عشق في بلاد حروبها لا تنتهى 2 (طرابلس ياغارقة في الدم)

البارت 17

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
البارت 17
.
.
في الحلقة السابقة
ضحك عمر عليها وسكت وهوا يشبحلها كيف قعدت تمسح علي وجها بيدها لترعش من التوتر ، رفع يده التانية وشد يداها الزوز بيديه وطبس وخلا طوله من طولها:اني شن درت باش تقولي خلاص قعده ماريتيش من شوقي وكلامي ليك شي
قعدت آيات تشبحله ببتسامه كيف قريب منها وهوا يبتسم ويشبح لكل أنش لوجها بحب وبشوق كبير ..
ضحك عمر وقال:نحبك ياآيات نحبك حب مش ح تتوقعي كبرة لين تخشي لقلبي
غمطت ايات عيونها بالقوة وضحكت بخجل لين خلت عمر يميل في راسه ويقرب يبوس فيهاا من خدها بالقوة لين أيات فتحت عيونها بصدمه وهيا تشبحله كيف بعد وشبحلها بضحكه علي صدمتها من حركته.........

قراءة ممتعة
#البارت_السابع_عشر

حين تكتشف ان البشر هم قذارة الدنيا وليس المال حينها فقط ستفقد ثقتك بالجميع ، وربما حتي نفسك ايضا 🙏✋
.
.
رفع السفاو حاجبه وشبح لساجده لمقعمزة جنب امها احلام بتوتر وقال:حني شن قولنا علي لقرايا مش سكرنا موضوعها
احلام:ماعليشي وكان كملت والمعهد قريب خطوه وتوصله
ساجده قالت بتوتر وبسرعة:وحتي بنات عمي مصطفي يقرو فيه وكلهم يشكرو فيه
سكت السفاو شوي وهوا يشبح للباب الحوش لنفتح وخشو رعد ورائد ليتنابشو ، ورجع شبح لساجده لخافت وقال:تو غدوة نمشي نسأل عليه وكان عجبني حاضر نديرلك حتي باص بعدها
ضحكت ساجده وهيا تشبح لرعد لركز وهوا يقرب منهم بخطوه وشبحت لسفاو:خلاااص يعني موافق
بتسم السفاو:اي لكن نسأل عليه قبل مدام خاطرك فيه علاش لا
زاد رعد قدم وخش في الموضوع:شن هوا لخطرها فيه
السفاو:تبي تكمل قرايا
قرب رائد من ساجده وبتسم:فيه معهد هني نشوف في صغار عمي مصطفي يمشوله
احلام:اي هوا هدا لت....
قص رعد عليها وقال:تي اما قريا أهيه والمعهد مخطلت ولشاده نعرفه ولد حرام ومش مزبوط
وشبح لساجده وهوا يقرب:وانتي شني مدايرتيها عناد معاي ياكلبة مش قتلك اني خلاص
وكيف جاي بمد يده بس رائد خش بينهم وهوا يشد في رعد ويبعد فيه من علي ساجده لدموعها نزلو وهيا تشد في يد أمها وتشبح لسفاو لقال:من لشاده
رعد:عظيم القدر تي معروف ولد حرام وشن خدمته وانت تساير فيها الكلبة هدي لمعندهاش عقل وربي لما تحصلاها الطريحه ياحيوانه
رائد:رعد خلاااص هيا شن دراها
السفاو:رعدد احترم روحك قدام امك
رعد قام يده وهوا يأشر لساجده لتبكي بالعبرة:احمدي ربك امي جنبك بس والا وربي اليوم فرمتك فرم ياكلبة لكلاب
وقفت ساجده ومشت تجري خشت لدار وهيا تتلوح علي سريرها وتبكي بالعبرة تبكي علي هلبا حاجات في حاجه وحده ، تبكي علي انها من عيلة كل شي فيها لا عيلة الولد هوا الوحيد لعنده الحق حتي لو كان غلط والبنت مجرد غلطه جت بينهم وخادمه ليهم ، هدا التفكير لتفكر فيه ساجده علي عيلتها لحرموها من هلبا حاجات واولهم لقرايا والصاحبات ....
