عشق في بلاد حروبها لا تنتهى 2 (طرابلس ياغارقة في الدم)

البارت 23

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
البارت 23
.
.
.
في الحلقة السابقة
رائد:اطلع منهم ماتخليهمش يدمروك زي مادمروني يارعد
رعد صيح لين السفاو لكيف طلع من باب الحوش شبحله وهوا يقول:يا......... ياسر يارائد قتلك مش ح يصيرلك شي
رائد:اني لازم نسكر
رعد تلفت وهوا يشبح في خوته لجايين يجرو:رد بالك تخاف مستحيل نخليك عندهم لو كان اخر يوم في عمري لما نطلعك
رائد:عارفك هدا علاش نحبك هههه
غمظ رعد عيونه وقال بتأتر لين عيونه دمعو:حتي اني نحبك ياخوي
بتسم رائد وسكر الخط ودموعه نزلو وهوا حاس بضيق حاس بشعور يتملك فيه شعور النهاية ، شبح للباب وبعدها رجع شبح لتليفون وكتب رقم وتصل بيه...........

قراءة ممتعة
#البارت_التالت_والعشرون

راك مليانه دنوب ياعروسه ، راك غارقه بقتل ودم وجرم هلك 💔
.
.
.
اول مرة نشوفها بين ضباب وسط بحر ....
جيتها راكب لانش ناوي إنها تستقر ....
اول مكان وطيت فوق منه مناء الشعاب ....
نزلت ومستغرب عروس وفستانها ضباب ....
الرصاص في كل مكان مابيدي حيله ....
ماسك إسلاحي وردد ياطرابلس قوليله ....
إنفرض علينا نجوك من غير جميلة ....
لقينا تريس قالو حشومه مافيش برانية ....
حضنتني عزيز تبكي حسيت بأمي بين إيديا ...
قلتلها ياأمي كلنا واحد والقدر فرقنا ....
لو نعلمو بيها ره ثرنا من زمان وقربنا ....
تي الله لا يسامح لكان السبب ان إعتقلنا ....
اولاد بنغازي ونعشقك كيف واحد من اصغارك ....
حتي لو مربيتش فيكي دمي يسيل عشانك ....
بلاكي مستحيل اروقو ونكملو لفراح ....
ياروح الوطن نعرفو قدرك من غير إسلاح ....
.
*بشوق جينا ليك ، حلم وأملنا فيك ، نبنوك يد بيد ، وندعو الله يحميك ، مهم عليك بعدنا ، ترابك دفي يجمعنا ، من غيرك يوحدنا ، واحد ونقسمنا إثنين ....
.
ياطرابلس نكلم فيك ردي جاوبيني ....
نشم فبنة الظلم وزناقيكي تشكيلي ....
انتي لبيكي تكمل المسيره يالبثول ....
عريسك غفل عنك كثرو عرسان البثرول ....
اسمع ، خطف ، سطو ، دم ....
قهر ، حزن ، رعب ، غم ....
شوارع العاصمه متليت بقطاع الطرق ....
عاشت في كئابه لعارض مصيرة الحرق ....
إنعدام الامن في حوشك وجيك الموت ....
أطفال بريئه تقتل ردت فعل الشعب إسكوت ....
استهداف المساكن عادي تمت إضحوكه ....
تي حط الظالم ع المظلوم لبستوهم في الخوطه ....
يالعن بوها السلطه لتجيب الإرهاب والقتل ....
وين أهداف الثورة وين ميزان العدل ....
فرقونا ....
بعدونا ....
منقسمين في الري والأصل والولاء يبونا ....

.
*بشوق جينا ليك ، حلم وأملنا فيك ، نبنوك يد بيد ، وندعو الله يحميك ، مهم عليك بعدنا ، ترابك دفي يجمعنا ، من غيرك يوحدنا ، واحد ونقسمنا إثنين ....
.
ياعاصمتنا ....
حقك علينا ....
كان فيوم قصرنا فحقك سامحينا ....
