عشق في بلاد حروبها لا تنتهى 2 (طرابلس ياغارقة في الدم)

البارت 7

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
الحلقة 7
.
.
في الحلقة السابقه
في مكان تاني تابع لمسؤولين لشادين سفيان توا ، كان معتز مقعمز في شيلا تانيه بس هدي عبارة عن حمام ، تتخيلو شن معناها شخص مقعمز في حمام طوله مترين وعرضه متر وفوق المرحاض فراش ، غير الضيق وغير كونه مقعمز في حمام ليه اكتر من ساعة وغير الريحة الكريهة والمكان لمعفن ، والاحساس اللي مش قادر ينساه لما معلق رأسا علي عقب شعور موت بطيئ شعور يوجع شعور تتمنى منه ان الموت يجيك بسرعة متشنج مش قادر ترفع راسك ولا يديك ودم ملي راسك ، غمظ معتز عيونه بالقوة وقال في داخله:ياربي عفوك ياربي صبرك ياربي رضاك وحسن خاتمتك

قراءة ممتعة
#البارت_السابع

انفتح باب الشيلا علي معتز لرفع راسه بتعب وكان علامة السلاسل لحديد مدايرة أثر علي رقبته المجروحة والحمرة ، حطوله خبزة ومكرونه وسكرو عليه ، شبح معتز للمكرونه ورفع عيونه قعد يشبح للحمام ، قرف ياكل من الريحة وفي المكان هدا ، واصلا الشهيه في زي المكان هدا ح تتسكر طول ، قعد مقعمز في مكانه ومامسهمش وهوا مغمط عيونه ومتكي راسه علي رجليه ، ماعاش عرف في شن يفكر بضبظ  في الكارته لي هوا فيها اللي مش واثق انه ح يطلع منها حي ، او في امه اللي تراهو ميته عليه ، ولا في فرح اللي ماحصلش فرصه يشرحلها اللي دارة ، مالحقش يشرحلها انه عرفها بعد مافات الوقت وبعد ماخطب وحط الخاتم في صبع غيرها ، ضن لما كلمها انه دردشه عديه وح تلتغي مع الوقت ، بس تورط ولقي روحه حبها ، حاول يبعد حاول يهملها ومايكلمهاش باش تمل وتسيبه هيا ، بس كل ماتزعل وتبعد كان قلبه يوجعه ويرجع طول يتأسفلها ويترجا فيها توليله وتردله بكل حب ، حبها لدرجه حول فكرت  فراقها من راسه بتاتا وبدي يفكر في قصة ينهي بيها خطبته من هند ...
__
لف محمد علي روحة وهوا يشبح حولينه لي الشقه ورجع تلفت لسيفاو وفاتح:ماشاءالله مش ناقصها شي
السيفاو:اي كامله ولو فيه حاجه نقصاتك مايردك غير السانك
محمد:بارك الله فيكم ماقصرتو معايا
السيفاو طبطب علي كتف محمد وقال:الناس لبعضها
وبعد وشبح لفاتح وكمل:هي امالا نخلوك ترتاح
مشي محمد معاهم للباب وسلم عليهم وهوا يشبح فيهم ينزلو لوطه ، وكيف محمد بيخش جاه صوت فاتح لقال:حميدا تنقصك حاجه حني في الدور اللي تحتك
طبطب محمد علي قلبه:درتو الواجب وبزياده شكرا
رفع فاتح يده ومحمد خش لشقه وسكر وهوا يضحك ، ماعرفش يضحك علي الصدفه الغريبه ، او علي حسن معاملتهم ليه اللي عطوهاله بكل ود وهوا ح يردهالهم شر الفعل بكل وحشيه ...
.
.
