صباح جديد
نضت رفدت تيليفوني لقيتها ال 11 منضتش بكري منبعد نشوف ليزابال تاع جاد اليوم يقتلني سور يكون منارفي
رحت توضيت و صليت وهبطت لتحت لقيت ماما تحط في الفطور
عبير : صباح الخير ماما
ماما : صباح النور
رحت نقعد ونشوف الماكلة هذيك قدامي رحت ديراكت نتقيا ( حشاكم ) و ماما شادتلي شعري
كي كملت غسلت ندور عند ماما نلقاها تضحك
عبير : عجبك الحال ماما راكي تضحكي عليا
ماما : دوك عرفت وعلاش ماكيش تحملي دارك و راجلك ، الرقاد بزاف و القيا دوكا
عبير : مفهمتش
ماما : يابنتي راني حاسة بلي راكي اونسانت
عبير : صااااح
ماما : ديري تاست وشوفي
كيما كان الحل رحت للفارماسيان جبت تاست و دخلت للدار رحت ديراكت نديرو حتى سمعنا لاصونات راحت ماما تفتح الباب وانا نشوف زوج خطوط ( ياك زوج خطوط معنتها ايجابي خاطيني هاذ العفايس ) و بديت نعيط و نسوطي دخل عليا جاد
جاد : واشبيك دخلتي في عقلك عبير
عبير : اونسانت اونسانت راني اونسانت جاد
جاد : صح
ماما : هههه يا ربي على المهبولة مبروك عليكم انا نخرج نخليكم
جا جاد عنقني وقعد يدور بيا شحال فرحت
جاد : ايه كيفاش عرفتي
عبير : شريت تاست
جاد : نتي رحتي تشريه
عبير : شكون حبيت يروح يشري نبعت ماما
جاد : واش وصيتك ماشي قتلك متخرجيش وحدك
عبير : جاد متقلقنيش دوكا انا و وليدي
جاد : ههه خلاص ايا نروحو نشوفو طبيبة
عبير : ايه
المهم بدلت حوايجي و رحنا لعند طبيبة حمدلله كلش لاباس عيطنالهم كامل خبرناهم و كامل فرحو بابا يوسف ماما زهيرة ماريا و جواد
كي كنا موليين
عبير : جاد هاذي الطريق ماشي تاع دارنا
جاد : لالا تاع دارنا
عبير : جاد حابة نروح عند ماما
جاد : حبسي مديري كيما دراري صغار
عبير : اهئ اهئ وعلاش جاد
خزر فيا واحد الخزرة عينيا مزدتش طلعتهم
حتى رقدت فالطونوبيل كي نضت نشوف روحي في شمبرة كبيرة و شابة جات عيني على واحد البارسو رحت نجري نشوف فيه عجبني بزاف
حتى دخل جاد
جاد : عجبك
عبير : ايه بزاف هذا تاعنا ؟
جاد : ايه عمري تاعنا و هاذي دارنا ارواحي نوريهالك
عبير : و الدار لوخرا بعتها
جاد : هههه لالا خليتها باش في الحمل التاني انشاءالله نزيدو نبدلو الدار كلما تكوني اونسانت تحبي تبدلي الاجواء اوموان كاين دار واحد اخرى
عبير : جاد سمحلي كي خليتك تبدل الدار
جاد : ماشي خسارة في مرتي و يمات ولادي
............. بعد مرور كم شهر
اليوم رانا مجموعين كامل في دار ماما زهيرة ( جاد عاود شرالها دار كبيرة ) و المناسبة هي ...... ماريا جابتلنا بوبون هههه يشبه بزاف لباباه شحال يفرح جواد كي نقولو بلي يشبهلو دوكا دورة زوج يقول وليدي يشبهلي ايا نحكيلكم واش صرا في هاذ الشهور
