عشق في بلاد حروبها لا تنتهى 2 (طرابلس ياغارقة في الدم)

البارت 11

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
البارت11
.
.
في الحلقة السابقة
زادو كتفوه وحطو لكليبشات في يديه وسكروله فمه بالصقه وربطو رجليه بحبل سميييك وحطوه في تابوت وسكرو عليه ، حاول سفيان يعيط يناجي بس اول ماسكرو عليه التابوت سكت طول وبدت رعشت الخوف تسري في جميع أطراف جسمه ، والادرنالين وضغط دمه رقو وهوا يسمع في صوت دقات قلبه في العتمه الموحشه اللي برغم من انه فاتح عيونه بس من الظلااام التابوت ووحشته مش مفرق لو هوا فاتح عيونه ولا مسكرهم ، بدي تدريجيا يفكر في كل شي داره ، في عصيانه وصياحه لامه وفي ظلمه وضربه لبعض المساجين في المقر لكان شاد فيه ، في موتت بوه في لاحظاته مع فارس في طفولته وفي كبره كيف كان يسكر يحشش ويروح يرعش في امه حتي من السبان لطلع من فمه كله ادكرة ، وفي حمزة لمات بين يديه ، لا شعوريا وبرغم برائته من جريمة حمزة بدي يفكر انه هوا لقتله انه ربي بعدبه وخيال حمزة ماعاش بسيبه ، بدي يسأل في روحه علاش قتلته علاش درت هكي ، بدي يهلوس ويفكر في الاخرة في ربه اللي ليه ناسيه سنين ، حس روحه وكأنه بالحق وبجديات ميت وتوا هوا في قبرة ويستني في عداب ربي ينزل عليه ...
#القليل_من_الكتير💔

قراءة ممتعة
#البارت_الحادي_عشر

عيطت نور بفرح وهيا تخش تجري لرنيم لمقعمزة علي سريرها وطبق في لحويج ، واول ماخشت نور جتها تجري ونقزت عليها وحضنتها لين رنيم عيطت:واااااك حولي خنقتيني حولي ياباودة
بعدت نور وهيا تضحك:بابا قال باهي برو
رنيم:وين بنمشو
نور نفخت:تي ياحمارة مش خالتي قالتنا تعالولي باش نطلعكم للحفلة لمدايرينها في تاجوراء ل17 فبراير
رفعت رنيم حاجبها:وبابا قال باهي متأكده
بتسمت نور ببتسااامة عريضه وهزت راسها بالقوة بمعني اي:اي اي قال اي
رنيم:غويبه بسم الله ابصو شن بصيو ياودي مش بلاش
نور:اكيد مش بلاش رجاء بتمشي معانا
رنيم نفخت ودفت نور:واني نقول فكيني توه تو بتقعد زي مسجل الصوت كله بتسجله لامها
نور:تي شن بندوو حني بنمشو ندهورو ونديرو جو باللهي عليك
رنيم:ماخاطويش اني اصلا امشي انتي وياها واني نقعد نشد مهند
وقفت نور ودفلت عليها ومشت وخلت رنيم تشبح للحوايج لطبقتهم كلهم طاحو لوطه ونحلو عيطت وهيا تقيم فيهم:حيواااااانه تجي تخوبي وتسومي في الحوايج وتمشي تفوه عليك