رد بالك تصدقيهم كان قالو كرهوكي ....
ماتصدقيش كان قالو رضو بالقسمه وسيبوكي ....
واللهي قبل كنا أجمل عاصمه نبوكي ....
درت فيكي أصحاب معزتهم جوا في القلب ....
فيكي إرجال وشيابين ونساء يتزنو ذهب ....
مقدر إستغرابك بس نا عارف كل شي فيك ....
طرابلس إسمك في قلبي لبيانو لغنيك ....
توحشنا ضيك ....
توحشنا فرحك ....
توحشت إصغار الزنقه يجرو فرحانين فظهرك ....
وعكست الليل ستاحشنا لقهويك وسهرك ....
توحشت نشوفك منورة في الشاشه ونا في داري ....
كنت نحلم نا قدام نحبب فيك إصغاري ....
لكن بإذن الله شده وتزول شوية صبر ....
ربي يزهي لفيك ويرحم لعدا للقبر ....
.
.
#اولاد _بنغازي_ونعشقك_كيف_واحد_من_اصغارك ....
حتي_لو_مربيتش_فيكي_دمي_يسيل_عشانك ....
.
.
.
سكر محمد باب الغرفة لي فيها رائد وطلع من ممر الزنزانات ومشي لمكتب الصقر اللي اول ماخش محمد عيط:ال..... وين آسامة اتصل بامه ولد الكلب
رفع محمد حاجبه وسكر الباب وتكي عليه:اولا ماعنديش رقمه ، وتانيا هدي بيش تعرف كيف تتصرف
شبحله الصقر وضحك بستهزاء ممزوجه بعصبيته لمش قادر يدرقها:لا واللهي تعالا ربيني وخلاص
وتلف لتليفونه لشرين تحت نظرات محمد اللي قعد يشبحله بصمت كيف تحمحم وقعمز علي كرسيه وحط التليفون قدامه عبي الطاولة وفتح الخط ودار المايك :شني مني ياوسيفة وصلاتك رسالتي
.
.
.
خبط السفاو الكرسي برجله لين مريم نخلعت وهيا تتكمش في بعضها وتشبح لرعد لمتكي علي الباب والسفاو لواقف قدامها وهوا شاد التليفون وفاتح المايك....
السفاو:قسما عظما يااحمد قسما عظما لما نوريك الويل
الصقر:احمد ههههه ده زمااان توا الصقر وماادراك ماالصقر
السفاو:دواك عندي يا...... هما كلمتين سلمني خوي والا واللهي
وشبح السفاو لمريم خطف وتلفت وكمل:والا واللهي واللهي لما نتعشه بالحلوة لمعانا
زادو دقات مريم لقعدت تشبح بخوف ورعب لرعد والسفاو وهيا تسمع في صدمت عمرها في صاعقه خلتها تنشل في مكانها وهيا تسمع في رد الصقر: وهيا ليك اعتبرها هديه مني هههههه قبل مانقتلك انت وخوتك استمتع معاها شوي
ضيق السفاو عيونه وهوا يتلفت لرعد لقعد يخبط علي الباب وقرب وهوا يصيح:يا.......... ول..... وربي تصير حاجه في خوي لما نقلبها فوق راس .........
سكر الصقر عليهم وخلا رعد لسب ويلعن وهوا يطلع وخلا السفاو لتلفت وهوا يحدف في التليفون علي الحيط لجي بين عشرة ورجع تلفت لمريم لدموعها ينزلو زي لمطر وتبكي بحرقه وبخيبه وبقهر ....
رفعت عيونها لسفاو لقعد يشبحلها شوي وبعدها طلع وهوا يسكر عليها في الباب ......
.
.
.
.
سكر الصقر التليفون وشبح لمحمد لبعد ماسمع كلامه ضيق عيونه وقال بعدم تصديق لكلام الصقر:بجديات بتخليهالهن
الصقر وقف:ماتهمنيش اصلا اني لهمني نجيب راس السفاو وخوته والباقي لقلب ليقلب
وطلع وخلا محمد اللي مسح علي شعره بصدمه وقال:يعن فيتك ياصقر ياعن فيتك انت وضميرك الميت
وضرب الطاولة برجله وطلع ............
