عشق في بلاد حروبها لا تنتهى 2 (طرابلس ياغارقة في الدم)

البارت 19

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
البارت 19
.
.
في الحلقة السابقة
بتسم رائد وهوا يتلفت وراه بس اول ماشاف الشاحنه جايه وكانو وراها هلبا سيارات عاليات ومصفحات وطالعين منهم شباب شادين اسليحه فيسع ما حاوطو المكان لكانو فيه هوا وخوته لتلفت بسرعة وهوا يشبح لرعد بنفس مقطوع وبرهبت خوف سري في كل مكان في جسمه وهوا يسمع في عياط رعد:اجرررررري يارااااااائد اجررررررري
قعد رائد يشبح لرعد لصيح وهوا يبي يجيه بس فاتح كان شاده ويجبد فيه باش يركب لسياره وهوا يدف ويصيح:راااااااااائد تي حول راااااااائد
طاح التليفون من يد رائد وهوا مش قادر يتحرك من مكانه ويشبح لمجموعة الشباب لحاوطوه وهما رافعين اسلحتهم في وجهه وفي مجموعه قعدو يلحقو في رعد وفاتح لدف رعد في سيارة بسيف وهرب هوا وياه...
قرب واحد من رائد لاول ماتلفتله رائد خبطه علي جبهته بالمسدس وكان هدي اخر شي يشوفه رائد لطاح علي الارض وغمي عليه..................

قراءة ممتعة
#البارت_التاسع_عشر
عندي وطن محروم من شوفت رايت سلامه مرفوعة ، عندي وطن مجروح وماعنده من يضمدله جروحه 💔
.
.
.
خبط رعد فاتح برجله وهوا يهجم عليه:سيبت خوك سيبته يا........ سيبته
قرب علاء يجري وهوا يبعد في رعد من علي فاتح بصعوبه:تي خلاااص يارعد وقف
دف رعد علاء من عليه وصيح:تي شن هوا...... لخلاص رائد معاهم علاااش ماخليتنيش نمشيله علااااااش علاااش
فاتح عيط:تي خير ...... انت كان شدوك مستحيل تطلع منها رائد نقدرو نطلعوه لانه ماعليه شي وسيرته نظيفه في خدمته وبين اهل الشارع لكن انت لااا
علاء:اي يارعد ستني اهو السفاو جاي وبتليفون يطلعه واكيد هما بيديرو اجرائتعم وبيعرفو انه ماعليه شي
رعد قعد يصفق:اي مشاءالله بطلعوه يجرو مه حني نتعاملو بالقانون والاجرائات تي...... انت وياه تحساب روحك في دبي ولا في امريكا هدو حصلو ..... طرف خيط منا حصلوه ومايهمهمش كان متورط معانا ولا ...... المهم انه يطيحو بالسفاو الشطان ال..... هدو مايهمهمش حتي كان يقتلوه المهم يجيبو روسنا
قعد فاتح يشبح لعلاء لسكت وهوا عارف انه كلام رعد حق ومزبوط ..
خبط رعد يده في الحيط بالقوة لين نجرحت وهوا يصيح:تي وين السفاو النمي وينه ال..... اه وينه كل لصاير من تحت راسه ال...... وربي كان تصير حاجه لرائد لما نقلبها ..... علي روسكم كلكم وربي لما نفجرها بيكم انتم وبوكم وال.......
وخبط رجله علي قومة السيارة ومشي وخلا علاء يحاول يتصل بسفاو وفاتح واقف شاد راسه:كله مني ياريت سلمت روحي وخليتهم يطلقوه ياريتني
علاء حط يده علي كتف فاتح:ماعاش تفكر هكي وخلينا نديرو حل ونشوفو وين السفاو توا
.
.
.
.
