عشق في بلاد حروبها لا تنتهى 2 (طرابلس ياغارقة في الدم)

البارت 3

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
البارت 3
.
.
في الحلقه السابقه
وسكر عليها الخط ومشي لمشوااره اللي اول ماوصل طلع تليفونه البيلة وتصل:الو اني في لمدينة وين مكانك ، تمام عرفته ، شن لابس ، تمام ماتوقفش عليا نمدهالك في طريق وعدي في حالك يابرو
سكر التليفون ودرس سيارته قدام الميدان ونزل وهوا يلبس في برنوسه فوق طقيته لنزلها علي وجهه و جبد كيسة سوده وحطها في بطنه وسكر عليها سريتت الجيبوطي وحط يديه في جيوبه وخش بين زحمت الناس واول ماركز علي شخص لابس تي شرت ابيض وطقية حمرة ويدور بعيونه علي حد ، فتح سريتت جيبوطيه وطلع الكيسه وهوا ماشي والولد جاي مدهاله من غير مايركز عليهم حد ولف ولا لسيارة وركب ولعها وهوا يحول في برنوسه ويحول في طقيته للوحها علي الكرسي لجنبه وتحرك بسيارته وقوي المسجل ...

قراءة ممتعة
#البارت_التالت

كلها ضربت ، عشقهم تعقيب ..
وراثه سبر ، عاداة وتقليد ..
يزيدو في النار حطب ، باش متوليش رماد ..
البير لتروا منه ، يعبوهولك رشاد ..
الغاية خراب العش ، يحضرو يفرقو ..
سم ضرب لمعاني ، في حلاوة السان يزرقو ..
اللي في القلب في العين يبان ، مستحيل يندس ..
ود الغيرك لتتمني ، النية مراية النفس ..
تكحل في ورقي واقف ، تعس علي كتافي ..
نضف روحك من داخل ، دمك مش صافي ..
ياداير يالااحد يغني علي ليلاه ..
شتي ريح ومطر ، في ودني لحن موج لبحر ..
لفخاطري كتبته ، في ليلة مافيهاش قمر ..
ياسهر الليالي يانبع الهواء ، جرحي ياحبيبي مش لاقي دواء.....
.
افكارنا زي زناقينا ، خاربة بدم ارواحنا 👊
(الياقوت)
.
درس رعد السيارة وهوا يشبح في الساعة للقاها 5 الا عشر دقايق ، نزل وهوا يسكر علي اتصال من رنيم ولبس طقيته ولبس فوقها برنوسه وسكر سيارته وتلفت يهرول .
.
نفخت رنيم وهيا تتلفت حولينها وقلبها من الخوف قريب يطلع من مكانه وهيا شاده تليفون رعد في يدها وتحاول تتصل برقمها بس كان يسكر عليها ومرة تشبح لتليفون ومرة تشبح حولينها ادور علي رعد نفخت وقالت بتمتيم:تو علي اساس كان جي وقف قدامي ح نعوفه اني واااك علاش مايودش ياوبي ستوك يااوب مايج...
وهيا قعده ماكملتش كلمتها سمعت صوت وراها:هي انتي
تلفتت رنيم طول وهيا ترفع في راسها ليه واول ماتلفتتله جو عيونها في عيونه .
رفع رعد حواجبه مع رفعة يده لقام بيها طاقيته من علي وجهه باش يزيد يشبحها زين وهوا قاعد سارح تلفتت لجيها التانيه وعيطت بصوت واطي:يااوبي موت بابا بوا بوا بسوعة والله تقتلني
تلفت رعد التالي وماعارفش علي من تدوي لانه كانت الدنيا زحمه ورجع تلفتلها ولقاها مشت بسرعة ، لحقها وهوا حاس روحه متبهول واول ماجي وراها قال:هاتي الهاتف من غير ماتشبحيلي
هزة رنيم راسها ومدتله تليفونه وهيا تشبح فيه كيف جي قدامها وخدي منها التليفونه ومدلها تليفونها اللي اول ماخداته تلفت رعد وشبحلها وبتسم وهوا يرجع يتلفت قدامه ومشي وخلاها تشبحله كيف مشي بين الناس وهيا قعدت واقفه تشبحله وبتسامته قعده بين عيونها وما فيقهاش غير صوت نور لجت شدة يدها وتشبحلها:شن صار
تلفتتلها رنيم وورتلها التليفون:خديته
نفخت نور بضحكه:الحمدالله ان شاءالله ديما مستورين
هزة رنيم راسها ورجعت شبحت علي الجيها لمشي منها رعد.