.
.
.
قولو لها انني لن انساها ، لو كان الفراق هوا الموت 💔
.
.
فتحت نور عيونها بتعب وهيا تشبح لتليفونها لهز جنب راسها ، طلعت يدها من تحت البطانية بتعب وشداته وهيا تشوف في رقم غريب ، رجعت غمظت عيونها وفتحت الخط وحطاته علي ودنها وردت:الو مني
ضحك رائد:حبيبي ستاحشتك يانوارت حياتي
فتحت نور عيونها طول بصدمه وجتها صحه خلتها تنوض روحها تقعمز وهيا تاخد في نفس كبير وترد عليه بعبرتها:رائد
رائد:ياعيون رائد انتي
زاد صوت بكي نور لخلا رائد يضيق عيونه ويحس بضيق اكتر من الضيق والتعب لحاسس فيه وقال:باللهي عليك ماتبكيش وتحرقيني معاك ره دموعك يحرقو فيا يعدبو فيا يانور
مسحت نور دموعها ورجعت صوتها لكان هارب وقالت بنفعال:وين كنت اه وين  قريب هبلت عليك نحسابه ابصر شن صارلك وانت ولا هامك ولا معبرني كلبه
رائد:حشاك انتي حياتي كلها انتي حبي
نور زادت صيحت لين رنيم لي في البلكونه خشت طول وهيا تشبح فاها كيف تكلمت من بين دموعها لرجعو نزلو:كاني حياتك خيرك ماكلمتنيش اه كيف تخليني اربعه ايام من غيرك كيف تختفي من غير ماتقولي بنمشي
رائد:مه اني متصل بنقولك اني بنمشي
هدت نور طول وقالت بخوف:لقيت غيري
رائد بتسم علي ردت فعلها لمبين قداش خايفه من بعده:يحرم من بعدك
نور عيطت:كيف امالا ماشي كيف
رائد نزلو دموعه:نور اني نحبك
قالها بعبرة باينه في صوته لين لاحظت عليها نور:رائد خيرك فيك حاجه
رائد هز رايه ومسح دموعه لنزلو علي جروح وجهه:ماعاش نبيك تبكي وبس نبيك ديما فرحانه اعتبريني كأني ماخشيتش حياتك بكل
نور زادت تبكي:خيرك تدوي هكي خيرك يارائد اني مش فاهمه شي وحقربي وين كنت وانت وين وخيرك وشن فيك
رائد:مش مهم هدا كله المهم اني نحبك وكنت نبي نتزوجك بجديات نويتك بالحلال من كل قلبي خليها في راسك وحبيتك هلباااا
نور:حتي اني نحبك هلباااااا
بتسم رائد من بين دموعه لقعدين ينزلو:ماعاش تبكي باهي
نور:بتسيبني
رائد:مش بيدي
نور:كيف مش بيدك كييييف
رائد سكت وهوا يسمع في صوت انين بكاها تنهد وقال:ماتحرقينيش بدموعك مانقدرش عليهم
نور:باهي ماتسيبنيش باللهي عليك
رائد:اني نحبك هلباااااااا ردي بالك من روحك يانوارت حياتي ان شاءالله حياتك تكون كلها حلوة زيك ، نحبك
نور نفعلت وهيا توقف علي ركبها علي السرير وصيحت:لالالالا رائد ماتسكرش رائد الو الوووووو الووووو لااا لا وينك لااا
.
.
سكر رائد منها وهوا يبكي ، خلا روحه يبكي وبالصوت يبكي علي احساسه لقعد يقوله هدي النهاية ، يبكي علي روحه وعلي حياته اللي ماشاف منها يوم حلو .......
.
.
__
.
.
