عشق في بلاد حروبها لا تنتهى 2 (طرابلس ياغارقة في الدم)

البارت 15

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
البارت 15
.
.
.
في الحلقة السابقة
رائد:ههههههه قوية انتي وتهبلي وتنزرطي زرط تعرفي وله
نور:اي نعرف هههه
وسكتت نور شوي وقالت وهيا تتحمحم:وحتي انت
رائد رفع حاجبه وركز معاها:وحتي اني شن
نور:قصدي هكي زي ماقتلي
رائد:وشن قتلك
نور:انه نهبل وننزرط زرط حتي انت هكي
رائد:اي شن حتي اني
نور نفخت:وااااك قصدي حت انت تهبل هلبا وتنزرط زرط
رائد:هههه خشييييي
نور:اوووف يابارد انت بالعاني ادير هكي وله
رائد ضحك:ههههه ياحليلي اني وخلاااص علي المتحشمات تي اني من الاخير بديت نحبك يافرخه ره
رفعت نور حواجبها وقعدت تضحك معاه وهيا متحشمه هلبااااا منه ......

قراءة ممتعة
#البارت_الخامس_عشر

حطت نادين يداها علي خدودها وشبحت لأختها فاطمه وقالت بفرحة امبينه علي عيونها لمدمعة:ياربي مش مصدقه بكل بكل
فاطمه رفعت حاجبها:ماتفرحيش يانادين بياخدك ك بديل عن نهي ره
نفخت نادين:وااااك ماتخربيش عليا فرحتي وانتي ماتصدقي تفسدي فرحت غيرك
فاطمه:اني نوقض فيك بس بالك تفيقي علي روحك ودماغك الفاضي يفهم شوي ، ره يانادين ح تنقلب علي راسك وقولي اختي فاطمه قالت لانه حياة فارس ولت كلها خطر في خطر شوفي نهي لتحبه وتموت فيه خافت علي روحها وعلي حياتها تنقلب وسيباته
نادين رفعت حواجبها وشبحت لفاطمه:غلط هيا ماتحباش كان تحبه صح وتموت فيه علي قولتك ره ماسيباتاش ولاني اني نحبه ومش زيها نرخي باللي نحبه مستحيل نرفضه ولا نرفض الفرصه لجتني باش نولي جنب لنحبه وهوا اكيد ح يحبني لما يشوفني وقفت جنبه
فاطمه رفعت كتافها ووقفت:ديري لي في راسك اني لعليا درته ونصحتك
طلعت فاطمة وخلت نادين تتنهد وتفكر في كلامها للحظه وبعدها هزت راسها وبتسمت وهيا تحاول تصدق الحلم اللي فقدت الامل انه يصير حقيقه
__
.
.
تاني يوم الصبح فاق رعد علي حركت رائد لي في الدار ، حول رعد اليرغان من علي وجهه وفتح عين وحده وشبح لرائد:تي خير...... علي صبح ربي شن ....
رائد:وين سروالي الجيشي ازح
رعد:وين نندري علي ..... شن نلبس فيه معاك فكنا من..... وقلب رمتك خليني نتمرقد
شد رائد تيشرت كان ملوح لوطه وحدفه علي رعد:تمرقد مرقد جدي لي ماعاد ناض
وطلع وهوا ينادي علي اخته ساجده:سااااجده
جاته ساجده تجري:نعم
رائد:ماشفتيش سروالي الجيشي
ساجده:توا كيف نشرته ره قعد مبلول
رائد نفخ:باهي باهي
تلفتت ساجده بتمشي وقفها رائد:سلم وخيتي ديريلي نص هكي علي السريع من تحت يدياتك
شبحتله ساجده وأشرت لعيونها بداها:من العين هدي قبل هدي
ضحك رائد وتلفت:تلقيني في البلكونه
خشت ساجده علي حنين لتوتي في لفطور:ياريت كلهم يولو زي رائد
تلفتتلها حنين وقالت بضحكه:ياريت باللهي
ساجده:اعطيني خبزة غر انديرله نص
حنين:قبل ماديريله بري لرعد قوليله السفاو قاله يتصل بيه ضروري لما ينوض
هزت ساجده راسها وطلعت مشت لرعد قربت من الباب المردود وقبل ماطق وتخش سمعاته وهوا يتكلم:ايح علينا ياقرجتي هي كلمه بنشوفك ويجيب ربي ماتطلعي
بتسمت ساجده وطقت الباب ، نزل رعد التليفون وقال:خشي
خشت ساجده:السفاو قالك لما تنوض اتصل بيا ضروري
رعد:باهي سكري الباب
سكرت ساجده الباب وخلت رعد لرجع التليفون في ودنه وهوا يسمع فيها تنادي:تي وينك الوووو
