببكي..
زهره:( اهدي ي ياسمين ماف شي)
ايهاب:( اهدي.. اهدي خلاص.. زهره اعملي ليها عصير)
زهره مشت تعمل لي عصير..
ايهاب:( ياسمين.. بطلي بكي ياخ...اهدي عليك الله)
مسك لي يديني الاتنين بيدينو...
و انا م قادره اوقف بكا... زهره جابت لي كبايه عصيرر.. ادتني م قدرتا اشرب..
قلتا ليهم:( عمو محمد نبذ امي قال حلبيه من الشارع)
ايهاب:( م تشتغلي بكلام ابوي.. ابوي بقول ااي كلام و خلاص.. م تزعلي روحك)
زهره:( ابوي طول عمره كلامو كده.. م تزعلي روحك عليك الله)
ايهاب:( زهره شوفي تلفوني وله من تلفونك اضربي اتطمني علي حبوبه)
زهره:( ااي صح حبوبه )
و قامت مشت..
ايهاب شال كبايه العصير اداني ليها..
قال لي بصوت حنيين:( عليك الله اشربي شوويه بس)
شلتا الكبايه شربتا حبه و اديتو الكبايه..
ايهاب:( تاني.. حبه بس)
تاني شربتا و اديتو الكبايه ختاها في الطربيزه..
قلتا ليهو:( انا دايره ارجع.. م دايره اقعد هنا.. انا بكره السودان ده)
ايهاب:( ليه كده.. م عشان حاجه وحده و بسيطه تكرهي كل الناس)
قلتا ليهو:( م بسيطه.. ابوك م بحترم زول...و نبذ امي.. امي في رحمه ربنا.. و لا يجوز علي الاموات الا الرحمه.. كيف يتكلم عنها كده?)
ايهاب:( عارف ابوي غلطان.. و كلامو كلو غلط و م من حقو يقول كلام عن امك ولا عن زول تاني)
نتلاقي😊