رجعت طبقتهم وحطتهم في دواليبهم وهيا تتلفت لتليفونها لشرين ، سكرت الدولاب ومشت للكمادينو واول ماقامت التليفون وشافت رقمه لحفضاته بتسمت وخلت روحها تتعطل في الرد شوي وبعدها ردت:الو
رعد:مبرد امك انم ردي بسرعة مية مرا نقول ردي بسرعة
ضيقت رنيم عيونها:احترم نفسك وماعاش تسب ماما
رفع رعد حاجبه وكيف جاي بسب تاني بس شد روحه وهوا يدكر انه امها متوفيه ، نفخ وقال:مش قصدي وهدي مش سبه خيرك انتي شادتها علي الواقف
رنيم:كيف شادتها علي الواقف
رعد:شي شي نخرط اي شني جوك
رنيم:اخي وماخطويش نسألك شن جوك
بتسم رعد:لسانك طول
رنيم:نعوف
رعد:هههه نعوف
رنيم:اسمع والله نسكو
رعد:وربي اديريها لما نقلبها فوق راسك تو
نفخت رنيم وسكتت وماعاش ردت عليه ، قعدو ساكتين فتره وبعدها رعد قال:غدوة بتطلعي للحفلة
رنيم:لا
رعد:طحلوبه
رنيم:وعلاش لمش طالع معناته طحلوب
رفع رعد كتافه:هما يقولو هكي مانعرفش اني بيها بلاها طالع
رنيم:اممم وين طالع انت ، قصدي وين بتمشي
رعد:لتاجوراء
رنيم رفعت حواجبها:اها حتي خواتي غدوة بيمشو غادي
قعمز رعد زين وقال:وانتي علاش ماتبيش تمشي معاهم
رنيم:هكي ماخاطويش
رعد:منكدية انم تي اطلعي غيري جوك
رنيم:ماخاطويش
رعد:هما قالولك لا
رنيم:لا اني ماخاطويش
رعد:باهي ابدي خاطوك وتعالي ههههه
رنيم بتسمت وهيا تفهم انه يقنع فيها وقالت:الا ماخاطويش
رعد:تي انم اني ماقتلكش تعالي كولي وانتي شديتي امها
رنيم:وانت خيوك مصو عليا خاطويش خلاص نبيش اني
رعد تنهد وهوا يحاول يشد لسانه وقال:ياعن شكلك باهيووو
رنيم صيحت بشويه:قتلك ماعاش تسبني
رعد:ماعاش تستفزي امي باهي وتعالي
رنيم:خوك شديت في الموضوع انت
رعد تحمحم وسكت لين رنيم رجعت تكلمت:تي وينك الوو
رعد انفخ بالقوة:انم تعالي بالك نتلاقو غادي
حطت رنيم يدها علي فمها وهيا تحاول تكتم ضحكتها وتحمحمت وقالت:اممم تبي تشوفني
رعد:علي اساس انتي ماتبيش تشوفيني
ردت رنيم طول:لا مانبيش
رعد:نحلف بمينات الله لاتبي ياكدابه
ضحكت رنيم:هلبااا انت وااه
رعد:ههههه عاوف عاوف
وحاول يتكلم بجديه بس ممزوجه بترجي:بتجي وله
رنيم:نعوفش تو نشوف
تنهد رعد:تم نتلاقو نفس المكان لدرنا فيه الحادت الحلو ههههه تمام
حطت رنيم يدها علي عيونها وقعدت تضحك:قتلك تو نشوف
__
تاني يوم الصبح ...
