امنه كانت جايبه الشاي وسمعت الكلام الأخير دخلت ليهم الشاي وطلعت الليل كلو كانت بتفكر كيف حاتعرس واحد تاني غير محمد هي حبتو ولا ده إعجاب عشان اول ولد يكون قريب منها بس انا حااعمل شنو لو ابوي سألني عن رأي في العريس وارفض كيف😭امنه نامت ساعتين وصحت مع وقت الصلاه استحمت وصلت وجهزت الشاي ولبست عبايتها وطرحتها وبقت منتظرة ابوها يجي يقول ليها اطلعي بعد شربو الشاي ودعت امها ولينا وطلعت مع ابوها لاقت في الشارع خالتو أسيا واحمد سلمت علي خالتو أسيا واحمد برضو سلم على خالتو أسيا ووصتو يهتم بي امنه ..امنه سلمت علي ابوها وركبت أحمد ودع عمي عباس ووصاهو برضو على امنه وانو لمن يصلو يتصلو عليهم في تلفون لينا..
محمد كان في المستشفى زهجان كان نفسو يسافر مع احمد بس هو اخد إجازات كتيرة من المستشفى ومارضو ليهو علي الاجازة دي..قال أحمد اسي بكون طلع من بيت ناس خالتو أسيا اسي لو كنت هناك كنت شفت امنه❤️محمد اتصل علي أحمد. .احمد وامنه كانو ساكتين ولمن جاهو الاتصال حس انو جاء في وقتو الموبايل كان في العربيه أحمد فتح الاسبيكر وقال ليهو حمودي محمد قال ليهو ياخ ماتقولي الاسم ده مش كفايه على امي😂أمنه اتنفضت لمن سمعت صوتو اتمنت ترد هي كان نفسها تسالو لي ما جاء عشان يشوفها ولي ما ودعها! !
محمد قال ليهو اها تجهيزات القافله كيف شكلك متحمس المره دي احمد قال ليهو والله محتاج أغير جو وحاسي انها جات في وقتها اها وانت كيف والمستشفى محمد قال ليهو عليك الله مستشفى شنو استمتع بالجو هناك وشايف قالو القافله حقتك كلها بنات يا بختك مش زي كل ماامشي قافله بكون اغلبيتها اولاد احمد ضحك علي هبل صحبو😂امنه كانت عايزة تموت من الزعل
بعد محمد شاغل احمد قفل منو ومشى علي شغلو ..احمد قال ليها ده محمد صاحبنا انا وعماد كان حضر العرس برضو زول مجنون ودمو خفيف انا بعتبرو اخوي انتي عارفه يا امنه انا وهو اصحاب من تمانيه سنين ماحصل افترقنا ولا اختلفنا قرينا في لندن وقعدنا هناك سبعه سنين ورجعنا السودان لينا سنه قالت لي ماشاء الله ربنا يديم الاخوة والمحبه بينكم قال ليها امين محمد ماعندو اخوان بعتبرني اخوهو قالت ليهو وانت عندك سكت مسافه تاني قال ليها كان عندي اخت بس اتوفت وعندي اخ من ابوي قالت ليهو ربنا يخليكم لبعض ويرحم اختك قال ليها آمين قال ليها انا اتكلمت مع ابوك في موضوع دراستك اتلفتت ليهو مخلوعه قالت ليهو لي قال ليها ماعارف بس حبيت اساعدك ووريتو انو في منحه ممكن اتوسط ليك وهو قال بفكر قالت ليهو شكرا ليك بس انا مادايره مساعده اذا ماشالوني بي نسبتي مادايره قال ليها أمنه الخرطوم ما ذي هنا كل حاجه بتمشي بس بالواسطه النسبه دي اخر شي بعاينو ليهو انتي أدخلي واثبتي نفسك في دراستك ويازوله ماتعتبريها مساعده واني بمن عليك بس انا ماعايزك تخسري حلمك وتضيعي سنه من عمرك عشان تنتظري تقدمي السنه الجايه امنه اقتنعت بي كلامو وقالت ليهو ربنا يسهل ان شاء الله وتسلم على انك وقفت معاي وانت مابتعرفني حتى قال ليها العرفتو ده بكفيني . .هو انتبه على نفسو وسكت وامنه مع حركه العربيه والاغنيه الهادئه المشغلها احمد نامت من دون ماتحس واحمد كان براقب فيها وبيبتسم..
لينا كانت في الاوضه واتزكرت الظرف مشت طلعتو من الضلفه وقالت حاتشتري بالقروش مكياج وكريمات مغصه في أمنه طلعت القروش وانتبهت انو في ورقه طلعت وبدأت تقرا فيها..