فتح السيفاو الباب وكيف بخش هوا وفاتح جاهم صوت رائد ورعد لنازلين من السطح وهما قعدين يتنابشو ، تلفتو فاتح والسيفاو لرفع حاجبه وبتسم:شني رجعت المياه لمجريها
هز رعد راسه:لا حولي ولا قوة الا الله خودنا بعين خودنا بعين تو بنتعاركو النم
ضيق السيفاو عيونه بضحكه وكيف بقرب منه صيح رائد:غر صلو علي النبي ياجمعة الخير
فاتح شح رعد لبعد بضحكه من نظرات السيفاو ليه
فاتح:خشو وتعاركو الداخل مش لازم كل عركة تلمو علينا العمارة
خشو وهما يتنابشو ويهدرزو
السيفاو :علاء وين
رعد:جايني زي الفروج يكاكي يبيني نرفع حشيش لصاحبه وزعته يحسابني الصبي متعه ال.....
السيفاو حدف عليه مالقي لمية لتشرتع وتبزع عليه هوا وفاتح اللي قعد يكح بعد ماخشتله لمية في خشمه ورعد بعد وهوا يصيح:تي خير امك ال.....
السيفاو:تي يا..... ماعاش تسب في الحوش ياخو الكلب
رائد ضحك:قوية خو الكلب جديدة والله من عيلة سعد يطلع الجديد
نفخ رعد ووقف وهوا يزيد يضرب في المالقي برجله لين جت امه من الدار:تي خير مصيبتكم
رعد تلفت:مانيش عارف ولدك لكبير هدا فيه الطقه
ومشي وخلا السيفاو يخرط عليه هههه
خش رعد للدار بدل حوايجه بعد مانكت الدولاب فوقي لوطي وطلع لبلكونة المربوعة وهوا يسكر في الباب البلكونه عليه ويشح في الكرسي وقعمز عليه ورفع رجليه حطهم علي حديد الحماية وشد تليفونه وهوا يشبح لرقمها ويفكر ، خيرني النم شديتها في جرتها من امتي يارعد تفكر في سريب لبنته مش تكرهم .
تنهد وتكه راسه التالي علي الكرسي وحط التليفون علي صدره وكمل تفكير بتنهيدة ، تراهو زيها زي غيرها مدام ردت عليا وستمرت متعودة علي ال.... هدا كله بنت ال.... وربي اربيها
فتح عيونه وقال بصوت مسموع:واني شن دخل ام امي بيها شن خصني بيها طلع امها من راسك ياكلب طلعهااااااا
انفتح عليه الباب فجأة لين انخلع ونزل رجليه بسرعة لين قريب طاح لو ماالكرسي اتشد بالحيط والتليفون طاح لوطه .
علاء:خيرك
عيط رعد:انت اللي خير ...... ال.... ماتعرفش تفتح ام ..... بشوية
حدف علاء علي رعد الفوطه بقوة قوته وقال:ياعن.... وعلي اللي جاي ومعبرك
وخش وسكر باب البلكونه بالقوة علي رعد اللي طبس خدي التليفون وهوا يسب ويشتم ورجع قعمز كويس وساوا الكرسي وشد تليفونه وتصل من غير تفكير ...
.
.
