عشق في بلاد حروبها لا تنتهى 2 (طرابلس ياغارقة في الدم)

البارت 25

_
_
#_في_بلاد_حروبها_لا_تنتهي
#طرابلس_ياغارقة_في_الدم
البارت 25
.
.
.
في الحلقة السابقة
مسح رعد علي وجهه بديه الزوز ونزل وهوا يقرب منها:جيتي
قربت رنيم منه ورفعت روحها ولفت يديها علي رقبته وحضناته وقالت من بين دموعها:خفت هلبااااا عليك خفت هلبااا
لف رعد يديه حولين خصرها وهوا يحضن فيها ويشم في ريحتها لأول مرة يشمها ، حضنها وكان يلقي يدخلها لي داخل جسمه بالحضن هدا ، حضنها بأحتياج بوجع بفقدان ، ستاقضت رنيم بروحها ورخت روحها بس رعد زاد ضغظ عليها باش ماتبعدش رجعت رنيم حضناته وهيا تحس بحضنه قداش هوا متألم قداش موجوع قداش هوا ضعيف من بعد توأمه....
بعد رعد شوي وهوا يشبح لوجها ، ورنيم اول مافتحت عيونها وشبحت ادموعه ، قلبت شفايفها ورفعت يداها لخده وقالت ودموعها زادو نزلو بوجع من شوفت دموعه:رعد
زمط رعد ريقه ونزل لمستوي طولها وقرب طبع بوسه علي جبهتها ورجع حضنها ليه بكل حواسه من بين صدمت رنيم لنزلت يداها لصدره وسيبت روحها ليه من غير ماتبعده او تحاول ترفض حضنه .............

قراءة ممتعة
#البارت_الخامس_والعشرون

بعد رعد وتكه جبهته علي جبهة رنيم وقعد يشبحلها كيف خدت نفسها بدل لخداه منها بحضنه وقربه منها وهيا قعده مغمظه عيونها ورافعه يداها لصدره ....
فتحت عيونها بشويه واول مافتحتهم بعدت يداها من علي صدره وهيا اضم فيهم لروحها وبعدت جبهتها من علي جبهته وهيا تشبحله كيف وطه راسه وقال:اني.....
ورجع شبحلها وماعاش عرف شن يقول ، اتكه علي الحيط بظهره وقعد يشبحلها بضعف باين في عيونه لمدمعه:ماتسيبينيش حتي انتي
نزلت رنيم يدها وقعدت تشبحله كيف مسح عيونه بكمه قبل ماتشوف دموعه لنزلو وقال :ماتمشيش زي مامشي رائد
ورفع عيونه لمدمعه فيها وكمل:ساعديني نطلع من المستنقع لأني فيه باللهي عليك يارنيم ساعديني
وسكت وطبس راسه ودموعه قعدو ينزلو مع صوت رجفاته لتعلو لين رنيم قربت منه من غير ماتفكر ووقفت قدامه وشدت يده وقالت بصوت رافعاته العبرة:اني ديما معاك
ورفعت يدها التانيه مسحت علي خده وهيا تمسح في دموعه ، قربها رعد منه ورجع حضنها وصوت بكاه اتعلي اكتر ، يبكي ومش متحشم منها يبكي وهوا يوريلها في ضعفه ويكسر في تعجرفه وكبريائه بصوت أهات وجع دموعه لانه يبي يبكي في حضنها لانه يبيها ومحتاجها هلباااااا يبي يطلع من الوسخ لي فيه علي يديا هيا ومعاها هيا ، يبي يدير لمقدرش يديره رائد ، يبي يسمع كلامه لاول مرة ويصغي لقاله توأمه ويصغي لنصيحته ......
.
.
__
.
.
في دخولك في حياتي انت درت معروف ، وفي رحيلك عنها بكيت عليك قلبي المجروح 💔

#الله_يرحمك_ياحبيبي
قربت نور من دولابه وفتحاته وهيا تشم في ريحته اللي ماليه الدار والدولاب لخدت واحد من تيشرتاته وقربتها لخشمها وهيا تشم فيها وتبكي بالصوت تبكي بقهر وشوق ، تلفتت وشبحت لفراشه لقعد في مكانه قربت وقعمزت فيه ، وحطت التيشرت جنبها وقامت مخدته وحضنتها:علااش خليتني علاااش يارائد
رقدت في فراشه وهيا حاضنه مخدته وتيشرته وتبكي وتمتم بكلمات غير مفهومه.....