حطت رنا لفطور وهيا تنادي:جلاااال جلاااالووو ولو وينك
طلعت سعيدة من المطبخ وهيا تحط في طاجين الدحي وتقعمز:زيك زي خوك الزوز اتبل من بعض
شهقت رنا:حرام عليك ياحناي لا ياودي علي الاقل اني اهو انوض بكري
جي جلال يجري وحط شنطة علي الكرسي وجي قعمز جنب حناه:هي ديرولي نص الباص قريب يجي
مدتله رنا نصه:نوض امخر وبعدها اقعد مدوده في روحك كول بسرعة
دق باب الحوش لين سعيدة بتسمت:نوضي نوضي اكيد هدا منذر
نفخت رنا:مش وقته بكل ادراه هدا
سعيدة:عيب ولد عمك هدا
قلبت رنا عيونها وهيا تنفخ وناضت وهيا تصيح:هي هي شوي بس
لفت وشاحها بعشوائيه ونص شعرها يبان وفتحت الباب وهيا قالبه وجها وتنفخ واول ماشافت محمد عاطي بضهرة فتحت عيونها علي وسعهم وساوت جاكيت توتتها وهيا تشبحله كيف تلفت وهوا حاط عيونه لوطه وقال:صباح الخير سامحوني علي الازعاج
رنا:لالا تفضل تفضل
محمد:لالا حتي هكي كويس ، كلا كان تجيبيلي وراقيكم وجوازاتكن كان وتيتوهن
رنا:شوي بس
خشت رنا تجري لحناها:حناي الولد لامس وصلنا برا
سعيدة:ياوخيتي مانساناش واللهي لا مازال فينا الخير
رنا:تي نوضي ياحناي مش وقت الشكران توا نوضي خشاشيه للمربوعة
سعيدة وقفت وقالت:باهي هي اهو نضت بري انتي جيبيله الجوازات
مشت سعيدة ورنا شبحت لجلال:كول بسرعة واطلع استني الباص برا
طلعت سعيدة لمحمد لكان واقف قدام الباب وعاطي بضهرة
سعيدة:صباح الخير ياوليدي خش خش خيرك واقف برا
تلفتلها محمد وبتسم وهوا يقرب منها وباس علي راسها:لالا ياميمتي واللهي مستعجل
سعيدة:غر خش حتي طويست شاهي وبرا
جت رنا تجري وهيا تمد في لوراقي لمحمد لطبس راسه وقال:مرة اخرا انشاءالله
مشي محمد وخلا سعيدة ورنا لنفخت وقالت:خيرك ماأصريتيش عليه
سعيدة:ماباش شن تبيني انكره بسيف
تنهدت رنا وشبحت لحناها:مشاءالله عليه ماتخيلتاش بجي من غير مانتصلو بيه
سعيدة:اي فيه الخير
__
طلعت مريم هيا وصاحبتها ندي لتلفتتلها:قصدك ماجاوبتي شي شي بكل
مريم:شوية حاجات بس شادتهم من الدكتور ، تعرفي حاسه راسي بيطربق واصلا مافضيتش نقرا وبالي مش في قرايا بكل
ندي:ربي يرحمه ان شاءالله شن حال امه
مريم:شن حالها يعني ان شاءالله غير ماتلحقاش من بكاها وحسرتها
ندي هزت راسها بتنهيده وهيا تتلفت التالي بعفوية بس اول ماتلفتت شبحت أحمد(الصقر) جاي جيهتهم ، شهقت وتلفتت لمريم وهيا تشد في يدها:احمد ورانا
تلفتت مريم طول وهيا تشبح في احمد(الصقر) جايها نفخت وهيا تمسح علي جبهتها وحاسه روحها مافيهاش جهد باش تتناقش معاه
ندي:اني نستنا فيك غادي كملي معاه وتعالي باهي
مشت ندي وخلت مريم واقفه وتشبح لأحمد(الصقر) لقرب ووقف قدامها
مريم:شن جيبك هني
أحمد(الصقر):كيف شن جيبني هني من امس وانتي ماترديش عليا
نفخت مريم:احمد ماخاطريش نتناقش معاك ياسر الدوة لقلتها امس مانبيش نسمع منك كلام بايخ ومش موزون اكتر
أحمد(الصقر) ضيق عيونه:كلامي مش بايخ وموزون يامريم اعرفي شن تدوي قعد صابر عليك اني ، وشن يعني كلامي كان مزبوط كلنا منموتو مافيش حد بيموت ناقص عمر
مريم رفعت حاجبها:خيره لكلام هدا ماقلتاش لما امك ماتت ولا انت تحس عادي وحلال عليك وغيرك لا ، احمد اني ولد خالتي مات خوي الصغير مات كبدي هدا كبدي طول عمرنا عايشين مع بعض عشرت عمر اني واحد لا نعرفه لا يعرفني نبكي عليه ويوجعني مابالك خوي
احمد(الصقر):تمام تمام مش لازم نتعاركو علي حاجه تافها
مريم رفعت حاجبها:هدي مش حاجه تافها تمام و باللهي عليك برا توا لانه مش متحمله نشوفك بكل
ومشت وخلاته واقف يشبحلها وهوا يشفشف في شعره بغل تلفت وهوا يطلع من الجامعة تحت انظار علاء لشبح كل لصار ...