حطت رنيم لمخده علي رجليها وحطت عليهم خوها الصغير (مهند) وقعدت تهز بيه وتطبطب عليه وتعطي فيه في شيشة لحليب وهيا تنقنق:اوقد اوقد عيت ووبي
خشت أسماء عليها وهيا تخشش في لحوايج وتحط فيهم علي السرير نور:رقدي خوك وطبقي لحوايج
نفخت رنيم:مايبيش يوقد ونور قعده حاصله في الصالة قولي لرجاء
رفعت أسماء حاجبها:رجاء تقرا غدوة عندها امتحان رقدي خوك وديري لقتلك عليه من غير طولت السان
وطلعت وخلتها تنفخ وتعجب فيها وهيا تتلفت تشد في تليفونها:علي اساس نور ماعندهاش امتحان مه مخليتيها اضم في الصالة ، اه مصعب غيبت لميمه باللهي
وكيف فتحت رمز تليفونها رعد اتصل نخلعت لين مهند ياناري انخلع وشيشه طاحت منه ، شبحتله رنيم وهيا تردله في شيشته:ياووحي نني اسفه
خدي مهند شيشته ورنيم قعدت تشبح لرقم رعد وهيا اتمتم بشوية:لالا توديش يارنيم يارنومه ياحلوة ود بالك تودي اصبوي اصبوي اهو ها سكو خلاص تمام هكي
نفخت وبتسمت بنتصار بس الا وهي تواني ورجع اتصل ، قلبت رنيم شفايفها ونقنقت:ياوبي شن نديو اني شن نديو
نفخت وستسلمت وهيا ترد وتبي زعميتها بتكشخ ودير روحها متعصبه بس اول مافتحت الخط جاها صوته لصيح بتعصيب وغيط لين عطامها رعشو وهيا توقف علي الهزان ب مهند لرفع راسه وشبحلها
رعد:خير ام.... .... .... .... اول مرة واخر مرة تردي علي ..... بعد عام يا..... تغلي في روحك وانتي وحده رخيصه يا....
خدت رنيم نفس:ماعاش تسب
رعد رجع وصيح:سكري ام... ماخصكش نسب ..... ولا .... اديري في روحك ماتعرفيشي وانتي ......
نزلو دموع رنيم طول وسكرت عليه وهيا ترعش علي لكلام والسبان الشوارع لقاله ، زمطت ريقها وهيا تمسح في دموعها اللي نزلو مش علي خاطر طلع لكلام منه ، لا لانه لكلام اول مرة تسمعة كلام ماعمرها تخيلت تسمعة او تخيلت يتوجه ليها ، شبحت لتليفون وهيا تشبح لرقمه لعاود وتصل قاماته وردت وهيا ترد ودموع في عيونها وقالت من بين شهقاتها:انت شن تحسابني كان وديت معناها مش بنت ناس لا لا واهو متوبيه واحسن توبايه ماتجيش انت وتقيمني وماعاش تتصل ولا نبي نشوف وقمك في تليفوني بكل
وسكتت وهيا تبكي وكانت تبي تسكر بس جاها صوته الهادي:اني مش قصدي
وسكر الخط في وجها وخلاها تشبح للتليفون وبعدها لوحاته لسرير نور لجنبها وهيا تحاول تبطل بكي وتنظم في انفاسها وتشبح لمهند لقعمز ويشبحلها بستغراب ، قرباته منها وباساته وهيا ترقد فيه في حضنها:نني حبيبي اسفه خلعتك خلاص ها هي نني
__
تاني يوم الصبح ...
شبح رامي لنزار ليشبح لبوابة الحبس وتلفت لعبدالباسط خو معتز لكبير:اخر مكان ماسألناش فيه
رامي:ان شاءالله مش هني
عبدالباسط:ان شاءالله يااارب
خشو عبدالباسط ورامي ونزار وقعدو يسألو ، في الأول مابوش يعطو اي معلومه عليه وقالو مش عندنا بس نزار ورامي قعدو مصرين انهم يتأكدو ف قالولهم يشوفو المتهمين والمقبوضين عليهم امس الصبح .