مسح آسامة وجهه وهوا يمسح في خشمه الملتهب ولبس طاقيته ونزل من السيارة وخش لستراحت الصقر لكان مقعمز جنب محمد اللي ضيق عيونه:شني
الصقر بتسم:شدينا خوه الصغير وبنأسروه يايجي هوا ياهب نبعتوله راس خوه
تعدل محمد في تقعميزته ونفعل:تي كنك انت تحساب روحك عصابه ولا مافيا ، نا قتلك ياصقر خليها علي تي كيف تتصرف من راسك
الصقر تعصب:شن كيف نتصرف من راسي اهيه اني السيد هني واللي في راسي نديره انت هني روحك وخلاص السفاو تو نجيبو راسه
سكت محمد وهوا يحاول يكمد عصبيته ومايتصرفش تصرف يندم عليه وبعدها قال:شني اسمه خوه لمسكتوه
الصقر:رائد
رفع محمد حواجبه بصدمه وهوا يشبح لصقر لرفع يده لآسامة ووقف يسلم عليه وخلا محمد يمسح علي وجهه بصدمه وبتفجأ ومافيقاش الا صوت آسامة:اووووو الطقه حتي هوا هني
الصقر ضحك وهوا يشبح لمحمد لوقف وهوا يسلم علي آسامة وقال:اي لكن معدي توا
الصقر:كيف جيت خيرك
آسامة:هههه شكله حضرو الشياطين دهبت الملائكه
محمد:حشاك ياراجل لكن طلعتلي حاجه ضروريه
آسامة:نبصرو نبصرو ياطقه خود راحتك
محمد بتسم:عجبتني الطقه هدي هي تصبحو وتربحو
آسامة:سلام
طلع محمد و آسامة تلفت لصقر لقعد يتبع في محمد بعيونه لين طلع وشبح لآسامة:شكلي بنخدم بيه عملية السفاو
آسامة ضيق عيونه:كيف
الصقر ضحك:زي ماخدمت بخوه هههه لكن علي العموم بنخليه يقتل السفاو وهكي نضرب عصفورين بحجر واحد السفاو وتاني هوا لانه بدي يلعب بديله ال.....
جبد آسامة شيشة السكير من جنب الصقر وتكه علي الحيط:اني كلمتي ماطيحش علي الوطي قتلك الطقه هدا يلعب بيك وبي عشره زي وزيك اخدم بيه كان قدرت
شبحله الصقر بطرف عينه وطبطب علي رجله:اشرب اشرب وخليك في بوختك انت
.
.
.
__
.
.
قلبت رنيم عيونها:بالك مغمي عليه من السم لبيعو فيه اكيد عاد مايبيعو فيه الا ياخدو فيه اوقدي اوقدي تو غدوة يتصل
هزت نور راسها وهيا قعده تمشي يمين يسار بتوتر:لالا قبل مايسكر الخط سمعت صوت دوشه ورصاص يارنيم اكيد فيه حاجه باللهي عليك اتصلي برعد باللهي عليك
نفخت رنيم وجبدت اليرغان علي وجها:لااا مانيش متصله بحد وتصبحي علي خيو
قربت نور منها وجبدت اليرغان وقالت من بين دموعها لنزلو:باللهي عليك اتصلي علي خاطري بنموت من الخوف عليه
عيطت رنيم وهيا تقعمز:وااااك وااااك منك
وتلفتت للكمدينو خدت تليفونها وتصلت برعد بس عطاها مقفل ، شبحت لنور لتراجي فيها تتكلم وقالت:مقفل
قعمزت نور علي سريرها وزادو دموعها نزلو وهيا تحط في يدها علي قلبها:قلبي مش مطمن حاسه انه فيه حاجه
سكتت رنيم وهيا تشبح في دموع اختها وتحاول تتصل برعد اللي اتكه علي باب المستودع وهوا يشبح لسفاو لعيط وهوا يضرب في الكرسي برجله:كيف ترفعوه معاكم كيف يا......
وقرب من فاتح وشده من سوريته:مش عارف الاحتمال هدا يصير كيف ترفعوه معاكم
فاتح:رعد لجابه اني مانعرفش انه جاي لين شفته غادي
دف السفاو فاتح من عليه وتلفت لرعد وقرب منه وضربه بوكس علي وجهه لين رعد طبس راسه لوطه وهوا يشد في خشمه لصب دم وحس بيد السفاو شداته من تيشرته من التالي وقامه ليه وهوا يصيح:يا...... ...... ترفع خوك للموت رفعته للموت عارفه مايعرفش يتصرف زيكم كيف ترفعه معاك ياكلب يا.....
ودفه علي الباب بالقوة وهوا يشد في راسه:ياربي يطلع حلم مش مستوعب اني مش قادر نستوعب كيف ترفعووووه معاااكم
علاء شبح لفاتح ليمسح في جبهته بخوف وبتوتر وشبح لرعد لشاد خشمه لينزف وهوا ساكت وماعطاش ردت فعل علي ضربت السفاو ورجع علاء شبح لسفاو لقعد شاد راسه بديه ويلود علي روحه بتلخبيط ....