__
في الليل وعلي سماء طرابلس المليانه بالألعاب النارية والاحتفالات في كل مكااان ، وأغاني التحرير في كل مكان في مناطقها ...
درس رعد سيارته برا تاجوراء من الزحمه وخش علي رجليه وهوا يسمع في صوت الاغاني العاالي اللي يتردد في تاجوراء كلهااا وكل مايخش كل ماصوت والزحمه تزيد والعلم يرفرف ومقيوم في كل يد طفل وكبير ويغنو مع الاغنيه المفتوحة ..
.
عيدك عيدين يابلادي محلي الفرحة ، ولمتنا في الشوارع مداينا السمحة ، فرحان من قلوبنا وين رتسمت الضحكه ، علي وجوه ولادك اللي ردو ليك البسمه ...
.
حست رنيم بهزان تليفونها اللي شاداته في يدها ، فتحاته وهيا تشبح في رسالة من رعد(وينك) ، بتسمت رنيم وشبحت حولينها وبعدين ردت وكتبتله(في نفس المكان لتلاقينا فيه اول مرة)
قراها رعد وحط تليفونه في جيبه وهوا يلبس في برنوسه علي طقيته
.
ليبيا فوق الجميع ، ويشهد العالي السميع ، نشيلوها فوق روسنا ماننسو جمايلها ...
.
وقف رعد قدام الزنقه لتلاقو فيها وهوا يطلع في تليفونه اللي يشرين من جيبه ورد وهوا يدور عليها بعيونه:ايوا
رائد:انت في تاجوراء ولا وين
رعد:اي في تاجوراء خيرك انم ماتقولش جايني
رائد:وربي لا كلب بلاش خليني منخمد في الحوش
رعد ضحك:نحلف عليك لا واقف في جزيرة بندلسي توا
ضحك رائد:هههه تي جايك اني قولي وينك
رعد:تعالا في...
وسكت وهوا يركز في بنت لابسه عباية سوده ترفرف عليها ووشاح اسود وتضحك مع بنت جنبها وعيونها من بعيد يلفتو الواحد بلونهم زي لون البحر الازرق الصافي ، وماركزش علي روحه الا علي عياط رائد:تي وينك ازح رعددددد
رعد:تي خير امك يا.... تي تعالا قدام المصور لنمشوله مابين جيتك وانت نفختهم
رائد:برا ياعن شكلك ماتتعطلش عليا
سكر رعد عليه واتصل ب رنيم وهوا يشبح للبنت واول ماشد شبحها كيف نتبهت علي تليفونها لشاداته في يدها وردت
.
نحنا لجبنا التحرير ، وحسينا طعم التغير ، واجبنا نحافظو عليكي ياقطعة من الجنه ...
عيدك عيدين يابلادي محلي الفرحة ، ولمتنا في الشوارع ومداينا السمحة ، فرحان من قلوبنا وين رتسمت الضحكه ، علي وجوه ولادك اللي ردو ليك البسمه ...
.