__
فتح حمزة باب البلكونه وطلع وهوا يشبح لتليفونه الجديد ولرقم ليتصل بيه ، ضيق عيونه ورد:ألو
جاه صوت:فوت امه التليفون وسكر فمك ماتقدرنيش انت
زاد حمزة ضيق عيونه وعرفه:ياوهمي برا يا..... وربي ماني ساكت وكان ماخليتك تاخدلي واحد جديد مانتسمه
وسكر في وجهه وهوا يتلفت علي صوت محمد:انت قد كلمتك
نفخ حمزة وطبس راسه وهوا يشبح لتليفونه:واللهي ماني عارف قصدي ازح بعيوني شفته خنبه وياريته خنب وسكت تي قعد يسب فيا ويتحلفلي لما وجهته
محمد:الجبان عمرة مايواجه افعاله
حمزة ضرب الحيط:وهوا جبان ومانه راجل واني لما ناخد حقي
قرب محمد ولف يده علي رقبة حمزة وتلف قرب علي حديد الحماية وشبح لوطه لزحمة الناس وقال:وانت خديته حقك يكفي كنت راجل وقلت قدام لعرب هوا لخنبه ووجهته قدامهم وخليته مكشوف حتي وكان هوا مش معترف لكن طيحت قدرة وشككة في امانته
هز حمزة راسه:صح كلامك
بعد محمد وبتسم وهوا يشفشف في شعر حمزة وقال:خليه بصحة عليه التليفون لطيح قدره قدام الكل وعتبرة صدقة عليه
ضحك حمزة:كلامك جي في وقته مسحلي علي قلبي
محمد ضحك وهوا يشبح لرؤوف لجاهم وهوا يقول:تي مالقيت الا الدور السابع ياراجل يدهشو الدروج
محمد:فيه اسانسير
رؤوف رفع يديه: حسستني ليبيا ضيها يفرين 24 ساعة
ضحك محمد و رؤوف كمل بضحكه:هي حمزة
حمزة:هي
محمد:كنكم مازال
رؤوف:مش عندك مشوار
محمد شبح لساعة وقال:اي وقضتني هي طالع معاكم.
__
فتح معتز الملف وحطه قدامه:شوف هدا ###### مستولي علي 2 مليون علي خدمة طريق ## والطريق ماتستحقش ل 200 الف
وفتح ملف تاني : وهدا وزير #### ...
وقبل مايكمل قص عليه:تعرف انت علي من تدوي
رفع معتز راسه وهوا يرفع في حواجبه:اي نعرف
وقعمز زين وهوا يسكر في الملفات وكمل:حني علاش درنا ثورة ونقلاب امالا باش نحولو اللي زيه واللي مش هامه ستفادة لبلاد وتقدمها ومطالب الشعب مش مهم من هوا ولا شن شاد ولا شن هيا قوته
وقف وهوا يلود علي مكتبه وقال بضحكه:ماتخدش لكلام والوعود لقالوها علي التقدم وعلي ليبيا الجديدة علي محمل الجد ، سلم خوي برا لوح الملفات هدي لانه كان بتقعد ادور وتحفر عليها ح يدفنوك في حفرة مالها اول لا اخر
ضيق معتز عيونه و وقف:قصدي حني قدرنا نطيحو طاغى اللي ماقدرو عليه اكبر دول العالم مانقدروش نطيحو شوية شلتت زي هدو
وسكت معتز وهوا يشبحله كيف شد التليفون ويكتب فهم طول وقال وهوا يطبس يلم في الملفات لي علي الطاولة:تمام فهمتك
واول ماتلفت وقفه صوته:خلي الملفات وطلع برا
تلفتله معتز ووقف شوي يشبحله وبعدها لوح الملفات علي الطاولة لين تشرتعو وقال:جايكم يوم وقولها معتز ال### قالها
وتلفت معتز وطلع وهوا قريب يتفجر ، بدي يحس بشك في كل لحايطين بيه ، مش معقوله كل مسؤول يمشيله يلقاه مغطس يده حتي هوا في جرم سرقة لبلاد او عاطينه فلوس مسكريله فمه او مهدادينه ومايقدرش يدوي ، حس انه الكل زي بعضهم مصلحتهم اولا من مصلحت الشعب والبلاد ، افعالهم عكس كلامهم لقالوه والوعود لوعدو بيها الشعب المسكين طلع كله وهم .
