عشق في بلاد حروبها لا تنتهى 2 (طرابلس ياغارقة في الدم)

البارت 6

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
الحلقة 6
.
.
في الحلقة السابقة
مشي فارس وخش لداره وهوا يتصل ب سفيان لرد:ها وينك مش مروح
سفيان:لا بروح
رفع فارس حاجبه:غريبه
سفيان بتسم:اهو بنتم موضوعي هني ومروح
فارس:موضوع شن
سفيان:بنحول للشرطه القضائيه وبناخد تعين وبعيد علي الدوشه لكنت فيها وريح امي باش اروح نرقد في الحوش
فارس ضحك:تطور مشاءالله
سفيان:مش قتلي حسن من روحك
فارس:ماتخيلتكش بتسمع لكلام هههه كان هدا ره من امتك قلتهالك الكلمه
ضحك سفيان:مصحك هي اهو مروح

قراءة ممتعة
#البارت_السادس

صعيب علي في موت جاري نحق ، صعيب علي بيديا اللملم في جرحه نتجدا في نبضه يولي يدق 💔
.
نفخت ايلاف:اووووف اوووف ياحمزة انساه كان بتقعد تهدد فيه تو يحطك في راسه
حمزة:ويحط شن بيدير يعني اللي في يديا نقدر نحبسه بيه
وفتح تليفونه وهوا يوري فيها في الرسائل:شوفي كيف يهدد فيا عيني عينك نقدر نرفع عليه قضية ونوريهم انه هوا لخنب التليفون
ايلاف:وشن بتستفيد باه هي التليفون وعندك خير منه
رفع حمزة كتافه:حتي صاحب رؤوف قالي هكي وكلامه خلاني ماعاش يهمني غر يقعد بينه وبين ربي
ايلاف:يعني خلاص فكك منه
حمزة:هوا هدا
خشت روان عليهم:مصح وجهك زودي عاونيني
ايلاف:ماتشبحيش فينا نقرو
رفعت روان حاجبها:تقري امك انتي وياه نوضو سايروني جتني الغولا في الكوجينه بروحي
وقف حمزة:غووووولااا هههه بري هي
ضحكت روان ومشت هيا وحمزة للمظبخ وأيلاف ردت علي تليفونها وهيا تلحق فيهم:الو خالد
خالد:وين حمزة
ايلاف:اهو جنبي
شبح حمزة لإيلاف لسمعت خالد:قوليلا يجي يكسد جنبي في المحل
ايلاف:باهي
سكرت ايلاف وشبحت لحمزة لقال:مني
ايلاف:خالد قالك تعالا كسد معاي في المحل
بتسم حمزة:حولي حولي نلبس حوايجي
رفعت ايلاف حاجبها وتلفتت وهيا تشبح فيه طلع من المظبخ جري:مصحك
روان ضحكت:هههه تي فوتيه وتعالي قرضيلي البطاطه
بدل حمزة بسرعة وكبه علي لبنات في المظبخ:اسمعو ضمولي دولابي
نفخت ايلاف:وااااك امس كيف ضميته
حمزة:تي زي وجهك غر زيدي ديري عليه دورة
قالها وطلع وهوا يشبح لتليفونه ويشبح لرساله لجاته(اطلعلي قدام الحوش كانك راجل)
ضيق حمزة عيونه وفتح الباب وهوا يرفع في راسه ويشبح في مالك لشاد التليفون ويمشي يمين يسار يسار يمين قدام الباب ، سكر حمزة الباب وقال:خيرك شن تبي
شبحله مالك وقرب بسرعة:عطيني تليفونك والا امسح لي فيه
ضحك حمزة:وكان مانبيش نعطيه ومانبيش نمسح
زمط مالك ريقه وطلع السلاح من تحت جيبوطيه ورفعه في وجه حمزة لوخر غير ايراديا خطوتين التالي وشبح لسلاح ولمالك لقال:عطيني التليفون خيرمانقتلك
حمزة:نزل السلاح مش لعب راهو هدا نزل
مالك:هيا كلمه هات التليفون