رعد:ها قرجتي
بتسمت رنيم:ها
رعد ضحك:ها ها
رنيم:مشيت بعقلي جيت بلاه اها اها
رعد:هههههه هبلة وهبلتيني معاك انم بري تو اقلبي خليقتك تو نتلاقو تمام
رنيم:نتخطو علي قلت اسلوبك لمعفن شوي ونقولك مش متأكده وه بس نحاول
رعد ضحك:اي علي خاطري حاولي
رنيم:حاضو
رعد:يحضرلك اني ان شاءالله هي سلام
سكرت رنيم من رعد وهيا تتلفت لنور لخشت عليها:بابا قال هيا
جبدت رنيم وشاحها:زعما كان نقولو لخالتي اطلعنا بعدين
نور:في شك لانها شاكه فيك تكلمي في حد اصلا في الاكيد ح طقها معاك اليوم نقاش
رفعت رنيم حواجبها وفتحت عيونها علي وسعهم وسيبت وشاحها:احلفي
نور هزت راسها:والله من هداكا اليوم قالتلي غر اني مابيتش نقولك في وقتها عارفاتك بتفضحي روحك
نفخت رنيم:واااااك ياحشمتي
نور:علاش ياحشمتك بنسبه ليا اني بنقولها والله مانقدر ندس عليها حويجه خالتي وبعدين لو كان ولد ناس تأكدي انه ح توقف معانا
رفعت رنيم كتافها:اي صح
نور:هيا هيا البسي وشاحك غر نوصلو غادي بكري ونكبشو فيها بالك اطلعنا
.
.
.
.
طلع رعد من الحمام وهوا يجفف في شعره ويسمع في صوت تليفونه لشرين في الدار ، كبه علي لبنات في المظبخ وقال:ديرولي نص دحي
تلفتتله حنين:واتي هي تعالا
رعد:تو نجي
مشي رعد وخلا ساجده تتلفت لحنين وقالت بضحكه:ياحليلي الحيط بدي يعشق ويتمعشق
حنين ضحكت:هههه اسكتي خير مايسمعك فكينا من نشافه هههه
.
.
.
لوح رعد الفوطه علي الكرسي ورد علي تليفونه قبل مايتسكر:ايوا
السفاو:صح النوم وخيتي
رعد بتسم:شن تبي في ....
السفاو:وربي يارعد كان ماتبطل سب معاي لما نطقطق امها رقبتك
رعد:تفضل خوي حبيبي شن تبي
السفاو:غدوة في الليل بتوصل بضعة جديده برا انت و فاتح باش تستقبلوها
رعد:علاش انت ماتمشيش
السفاو:رعد دير زي ماقتلك من غير ماتناقش
رعد:باهي باهي يستر الله
السفاو:وتصل ب بوك يسأل عليك
رعد:خيره ماعاش روح هوا
السفاو:يخدم
رعد رفع حاجبه:قصدك يسكر اي اي تمام
السفاو:ياعنشكلك اقلب وجهك
وسكر في وجهه وخلا رعد يسب فيه ، بدل حوايجه بسرعة وطلع مشي للمظبخ وقبل مايخش سمع ساجده لقالت بحماس لحنين:ادعي بابا يوافق مليت من الحوش نبي نكمل قراية
حنين:مش عارف مرات يقول اي مدام المعهد قريب منا تقدري تمشي حتي علي رجليك
هزت ساجده راسها بفرح وقبل ماتتكلم خش رعد وقال:تمشي علي امك مش علي رجليك لا قراية لا شطان قعمزي وركحي
نخلعت حنين لشبحتله ورجعت شبحت لساجده لوجها تغير من ملامح فرح لملامح حزن وغضب وقالت بنفعال ك ردت فعل منها:وعلاااش هوا قريب ديرولي حتي باص وحتي بنات عمي مصطفي يقرو فيه
رعد خدي النص والشاهي ورجع شبحلها شبحه لين حنين نخستها وهيا تشبح لرعد لقال وهوا مسكر علي سنونه:ان شاءالله الباب في الباب لاااااا لا بنات مصطفي لا معتوق
ساجده رفعت حاجبها:والله بوي قعد حي كان قالي باهي هو والسفاو لما نمشي
حدف رعد طاسة الشاهي تحت رجليها لين ساجده نخلعت وهيا توخر بخوف ورفعت راسها طول لرعد لقرب منها وشدلها شعرها بالقوة لين عيطت وقال بعصبيه:من مكبرلك راسك اه من مكبرهولك
شدت ساجده يده لشاد بيها شعرها ودموعها نزلو:حول حوووول
رعد:اهو نسمع بيك مشيتي وربي رجليك نقصهم من وين نبتو
وطلقها وهوا يدف فيها وطلع من غير ماياخد النص متعه وخلا حنين لقربت من ساجده لتبكي بالعبرة وهيا شاده شعرها ....