.
.
.
.
ضيق رائد عيونه وهوا يشبح في حد مقعمز علي الكرسي ومتكي راسه التالي علي الكرسي ويشبح للسماء ورافع رجليه علي الكرسي قدامه ، قرب وقال:السلام يااهل السطح
رفع محمد راسه وشبحله:وعليكم السلام والرحمه
واول ماشافه من بتسم محمد ونزل رجليه من علي الكرسي وكمل:شن جو
شح رائد الكرسي وسلم علي محمد باليد:واللهي ماشيه علي الحاشيه وانت يابرو
محمد:لنقنه نا عترت وطحت من علي الحاشيه
ضحك رائد:خسارة كاني جنبك ره خديت بيدك
محمد:هههه راجل
اتكه رائد علي الكرسي:هههه اي شن لخبار وشن جو سالم غادي
محمد:الحمدالله اخبارة تمام
رائد:هوا يقرا
محمد:اي
هز رائد راسه وسكت ...
محمد ضيق عيونه:وانت تقرا ولا تخدم
رائد:لا عاد اني نخدم مكمل قراية
محمد رفع حاجبه وقعد يقصقص:مشاءالله في شن تخدم
رائد:محاسب في شركة
محمد:كويس ماشاءالله وحتي رعد يخدم زيك
ضحك رائد بهزوة:ياريت باللهي ههه لالا رعد يخدم مع خوتي
محمد:في مستودع الغاز
رائد:ههه اي في مستودع الغاز
محمد بتسم علي هزوة رائد الباينه من كلامه وقال:ختصر علي روحة طريق لقراية كنك انت ماخدمتش معاهم
هز رائد راسه كردت فعل فورية وقال وهوا يشبح لمحمد:لا اني مش جوي خدمتهم نحب نخدم علي النظيف وعلي السمعة لكويسه لبتقعد وراي بعد موتي
محمد ستعبط:وعليش خدمت مستودع الغاز مش نظيفه ومافيهاش سمعة طيبه
رائد حس روحه بدي يفقش فيها وصلاح كلامه:لا قصدي خدمه اني تاعب عليها مش خدمه واتيه ورثتها من بوي ولا من خوتي نحب نستقل بنفسي
بتسم محمد لحس بصدق كلام رائد لبتسم لمحمد:فهمت
محمد:هيوالله ربي يوفقك ان شاءالله
رائد:اجمعين
سكت محمد وقعد يفكر في كلام رائد اللي مبين انه مش راضي علي اللي يديرو فيه خوته وبوه ومش مخشش روحه في المتاها ليلعبو فيها .....
وخر محمد كرسيه ووقف:هي نستأذنك نا ياطيب
رائد ضرب التحيه بضحكه:تصبح علي خير عقيد
ضحك محمد لتلفت وهوا يطلع في تليفونه لشرين من جيبه:وانت من اهل الخير ياغااالي
نزل محمد وهوا يرد علي التليفون قبل مايتسكر:ها
رنا:مساء الخير
محمد:مساء الخيراااات
ضحكت رنا:مشاءالله المزاج معدل
محمد بتسم وهوا يفتح في باب الشقه:كيف الحال
رنا:الحمدالله
محمد:كويس قلتي لحنك علي بكرا
رنا:اي قتلها وياحنه من امبكرييي خشت رقدت باش تنوض بكري
محمد:هههه هضا الصح وكنك انتي مارقديش كيفها
رنا:مافيش نوم اولا
محمد:وتانيا
بتسمت رنا:قلت غر نتصل نشوف اخبار الحيط
ضيق محمد عيونه:حيط ؟؟
ضحكت رنا:اي حيط انت
محمد:وعليش
رنا رفعت كتافها:هكي ماتحسش ماتركزش وماتفهمش اهم شي ، ولا انت تستعبط وتتغابه مش عارفه الحق
محمد:تمام خليني في ستعباطي وغبائي وتصبحي علي خير
وسكر الخط في وجها وخلاها تتفجأة من حركته وهيا تفتح في فمها وتشبح لتليفون
.