رفع الشاب راسه وقال:معتز ال####
حس عبدالباسط وكأنه من ضربه علي راسه بحديده وهوا يهز في راسه :اي هوا
الشاب:اي امس تم القبض عليه بتهمت الابتزاز والتشهير وتزوير
انفعل نزار لخبط علي الروشن لقزاز لكان الشاب وراه:تي تشهير بمن كيف تحبسوه من غير ادله شن هالانسياب هدا
قرب رامي وشد يد نزار بالقوة وهوا يتلفت لرجال الامن لملتمين خشو اول ماسمعو صياح نزار ، رفع رامي يده كأعتدار:انفعل شوي مافيش شي لمور تمام ره
رد عليه وحد من رجال الامن:خليه يضبظ روحه خير مايلقا روحه في واحد من الشيلات
عبدالباسط:امسحوها في وجهي ساموحنا
وخرو رجال الامن وعبد الباسط تلفت لشاب لقال:حني مانشدوش حد ولا نتهموه الا بدلائل فيه وراق وشهود عطو ايفاتدتهم انه اعتدا عليهم بسب والقدف واشهر بيهم في النت ولقينا عنده وراقي مزورة
رفع رامي حاجبه:ومن هما هدو
الشاب:لا مانقدرش نفصح عليهم
نزار:باهي ورونا الدلائل والوراقي لمزورة للقيتوها عنده
الشاب هز راسه:مش بيدي نوريها ومش بكفي خوي وبعدين فيه قضات وراي هما لقرارو
عبدالباسط:باهي نقدرو نشوفوه نظمنو عليه علي الاقل
الشاب:لا تقدرو تمشو توا لانكم مش ح تستفيدو شي بقعدتكم والزيارات ممنوعة طول فترت الاستجواب والتحقيق
شبح نزار لعبدالباسط لقعد يمسح علي جبهته وتلفت لرامي:كيف بنقول لأمي كيف بس
نزار:لاحولي ولا قوة الا بالله
__
.
.
كل السماء تحيطها غيوم بيضاء ، الا غيومك يابلادي قد تلوتت بسواد قلوب مجرميك💔
.
.
الله أكبر الله أكبر ، الله أكبر الله أكبر
أشهد ان لا إله الا الله ، أشهد ان لا إله الا الله
وأشهد ان محمد الرسول الله ، أشهد ان محمد الرسول الله
حي علي الصلاة ، حي علي الصلاة
حي علي الفلاح ، حي علي الفلاح
الله أكبر الله أكبر ، لا إله الا الله
نفخ احمد(الصقر) الدخان وهوا يسمع في أذان الظهر وسارح معاه لين كمل ، نزل راسه لتليفونه لشاده بيده وعاود الاتصال العاشر ممكن وهوا يحاول مايتعصبش واول مانفتح الخط عيط:خيرك ماترديش النم شغلتيني عليك وينك
حاولت مريم تتكلم من بين شهقاتها وبكاها بس ماقدرتش وصوت بكاها تعلا وهيا تناجي بأسمه:احم..د احمد
وقف أحمد طول وقال بخوف:خيرك شن فيك
مريم حطت يدها علي فمها أول ماسمعت صياح إيلاف:لاااااااااا ياربي لااااااااااا الا وخي ياربي لااااااا
سكرت مريم التليفون علي احمد(الصقر)المستغرب ومش فاهم شي ، وطلعت تجري وهيا تشبح في سراج وخالد وولاد عم ايلاف مخشاشين التابوت اللي حطوه في دار المعيشه ، تلفت سراج اللي دموعة في عيونه وهوا يشبح لنجيه اللي تتنفس بسيف وتشبح لتابوت بعيون حمرة دبلانه ورفع يده وقال:اللي مش محرم يطلع اللي مش محرم يطلع باللهي عليكم اللي مش محرم واللي مش عليه الوضؤ مايمساش علي رحمة ولديكم