حضنت فرح مخدت أيات وهيا تبكي بالصوت وبقهر وكل دكرياتها مع بنت خالتها مع صديقتها واختها واعز ناسها بدو يرجعو ، برئتها عفويتها حركاتها وكلامها ، مقهورة من فراقها اللي مش متوقعاته ، مقهورة علي كل موقف دارتهولها وزعلتها فيه ، مقهورة علي كل كلمة قالتهالها ، مقهورة من الموت اللي خداها وهيا صغيرة خداها في ابشع صورة في ابشع موقف في ابشع وضع تتعرضله اي بنت في العالم .....
فتحت عيونها علي صوت رسالة تليفون آيات للقوه طايح قدام الحوش جنب شنتطها ، قعمزت فرح وهيا قعده حاضنه لمخده ، خدت التليفون وفتحاته وهيا تلقا في مجموعة رسائل ، خشت علي الرسائل وقرت الاسم #حلمي ، زاد صوت فرح في لبكي ودموعها غدشو عليها من الرؤية قعدت تمسح فيهم وخشت قعدت تقرا في الرسائل لباعتهم عمر (حبيبتي ) (باللهي عليك ردي عليا وكدبيهم) (علاش مشيتي وسيبتيني علااش ماعطيتينيش فرصه علاش قتلتي روحك وخليتيني نتوجع ) (انتي ماوثقتيش فيا وله انتي فضلتي الموت تحسابيني بنرفضك وله) (كيف تفكري هكي كيف اني نحبك اني نموت فيك وربي كنت ح نرضا بيك وناسيك كل لورهولك ولد ال......) (وربي ياآيات لما نجيبه وربي لما نقتله بديا ونوريه الويل زي ماخداك مني وحرمني منك) .....
حطت فرح التليفون علي السرير وحطت راسها جنبه وقعدت تبكي وتعيط بالصوت وهيا تنادي:آياااااااااااااااات آياااااات
قعدت تبكي وتنادي وخلت التليفون لوصلتله رساله اخيرة من عمر (انتي حرمتيني منك وقررتي لفراق وله قررتي تبعدي من غير ماتعطيني فرصه نوضحلك ونتبتلك اني راجل وحبيتك وح نقبلك بجميع حلاتك ، حرمتيني منك وقللتي من رجوليتي موتي وقتلتي معاك قلبي وطفيتي من علي حياتي الحب ، لكن وربي يآيات وربي بعدك يحرم ، من بعدك يحرم ياعمري )........
رخي عمر التليفون من يده بعد مابعت الرسالة وخلاه يطيح علي الارض مع دموعه لنزلو وهوا يتكي في راسه علي الحيط وخلا شهقات عبرته يزيدو ، وعلن استسلامه لدموعه لبدو ينزلو زي لمطر مع صوت آهاته وهوا يتمتم:علاش سيبتيني علاااش واللهي كنت ح نتقبلك واللهي كنت ماني مسيبك علاش ظلمتيني معاك علاش
.
.
اصعب مايشعر به الانسان ، هوا الخدلان من شخص ميت 💔
.
.
__
.
تاني يوم ....
.
.
وقف محمد قدام العمارة وهوا يشبح لتليفون لشرين ، بتسم وكان برد بس شبح السفاو نازل يجري وهوا يتكلم في التليفون ، حط تليفونه في جيبه وقال:سفااااو
تلفتله السفاو وهوا يسكر في التليفون:محمد
بتسم محمد:كيف الحال
هز السفاو راسه:تمام سامحني ياطيب غر مستعجل نتلاقو بعدين
قال محمد بسرعة:لو ترجا شوي تما عندي موضوع نبيك فيه ضروري
مسح السفاو علي شعره وهوا يشبح لسماء لمغيمه وقطرات لمطر لنزلت عليه ورجع شبح لمحمد وقال بعد لحظات:خليها مرة تانيه وراس حميدة غر عندي موضوع ضروري
ورفع يده طبطب علي كتف محمد وتلفت وكيف بيمشي وقفه محمد وقال:نا نخدم مع الصقر
رجع السفاو تلفتله طول بصدمه:كيف
محمد: عندي خطه بيش نطلعو رائد من غادي
السفاو قرب من محمد وقال بعصبيه:انت اللي....