جاد دا كونجي و يوسف و جواد هما لي استكلفو بالخدمة و قدر جاد يعوضني في اليامات لي راحو وعرفت بلي راح يجينا طفل ماريا كرشها خرجت نشفا هذاك النهار فالليل كي عيطولنا و قالونا بلي ماريا راهي فالسبيطار حتولد قلبتها بالبكاء قعدت نسمع في العياط تاع ماريا و قاعدة غير نتفكر نهار نولد انا و الحمدالله كلش جاز بخير ودوكا رانا كامل في الفيلا حتا ماما و بابا عرضتهم ماما زهيرة للعشاء اليوم
ماما زهيرة وجدت الماكلة من كل نوع كملنا العشاء و قعدنا ساهرين و نضحكو حتى سمعت لاصونات ايا قتلهم انا نروح نفتح الباب شكون نلقا زعما لقيت اسماء
عبير : واش تسحقي
اسماء : حابة نهدر مع جاد
عبير : معندك ماتهدري معاه ياك دراهمكم و رجعناهم الطلاق و ديتيه واش تسحقي قولي
كي سمعو العياط كامل جاو
جاد : اسماء واش راكي تديري
اسماء : جاد راني حابة نوليلك معليش نقبل مرتك برك اقبلني نوليلك
عبير : متحشميش نتي تهدري معا راجلي هكذا
جاد : عبير ادخلي لشمبرة
عبير : راك تحاوز فيا ايه هايليك اديها و انا نساني
جاد : واش راكي تهدري بديتي تخلطي
عبير : انا لي راني نخلط ولا هي قول اه ......ايييييييي اي كرشي
جاد : عبير وشبيك
عبير : متمسنيش اهئ اهئ كرشي اهئ اهئ
داوني لعند الطبيبة لي نجوز عندها
جاد : راهي مليحة
طبيبة : ماشي قتلكم متخليوهاش تتقلق ولا تعيي روحها واش صرالها
جاد : مشكل صغير برك
طبيبة : هذا المشكل قريب ما طيحلها البيبي بالاكو عليها
خرجت من السبيطار وعاملوني معاملة الملكة ههه حكاية اسماء مزادوش جبدولي عليها عرفت من ماريا بلي هذاك النهار جا باباها داها بارسكو مكانش قابل الاهانة لي دارتها بنتو
بعد مرور سنة
اليوما رانا مجموعين كامل مرة اخرى في دارنا اليوم حبيبي امير ولا عندو عام درنالو حفلة كبيرة جاو فيها الحباب و الصحاب و العائلة
عبير : امواح وليدي حبيبي كبر ولا في عمرو عام
جاد : ياك قتلك متزيديش تبوسيه
عبير : جاد هههه وليدك تغير منو
جاد : كي وليدي نخليك تبوسيه مي شوية ما تسماطيش احشمي
زهيرة : هههه ربي يخليهلكم
ماما : انشاءالله
جواد : احم حنا عندنا عفسة حبينا نقولوها ...... قريب يولي عند فارس ( وليد ماريا و جواد ) اخ ولا اخت
زهيرة : ماريا اه مبروك عليكم
ماريا : يسلمك ماما
جاد : service rapide
عبير : جاد
جاد : وشنو
عبير : احشم
باركنا لجواد و ماريا كامل
وهاذي هي حكايتي لي بدات بموظفة بسيطة لي انذلت من طرف مديرها و بعدها عاشو قصة حب
هذي هي نهاية حكاية عبير وجاد نتمنى تكون عجبتكم راني نسنى في تقييماتكم للحكاية في التعليقات شحال تمدولها من عشرة قولولي واش عجبكم فيها واش ماعجبكمش ومتنساوش تابعو حكاية " هل يمكنني ان احبك " راني رايحة نكمل نكتبها قريبا
أنت تقرأ
احببت من اذلني باللهجة الجزائرية
Romansaابطال القصة عبير و جاد ؛ عبير تخدم في شركة تاع جاد ؛ اللي يولي يذلها و يهينها بسبب ..... تعرفوه كي تقراو الحكاية راح يقدرو يحبو بعضهم هاذي نشوفوها من بعد ننصحكم تقراوها لانها بزاف هايلة #قصص_جزائرية #حب #dz
