عشق في بلاد حروبها لا تنتهى 2 (طرابلس ياغارقة في الدم)

البارت 29 والأخير

_
_
#عشق_في_بلاد_حروبها_لا_تنتهي2
#طرابلس_ياغارقه_في_الدم
البارت 29 والأخير من الجزاء التاني
.
.
.
في الحلقة السابقة
هزت رنيم راسها ورت علي رعد:الو
رعد:ها قرجتي
رنيم بتسمت:شن حالك مجنوني
رعد رفع حاجبه:اني مجنون ياهبله
ضحكت رنيم ورعد كمل:تعرفي غر زابطه كيف تغيريلي في جوي وتهدي فيا كان هدا ره قطعتك علي اسلوبك متع امس ياكلبه
رنيم زادت ضحكتها:ههههه كنت متعصبه منك هلبااااوانت تقول ميت في واسك حماو ماتفهمش فيا بكل
رعد:تي انم تكلمي زين
رنيم:تمام تمام ها خلاص هههههه
رعد ضحك علي ضحكتها وقال:محلاك وربي ياحبي
رنيم ضحكت وقالت من غير ماتركز علي روحها:ياوبي انت لتهبل نحبك اني هلبااااااااا ياقلبي انت
رعد رفع حواجبه وردهالها طول بضحكه:تي ورب الكون لنموت في حبك ياحلالي
حطت رنيم يدها علي فمها ووقفت طول وهيا مصدومه من لقالته ومن رده عليها ، قعدت ساكته وتلعن في روحها وهوا قعد يضحك وفهم انه تحشمت:ياحبي وينك تي انم ياقرجه وينك هههههه تحشمتي ههههه مرتي انتي ماتتحشميش مني

قراءة ممتعة
#البارت_التاسع_والعشرون_والأخير

اجعلني أملكك ، وعد سأكون لك الجميع حينها 💛
#الياقوت
بتسمت فرح لفدوي لقربت منها والدموع في عيونها:تهبلي طااااالعه
فرح:اس اس ماتبكيش باللهي عليك مانبيش اللبز مكياجي من توا
ضحكت فدوي:مصح وجهك هههه
ضحكت فرح وتلفتت للمراية وشبحت لروحها ، كانت طالعه زي اميرات دزني بالفيلو وتسريحتها البسيطه زي مكياجها ، بتسمت بفرح وهيا ترجع تتلفت لفدوي لقربت ولبستها الكاب:هي بابا يراجي برا
فرح:بنمشو لخالتي قبل
فدوي قالت وهيا تساويلها في الكاب:اي نمشو نشوفوها وتسلم عليك وبعدها بنوصلوك لعزو
فرح دمعو عيونها:ماكنتش نبي ندير العرس وآيات ماسكرتش السنه حسيتها رزينه وتحشمت من خالتي والبنات هلباااا
فدوي:خالتي لأصرت انه مانأجلوش وبعدين سفر عزو هوا لخلانا نستعجلو توا مش مهم شي
وشدت يدين فرح وقالت ببتسامة:المهم انه تزوجتي لتحبيه صح عرس مفركس ومش هداكا الجو والعرس لكبير بس المهم وصلتي لمبغاك صح
هزت فرح راسها وقربت حضنت فدوي ......
.
.
.
سر الحياة عيونك 🙈🌙