.
.
__
.
الان فقط تأكدت ان الحرية هيا كنز لا يشعر بها الا من سلبت منه حريته 💔👌
.
.
مسح معتز علي وجهه وهوا حاس روحه وكأنه في شهر 8 ولا 9 من النو ودرجة الحرارة المرتفعة في المكان ، شبح حولينه في الدار لكانت مساحتها مش كبيرة هلبا والاشخاص لفيها اكتر من 70 شخص عايشين في الضيق هدا وفي درجة حرارة ادوب في عز الشتاء ..
تنهد معتز لماليشي في المكان خمس او سته ساعات الا انه حاس روحه بتطلع من ضيق المكان و النو لفيه
......:تفضل خوي خود اميه
تلفت معتز لراجل طول وهوا ياخد منه في طاسة لميه:بارك الله فيك
قعمز الراجل جنب معتز وقال:ان شاءالله خير ياولدي شن تهمتك ان شاءالله مش كبيرة
حط معتز طاسه لمية لزي النار جنبه وشبح لراجل لباين عليه كبير في العمر شوي وباينه عليه ملامح الكبر والشيب لمالي شعره ..
تحمحم معتز وقال بهزوة:متهم من غير تهمه
بتسم الراجل:عادي عادي اكترية لهني حالهم من حالك
ضيق معتز عيونه:كيف
الراجل:ياولدي لهني المظلومين اكتر من الظالمين
سكت معتز وقعد يشبح لشباب وفيه حتي شيابين وفي من شباب يبانو صغااار بكل في العمر كانو مقعمزين لي في يهدرز وليضحك وباين عليهم متعودين علي الحياة هني وكأنهم ليهم سنين في مكان من المفروض ماينحطش فيه الا اللي مش محكومين بس........
__
.
.
حطت آيات راسها لوطه وقلبها قريب يطلع منها وهيا منتبها علي السيارة لملاحقتها ، سرعت من خطواتها وهيا تستودع في روحها وتدعي بخوف ، واول ماخشت لزنقه كانت هاديه وفاضيه من الناس قربت السيارة اكتر واللي فيها فتح الروشن وهوا يطلع في يده ويمد في يده:بس بس ياقمر هاكي خودي الرقم
من الخوف لركب آيات ماقدرتش حتي ترفع عيونها وقالت وهيا تسرع في رجليها اكتر:برا باللهي عليك خليني في حالي
زاد خفف سرعة السيارة وقال:تي خودي خيرلك
آيات نزلو دموعها:مانبيش خلاص ياخوي برا في حالك باللهي عليك
ضيق الشاب عيونه وقال بصيغة الامر و بعصبية :خودي قتلك ماتخلينيش ننزل ونعطيهولك بطريقتي
صيحت آيات:قتلك مانبيش خليني في حالي
وقف الشاب سيارته وفتح الباب بينزل خافت آيات وهيا تزمط في ريقها وجتها قوة خلتها ترفع التجيلي التانوي لكان طويل وجرت بكل سرعتها وهيا تبكي وماوقفت الا لما شافت ناس ورجالة في الشارع وقفت وهيا تتلفت تشبح في سيارة الشاب لكان واقف بسيارته بعيد شوي ، مسحت دموعها وسرعت خطواتها وكملت طريقها لحوشهم وقلبها قريب يطلع من الخوف ....
.
.
.
__
خشت ساجده لدار رعد بتسلل وقربت من فراشه وقعدت ادور فيه لين لقت تليفونه لحاطه جنب فراشه ، خداته وهيا عارفه كويس انه رعد مايديرش في رمز لتليفوناته ، فتحاته وخشت علي المكالمات الصادرة وكان اخر مكالمة من السفاو وبعده رقم مش مسجل ، خدت نفس وطلعت التليفون البيلا من جيب توتتها وسجلاته بسرعة وحطت التليفون في مكانه ودست تليفونها بسرعة في جيبها وطلعت تجري وهيا تتلفت تشبح فيه وهوا يهدرز مع رائد في البلكونه......
رائد ضحك:مش عارف بس باين انها بنت ناس قلبي رتاحلها
وشبح لرعد لرفع رجليه وحطهم علي الكرسي لقدامه..
