#ريفية
بقلم فدوى الحاج
-١٦-
نهله رجعت سريرها واقتنعت انو هي صاح وماكانت غلطانه في حكمها على عبد الله هي دايره راجل يكون سندها وعبدالله من اول اختبار غلط وغلط مابغتفر..تاني يوم الصباح الكل صاحي مبسوط بااجواء العرس وفرحان لي عماد لانو تعاملو راقي وطيب مع كل الناس امنه ونهله والبنات بعد شاي الصباح بدو يرصو في الخبيز وفي جزء تاني بنظف ويبخر العقد كان بعد صلاه الجمعه خالتو أسيا رسلت امنه لي عماد في الديوان بالجلابيه والشبشب وكمون يسفوو من العين..عماد كان بتكلم مكالمه فديو مع احمد وبحكي ليهو انو فرحان ومامصدق انو حايعرس حبيبتو احمد كان مستغرب بقول معقول الحب يعمل في الواحد كده!امنه جات داخله الغرفه وقالت لي عماد انو يلبس لانو الزمن جاء بعد ده وادتو الكمون والمويه قالت لي ده من العين واتحصن عماد ختي الابتوب على التربيزة وبقى يضحك قال ليها امي القالت ليك ابلعو صاح ..احمد شاف امنه وبقى مركز في حركاتها العفويه وضحكتها امنه قالت ليهو اي بس العين حق ابلعو عشان امشي لانو ماحاامشي الا اشوفك عماد قال ليها حاضر بلعو وقال ليها شكرا امنه طلعت وعماد قال لي احمد ابو حميد لقاهو سرحان تاني نده علي حتى احمد رد قال ليهو وصلت وين احمد قال ليهو معاك يلا عشان ماتتاخر بعد العقد بتصل عليك وربنا يسعدكم وقفل بعد قفل من عماد بقى سرحان انو اول مره بت تجذبو بالطريقه دي ..مراه ابوهو جات داخله الغرفه قالت ليهو تعال الفطور قال ليها ماجعان جات قعدت جمبو قالت ليهو الله يرضى عليك ياولدي ماتعمل في نفسك وفينا كده ده قضاء وقدر واليوم تم ماتشيل نفسك ذنب حرام عليك نفسك والله معذبها بالشغل وعدم النوم والاكل حتى الضحك حرمتو عليك امك قاطعها طوالي قال ليها انا ماشي استحمى الصلاه وقتها دخل..شال الجلابيه ودخل الحمام قفل على نفسو وقعد يبكي بحررقه كل ماتنفتح سيرتها وجعو بزيد واحساسو انو هو السبب ما مخلي يعيش حياتو..مراه ابوهو كانت سامعه صوتو وواجعها شديد حالتو بقت تدعي وتستغفر. .عماد بعد لبس مشى لي امو سلم على راسها وقال ليها رضاك قالت ليهو راضيه عليك وربنا يسعدك ويتم ليك على خير وزغردت ليهو عماد وعبدالله وابوهم والرجال طلعو على الجامع محمد اتاخر كان بتكلم مع امو لمن جاء طالع صادف أمنه ماشه بيتهم بطريقه عفويه قال ليها اها طالع كيف ما عريس عريس😉قال ليها اول مرة البس جلابيه امونه ضحكت علي حركاتو قالت لي ماشاء الله تبارك الله❤️ودخلت البيت هو انبسط شديد ومشى وهي كانت مستغربه من كلامها وعفويتها معاو..استحمت وصلت الجمعه بعد خلصت سمعت اصوات الزغاريد عرفت انهم عقدو فتحت الدولاب تفتش حاجه تلبسها مالقت💔فتحت دولاب لينا هي متأكده لو لبست منها لينا حاتعمل ليها مشكله بس هي ماعندها حل غير كده لقت ليها اسكيرت كبدي وبلوزة سودا حلوة لبستهم ولبست طرحه فيها كم لون وشبشب اسود وعملت كحل وطلعت كانت حلوة شديد وبسيطه لينا لبست في بيت العرس فستان بنفسج مع الجسم وطرحه بيضاء وفل ميكب..كل الناس علقت علي امنه انو حلوة بعد المباركات البيت بقى جايط بطلعو في الغداء جاء محمد وكم ولد يشيلو الصواني محمد من شاف امونه تنح فيها اول مرة يشوفها لابسه كده اتمنى انو يغطيها من عيون الناس..
عند الرجال كان في مديح وكان في زحمه الناس دي كتيرة شديد ابو عماد زول حارة وبجامل وكمان عشان شغل التجارة بعرف ناس كتيرة غايتو النسوان تقوم وتقع لحدي ماكفو الرجال وبداو يرص للحريم امونه والبنات تعبو شديد بعد خلصو من الشاي امنه قالت لي خالتو أسيا حاامشي البيت وارجع لمن طلعت شافت ابوها في الصيوان مشت ليهو سالتو اكلتها قال ليها الحمد لله قالت لي داير حاجه اعملها ليك قال ليها لالا عقبال ما افرح بيك عروس محمد شاف امنه وعرف انو ده ابوها بعد امنه دخلت البيت محمد مشى لي ابو امنه..