.
.
.
عبه رعد طاسة لميه وتصل برنيم وهوا يتكي علي حاشية رخامت المظبخ ويشرب ، بس اول مالقها مشغول بعد التليفون وسكر وهوا يعاود بس رجع وعطاه .. الخط المطلوب مشغول حاليا ..
ضيق عيونه وهوا يشبح لساعة لخاشه علي ال1 نص الليل وقال بتمتيم:في من تكلمي انمم
.
.
.
.
شبحت رنيم لخالتها ميسون لقالت:هاتي الرد اني ولا ردي بالك وحده من صاحباتك
نور:تي ردي ولا سكري العازي بنتفرج
ضربتها رنيم برجلها ووقفت وهيا ترد:الو من معاي
جاها صوت واااطي:اهلين
خشت رنيم لدار خالتها وقالت وهيا تقعمز علي السرير:اهلين بيك من معاي
تحمحمت البنت وقالت:ساجده اخت رعد
رفعت رنيم حواجبها ورجعت وقفت بعد ماقعمزت وماعاش عرفت شن ترد لين جاها صوت ساجده:الو
رنيم:ايوه نعم قصدي شن اخبارك
ساجده:الحمدالله وانتي
رنيم ردت وهيا متحشمه:الحمدالله
ساجده:دوم يارب
رنيم:تسلمي
وسكتت شوي وبعدها قالت:هوا اني اسفه بس هوا رعد عطاك وقمي
ساجده بتسمت:لا اني خنبته
ضيقت رنيم عيونها:خنبتيه
ساجده:اي
رنيم ستغربت هلبا:اها
ساجده:اني
وزمطت ريقها وكملت:اني متصله نبي نحدرك وننقضك قبل ماتغرقي
رنيم:مافهمتش من شني بتحدويني
ساجده:من خوي رعد اللي تكلمي فيه وانتي ماتعرفي عليه شي واللي يخفيه رعد عليك عظيم
رنيم توثرة وقالت:وشن هوا
ساجده:خوتي تجار مخدرات واللي تكلمي فيه ياما بايع سم قتل اروح ناس وفلوسه كلهم حرام في حرام
فتحت رنيم فمها وهيا تشد في راسها بيدها:شني انتي شن تدوي
ساجده:حبيبتي نعرف كويس لنقول فيه كبير وخطير ، لكن اني ماهانش عليا نخليك مستمرة معاه علي العمياني لزي رعد غدار ومجرم يخليك تتعلقي بيه ويهبع بيك في طريق المخدرات باش يكسب من وراك وفي الاخير يخليك جثه ملوحة جثه هلكها الادمان
قعمزت رنيم علي الارض ودموعها نزلو:انتي .. ا.نتي اخته ب..جديات
ساجده:من حقك تستغربي فيا كيف نفضح في خوي ، بس كانك في مكاني وعندك ضمير اكيد ح تفضحيه باش تحمي بنات وصغار الناس من شره وجرمه
زاد صوت بكي رنيم اللي وصل لساجده لكملت:وباللهي عليك لو كلمتيه ماتقوليلاش اني لقتلك واللهي بعدها ممكن يدفني واني عايشه استري عليا زي مانقضت حياتك منه وتصبحي علي خير...
وسكرت ساجده وخلت رنيم مصدومه وهيا ترخي في التليفون من يدها لطاح لوطه وحطت يداها علي وجها وتبكي ، تبكي من كل قلبها وماتعرفش علاش ، اي علاش تبكي علي شخص ماليهاش معاه شهر ، من هوا باش تبكي عليه من هوا باش يخلي قلبها يوجع بوجع غريب وجع يكوي وجع يشبه النااار لتصلي صلي ، من هوا غير واحد عابر خش لحياتها صدفه وتعلقت بيه برغم غرابة شخصيته وتصروفاته وطلع تاجر مخدرات ، من هوا يارنيم باش تبكي عليه ولا معقوله حبيتيه ، حبيتيه وانتي ماليكش تعرفيه شهر شهر ناقص ...