رائد:وانت
شبحله رعد ورفع حواجبه:خيرني
رائد:نحس فيك متقبلها هلبا قبل كنت متضيقش في جنس لبنات بكل ندكر فيك مرة كلمت وحده يوم واحد بس وماخليت شن سمعتها من سبان ههههههه
ضحك رعد:ال..... تتمايع هلبااا مانحبش ..... لوهم اني
رائد:وهدي
حك رعد راسه وقال:مش عااارف حتي هيا تتمايع ومستفزه وترقي في ...... هلبا ودراه كبد ولسانها ملوي علي رقبتها ستين لفه
رائد:ههههه لكن
رعد ضحك:لكن ههههه مش عارف واللهي ماني عارف
ضحك رائد وبعدها تحولت لبتسامه من علي وجهه وقال وهوا يتحمحم:تعرف اول مرة نفكر نخطب بنت بجد صح مالياش سبوعين نعرفها لكن حاس روحي كأني ليا سنين نعرفها لكن المشكلة لكبيرة
وسكت رائد وماعاش كمل لين رعد شبحله وقال:شن هيا المشكله لكبيرة
رائد:عيلتنا
وفتح يديه وهوا يرفع في حواجبه وقال:ومحيطنا واهم شي سمعتنا من بيعطي بنته لواحد خوته وبوه تجار مخدرات
ضحك رعد بستهزاء وقال بصوت واطي:اهون من صبي لتجار المخدرات
رائد قعد يشبح لرعد لدقايق وبعدها قال:هدا علاش اني نبي نطلع من هني نبي نأسس روحي بعيد عليكم نبي انظف سمعتي منكم
شبحله رعد وضيق عيونه وقال:اول مرة نقولها لكن انت احسن فينا واحد متستاهلش تقعد هني
رائد:تقدر حتي انت تغير من روحك
رعد هز راسه وهوا يتكي فيه علي الكرسي التالي ويشبح لسماء:عندك علم تاجر المخدرات ومدمن المخدرات مايفرقوش شي علي بعض
رائد ضيق عيونه بعدم فهم:كيف مافهمتش
رعد:الزوز ماعاش يقدرو يسحبو يدهم ولا يقدرو يتراجعو المدمن يحتاج المرجوانه ولا لحشيش ولا لحبوب باش يطفي ألم جسمه والتاجر يحتاج يبيعهم باش يطفي ألم ضميرة ويعيش في الحياة لبايعة امه
وشبح لرائد وكمل:رد بالك تخش مخشيشنا ياتوأمي...
__
غسلت آيات وجها وهيا تشبح لروحها في مراية الحمام وقعد الخوف يسري في كل جسمها ورعشة الموقف في كل اطرافها ، سمعت دقات باب الباب وصوت سهي:آيااااات اطلعي بسرعة بنقولك حاجه ...
مسحت آيات وجها وطلعت وهيا تشبح لسهي:حتي اني بنقولك حاجه
سهي:خيرك شن فيه
سمعو صوت امهم سعاد تصيح:سهي زودي سكري علي الشاهي وارفعي لبوك طاسه
سهي:هيا هي
وشبحت لأيات:بري لدار تو نجيك
مشت سهي ومشت آيات لدارهم ، فتحت دولابها وطلعت تليفونها لفتحاته واول مانفتح جتها رسالة وقبل ماتفتحها خشت سهي وهيا تسكر في الباب وتشبح لآيات لقعمزت علي السرير وقالت:خيرك شن فيه
آيات:قولي انتي قبل شن فيه
بتسمت سهي وقربت قعمزت جنب آيات لستغربت ابتسامت اختها:أشرف امبكري قال لامي انه عمر كلمه عليك
فتحت آيات عيونها علي وسعهم وخطمت علي مبسمها شبه ابتسامه مصدومه:شن قال
سهي:قال عمر يبي آيات وبجيب امه بعد عرس اخته باش يخطبوك ليه معقوله ماقالكش
ضحكت آيات وهيا تشد في خدودها بداها الزوز وبعدها شدت تليفونها وهيا تفتح فيه وتشبح لرسالة لوصلتلها من عمر لكان مكتوب فيها(اليوم نبي نشوف خطيبتي ماخصنيش في حد ورد بالك تفكري كان جيتيني بنقول عليك حاجه لانه عارفك انتي شن وبنت واخت من واهم شي خطيبت من 💛)
ضحكت آيات لوقفت وهيا تنقز وتعيط بفرح لين سهي قعدت تضحك وهيا مش فاهمه شي.....
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3