__
نفخت آيات وسكرت تليفونها وشبحت لسهي لتخلط في الكيكة:اوووف مش معبرني بكل
سكرت سهي الخلاط وشبحتلها:نهارك لحرف كان يشدك أشرف والله لما يقددك
آيات:كش برا وبعيد خيرك تفاولي انتي
سهي:مانفولش بس فكيك انتي قدام عيونه ومن صغرك يعرفك كان يبيك تو يجيك من الباب
آيات:بس مرات يبي يعرف كان اني نبي ولا لا امالا علاش مكلمني
سهي:ياغبية مرات أشرف مقايلة جربها خيرك انتي ماتزبطيش حركات اشرف
خافت ايات:زعما
سهي:ماتبعديهاش
شبحت آيات لتليفونها لعلن وصول رسالة مسنجر ، فتحاته وهيا تشبح في رسالة منه(سامحيني امبارح كنت مع صحابي مالهيتش)
شبحت آيات الرسالة ورفعت راسها لسهي لقالت وهيا تحط الكيكة في الكوشه:الباب لجيك منه الريح سده وستريح ، ماعاش تردي عليه
رجعت آيات شبحت لرسالة التانية لبعتها(شن جوك اليوم ان شاءالله خير)
طلعت آيات من المسنجر وسكرت تليفونها وهيا خاطرها ترد بس في نفس الوقت حست انه كلام سهي مقنع لانه أشرف يطلع منه لعمايل هدي .
تنهدت وهيا ترجع تشبح لسهى:تعرفي الكلب سامر شادها وراي قريب يفددني
سهى:قتلك قولي لاشرف ولا لبابا
هزت آيات راسها:لالا فكيني والله يقيمها أشرف فوق راسه كان هدا المهم اهو ماعاش نمشي لحوشهم وخلاص
سهى:تقول مش خو أمل ازح مطيبها هيا
هزت آيات راسها:اي حسبي الله فيه خسرني صاحبتي
سهى:لا خسرك لا شي اهو تو تجيك هني اكيد فاهمه هيا ليدير في خوها
رفعت آيات كتافها:اكيد
__
قعمز أحمد(الصقر) قدام آسامة لتلفت للأفندي حامد وقال:لا امتي بيقعدو هكي لازم نديرولهم حل نبو نخشو لمنطقتنا ازح
أحمد(الصقر):لكلاب محاوطين المنطقه زين مش قادر حتي نمشي نشوف الوالد متحلفيلي لو كان يحصلو عليا نمشي فيها
الافندي حامد:زودوها ل..... نفوتو اسبوع الجاي علي خاطر عيد لستقلال وبعدها نقصفو امهم ونهجمو علي مقراتهم ومانبيش ولا واحد منهم حي ماترحموهمش بكل باش يولو عبرة لغيرهم
هز أحمد (الصقر) راسه:تمام يافندي 
ووقف وهوا يشبح لآسامة لوقف حتي هوا وقال:اني بروح نشوف بوي من بعد أدنك يافندي
الافندي حامد:برا اكيد وسلمنا علي الحاج
طلع آسامه وطلع وراه أحمد(الصقر).
تلفت آسامة لأحمد(الصقر) وقال:شني مني مافيش مشيات تانية
أحمد(الصقر) رفع حاجبه:تي برا ياراجل شوف بوك برا
ضحك آسامة:هههه غر دبرنا مشيه لغدوة ماعاش قادر نتحمل من غير البوخة ازح
أحمد(الصقر):رد بالك تدمن ياراجل عمي عبدالله مش ناقصه همك
نفخ آسامة:تي شني ادمان هيا بجو مدايرها
هز أحمد (الصقر)راسه وطلع تليفونه:اني قتلك المهم برا شوف بوك برا
مشي آسامة وقال:نتلاقو غدوة ياطير
رفع أحمد(الصقر) يده وهوا يتصل:تمام ياطيري
واول مانفتح الخط قال:ستااااااحشتااااااك
ضحكت مريم:ياللهول لهدرجة
أحمد(الصقر) :واكتر وربي تي خاطري فيك لا المليون يابنت
ضيقت مريم عيونها:احمد قداش مرة نقولك الالفاظ هدي مانحبش نسمعهم
احمد(الصقر):شن قولت تو اني عادي خاطري فيك نبيك
مريم:قول نبيك شن خاطري فيك عفوا منك اني مش غبيه يعني نفهم
احمد (الصقر)ضحك:هههه تمام ياعفوا انتي نبيك اني
مريم بتسمت وهزت راسها:ههه هلبا انت
بعد أحمد (الصقر) التليفون من علي ودنه واول ماشاف من خش عليه انتظار رد وقال لمريم:عيوني انتي بعدين نكلمك جتني مكالمة مهمه
مريم نفخت:تمام ماتنسانيش
أحمد(الصقر):مستحيل هي سلام
سكر أحمد (الصقر) من مريم ورد طول:الو محمد شن لخبار برو
محمد:تمام الحمدالله مغير اتصلت نبي نتلاقو
أحمد(الصقر) :اي اي غدوة تعالا لنفس المقر لتلقينا فيه اول مرة تمام
محمد:تم
__
في الليل ...