محمد قص عليه طول:لا كان نبي نخبرة عن مكانكن ره جبته لعند هنا
ضيق السفاو عيونه:تعرف مكانه
سكت محمد شوي وقعد يفكر لو قال علي مكانه ح يهجم السفاو علي الصقر طول وح يريحو فيها هلبا ارواح ، تحمحم وقال بعد لحظات من الصمت:لا نا قعد جديد معاهم مش كل شي نعلم بيه
السفاو:باهي تقدر تعرف مكانه
هز محمد راسه:اي نقدر بس ارجو علي شوي وماديرو شي توا
سكت السفاو وقعد يشبح لمحمد وحس بعدم الثقه في نظراته لخلاه يقول:نا منساعده عشان عارف كويس هوا مادنبه شي في الجرم لديرو فيه ومانرضاش نعاقب شخص علي جرم خوته
وتلفت مشي ركب سيارته وخلا السفاو واقف حاير في مكانه.....
.
.
__
.
.
رفعت مريم عيونها في الباب لنفتح وخش رعد وهوا يحطلها في وجبه ووقف تلفت بيطلع بس مريم قالت بخوف ومن بين شهقات دموعها:باللهي عليكم سيبوني خافو ربي فيا عندكم خوات والدنيا دوارة ره
تلفتلها رعد وشبحها كيف زادو دموعها نزلو وصوت بكاها تعلا وهيا تشبحله بترجي ، رجع تلفت وطلع من غير اي كلمه وخلاها تبكي بالصوت العالي وحاسه بوجع في قلبها وجع من حياتها وجع من حبها لشخص الغلط ، غمطت عيونها بالقوة وتدكر في كلامه "".....:اكيد ح نختارك انتي تو من كبر عقلك بنفضل خدمه زي هدي عليك ...... :عليك من سيرة قتلك مليون مرة اكيد انتي الأهم من خدمتي ويجي يوم ونسيبها لكن مش توا فضي السيرة يامريم .....""
حطت يدها علي فمها وهيا تدكر في كلامه امبارح ""...: وهيا ليك اعتبرها هديه مني هههههه قبل مانقتلك انت وخوتك استمتع بيها شوي .....""
تلفتت لروشن وهيا تشبح في المطر لتصب وقالت وهيا تبكي:حسبي الله ونعم الوكيل فيك ياأحمد حسبي الله ونعم الوكيل ضيعتني خربت حياتي حسبي الله ونعم الوكيل فيك
#حقيقة
.
.
.
وقف رعد قدام لستراحة وهوا يرد علي تليفونه:ايوا
آسامة:شن الجو مافيا
رعد عرفه من صوته طول وقال وهوا يتنهد:اسمع قتلك ماعاش نبيع اني شوف غيري
آسامة:اخر مرة باللهي عليك تمو لحبوب من عندي
رعد:تي انم قتلك ماعاش عندي من وين بنخلقلك امهم ال.....
آسامة تعصب وعيط:تي ياولد ........ ماتبيش تبيع وله يا.......
رعد:برا...........
وسكر عليه التليفون وهوا يخبط علي الباب بعصبيه ورجع رفع تليفونه وتصل بالسفاو.........
.
__
.
.
.
نزل محمد من سيارته وهوا يشبح في آسامة اللي يتكلم في التليفون بعصبية وبصوت عالي وبعدها لوح التليفون علي الارض وهوا يشد في راسه بيديه...