بتسم بفرح ولاول مرة في حياته حاس بنبضات قلبه يزيدو بشوفت حد وبشعور حلو هلباااا ، نتبه علي صوتها:الووو
رد رعد وهوا يشبحلها كيف تتلفت يمين يساار وكانها ادور عليه:كان تشوفيني تعرفيني
رنيم:عليييي صوتك
رعد علا صوته:كاان تشوفيني تعرفيني
رنيم ضحكت:لا هههه
ضحك رعد:ههه تلفتي وراك
تلفتت رنيم وهيا ادور عليه بعيونها:وينك
حول رعد برنوسه من علي راسه:لابس طاقيه كحله
نتبهت رنيم عليه طول وهيا تشبح فيه كيف حول الطاقيه ولبسها بالمقلوب وهوا يغطي في شعره الهايج ، بتسمت غير اراديا كان حلو طويل ولابس سروال وتيشرت اسود وفوقهم كبوط جلد اسود ، ولحيته مخففها وعنده غمازه باينه من ابتسامته ليها وجرح في جبهته شالم حاجبه بين زوز
.
تعلا بو نجمه وهلال ، مخطط يامحلي للوان ، دفعو حقه دم الثوار ، اللي جابو حقوقنااا ...
.
ضحكت رنيم وهيا تسمع في صوته:تقدري تجي
هزت رنيم راسها بمعني لا وهيا تشبح في بتسامته تلاشت وحواجبه نعقدو وهوا يضيق في عيونه:علاش لا
رنيم:نخاف
رعد:مني
رنيم:امممم
رعد نفخ وهوا يشبح حولينه وبعدها شبحلها:باهي انم قربي شوي نبي نشوفك من قريب
تنهدت رنيم وهيا تتلفت لنور لشبحتلها وصيحت:في من تكلمي
رنيم ردت علي رعد:باهي
بتسم رعد:هي تعالي
.
تعيشي يابلادي حرة ، واللي خانك يطلع بره ، الليبي وتاريخ تحكي بيه الامه...
عيدك عيدين يابلادي محلي الفرحة ، ولمتنا في الشوارع مداينا السمحة ، فرحان من قلوبنا وين رتسمت الضحكه ، علي وجوه ولادك اللي ردولك البسمه ...
.
نزلت رنيم التليفون وهيا تقرب من ودن نور:تعالي معاي
بعدت نور وقالت:وين
شدت رنيم يد نور وجبدتها:تعالي واسكتي قبل مايوكزو علينا رجاء وخالتي
مشت نور بعدم فهم ورا رنيم لتشبح لرعد اللي حول طاقيته وهوا يرجع في شعره التالي وحاس روحه مش قادر يفكر ومش عارف شن يدوي بضبط معاها والابتسامه ماعاش تحولت من علي شفايفه ، وهوا لاهي يشبح لرنيم حس بيد علي كتفه وصوت رائد:رعد
تلفتله رعد طول وصيح:ال...... شن جيبك هني انت
وخر رائد بخلعة وقال:تي خيرك تعيط ازح
نفخ رعد وهوا يمسح علي جبته وتلفت واول ماتلفت جت عينه في عين رنيم لكانت قريبه منه ومش بينهم الا تلاته ولا اربع خطوات ، بس من الزحمه وقرب الناس من بعضها مانتبهتش نور اللي تنفخ جنب رنيم وتعاود ولما رفعت عينها شبحت رائد اللي لما شبحها قعد موقف عيونه عليها وماحولهمش بكل من عليها لين نور ضيقتله عيونها بشر لين رائد بتسم من حركتها وهيا تقطع اتصال عيونهم وتشبح لرنيم:تي خيرك جبتينا هني
تلفتتلها رنيم وقالت:شوفي غادي فيه ولد لابس اسود وشاد طاقيه في يده
ركزت نور واول ماشبحت رعد زمطت ريقها وهيا ترجع تشبح لرائد بخوف وقالت:بسم الله الرحمن الرحيم الولد قرينه واقف وراه ومن امبكري يشبحلي ويبتسملي اعود بالله من الشطان اعود بالله من الشطان
رنيم:تي قوين شن شن تخوطي انتي
وتلفتت رنيم وهيا تشبح لرعد وبعدها ركزت في رائد اللي خلاها تفتح عيونها علي وسعهم من الخوف لين رعد ضيق عيونه وهوا يلاحظ في ملامح الخجل والابتسامه اختفو من علي وجها ، وتلفت وراه لرائد لقعد يشبح لنور ، خبطه رعد بمرفق يده علي بطنه لين رائد تأوه وهوا يوخر ويشبح لرعد لعقد حواجبه:علي شن تتشبح انم
رائد:تي خيرك عليا ازح انت من امبكري تكشخ
رعد رفع حواجبه وغمط عيونه ورجع فتحهم وقال:درق وجهك لاخر نقطه في تاجوراء وماتخلينيش نلمحك بكل لين نجيك يا.....