حط آسامة صفرت لعشي قدام بوه وقال:وهدي مكيرينه من تحت يدياتي
بتسم عبدالله:قتلك مش لازم اونا عمتك جابت كسكسي امبكري
آسامة ضيق عيونه:تو كسكسي مصقع رايح وباين من شكله مش مدايراته بنية بجي جنب مكرونتي لتفحفح لأخر الشارع
ضحك عبدالله:هههههه لا واللهي مايجي
آسامة:هههه ايوا هي سمي بالله
قعدو ياكلو ويهدرزو لين كملو ، نهض آسامة الصفرة وخش قعد يغسل في لماعين وهوا يدوي بروحة:بالله تو كان متجوز ره متريح من هدا كله معقوله اخرتي نغسل لماعين هالله هالله عليك يادنيا
تلفت لتليفون لشرين مسح يديه وخدي رد:ايوا صلاح شن جو يابرو
صلاح:ماشية تي وينك ياراجل مغطس
آسامة:واللهي لاهي في الخدمة وفي بوي ماعاش نفضه بكل حتي لروحي ماعاد لهيت
صلاح:خسارة فاتك ولامس خلقة سهرية مع الشباب اطلع طول
آسامة ضحك:هههه خوانين شني مني مافيش سهريات تانية وحبيبات زي هداكا اليوم
صلاح:فيه والله خلقة حبوب يعيشوك تلاته ايااام في نعيييم وستجمام روعة
آسامة:لا لا حتي يوم ياسر ياراجل عندي خدمة  ههههه يكفيني الروج اني
صلاح:ههههه خواف تمام نحسبك في حفلة لخميس
آسامة:مية مية
__
نفخت رنيم وقعمزت علي الكرسي:مداييني عقده بديت ماعاش نحب جيانهم
نور سكرت الشيشمة وهيا تنفض في يداها من لمية:تعدليش عليهم عارفتيهم خوات مرت بوك انتي جاهلات وكانك كرجه يعني علي الاقل مستفيده انه اطيري في العرسان لي ماتبيهمش بالكروجيه هدي
ضحكت رنيم:اي والله هههههه
نور قربت وشحت الكرسي قعمزت قدام رنيم:حقا قوليلي شن صار امبكري
رنيم:واااه اسكتي لما طلعتو قدامي قريب صبيت مصاويني من الخوف
نور:لالا ماتخافيش اصلا كنت مقررة لو شفتك قدامي بندير روحي دايخة
ضحكت رنيم:هههه كفو والله اختي
غمزتلها نور:امالا شن المهم حلو هههههه
رنيم رفعت كتافها وهيا تزمط في ريقها ودكرت عيونه السود والناعسات وتقول مكحل وعلي جبهته جرح كأنه مضروب بموس ونازل علي حاجبه المفلوج وكأنه مجروح من الصغر وقعد أثر الجرح ولحيته كيف طالعة ولبسه كله اسود بالسروالة وتيشرته وجيبوطيه وحتي طاقيته مبين عليه تقول من عصابة.
طربقت نور صوابعها في بعض قدام وجه رنيم وقالت:هي هي وينك
ستاقطت رنيم:هااا نعم
نور بتسمت وقعدت ترقص في حواجبها:شكله جلطه
رنيم:فوقة حاله ههههه قصدي ماشفتاش زين كان منزل الطاقية علي وجهه هلبا بس مقبول عادي مش حلو هلبا
خشت عليهم مرت بوهم أسماء وهيا ادخل في صفرت لعشي:ماتتحشموش مقعمزين هني فاتحين معاد ومسيبين الصفرة قدام خواتي تراجو فيهم يجيبوها
وقفت رنيم:نحسابوكم مزال
أسماء تلفتت وقالت قبل ماتطلع:اغسلو لماعين وديرو الشاهي بسرعة
قلبت نور عيونها ووقفت تلم في لماعين من الصفرة:خداامات خدااامات
كملو غسل لماعيين ودارو الشاهي.