حمزة شبح ورا مالك ورفع يده بمكر ، وكردت فعل من مالك تلفت طول وفي اللحظه هدي قرب حمزة وكان يبي ياخد السلاح من يد مالك بس مالك تلفت وطلق الطلقه لجت في صدر حمزة لطاح علي بابهم ، صوت الرصاصة تردد صداه في الشارع الفاضي الشارع لشهد مقتل طفل برئ ، ونفس الصوت تردد صداه في مسمع سفيان لكيف بيفتح باب الحوش بس اول ماسمعها رجع وطلع من باب جنانهم يجري يشبح في مالك اللي طبس وخدي تليفون حمزة لصارع في الموت بأنفاس بدت تغيب ، بس اول مارفع راسه وتلفت يسار شبح سفيان لجي يجري وهوا يسحب في سلاحة ، وقف مالك ومشي يجري وهوا يدس في السلاح تحت جيبوطيه ، وسفيان من الرعشه والخلعة ماعاش هتم ب مالك وقرب من حمزة وشد مكان الطلقه بيده وهوا يصيح:حمزة حمزة تسمع فيا
زمط حمزة ريقه وشد في جيبوطي العسكري متع سفيان بالقوة وهوا يبي يتكلم بس ماعاش قدر ورتخت يده لطاحت وعيونه قعدو مفتوحات وتوقفو عن حركتهم الحيا ، في وقتها حس سفيان وكأنه من سحب منه روحه وكانه كان عارف انه حياته ح تتغير ، وكأنه عرف انه التغير لكان يبيه بأرادته ، ح يصير غصباً عنه .
قعد سفيان يهز في حمزة لروحه صعدت لسماء غاضبه من مالك المجرم لخلا روح معلقه في رقبته وتار بيها غضب رب الكون عليه ، عيط سفيان:حمزة نوووووض نوض
وهوا قعد يهز فيه انفتح الباب لاول مانفتح طاح حمزة التالي عيطت روان وإيلاف فتحت عيونها بصدمه بس اول مارفعت راسها وشافت سفيان لحوايجه كلهم دم وسلاحه في يده وقال كردت فعل خوف من ايلاف تفهم غلط:واللهي مااني لقتلته
وحدف السلاح من يده وشبح لإيلاف لخدت نفس كبيييير وهيا تحس بالارض تجدب فيها بالقوة ، غمطت عيونها وطاحت مغمي عليها ...
__
.
.
نفخت رنيم وتكت علي الكرسي براسها:يهبل صوته ازح وشخصيته غويبه بس واااه تجلط
رفعت نور حاجبها:بس يخوف
شبحتلها رنيم وهزت راسها موافقه علي كلامها:وهلبااا وه
نور:وبرضو قعده مش فاهمه علاقتكم علي اي اساس تردي علي اتصالاته
وفنصت وكملت:ماعاش تردي عليه تي باين عليه واحد رديف
قلبت رنيم عيونها:باهي باهي اوووف علي اساس اني اود عليه بمزاجي تي يخوف هدا ووبي واصلا تو ينساني ويمل اني مش عاطياته وجه
نور:ان شاءالله...
وقعده نور ماكملتها وتصل تليفون رنيم لرفعاته وهيا تشبح في رقمه:هدا هوا هوا
نور قربت وشدت يد رنيم لشاده بيها التليفون وفنصت:ماترديش
رفعت رنيم حواجبها وقالت بتسخيف:لكن
نور:لاااااااا
نفخت رنيم بغيط من نور لفكت منها التليفون وسكرت في وجه رعد وحطاته في جيبها ...
.
.
ضيق رعد عيونه وقال:تسكري في ام..... تو نوريك يابنت ال....
حط التليفون في جيبه وطلع من شقتهم وركب فوق سطح العمارة وهوا يحط في طرف لحشيش في فمه ويولع فيه ، رد باب السطح واول ماتلفت شبح رائد لكان مقعمز علي حاشية السور ويشبح لوطه لشارع لمعبي بالناس ودوشة الصغار ، قرب وهوا يجبد في جبده قويه و ينفخ في الدخان ويلوح فيه لانه عارف رائد عنده حساسيه منه ، قرب ووقف جنبه وقال:قعد تجي هني
تلفتله رائد بخلعة وقال بعد ماخدي انفاسه:اي انت شن جابك هني
بتسم رعد وركب قعمز زيه وقعد يحرك في رجليه اللي في لهواء ويشبح للإرتفااع ليهز القلب وقال:كنت نبي نحشش علي راحتي لكن لقيتك قدام......