طلعو الكل وماقعدش غير عماته وخالاته وامه الي قعمزت جنب راسه وهيا تحول في الكفن الابيض وتشبح في وجهه لمنور ولعيونه لمغمظه اللي ماعاش ح تشوفها مفتحه لين تلحقه عند لخلقه ولخلقها ، ماعاش بتشوفه وحتي وهوا هكي وليدها اللي تشوف فيه توا بعد ساعات بولي تحت التراب وبيولي لربه وبأذنه بيولي راضيا مرضيا رفعت يدها وهيا اطلع في صوتها اللي طلع برعشة بكي يقهر ويهز جبال:ربي يتبتك عند السوأل ربي يتبتك عند السوأل ياوليدي الله هوا ربك محمد عليه الصلاة والسلام هوا رسولك الاسلام هوا دينك ياوليدي الله هوا ربك الله ياحمزة ان شاءالله ياوليدي ربي يتبتك عند السؤأل ربي يسامحك ياضناي راني مسامحاتك وراضيه عليك ورضاي من رضي الله واني راضيه عليك وانت سامحني ياوليدي سامحني ياحبيبي
قعمزو ايلاف وروان جنب خالد اللي مقعمز تحت رجليه ويبكي زي الطفل يبكي علي خوه يبكي علي صديقه يبكي بحرقه وماحسش الا بالباب دار المعيشه لنفتح والكل انصدم ب رؤوف اللي كيف وصل من الصحراء بعد ماسمع بموت حمزة طول عطوه اجازة وطلع في اول طيارة لطرابلس ، خش وهوا يشبح لسراج اللي متكي راسه علي الحيط ويردد:اللهم تبته عند السوأل اللهم تبته عندا السوأل
تلفت رؤوف وشبح لخواته روان وإيلااف يبكو بقهر ولخالد لمقعمزين لافين علي تابوت حمزة وشبح لامه لتشبح لحمزة اللي مغمظ عويناته لاحد امس العصر يكلم فيه ويضحك ويتسهوك هوا وياه يادنيا ياغدارة خوي امس كان يضحك معاي يقولي روح ستاحشتك قعد صوته قعد يرن في ودني كيف تاخديه كيف ، كيف يادنيا تخلي عيوني تشوف خوي في كفنه قبل ماتشوفه ب بدلة تخرجه ، كيف تخلي خوي الصغير يموت قبلي كيف تخلي عم صغاري يموت قبل ماياخد حقه فيك ، حرقتيني يادنيا حرقتيني ياغدارة بشوفته عريس قبور قبل عريس فيك ، حرقتيني وحرقتي قلب اوبيي و اميمتي عليه ...
اخخخخ ياطرابلس اخخخخخخ كل يوم بخيمه مستحيل ترمي العده 💔
.
.
__
قعمز آسامة علي المرشبيدي وهوا يشبح للحبة لي في يده وتلفت لشاب:ههههه عالم دار قوي اسمهم لكن مفعولهم اووووو محلاهم
وحطها في فمه وزمطها وهوا يرفع في راسه ويسمع في ضحكت الشاب:تبي زيهم من عيوني
هز آسامة راسه ورجع نزله وهوا يفتح في عيونه:لالا لكن من وين تاخد فيهم
الشاب:والله يافندي مانقدرش نقول
آسامة:تي قول هيا مش فاضيلك ولا نقولك عطيني رقم اللي يبيع فيهم
سكت الشاب بحيرة واول ماشبح لأسامه لفنص فيه:قتلك عطيني الرقم
هز الشاب راسه وطلع تليفونه وعطاه الرقم ، لسجله آسامة وقاله:شن اسمه
الشاب:مافيا هكي يلقبو فيه
هز آسامة راسه وبتسم وهوا يسجل في الرقم ...