غمطت عيونها ودكرت كلامه هداكا اليوم ...
"""" رعد:كان قالولك عليا حاجه اخي ماعاش تكلميني
رنيم:من هما
رعد:انم قتلك كان اني جاوبي من غير استعباط
رنيم بتسمت:ههه باهي زي شن بقولو
رعد سكت شوي وقال:متلا تاجر مخدرات
رنيم رفعت حاجبها:تي تبدا وبي باعتك ليا من سابع سماء باش نشوي منك هلبا مخدوات باش نموت ههههه """"
مسحت دموعها لينزلو بالعبرة:اني خديتها ببصوة وتاويتك انت تدوي بجديات
شبحت لتليفونها ليتصل واول ماشفاته هوا زادو دموعها نزلو وخداته وهيا ترد عليه طول ومن غير ماتفكر وفي شي داخلها يكدب لسمعاته..
واول مافتحت الخط سألاته طول من بين شهقاتها:..انت ت.بيع في مخدوات
قعمز رعد لكان متكي في فراشه طول وهوا حاس وكأنه من بزع عليه اميه مصقعة زي التلج في عز الشتاء من جملتها ولسانه ارتبط وماعاش عرف شن يرد وهوا يسمع فيها ترجع تتكلم بس هدي المرة بعياط ونفاذ صبر:انت تاجو مخدواااااات
مسح رعد علي جبهته وقال بصوت واطي:من قالك
خدت رنيم العبرة:معناها صح
رعد:خوتي تجار
رنيم:وانت معهم
وقف رعد وهوا يمسح علي شعره:رنين اسمعي ان.....
سكرت رنيم الخط في وجهه وهيا تحدف في التليفون علي السرير علي خشت نور لاول ماشافتها طايحه علي الارض وتبكي قربت منها طول وهيا تنزل في تليفونها وتخلي في رائد علي الخط...
نور:رنيم خيرك شن فيك
تلفتت رنيم لنور وحضنتها طول وهيا تبكي بعبرتها لين خلت نور تخاف وهيا تبعد فيها شوي وهيا تمسحلها في دموعها :ستني نرد علي رائد ونفهم شن....
قصت رنيم علي كلام نور وهيا تفك منها في التليفون طول وترد علي رائد:سيبونا في حالنا انت وخوك وماعاش تتصلو بينا فاهم ماعاش تكلم اختي ياحقيو زيك زي خوك الكلب
وسكرت التليفون في وجهه وهيا تشبح لنور لضيقت عيونها وقالت بعصبيه:تي خيرك درتي هكي اه خيرك مش كان متعاركه مع رعد معناها اني ماعاش نكلم رائد
رنيم:غبيه انتي غبيه
وخدتها العبرة مع دموعها لمابطلوش نزول مع وجع قلبها وكملت:غبيه زي اختك هادم تجاو مخدوات
فتحت نور عيونها وقالت:كيف
.
.
.
.
__
تاني يوم الصبح...
.
.