رفع رائد حاجبه بستهزاء ورجع شبح قدامه:ماتعرفش تتكلم من غير ماتسب
رعد:لا
سكتو وماعاش تكلمو فترة لين رائد رد وقال:بوي غدوة بروح
رعد:مش عارف
سكت رائد شوي ورجع قال:اني ماعاش نبي نقعد هني
رعد:حتي اني
شبحله رائد:ندوي بجديات اني
رعد شبحله:تبي السيفاو يشرب من دمك ، اركح وقعمز علي معطاك ربي ، حولت من قبلك وفشلت
رئد رفع حاجبه:حولت
نفخ رعد:واااااك ماقصقاص انم حتي اني فاضي ال... مقعمز جنبك
وكيف رعد بيتلفت بينزل شده رائد وضحك:ههههه خلاص خلاص باه
فك رعد يده من رائد وولا علي تقعميزته ، ورجع رائد وقال ببتسامه:عادي نتكلم
شبحله رعد وتنهد:شن تبي مني انت
ضحك رائد:ههههه دكرتني في ايام زمان
بتسم رعد وشبح لوطه لشارع:تدكر كيف كنا نهبلو في عمي رشيد
رائد:هههه قعد لا توا يقولنا المضروبين في زوز
رعد:هههههه ماخلينا حد في حاله
تنهد رائد وهز راسه:ياريت طلعنا نشبهو بعض في كل شي مش في الشكل بس
تلفت رعد لرائد لختفت من وجهه لبتسامه وتحولت لألم مخلوط بالياريت وقال:اقلب امها نكد توا
رجع رائد بتسم طول وقعد يضحك وضرب رعد علي كتفه وقال:انم وانت ديما تخرب في الحظات الدراميا ههههه
ردله رعد الضربه بالقوة علي ظهره لين رائد ختل توازنه وقريب طاح لو ما رعد شده وحضنه بديه الزوز بخوف ره طاح ، بعد رعد علي رائد لقال وهوا ياخد في نفس كبيير وقعد شاد في تشرت خوه بالقوة وقال:قريب طحت
فكله رعد يده بالقوة من تيشرته وقال:ال...... اشحط روحك وانت تقول ريشه
شبحله رائد وضيق عيونه:مصحك اني الريشه ولا يدك تقول باله
ضربه رعد علي راسه بشويه وردهاله رائد طول وقعدو يضحكو وهما يضاربو ويصيحو علي بعض بضحك ...
__
درس محمد سيارته وقال:طلب صغير نبي شوية شباب يعدو معايا لمكان
أحمد(الصقر):وين
محمد:لمكان
أحمد(الصقر)نفخ علي الغموض محمد لبدي يربك فيه وقال:تمام تمام تعالا ولتبيهم خودهم عادي
محمد:تمام
سكر محمد من الصقر وتنهد وهوا يفتح علي لستوديو ويشبح لصورة لبعتهاله آسامة امبكري ...