ضيق محمد عيونه وسكر سيارته وهوا يرد علي تليفونه:ها رؤوف
رؤوف:شن صار مافيش اخبار
محمد:الاخبار عندكم
رؤوف:مافيش اخبار ياراجل تقول فص ملح وداب ماتصل بينا حد
محمد:سامحني فيها يارفيق كان مخطوفه ره اتصلو بيكم وطلبو فلوس او علي الاقل هددو
مسح رؤوف علي جبهته بتوتر وقال:شن قصدك هاربه مع حد انت عرفت حاجه وماتبيش تقول شكلك
محمد:لا قعد ماعرفتش شي عنها
وسكت شوي وبعدها كمل:نا مانبيش نطعن في شرفها حتي نحنا عندنا صبايا والدنيا تبرم خلينا نشوفو للقدام وبأذن الله نا مش مسيب موضوعها
رؤوف:باللهي عليك اول ماتعرف عليها حاجه اتصل بيا
محمد:بأذن الله
سكر محمد من رؤوف ورفع عيونه لوين ماكان واقف آسامة بس مالقاشي قعد يتلفت يدور عليه بس كأنه فص ملح وداب ، تنهد ولبس برنوسه علي لمطر لتقوت وخش للمقر وهوا يشبح في زياد كيف بخش مكتب الصقر:الصقر قعد
تلفتله زياد:اي يافندي
بتسم محمد وتخطا زياد وقال وهوا يفتح في الباب:قعد ماوليتش فندي لكن عجبتني
بتسم زياد وخش ورا محمد لاول ماشافه الصقر قال:باهي لجيت كيف بنتصل بيك
ضيق محمد عيونه وقعمز علي الكرسي:ان شاءالله خير
الصقر شبح لزياد لحط الملف علي الطاولة:هدا ملف البلاغ في قضيت البنت
شبح محمد للملف وقعد مركز في الاسم لاول ماقراه رفع حواجبه وشبح لصقر لقال:عرفنا وين هاربين السفاو وخوته نبيك انت تمشي مع الشباب
محمد جبد الملف وقعد يردد في الاسم في داخله وبعدها قال:هضا ملف البنت لخاطفينها
خطف الصقر الملف من بين يدين محمد وقال:مش موضوعك هدا المهم الشباب واتين نبيك بعد ساعة تطلع معاهم ونبي البنت تجيبوهالي حتي هيا
ووقف وهوا يشبح لساعة يده:توا الساعة 6 شوي تانيه واطلعو زياد تو يقولك علي مكانهم بضبط
وطلع وخلا محمد في صدمته يشبح قدامه
زياد تحمحم:هما في ستراحة في ضواحي عين زارة في واحد نعرفه شاف السفاو غادي واك.....
قص محمد عليه وهوا يوقف:وتي السيارات وقول لشباب يجهزو روحهم
وطلع وخلا زياد واقف مكانه:قعد ماكملتش الزح
ورفع كتافه وطلع برا وهوا يشبح في محمد لمشي جنب سيارته وشاد تليفونه وهوا يتصل بسفاو لاول ماشاف رقم محمد رد طول:ايوا
محمد:عرفت مكان رائد كان عندكم شباب تعالو اهجمو علي المقر
السفاو ضيق عيونه:اما مقر ووين
محمد سكت شوي وبعدها قال:بنقو لك لكن بشرط
السفاو:شن هوا
محمد:نبي البنت لمعاكم ماديرولها شي وتردوها لهلها
السفاو:اكيد هيا في الحفظ والصون وماحد قربها وبردها لعيلتها
محمد: تمام حني في مقر #### لي في #### واطلعو من مكانكم عشان عرفوه وهم توا طالعين جاينكن
السفاو خبط يده علي السيارة:الكلب تمام جايين
قال محمد قبل مايسكر السفاو:سفاااو
السفاو:هااا
محمد:مانبيش الدم يسيل واجد
السفاو:بسيل يامحمد نبو ولا مانبوش بسيل
سكت محمد وسكر من السفاو وهوا ينهد .......
.
.
.
.