رنا بتسمت:بارك الله فيك ماقصرت معانا
محمد:هضا واجبي
رنا شبحت لحناها وخوها لمقعزين في السيارة ياكلو بعد تعب اطوابير الجوازات ورجعت شبحت لمحمد:اممم شن رايك نوصل حناي وخوي و نعزمك علي طاسة قهوة في كافي
محمد:بارك الله فيك لكن عندي شغل
رنا:باهي عادي نخلوها مرة تانيه
محمد ضيق عيونه وبتسم:ماعتقدش في مرة اخرا
رنا:اممم هدا كله علي خاطر كلامي امبارح اسفه ياسيدي ماقصديش
محمد هز راسه بألامبلاة:لالا ولا شاغل بالي ، لكن نا مانرضها نقمعز مع بنوته نا مش محرم عليها
رفعت رنا حاجبها:واو فكرت حتي في هدي انت
محمد:اكيد
رنا:يعني عادي حني مش اول واحدين ولانا اخر واحدين
محمد:نا ماخصني في حد خصني في روحي ونظرت الناس لي وحترامهم لي
رنا ضحكت بهزوة:لو قعمزت معاي احترام الناس ح ينقص ليك يعني
محمد:احترامي لنفسي هو لبينقص
ولبس نظراته وهوا يشبح لسيارتها:نستأذنك
وتخطاها وهوا يطبس علي روشن الكرسي لمقعمزة فيه سعيده وقال:هي مع السلامه اميمتي
سعيده:بارك الله فيك وليدي
محمد:فيك بارك الله
ومشي ركب سيارته وهوا حاس بنظرات رنا لمتحولوش منه لين ركب سيارته وهيا متمنيه الارض تنشق وتبلعها .....
__
.
.
.
خبط رائد يده في الدولاب وعيط لين لم عليه الحوش وهوا يصيح:واني شن خصني اني شن دنبي اه شن دنبي يعلقو في كل جرمكم في رقبتي علاااااااااش علاااااش الناس تشمل فيا باعمالكم علااااش
خشت احلام ووراها حنين وساجده لشبحت لرائد لقرب من رعد لمتكي علي الحيط وحاط راسه لوطه ومانطقش ب ولا حرف ، شده رائد من تيشرته وقعد يهز فيه:انت لقلتلها وله انت
وبعد وضربه بوكس علي خشمه لين احلام عيطت وهيا تقرب:لاااا لا من غير ضرب اهدي يارائد اهدي ياوليدي
شد رعد خشمه وماتكلمش بكل ولا ردهاله
بعد رائد من علي امه وزاد صيح:حتي انتي يمه حتي انتي مصره ادمريني مصره تخليني معاهم شوفي حالتي شوفي بدو الناس يخافو يقربو مني
وضحك بهزوة:مه اني خوت لكلاب هدو خوت ولادك لكلاب يمه ليقتلو في الناس بسم ليبيعو فيه ويقتلو فينا بالفلوس لحرام لمعيشينا بيهم
احلام:عيب ياولدي عيب ماتقولش هكي هدوم خوتك وبوك
رائد:ونبي فكيني يمه خلوني في حالي خلوني نطلع من هني نبي نمشي بعيد وبس نبي انظف روحي منكم بسبت سمعتكم لمسخه ال...... لا قدرت نخدم وين مانبي لا نبني علاقات تفيدني واخرها حتي البنت لنبيها سيبتني سيبتني علي خاطر ولادك لكلاب علي خاطر حني نبيعو في السم الهاري علي خاطر حني تجار برغم اني مش منهم بس جملوني معاهم
وخبط برجله علي باب ادولاب ودموعة نزلو من القهر لحس بيه وطلع من الدار وطلع من الحوش بكل وهوا يقربع في الباب ،
احلام قربت من رعد لقعد متكي علي الحيط ومادارش اي ردت فعل او عصب او صيح زي مايدير كل مرة كان المرة هدي ساكت وحتي بعد ماضربه رائد ماحولش يردهاله او يصيح عليه او حتي يوقفه ..
احلام:رعد خيركم خيرك انت وخوك
طبس رعد خدي تليفونه الطايح من علي الارض وجبد طاقيته وتجيبوطيه وطلع وخلا احلام مستغربه ودموعها علي خدودها وساجده اتبع فيه بعيونها لين طلع من الحوش وقربع الباب ، مسحت علي وجها وهيا تفكر لصار هدا كله بسبب لدراته ، زعما غلطت بدل ماناخد رقم البنت ليكلم فيها رعد خديت الرقم حبيبت رائد ، بس خديته من تليفون رعد شن جاب رقم لكلم فيها رائد لتليفون رعد ...
نفخت وهيا تشد في راسها بيداها ، ياربي ماكنش قصدي نكسر رائد ماكنتش نبيه هوا لينجرح ويتعدب .....
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3