__
نفخت فدوي وهيا تشبح لامها:والله مانندري عليها ياماما فدادتني مكتأبه من كل شي منكده عليا عيشتي مع عيشتها قريب يوم تاني نهج ونخليلها الدار كلها
أمينه (ام فرح) ضحكت:تحمليها سلم بنتي اكيد من لقرايا تعرفيها بعد كل امتحان يصيرلها هكي
تنهدت فدوي وفي خاطرها ، لا من متحانات لا ودان ياماما بالله خليني ساكته
ووقفت وقالت:غر نشوفها
امينه:اي شوفيها
مشت فدوي لدارهم واول مافتحتها لقت فرح مقعمزة وهيا تبكي بشرقتها وبصوت العالي ، نخلعت فدوي وجتها تجري قعمزت قدامها وهيا تشد فيها من كتافها :تي خيرك
فرح شبحت لفدوي وهيا تحاول تاخد نفس من بين بكاها وصوت بكاها العالي زاد وتمدلها في التليفون خدت فدوي التليفون منها وهيا تشبح فيه ، وكان نزار منزل منشور ومداير تاق لمعتز وكاتب فيه (ربي يفرج عليك ياصاحبي ، حسبي الله ونعم الوكيل وخلاص علي خاطر لقوه يجري ورا مصلحت لبلاد ويبي يفضح شوية شلتت ينهبو ويلهفو في حق الشعب وفي حق ليبيا ويبي يعلي شان بلادنا لفكوله تهمت ابتزاز والتشهير والتزوير ، طلعو لوراقي لموتقه مزورة باش يخفو عمايلهم ويكملو في مصالحهم ونهبهم في حق الشعب ، لكن وربي لما يشوفو لوراقي الصح والمزبوطه لبتطلع توا ، وياريت فزعتكم ياولاد بلادنا وعزو بحاجتكم ، ادعوله وواقفو معانا حتي بدعوة وبالكلمة الطيبة )
حطت فدوي يدها علي فمها بصدمه وهيا تشبح لفرح لشارقه ببكاها...
__
سهي:شن قصدك يتبع فيك
آيات:تي يتبع فيا بالسيارة للحوش واليوم بس حدف رقمه تعرفي قلبي قريب وقف منظرة يخوف ومعاه ولاد
سهي:اول مايروح بوي قوليله هدي حاجه ماتنسكتش عليها هدا مايتبع فيك الا حاطك في راسه
هزت آيات راسها:اي اصلا بعد ماشفته اليوم بنقول لبابا وخلاص خفت
رن تليفونها معلن وصول رسالة مسنجر رفعت آيات تليفونها واول مافتحاته وشافت الرسالة من عمر حاولت ماتبتسمش قدام سهي لتشبحلها:مني
هزت آيات راسها:صاحبتي هدي
سهي وقفت:المهم بوي علي وصول اول مايوصل تعالي نقولوله باهي
آيات:تمام
طلعت سهي وخلت آيات تفتح في محادثتها هيا وعمر لكان باعت(اهلين) (ليك وحشه)
بتسمت آيات ووقفت قعدت ترقص ترقص زي الهبلة ورجعت قعمزت وردت عليه(اهلين بيك) (تستاحشك العافية)
رفعت حواجبها وشبحت للحيط لقدامها:حي شن تستاحشك العافيه هدي لكن شن بنقوله يعني لو مش لحشم والحيا ره قتله حتي اني ستااااااحشتك موت موت ونحبك ونموت فيك ياعموري وااااك
نفخت بتنهيده وهيا تركز علي الرسالة لوصلتها منه(من عافيه هدي) (مانبيها تستاحشني ولا نبي وحشتها نبيك انتي اني)
فتحت آيات عيونها علي وسعهم مع ضحكه طلعت من قلبها:ياروحي واللهي لا ستاحشتك هي وااااك ياربي نحبك نحبك ياريتك تسمعني
وتحمحمت وكتبت(شن تبيني اني 😨)
عمر(قصدي ههههههه) (شي شي)
آيات(لالا مش شي شن تبيني)
شبح عمر الرسالة وماردش لين آيات ضيقت عيونها وكانت بتكتب بس طلعت وقالت:ارزني ارزني
ونفخت وسكرت عيونها وهيا اضم في يداها لبينهم التليفون قدام وجها وقالت بترجي:يااارب يبعت يااارب يرد عليا توا توا ياااربي يااااربي
رن صوت رسالة المسنجر لفتحلها عيونها طول وخلاها تفتح التليفون بسرعة وخشت شافت رسالته(نبيك انتي تستاحشيني زي مااني مستاااحشك) (ومستاحشك هلباااا فوقها هي) ...
.
.
ياليت لو تحدت بعض البدايات ابكر من الوقت التي بدأت فيه ، فدائما تأخرها تفسده نهاياتها 💔
.
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
.