الصقر:ركز علي روحك كان بتقعد هكي نهايتك زي حامد متلوح في المستشفي هدا كان مامتش
آسامة تلفت لصقر وقال والتعب امبين علي ملامحه:ادمنت ياصاحبي
وتنهد وهوا يشبح قدامه:ومش لاقي حتي حق ادماني ال.... مش قادر نتحمل ولا قادر نتحكم في روحي
الصقر:حدرتك من الاول لكن دماغك كاسح شوف روحك كيف وليت
ورفع يده وهوا يشد فيه من دقنه ويلفت في وجهه ليه:من وجهك واضح عليك الادمان شوف كيف خليت روحك
وفكله دقنه بعنف ووقف وقال:بعد من لتاخد فيه وتحكم في روحك خير ماتجيب اجلك بديك
ومشي وخلاه مقعمز وهوا يطلع في حبة كانت في جيبه وكانت اخر وحده ، حطها في فمه ووقف طلع من المقر علي رجليه.......
.
.
__
.
.
حطت ميسون بكرج القهوي علي النار وقالت:باهي اتصلي بأخته وخلاص شكله بالحق صايره حاجه كبيرة
رنيم اتكت علي الرخامه:لا اخته لا فكيني بعد لكلام لقالاته وبنتصل
ميسون:هبلتوني في جرتكم مش عارفه كيف صابرة وساكته مستغربه من روحي الحق
رنيم بتسمت وقربت حضنتها:لانك تحبينا هههه وحني نحبوك وه
ضحكت ميسون وبعدتها:حولي غادي وردي علي تليفونك غر نرفع لحناك القهوي
بعدت رنيم وهيا تشبح في من المتصل:اوووف هدي موت بابا ادواه
ميسون:خيرها امبكري اتصلت ببوك وعلي اساس قالي خليهم عندك اسبوع
رفعت رنيم كتافها:ماتستغوبيش لو غيو واية
طلعت ميسون وخلت رنيم ترد علي مرت بوها:الو
أسماء:شن مش ناويين تروحو ان شاءالله
رنيم قلبت عيونها:قلنا لبابا بنقعدو اسبوع علي خاطو قعدين جنب حناي مويضه وخالتي تخدم الصبح
آسماء:اللي هوا المهم الاربعاء الجاية لا لبعدها بجي الراجل بشوفك
رنيم ضيقت عيونها:واجل من
أسماء:راجل الجيران تي لجو اماليه شافوك بجي يدير مقابلة الشرعية ، المهم اهو قتلك قبلها بسبوع باش مديريش لعوج الزايد
وسكرت عليها الخط وخلتها فاتحه فمها وبعدها خبطت رجليها علي الارض:موض يوفعك ياأسماء موض يوفعك
خشت خالتها عليها وهيا مضيقه عيونها:تي ناس تحتنا ماعاش ترزمي برجليك وخيرك
تنهدت رنيم:اووووف اووووف
.
.
.
__
.
خدلوني وجيتك اناجي ياطرابلس ، كنك زدتي من خدلاني وغرقتيني بدم ضنوتك ياعروس 🔥
.
.
.
وقف الصقر علي صوت الرصاص ودوشة الشباب لبرا ، مشي لروشن وهوا يشبح في السيارات لخشو للمقر وهما يرمو في الرصاص ...
تلفت وهوا يجبد في سلاحة من علي الطاولة وطلع صيح:احمو مدخل المقر
مشو الشباب يجرو والصقر قعد واقف بين الممرات وهوا يتصل بمحمد بس ماردش رجع وتصل بزياد لرد طول:ايوا سيدي
الصقر:ولو بسرعة السفاو شكله سبقنا وهجم علينا
زياد:حاضر سيدي
سكر الصقر ورجع يحاول  يتصل بمحمد لكان قعد في المقر وهوا واقف قدام زنزانة رائد ويسمع في الضرب لبرا ، بتسم ودس تليفونه في جيبه وفتح الباب علي رائد لرفع راسه وشبح لمحمد لخش وقرب منه فكله الكلبشات من علي يديه بسرعة ووقف وهوا يمدله في يده:هيا صبي بسرعة
ستغرب رائد لقال:علاش
شد محمد يده وجبده خلاه يوقف:ماتبيش تطلع
رائد ضحك:اكيد نبي
محمد:بسرعة اطلع قدامي
طلع رائد ومحمد طلع وراه وهوا يطلع في سلاحه من خصرة ويلبس في التام علي وجهه باش ماحد يعرفه وطلعو يجرو من ممر الزنازين واول ماوصلو في المدخل شافهم الصقر لعيط:هي شدوه بسرعة
تلفت محمد لكان ملتم وجهه وشبح الصقر لكان مصوب اسلاحة عليه ورجع تلفت لرائد لواقف جنبه وهوا مصدوم ويشبح لصقر لصيح علي الشباب ....