وخشت نور ترقد في خوها الصغير في الدار .
خشت عليها رنيم وهيا تشبح لتليفونها ليتصل.
رفعت نور راسها وشبحتلها:مني
رفعت رنيم كتافها:نعوفش زعما اود
نور:فكيك تو يطلع واحد حصله
ضيقت رنيم عيونها وقالت:بالك يطلع جنتل ويطلعني من المسخوة ديه اس بود بنديو ووحي كبوياء وبنغلط صوتي
وقربت رنيم من نور لضحكت وردت:الو
واول ماجاها صوته تلفتت لنور وهيا تفتح في عيونها علي وسعهم وتسمع فيه:اعطيني اختك لكبيرة لمبكري جتني يافرخة
ضيقت رنيم عيونها وتشجعت:انت ماتتحشمش علي وجهك علي فكوي تمام واول شي اني لكبوا وتاني شي اني لجيتك امبكوي واخيوا شني تبي مازال ها تفضل
رفع رعد حاجبه وبتسم:متأكده انتي لجيتي
رنيم شبحت لنور لتزربز جنبها وأشرتلها بمعني اسكتي وقالت:اي متاكده وباوك الله فيك ماقصوة وديت التليفون ومع السلامة خلاص توا
رعد:وين وين ياكرجة ستني
تكنطت رنيم وقالت:احتوم نفسك
رعد:وحتي اني محترم شن تشبحي فيا قدامك سحتوت
رنيم فتحت فمها وقالت بغيظ:تفضل خوي شن تبي
رعد:لا خوك لا نعرفك سادني خواتي اني ماعنديش نية في وحده تالته
رنيم:شني تبي انت من الاخيو
رعد:ههههه وربي اطلق كرجه شفتها في حياتي بالله كم عمرك صوتك علاش بيبي هكي
ضحكت رنيم:وانت شن دخلك
رعد:خير امك انتي جاوبي ومادخلكش كم عمرك
رنيم:مانبيش نجاوب هي شن بديو
رعد صيح:ياعنفيتك كم عمرك
نور كانت ملصقه ودنها في التليفون من التالي لين نخلعت وشبحت لرنيم:قوليله ياعن فيتك قوليلة
رنيم ردت بخوف:عمري 20 سنه
رعد اتكه علي الكرسي السيارة ورجع قال بصوت هادي:انتم ماتجوش الا بصياح
رنيم قالت بخوف:شن تبي انت
رعد:عادي نبي نتعرف
رنيم:واني مانبيش
رعد:مش مهم المهم اني نبي
ضمت رنيم شفايفها وشبحت لنور لحطت يداها علي خدودها وقالت بتوشويش:خفت اني
هزت رنيم راسه بمعني حتي اني وسمعت صوته رجع قال:شن اسمك ياسنفووة هههههه علي قولتك
ضيقت رنيم عيونها وقالت بخوف:رنيم
ضيق رعد عيونه:رنين
رنيم:رنيم
رعد:اااه قصدك الرانين زي الايكو والجو هدا لي في المستشفيات وله
حطت نور يدها علي فمها وهيا شادة ضحكتها لين رنيم دفتها وقالت بغل:هي انت احتوم نفسك واني قتلك رنيم مش رنين
ضحك رعد:اهو تنطقي في الرا ولا غير اديري في الجو
نفخت رنيم وقبل ماتتكلم قال رعد:اقلبي وجهك توا
فتحو نور ورنيم فمهم وقبل ما ترد رنيم سكر الخط في وجهم وخلاهم يشبحو لبعض بصدمة علي كلامة .