قرب علاء من السفاو:خلينا نلمدو الشباب ونمشو نهجمو علي الصقر
السفاو تلفتله:تي...... بتهجم عليه علي اما مقر ومقر اه علي اما مقر ومقر يا..... انت وياه مه كان تفكرو بعقلكم كان عندكم دماغ اصلا ره مصارش هدا كله
فاتح:باهي شن بنديرو
السفاو:لازم نعرفو وين هوا قبل الكلب اكيد مش ح يحطه في الحبس ولا في..... باش مايتحولش للقضاء
علاء:وباه كان تحول للقضاء
السفاو:تي نطلعه طول لكن عارف دماغ الصقر هوا يبي يطيح بيا وبيكم اكيد بخليه مأسر عنده
فاتح:قصدك مخطوف
سكت السفاو شوي وبعدها شبح لرعد وقال:خير امك ساكت اه تكلم طلعنا حل ..... طلع خوك من لمصيبه لدخلته فيها
رعد رفع عيونه في السفاو وقال بعد لحظات صمت مش طويلة:نخطفوله حد من عيلته
السفاو ضحك بهزوة:اي مه حني نعرفو عيلته من الطقطق لا السلام عليكم
علاء:اي نعرفو
شبحوله فاتح والسفاو لقال:مني
علاء:هوا ديما يمشي لبنت في الجامعة ممكن اخته ياخطيبته مش عارف
تلفت السفاو لرعد لقال:وحده بوحده خطف خونا نخطفوله خطيبته
سكت السفاو لحتار وهوا يحط يديه علي وجهه ويحاول يفكر زين يفكر ومايتهورش ومايدخلش ارواح ناس بريئه في المصيبه لخشو فيها ....
.
.
__
.
.
لطالما عرفت ان قربك نار جهنم ، ولكن لم اتخيل ابدا بأني اول من سيحترق بها 🔥💔
.
.
تاني يوم الصبح في الجامعة ....
طلعت مريم من المحاضرة هيا وصاحبتها لنفخت:صدعلي راسي الدكتور والله مافهمت منه حاجه
مريم:احرف منك والله
وطلعت تليفونها لشرين وردت:الو اوفي
ايلاف:صباح الخير
مريم:صباح الخيرات شن حالكم
وتلفتت مريم لصاحبتها لقالت:هي باي بوي يراجي برا
سلمت مريم علي صاحبها لطلعت وخلتها تتمشي لبوابة الكلية وردت علي ايلاف:اي بعدين بنجو واني مرات نبات
ايلاف:باهي باللهي خوديلي كرسات املاء وخط ونبي سفار اصفر غر بابا مش فاضي
مريم:من عيوني شن تبي تاني
ايلاف:وكان تبي خوديلي كندر بوينو ههههه
ضحكت مريم:هههه حاضر
ايلاف:وعصير راوخ نحبه
مريم:كأنك زودتيها
ضحكت ايلاف:ههههه نبصر نبصر
مريم:هههههه لا من عي.....
سكتت في نص كلامها وهيا تحس بشي لصق في ضهرها وشخص واقف وراها بتمام ، كيف جايه بتتلفت بصدمه بس جاها صوت خلاها تزيد تنصدم اكتر وتتجمد وتوقف مكانها وهوا يقول:تحركي قدامي من غير صوت حركه عبيطه منك
ونخزها بالسلاح في ضهرها بالقوة وخلاها ترجع تمشي قدامه وكمل:طلقه من هدا ترفعك عند لخالقك
نزلت مريم التليفون من ودنها بشويه ودقات قلبها زادو وهيا تشبح لناس لقدامها وهيا تحاول تستنجد بيهم بنظرات عيونها لتعبو دموع ، فك منها التليفون من يدها بشوية وسكر الخط علي ايلاف لتنادي في مريم لتمشي بتشنج وهيا تفكر نصيح ونخليه يطلع روحي ونموت بشرفي قدام الناس خير مانمشي معاه ويطلعو عليا وسخ الدنيا كله فيا ، عيطي يامريم عيطي عيطي وموتي قدام الناس بشرفك عيطي ...
.
.
