معاذ ومنار °° باللهجة الجزائرية °°

✌ الحلقة 33 ✌

~~~~~~ عند ماريا ~~~~~~

ماريا كانت شمسيتها عالية كيما يقولو مناضتش بكري بصح كيفاه تنوض بكري وهي اللي رقدت والدموع في عينيها وكلام امين يتعاود في وذنيها ناضت من بلاصتها تحس في روحها تعبانة للخر وراسها يوجع .. حطت يديها على راسها وتضغط عليه باه يخفف السطر وبعدها لبست بانطوفتها وراحت للدوش غسلت وجها غسلاتو وجات راجعة لبيتها تسمع في هدرة قاوية في الصالون وصوت راجل هي تعرفو مليح وتقدر تفرقو من 100 واحد يهدرو
تبسمت بعدها مشات هذيك التبسيمة خاطر واقعها انو هي مرت امين وكمال لازم تنساه احسن وتتفادا المشاكل دخلت للصالون وهي متبسمة

ماريا: على السلامة هاذي غيبة ما طل علينا ما والو نسيتنا

كمال: الله لا يغيبك *وسلمو على بعضاهم* راكي تعرفي الخدمة ولازم نثبت روحي فيها

ماريا: المهم راك بخير والخدمة هاذي هي الخبزة

كمال: الحمد لله وانتي

ماريا: نحمدو ربي

كمال: مبروك عليك الخطبة ربي يكمللكم ويهنيكم ببعضاكم *كمل كلامو وتنهد 😩*

باباها وامها وحتى هي استغربو وين علابالو

ماريا: الله يبارك فيك لعقوبة ليك 😩

امها: ايه ماريا وامين شافو بعضاهم وتفاهمو بيناتهم وانت وكتا نفرحو بيك

كمال: انا صايي على كل نتلهى بخدمتي برك

ماريا: ايه وخدمتك مليحة امورك ماشية فيها

كمال: ايه نحمد ربي

زبيدة: مدامك هاني في خدمتك نشوفولك عروسة

ماريا شافت مع امها

زبيدة: عندي بنت اختي شابة وعاقلة اذا تحب نشوفوهالك

ماريا ناضت من بلاصتها ماقدرتش تزيد تسمع كلام امها اللي تخمم في مصلحة بنت اختها ومهملة مصلحة بنتها وهي عارفة مشاعرها وساكتة

بشير: وين رايحة

ماريا: رايحة لبيتي

ومشات وكمال يتبع فيها بعينيه عرفها بلي ماهيش قابلة بهاذ الخطبة وهاذ الزواج كامل وهاذ الشي باين من عينيها اللي منفخين من البكا تنهد وحمل روحو الغلطة مكانش لازم يغيب عامين كاملين عليها

ماريا دخلت لبيتها غلقت الباب وتحكي مع روحها: هاذي ام صح اواه انا لقاوني في كاش بلاصة بلاك ماشكيتش نكون بنتها ودير هكذا

راحت لفراشها فرغت غشها فيه خاربطاتو كامل وطيشاتو وقعدت على شط سريرها وتتنفس

ماريا: اواه انا نخرج برا ندور كون نبقى هنا نتخنق

وبعدها هزت فراشها وسڨمت بيتها وبدلت حوايجها وزادت فاست باسكو البرد برا وخرجت شافها باباها حبسها