ضيق رائد عيونه ورجع الخبطه لرعد اللي عيط منها وشبح لنور لقعده تشبحله وغمزلها ببتسامه لين خلاها تشهق وخلاته يضحك وهوا يتلفت ويمشي ويلعن في رعد لرجع تلفت لرنيم لتلفتت لنور لصيحت بصوت عالي :غمزلي غمزلي القرين غمزلي
رنيم عيطت:اس اسكتي ماتخوفينيش باللهي عليك
قلبت نور شفايفها وقالت بتنقنيق:درتي موعد من ورا ضهري الله يسامحك واللهي مسامحاتك بس خيرك مالقيتي اديري موعد الا مع واحد مخاوي جنون
رنيم:ووبي كان ماتسكتي لما نبوك عليك قدام الناس
نفخت نور وشبحت لرنيم لنخلعت من التليفون لشرين وهيا تقلب فيه وتشبح فيه هوا المتصل ردت عليه طول وقالت:انت جني
رعد:اشبحيلي
رنيم:لالا توا شبحت منك زوز وحقوبي هي حتي اختي شافته واقف وواك
رعد:تي خيرك انم تحضريلي فيهم اعدو بالله منهم هدا خوي التوأم
رنيم:بالحقا
رعد:انم تلفتيلي
تلفتتله رنيم وشبحتله كيف بتسم وقال:ماتقدريش تقربي اكتر انم
رنيم بتسمت:انخاف اختي وخالتي يشوفوني
رعد شبح لنور اللي تشبحله بتعصيب وبخوف في نفس الوقت ورجع شبح لرنيم وقال:واللي واقفه جنبك من مش اختك
رنيم:اي ماندويش علي هدي ندوي علي اختي من بوي
رعد:اه
وسكت وقعدو يشبحو لبعض ويبتسمو لبعضهم ، وماقطعش عليهم غير صياح نور:تي ياسر وانتم تتشبحو في زول بعضكم هيا ازح اني عضامي يتمرعشو مع بعضهم
شبحت رنيم لنور:تي اوكحي باهي
ورجعت شبحت لرعد وتسمع في صوته وهوا يضحك:اوكحي صار ههههه
تحشمت رنيم وبتسمت:اني خلاص بنمشي
رعد:مزال
رنيم:هوا هدا شبحتني وشبحتك شن مزال تاني
رعد:اروح بيك عندي
رنيم:هههه احلف
رعد:انم نبي نتزوجك
رنيم ضحكت:هههه واني مانبيش
رعد:ومن طلب رايك انتي
ضيقت رنيم عيونها:باي اني ماشيه
ضحك رعد:هههه باهي خلاص بري هي
بتسمت رنيم وهيا تشبح لرعد لنزل التليفون وهوا يشبحلها ويبتسملها ، زادت ابتسامتها وتلفتت وهيا تشبح لنور لمضيقه عيونها:نتفاهم معاك في الحوش يا فانص
ضيقتلها رنيم عيونها ومشت سبقتها وخلتها تتلفت لرعد وهيا تبعتله في نظرات تهديد لين رعد عوج فمه وقال:خيرها هدي ..
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
اسم الاغنية / عيدك عيدين يابلادي لـ صلاح غالي