الانسان قد مايكون شجاع ونفسه عزيزه وقوي بس مايقدرش يخاطر بحياته ويدير حركه ممكن تقتله حتي لو بستمرارة في حياة تكون معبيه لوم عليه وذل وإهانه ح يفضل الحياة هدي علي انه يموت ، ح يفضلها في وقتها وبعدها ح يندم هلباااا ح يندم ندم ممكن يوديه للموت .....
.
.
.
__
.
.
حط رامي لوراق قدام الضابط ووقف وهوا يشبح لنزار وعبدالرحمن لقال:هدو كل لوراق والمستندات والملفات لعندنا ولعند معتز
رامي:ومستعدين نوقعو تعهد المهم اطلعوه
الضابط بتسم وهوا يقرب في الملافات والوراق منه وقال:كويس
ورفع عيونه لنزار لواقف قدامه وكمل:خيره الاخ شكله مش راضي ولا كيف
شبح رامي لنزار المتكنطي وعلامت عدم الرضي واضحه علي وجهه وشبح لعبد الرحمن لنخز نزار بمرفق يده وقال:لالا راضي كلنا راضين ولتبوه تم المهم معتز يطلع
بتسم الضابط ووقف وهوا يلف من علي مكتبه وفتح باب المكتب وصيح:ياولد جيب ورقه وقلم وتعالا
ورد الباب وتلفت لشباب:وقعو التعهد ونجيبوه حتي هوا يوقع
رامي:يعني اليوم يطلع
الضابط:لا لين نكملو الاجراءات شن تحسابها طب زن هيا
كيف جاي نزار بيتكلم قص عليه عبدالرحمن:تمام المهم يطلع
هز الضابط راسه وعبدالرحمن شبح لنزار وقال بتوشويش وهوا يفنيص فيه:فكنا من المشاكل ياراجل
.
.
.
__
.
قعمز محمد علي الكرسي لجنب باب شقته ورد:الو
جاه صوتها الهادي:اهلين
محمد:اهلن وسهلن
رنا:شن جوك
محمد:الحمدالله كيف حال هلك وحنك
رنا:الحمدالله بخير وصحة
محمد:كويس
رنا سكتت شوي تراجي فيه يتكلم بس محمد سكت وهوا شاد التليفون بكتفه ويلبس في سبيدروه ، تنهدت رنا بالقوة وقالت:شكلك مش فاضي
محمد:اي طالع
رنا:اها تمام نعطلش عليك امالا
محمد:تمام مع السلامه
ضيقت رنا عيونها وقالت بحيرة وغيظ:علاش تتعامل معاي هكي
محمد رفع حاجبه:كيف
رنا:هكي يعني ترد بسيف حتي نبي نفتح معاك موضوع ترد بكلمتين وقص
محمد:نا هكي
رنا:اها تمام اني اسفه انه ازعجتك وتقلت عليك بس خشيت خاطري وملتلك وحبيت نتعرف عليك اكتر بس شكلي عطيت علي روحي فكرة غلط وظنيتني نتلصق
محمد:لا حشاك .....
قصت رنا عليه:حشاك من السوء اسفه مرة تاني مع السلامه
محمد رد بضحكه:مع السلامة
زادت رنا تعصبت من رده البارد وسكرت الخط وهيا تعيط لين جتها حناها تجري:خيرك تعيطي
تلفتتلها رنا بكل قوتها:شي شييي مافيااااا شي اووووف
ووقفت مشت لدارها وخلت سعيده مستغربه من تصرفها.....
.
.
.
طلع محمد من شقته وهوا قعد ممبتسم علي تصرف رنا وعصبيتها معاه ، سكر الباب ونزل وهوا قعد شاد التليفون في يده وجي في ودنه صوت رعد لقال:حطوها في الاستراحة المستودع مكان مشبوه ومعروف
فاتح:اي قتله يرفعوها غادي طول اني بنسلم بضعة لولد ونمشيلهم
رفع رعد حاجبه:يا..... وقت بيع هوا تي انم رائد مشدود وقعد تفكر في بيع
فاتح:شن تبي من امي ندير نرخي بأم الراجل نمشي نسلمله بضعته ونمشيلهم
ونزل فاتح وخلا رعد يخبط علي الحديد الحماية متع الدروج ونزل ....
مسح محمد علي شعره وهوا يتلفت يضرب في الحيط برجله:يانعن فيتك ياصقر ينعن فيتك
.
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3