نور ضحكت:هههه نبصم بالعشرين انه مش طبيعي
رنيم:ووبي لا حقيو هي
نور رجعت رقدت علي السرير وهيا تضحك:هههههههه طلعتي الرنين في الاخير هههههه
__
طلعت ماجده من المظبخ علي صوت باب الحوش لنفتح واول ماشافت سفيان صفقت وقالت:طيب والله فيك هدا وين عرفت عندك حوش
نفخ سفيان:ماتبديش فيها يمه باللهي عليك راسي يوجع فيا لانم
ماجده:زيد انفخ انفخ ماتحساباش حرام هدا واللهي ماقاتلني حد غيرك
وخشت للمظبخ وهيا تكمل:ربي ياخدني ويريحني من لما كبرتو وماريت يوم مقوم زي العالم والناس
تنهد سفيان وخش لدارة وهوا يحول في كبوطه ويطلع في تليفونه من جيبه وتلوح في فراشه و تصل بيها واول ماردت بتسم علي صوتها لـ جاه:الو حبي ستااااااااحشتك خيرك امس ماترديش عليا
سفيان حك شعرة وقال:هوا كان عندي خدمة ومافضيتش وفليل رقدت زي الميت
رفعت إيلاف حاجبها:يعني نسيتني
سفيان:وفي حد ينسي روحة
ايلاف:هههه واو بليز ماتخجلنيش
ضحك سفيان وقبل مايرد فتح فارس عليه الباب وخش زي الإعصار:واااخيرا روحت
سفيان من الخلعة سكر علي ايلاف الخط وقعمز:تي خيرك ...... ياراجل هكي يفتحو الناس الباب
فارس:اي لما يبدا واحد زيك كلب ومسخ هكي يفتحو عليه الباب
وقف سفيان:فااارس ادكر اني اكبر منك اعرف شن اطلع من فمك
ضحك فارس وهز راسه:اي كبير مشاءالله في العمر والعقل عليه السلام
وقرب من سفيان وقال:تي مضحكنيش باللهي عليك خليت فيها انت احترام ولا ادب كل يوم تروح سكران طينه ولا تقعد بسبوع مانشوفو في خليقتك ومخلي امك قريب تموت في جرتك وتبيني نحترمك
دف سفيان فارس وطلع من الدار وهوا يطلع من الحوش ويقربع في الباب علي قوته لين ماجده طلعت من المظبخ مخلوعة:خيركم
طلع فارس من الدار وشبحلها وهوا يتنهد:شي شي
ماجده:خيرك يافارس خيرك حني ماصدقنا روح للحوش وتجي انت تهجج فيه علاش
مسح فارس علي وجهه وفتح الباب وهوا يقول:ماعاش عرفتك اني يمه واللهي ماعاد عرفتك كيف
.
.
ايلاف:خيرك سكرت في وجهي
سفيان:خش عليا خوي زي الاعصار سكرت من غير قصد
تنهدت ايلاف:تعاركتو
سفيان:زي العادة مافيش حاجه جديدة
ايلاف:معاه حق الصراحة ، حبيبي فكك من الدوشه هدي انت عارف انه مكانك وخدمتك غلط
نفخ سفيان:اووووف ياايلاف ماتبديش حتي انتي
ايلاف:باهي باهي خلاص سكتت
وسكتت شوي وبعدها قالت:وينك انت
سفيان:نتمشي في الشارع
ايلاف:خاطري نشوفك تعالا من روشن الحمام
ضحك سفيان:فكينا يابنت ماشعفتيش من المرة لفاتت طبة علينا روان
ايلاف:تي ماتعدلش عليها غر تعالا هيا مدام خوتي وبوي ماروحوش من حوش عمي قعدين
سكت سفيان شوي وبعدها قال:باهي هي تعالي
وقفت ايلاف بسرعة وطلعت تجري.
كانت روان تتفرج في وسط الحوش واول ماشافتها طلعت من الدار تجري صيحت:خيرك
وقفت ايلاف وتلفتتلها:شي بس بنخش الحمام
رفعت روان حاجبها:شن بديري
ضيقت ايلاف عيونها:مصح وجهك شن يديرو فيه الحمام هوا تره
روان:ان شاءالله اديري فيه وضيفته مش حاجه تانية
قلبت ايلاف عيونه وتلفتت خشت وسكرت علي روحها وهيا تقرب تفتح في الروشن اللي اول مافتحاته شبحاته واقف وعاطي بظهرة
ايلاف:بست ياحلو
تلفت سفيان وضحك:مجنونة
ايلاف:هههه ستاحشتك
قرب سفيان ومدلها شكلاطه لين ايلاف ولو عيونها قلوب قلوب:امتي جبتها هدي هههه
سفيان غمزلها:خشيت الدكان بسرعة بسرعة عارف حبي يحبها
خدتها وهيا تحضن فيها وتضحك بفرح بشوفته:ياروحي نحبك واللهي
سفيان:حتي اني نحبك
وقبل ماسفيان يزيد يتكلم سمع صوت وراااه:سفيان
تلفت سفيان طول وايلاف من الخوف سكرت الروشن بتقربيع .............
.
.
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
اسم الأغنية/ ليلة من غير قمر لـ mc zofree