فتحت حنين الباب بشويه واول ماشافتها دموعها نزلو وتلفتت لساجده لبعدتها وهيا تزيد تفتح في باب الدار وتشبح في نور لمستاقطش بيهم ، تلفتت ساجده لحنين:اني ماشيه مش ح نقدر نتحمل نشوفها هكي
وتلفتت مشت تبكي وخلت حنين تقرب منها وقعمزت جنبها وهيا تقرب في يدها وتمسحلها في دموعها:نور خالتك قالتلك هيا
نهضت نور روحها ومسحت دموعها وتلفتت خدت تيشرت رائد وشبحت لحنين:انتي قلتيلي بتعطيني حجات تخصه صح
هزت حنين راسها:اي نبي نعطيك صوره وعندي ممري فيه فيديوات ليه ولرعد
نور:اعطيهملي توا
وقفت حنين وساعدت نور لوقفت وهيا تشبح لدولاب لخلاته مفتوح وجت عينها في الصنه ، قربت من الباب وخدت الصنه وتيشرته حطتهم في شنطتها وطلعت ورا حنين لتلفتتلها وقالت:نجيبهم ونجيك
مسحت نور زادت دموعها لمابطلوش نزول وهيا حاسه بنظرات الناس ليها ومشت قعمزت جنب خالتها لقربت من ودنها ووشوشت:وين اختك
رفعت نور كتافها بمعني مانعرفش..
نفخت ميسون وطلعت تليفونها تتصل بيها........
.
.
.
.
بعدت رنيم من علي رعد اول ماسمعت صوت تليفونها لشرين ، طلعاته من شنطتها بثوتر وخوف واول ماشافت رقم خالتها شهقت لين رعد ضيق عيونه:خيرك
شبحتله رنيم:هدي خالتي اكيد يدووو عليا لازم ننزل
شدها رعد من يداها:مزاال اقعدي
رنيم:مانقدوش بووحو خلاص
رعد:باه عادي نتصل بيك
هزت رنيم راسها بمعني اي وبتسمتله:اي عادي
قعد رعد يشبحلها كيف تلفتت ومشت خطوتين بس وقفت ورجعت تلفتتله :رعد
ضيق رعد عيونه ورنيم كملت:ماعاش توكب فوق السوو
برغم الوجع والألم لحاس فيه خلاته يبتسم وهوا يهز في راسه:حاضر
بتسمت رنيم:مع السلامه
.
.
__
.
.
نفخت رنا ودفت جلال:بسرعة تو حناي تبدا تنق علاش متعطل عليها
جلال طلع من الباب وهوا يلبس في جكيته:وانتي ماتبيش تجي تو مرت عمي تسأل عليك
رنا:نكمل قراية ونجيكم
جلال:باهي
مشي جلال ورنا سكرت الباب وهيا تفنخ وخشت تجري لدارها وهيا تشبح لروحها في لمراية وبتسمت ، وتلفتت لدولابها لفتحاته وطلعت حوايج ولبست بسرعة وساوت شعرها وتلفتت لتليفونها لشرين لقربت منه وهيا ترد طول:الو
محمد:حنك في الحوش وله
سكتت رنا وهيا تضرب في جبهتها بكف يدها وقعدت تفكر لو قتله لا مش ح يجي ، ستاقطت بصوته لنادي :الوو
رنا:الوو مانسمعش فيك ره الوووو
محمد:نا نسمع فيك عدي لمكان فيه ضغطيه
رنا:الووو اسمع اهو اني في الحوش نراجي فيك غر مانسمعش فيك
وسكرت الخط في وجهه وهيا تضحك:والله مفلحني ان شاءالله تمشي عليه ههههه
.
.
.
.
شبح رؤوف لمحمد لينفخ:خيرك
محمد:شي شي تمام اوقف هنا تو نكمل علي كرعيا
رؤوف:تبي نستناك
محمد:لالا عادي مانبيش نتعبك معايا اكتر
رؤوف:تي تعب شن ياراجل تحشم حني خوت
بتسم محمد وطبطب علي رجل رؤوف:وعز الاخوا وربي خلاص عدي تو نكمل مشاويري ونتصل بيك بيش توصلني للمطار
رؤوف:تمام نراجي في اتصالك
انزل محمد وكمل علي رجليه لحوش رنا وهوا يحاول يتصل بيها بس يلقا فيها مقفل ، نفخ وهوا واقف قدام الباب طق علي الباب اللي اول ماسمعاته رنا وقفت طول ببتسامه وجت للباب وقالت:مني
محمد:محمد
فتحت رنا الباب ببتسامه:تفضل
محمد مدلها الجوزات:لالا مستعجل
رنا ضيقت عيونها:قصدك جاي علي خاطر دقيقتين بس غر خش شوي بس
محمد:حنك جوا
هزت رنا راسها:اي اي هيا الداخل غر تعبانه شوي وراقده
محمد:ان شاءالله خير خلي نشيلوها المستشفي
رنا:لالالالا غر كل ماتاخد الدواء يديرلها في مضعفات تو ترقد شوي ويولي حالها باهي غر خش توا علي الاقل نضيفك حتي طاسة عصير
سكت محمد شوي وبعدها قال:تمام
خش محمد قدام الباب لسكراته رنا وتلفتتله:خش للمربوعة
محمد:حتي هنا كويس
نفخت رنا:اوووف تكول بناكلك
بتسم محمد:نعدي ره
رنا:لالا اهو ماشيه نجيبلك عصير ونجي
مشت رنا بسرعة صبت عصير وطلعته لمحمد لقعد واقف قدام الباب .....