ستغل محمد انشغل الشباب وغفوت الصقر لنادي عليهم وسحب سلاحة بسرعة وضرب رصاصه علي رجل الصقر ودف رائد ومشي يجري هوا وياه برا وخلا الصقر لقعد يضرب في الرصاص عشوائي من ألم رجله وماقدرش يجيبها لا في محمد لا في رائد لطلع وهوا مطبس زي ماقالة محمد ويمشو علي الحيط الحيط ، واول مارفع رائد راسه شبح رعد لجايهم يجري ، ضحك وفك يد محمد من مرفقه ومشي يجري لرعد بس قبل مايوصله جاته رصاصه في نص صدرة قدام عيون رعد لقرب يجري وماهاب انه تجيه رصاصه زيه وشده قبل مايطيح لوطه وهوا يعيط:راااااااااااائد
فقد رعد توازنه من رزن رائد وطاح هوا وياه لوطه بس قعد رعد شاد رائد في حضنه ودموعه نزلو وهوا يحط في يده علي مكان الرصاصه:رااائد
شبحهم محمد اللي حط يديه علي راسه بس تلفت علي صوت الرصاص لزاد وطبس مشي يجري ركب وحده من السيارات ودرسها قدام رعد ورائد حماية ليهم ونزل يجري وهوا يطبس لرائد لبين يدين رعد لنزلو دموعة علي وجه رائد مع حبات لمطر لخلوه يغمط عيونه مع دموعة لنزلو وتخلطو مع قطرات المطر ورجع فتحهم بسيف وكانو حمرررر وقال بتعب مع الدم لطلع من فمه:رع....د
زادو دموع رعد لبدي يبكي وهوا شاد بيده علي جرح رائد بالقوة وبيده التانية يمسح علي وجه رائد:تحمل باللهي عليك يارائد باللهي عليك تحمل ماتسيبنيش باللهي عليك
رفع رائد يده وحطها علي يد رعد لحاطها علي جرحه وشد فيها بالقوة وخدي نفس وهوا يحاول يدوي:نح..بك ي..اخ.وي
حول محمد التام من علي وجهه وقلبه ينتفض من المنظر لشوف فيه وفي رعد لقال:حتي اني نحبك ياخوي
غمط رائد عيونه بس رجع فتحهم بسيف علي عياط رعد:لالالالالا باللهي عليا لااااا انم انم انم مش يانموتو مع بعض يانعيشو مع بعض مش عدل يارائد مش عدل ياخوي
ارتخت يد رائد من علي يد رعد مع دمعة نزلت من عينه وهوا يشبح لرعد لصيح:لاااااااا لااااا ياخوي لاااااااااا
طبس محمد وهوا يمسح علي وجهه:ان لله وان اليه راجعون ان لله وان اليه راجعون
حط رعد يده علي عيون رائد وسكرهمله وهوا يحط في راسه علي صدره ويبكي بالصوت علي خوه يبكي بحرقه علي توأمه لستسلم للموت ، لستسلم بكل رحابة صدر ، وبكل قناعة ، من غير مايقاوم فضل يرد لربه ويسيب لحياة لماشاف فيها يوم حلو يسيب لحياة اللي ضحكتله وفي عز فرحته بيها غرست سكين في وسط قلبه وخدت روحه بين يدين خوه .............
.
.
.
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
اسم الاغنية / ياعروس لـ عيسي بن دردف