انخلع محمد وهوا يقيم في راسه اول ماسمع صوت اطقطيق علي الروشن السيارة ، سكر التليفون طول وفتح الروشن وقال وهوا يشبح لشاب الواقف:تفضل خويا
ضيق الشاب عيونه وقال:انت لتفضل واقف قدام المخزن متعنا سقدنا نبي نفتح نسترزق علي حالي
تلفت محمد للسرانتي المخزن ورجع تلفت لشاب:ماتوخدناش خونا
وقبل مايتحرك محمد رجع وتلفت لشاب وقال:سامحني شبوب لكن نا قعد جديد هنا نبي شقه للإيجار ولا للبيع مانلقاش
رجع الشاب قرب وقال:شكلك مش طرابلسي
محمد بتسم وقال بتسهويك:لا طرابلسي لكن من بنغازي
ضحك الشاب:هههه مرحبتين بيك تفضل تفضل معاي والشقه خليها عليا خوي عندي شقه بأذن الله تعجبك
محمد فتح باب السيارة ونزل وهوا يتبع في الشاب لفتح باب المخزن اللي كان مخزن غاز
جبد الشاب كرسي لمحمد وهوا شاد التليفون ويتصل:تفضل قعمز
قعمز محمد وهوا يشبح للمخزن لحس انه فيه شي غريب
الشاب:ايوا علاء تعلا للمخزن
علاء:اونا السيفاو جاي قال ، اني نعطي لرعد بضعه طالبها واحد ونجيك
فاتح:خيره السيفاو جاي
تلفت محمد طول لفاتح وهوا يضيق في عيونه ويركز في كلامه ، وفي نفس اللحظه خش السيفاو عليهم:السلام عليكم
رد فاتح علي علاء اللي في تليفون:خلاص خلاص اهو جي السيفاو
ونزل التليفون وشبح لسيفاو ليشبح لمحمد اللي وقف وتلفت بشوية واول ماتلفت كله جو عيونه في عيون السيفاو لضيقهم وقال لفاتح:من هدا الطيب
تلفت فاتح لمحمد وقال:هدا واحد شرقاوي يدور علي شقه
بتسم السيفاو وقرب من محمد ومد يده:شرفتنا ياطيب
سلم محمد عليه:نا لزادني الشرف
السيفاو تلفت لفاتح وقال:اتصل برائد يجيب قهوي
وشبح لمحمد:قعمز قعمز وماتفكرش شقتك واتيه
ضحك محمد:وربي كرمكم واصل مش لازم لا قهوي لاسو
السيفاو:هههه لالا كيف عاد رانا نعشقو الشراقه ره
محمد قعد يشبح لسيفاو للحظه بصمت وبعدها قال:واهل الشرق يعشقنكم
قعد محمد يشبح حولينه ورجع شبح لسيفاو ودكر كلام الصقر لما قاله انه برغم عداواته وشغله الوسخ الا انه الناس كلها تحبه ...
__
شد فارس راسه وهوا ينزل يقعمز لوطه ومافيش الا كلمه علي السانه يردد فيها:يارب خودني يارب خودني يارب نموت
قرب خاله معاذ طول وشده:فارس
رفع فارس راسه وقال:قتله خوي قتل امي تموت كان تسمع ياخالي تموت
وهوا قعد ماكملش كلامه شبح سراج اللي جاي يجري والدموع في عيونه وهجم علي فارس بضربه طيحاته لوطى وفارس ماحولش حتي يحامي علي روحه .
ادخلو خالد ومعاذ والشرطه والشباب لكانو في المقر الحبس وهما يبعدو في سراج لقلبه دم علي فارس وسفيان اللي كان مقعمز في "الشيلا" (الشيلا هيا عبارة علي دار طولها مترين وعرضها متر ، وفي اكتر الاحيان ماتكونش دار وانما حمام وبنفس الحجم)
اتكي براسه علي رجليه ومش قادر يبطل تفكير في منظر حمزة ونظراته الاخيرة لكان يبي يوصله بيهم حاجه بس ماقدرش ينطقها ، غمظ عيونه بالقوة ودكر نظرات ايلاف اللي فيها هلبا عتب هلبا ولوم واكيد نظرت بداية كره وبداية ظلم ...
.
.
في مكان تاني تابع لمسؤولين لشادين سفيان توا ، كان معتز مقعمز في شيلا تانيه بس هدي عبارة عن حمام ، تتخيلو شن معناها شخص مقعمز في حمام طوله مترين وعرضه متر وفوق المرحاض فراش ، غير الضيق وغير كونه مقعمز في حمام ليه اكتر من ساعة وغير الريحة الكريهة والمكان لمعفن ، والاحساس اللي مش قادر ينساه لما معلق رأسا علي عقب شعور موت بطيئ شعور يوجع شعور تتمنى منه ان الموت يجيك بسرعة متشنج مش قادر ترفع راسك ولا يديك ودم ملي راسك ، غمظ معتز عيونه بالقوة وقال في داخله:ياربي عفوك ياربي صبرك ياربي رضاك وحسن خاتمتك
.
.
هدا جزاء من الحقيقه فقط ، ف الدي نعيشه في بلادنا أسوء بكتير من هدا 💔
.
.
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3