محمد خدي طاسة العصير:شكرا
رنا:ولو خود شكلاطه
ضحك محمد:حاضر
رنا:توا بتمشي
محمد حط طاسة العصير علي طاولة المدخل وهز راسه وهوا يطلع في الجوزات من جيبه ومدهولها وطلع تليفونه لشرين ...
خدتهم رنا وقربت منه بكل جرائه لين محمد لكان لاهي في التليفون ركز عليها ورفع راسه شبحلها وكانت بتقرب اكتر وبتبوسه بس محمد بعد بخفه من غير مايمسها او يدفها وقال وهوا يتحمحم:كنك انتي هبلتي
زمطت رنا ريقها ووخرت خطوتين ووجها ولا احمرر من الحشمه وهيا ماتوقعتش انه يصدها بكل وقالت:اني .. مش قصدي
وسكتت وهيا تتمني الارض تنشق وتبلعها وبس لين محمد حس بيها وقال:لتتعرفي عليه هكي اديري له
شبحتله رنا وقالت بنفعال:مصحك تحسابني لهب ولدب الوّح  في روحي عليه
سكت محمد وقعد يشبحلها كيف نقصت من صوتها وكملت:وبعدين شكلي توهمت هلبا نحسابك تحس اتجاهي زي منحس اتجاهك
محمد:وحتي كان نحس كيف ماتحسي اتجاهي مش صح انديرن هكي
رنا:علي اساس انت مش مدايرها من قبل ماك ولد ومجرب كل شي
محمد:نا مانحبش لحرام ولا نحب نجربه
رنا:هدا مش حرام هيا بوسه
ضحك محمد:هههه  هيوالله تو بكرا ربي يقولي عليش يامحمد درت هكي تو نقوله والله رنا قتلي مش حرام وله هههههه
رنا:مافيش شي يضحك ره تحرج فيا هكي انت
محمد:هههههه تمام خلاص سلميلي علي حنك
هزت رنا راسها وقعدت تشبحله كيف فتح الباب وطلع وخلاها تفكر في كلامه وتتمني المووووووت علي انه قربت منه وفكرت في فكره زي هدي معاه ........
.
.
.
مالا تتقبله مع أحدهم بسبب الحرام ، ستفعله مع اخر بسبب الحب 💛👎🏻
#ياقوت
__
.
.
.
حطت فرح شنطتها علي سريرها وقالت:ولعي الغساله بسرعه بابا قال ساعه وموليلكم
فدوي:باه حطي لماما حوايجها لقلتلك عليهم في الساكو ودوري علي تليفونك
فرح:والله مانندري وين لوحته من الصدمه
قالتها وهيا اتحول في عبايته ودور بعيونها علي تليفونها في الدار لين لقاته ملوح تحت السرير ، طبست خداته وفتحاته طول وهيا تلود توتي في حوايجها في الشنطه باش يولو لحوش خالتها بس ركزت علي الرسائل لجايتها ، هدت شوي وقعمزت علي السرير وهيا  تقرا ودموعها  بدو ينزلو ولفتت انتباها وحده من الرسائل وكان محتواها (حبيبتي يافرحت عمري ستااااحشتك حبيبك عزو ستاحشك هلباااا)
مسحت دموعها وخدت نفس وتصلت بيه لمن اول تشرينه رد طول بلهفه:فرح
كانت بترد عليه بس ماعاش قدرت من العبره لخنقتها وخلتها تبكي بالصوت ..
تنهد معتز وقال:ياروحي باللهي عليك خلاص مانتحملش دموعك اني
فرح:س..تاااحشتك هل...هلبااااا
بتسم معتز:اني لستاحشتك يافرحي هلباااا خلاص امسحي ادموعك
مسحت فرح دموعها :شن حالك
معتز:لما سمعت صوتك الحمدالله ياربي شن حالك انتي
فرح:الحمدالله
معتز:خيرك مش علي بعضك وهداكا اليوم سمعت صوت عياط وبعدها ماعاش رديتي عليا ان شاءالله خير
فرح :آيات أكيد تعرفها بنت خالتي
معتز:اي نعرفها
نزلو دموع فرح وقالت بعبرتها:عطاتك عمرها
معتز رفع حواجبه بصدمه :ان لله وان اليه راجعون البقيه في حياتك ياعمري
فرح:حياتك الباقيه
معتز حس الحزن في صوتها واضح هلباااا تنهد وقال بضيق من ضيقها:هدي حال الدنيا ماحد باقي فيها الا وجه الله وكلنا للموت والموت لينا
فرح سكتت وهيا تحاول تبطل بكي وتهداء وبعدها قالت:لازم نسكر بنوتي حوايجي قبل مابابا يوصل
معتز:تمام كملي وتصلي بيا
فرح :علاش
ضيق معتز عيونه:شن علاش ستاحشتك ونبي نهدرز عليك
فرح سكتت وهيا تدكر في كلام هند خطيبته وقالت:لا مش صح تهدرز عليا وانت خاطب اولا مانرضهاش علي روحي وعيب في حق خطيبتك
خشت فدوي عليها وهيا تصيح:تي هيا نوضي بوي قريب يجي وحني مادرنا شي
معتز تنهد وقال:كملي امورك وبعدها تو نتصل بيك ونتفاهمو وياويلك ماترديش يافرح
فرح سكرت في وجهه الخط وشبحت لفدوي لقربت منها:مع من كنتي تتكلمي
.
.
__
.
.
وطن مغدور ، وشعب مقتول ، والمستعمر مجهول ؟؟؟
.
.
في الليل .........
حط آسامه الحبه في فمه وزرطها وهوا يهز في راسه بالقوه ويشد فيه بديه الزوز وقرب فتح باب الحوش وسكره بالقوه لين بوه عبدالله لمقعمز في وسط الحوش انخلع ووقف بشويه وهوا ينادي:آسامه
خش آسامه وأول ماشافه بوه كيف باين عليه الإدمان من عيونه الطايحات وتحتهم إرهاق ودمار الهيئه ضنه سكران وقال:وجايني سكران
آسامه:اعطيني فلوس
تلفت عبدالله وخش لداره وقال:برا ماعندي مانعطيك
لحقه آسامه وخبط علي باب الدار وصيح:يا.......... ........ ماتخلينيش نقلب امها علي راسك
قعمزعبدالله علي الكرسي وهوا يشد في قلبه وقال بتعصيب وبصوت هارب تاعب:الله لا تربحك قلبي والساني داعيين عليك لا يوم الدين الله لا تسامحك وبرا اطلع من هني اطلع واني متبري منك لا يوم الدين لا ولدي ولا نعرفك
ورفع راسه بتعب وبدموع غلبت نفسه شبحه وهوا يشد في راسه بين يديه وهوا يخبط فيه علي الحيط عدت مرات وبعدها وخر وهوا يضرب في راسه بيديه ويعيط:اسكت اسكت اسكتتتت
رد عليه بوه وعيط هدي المرة لين قعد يكح:اطلع من هني اطلع وماك راي مني مليم اخضر اطلع
تلفتله آسامه بعيون حمرررر طايحات مش واااعيات واللي ركزو علي الموس المحطوط علي الطاولة ، خداه وتلفت وهوا يعيط:ياعن.... ياولد....
وقرب بسرعة من بوه لمش قادر يتكلم من الكح  ، شد راسه بالقوة التالي لين اطربق بالقوة مع صوت عياط عبدالله لطلع مع كحانه ومن غير وعي من آسامه وتحت تأتير المخدر حط الموس علي رقبته ودبح بوه  بالموس من الحد لا الحد من غير اي تردد او شفاعة او من غير قلب ينبض ويحس ....
بعد وهوا يشبح في بوه لنتفض وهوا يطلع في الروح قدامه ، لوح الموس لمعبي بالدم بوه لملي الدار وملاه هوا وحوايجه وتلفت لدولاب لنكته كله لين لقي لفلوس لداسهم بوه وطلع من الدار وخلا بوه الملوح علي الكرسي جثه مدبوحه جثه تنكتب في التاريخ لانه أسوأ وأشنع وأبشع جريمة ممكن تحدت في الحياة ......
.
يالله علي موتّي جتني من قريب مقتول
يالله علي موتّي علي يديات وليدي جت أجلي مدبوح
يالله علي موتّي من قال ليقول بابا ينقلب سبه ويسب مسبه
يالله علي نا مقهور وقهرتي عازه
يالله يا الله مقتول واللي قتلني طناي 💔
.
.
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3