فتح معتز غرفة الفندق ومد يده لفرح المغمومه بالكاب وقال:خشي ياعروستي
بتسمت فرح بخجل وشدت يده وخشت للغرفه ومعتز سكر الباب وأول ماتلفت رفع حواجبه ببلاها وهوا يشبح فيها كيف رفعت الكاب من علي وجها وحولاته وبانت من تحته زي القمر لبان من بين لغيوم بنوره ...
قرب معتز منها هلباااا لين فرح نتبهت عليه ورفعت راسها ، واول مارفعت راسها باسها معتز ع جبهتها وبعد شبحلها وقال:ربي يباركلي فيك ويدومك ليا
بتسمت فرح:ويدومك ليا
.
.
__
.
.
بعد مرور 3 شهور .....
.
.
حطت مريم يدها علي قلبها:مش عارفه حاسه روحي مضااايقه هلباااا
سكرت ايلاف النار علي بكرج القهوي وقالت:مش مرتاحه خلاص قوليلهم مانبيش
روان:هدا زواج مش لعبه ره كان ماتبيش قولي من توا
مريم:ب اما وجه بنقول لا اه ب اما وجه اني ماصدقت حد جي وبياخدني ويسترني قدام بوي اللي مش قادره نحط عيني في عينه لا حد اليوم
ايلاف شبحت لروان لتنهدت وقربت منها:علاش ماتحطيش عينك في عينه اه علاااش تي تحطيها وبكل تقه انتي ماذنبك شي ومادرتي شي واهم شي قعده بنيه وعفيفه وماحد قربك ولوث شرفك
مريم ضحكت بهزوه وقهر:انتي تقولي هكي بس الناس كلامها مايرحم واولهم عمامي حرمو عليا نمشيلهم ولا نخالط بناتهم حطوني اني المذنبه واني الفاسده وكلامهم صح لو ...
وسكتت شوي ودموعها نزلت من عينها وشبحت لروان وكملت:لو سمعت كلامكم وبعدت علي الكلاب هداكا ره ماصار لصار
قربت ايلاف منها وحضنتها وقبل مايزيدو يكملو خشت رانيا اخت مريم الصغيره وقالت:بابا قالك اطلعي الراجل يراجي
بعدت مريم من علي ايلاف وساوت وشاحها وخدت صفرة القهوي وطلعت وخلت ايلاف تتلفت لروان:ان شاءالله يارب ترتاحله ويكون الراجل الصح
روان:ان شاءالله تمشي هالمقابله علي خير والله حتي اني مامظمنه
ايلاف:بالله فكينا من التشائم وتصلي ب رؤوف يتوسطنا بابا نقعدو انباتو معاها اليوم
.
.
.
سعيت بك للإنتقام ، وسعيتِ بي للنور 💛
.
خشت مريم وفي يدها صفرة القهوة وراسها لوطه ، واول ماشافها بوها خشت وقف وقال:هي خودو راحتكم تو النادي سامح يقعد معاكم
وطلع وخلا مريم تقرب تمدله في القهوي وهيا مش قادره ترفع عيونها وتشبحله بس اول ماسمعت صوته:بارك الله فيك
رفعت عيونها طول وجو عيونها في عيونه لمتحولوش منها اول ماطلع بوها ، فقدت مريم توازنها ورخت الصفره من يدها وقبل ماطيح من بين يداها شدها السفاو منها ....
ستوعبت مريم من هوا وكيف هيا قريبه منه بعدت عليه طول وهيا تتلفت تحط في صفرة القهوة علي الطاوله وتتلفتله وهيا مضيقه عيونها:انت شن ادير هني
سكت السفاو وماعرفش شن يرد عليها ، فعلا شن لبقوله اما كلام اللي ح يبرر فيه لداره فيها ، اما عذر اللي ح يحطهولها .
مريم:انت ، انت كيف عندك وجه حتي تجيني وتتكلم مع الراجل لوسخت سمعت بنته اه
السفاو:واني جاي بنصلع السمعه لوسختها
مريم ضحكت مع دموعها لنزلو:بتصلحها اه باه صلح صورتي في عيون بوي صلح صورة بوي في عيون عمامي والعيله كلها مش بتصلح هي خلي الناس تسكر فهمم عليا وعلي بوي
وسكتت وهيا تمسح في دموعها:شن بتصلح ولا بتصلح
السفاو:كله انصلحه بس انتي اعطيني فرصه ، عارف روحي غلطت وغلطي معاك كبيره ومايصلحها غير زواج يسكت افوم الناس
شبحتله مريم وكيف بتتكلم خش خوها عليهم سكتت وهيا تتلفت وطلعت وخلاته واقف وخوها قعد مستغرب ويشبح لسفاو
.
.
__
ضاعت بهجتي بالحياة حين ضاعت الحياة منك ياأخي 💔
.
.
.
كان رعد مقعمز علي حاشية السطح ويشبح لوطه لزحمت الناس وسارح في كل لحطه عاشها مع توأمه في كل ضحكه ليهم مع بعض لكل مغامره وحكايه وعركه ، تنهد ورفع راسه فوق لسماء وهمس ودمعه سالت من عينه:وينك يارائد
تحمحم ومسح دمعته وهوا يطلع في تليفونه لشرين من جيبه واول ماشاف اسمها "قرجتي" بتسم ورد عليها طول:ها قرجه
رنيم:حبيبي
زادت ابتسامت رعد:مادام فيها حبيبي فيها انَّ
رنيم ضيقت عيونها:مصحك ومصح اللي يدلع فيك ويدلع عليك باهي باي بلاش
رعد ضحك:هههههه تي انم تعالي وقولي شن تبي
رنيم:بلاش خلاص قتلك
رعد.رنيم ماتخلينيش انم نقلب امها عليك
رنيم نفخت:اوووووف ياوبي اوووف ادوي زين
رعد:ادوي خيرلك شن تبي
رنيم:هوا اممم اتصلت امك ب موت بابا
رعد:ايه باه
رنيم:هوا اني والله عادي وه بس خالتي مدايوه فيها ايامات السود تبي اديولي حفله صغيونه
بتسم رعد:صغيونه زيك
رنيم:رعددد ندوي في موضوع جدي اني
رعد:لا جدي لا حناي ديري يانبض قلبي ديري وكان تبي نجي حتي اني ماعندكش مشكله
ضحكت رنيم:حليلي وحقوبي تهبل تهبل
رعد:نهبل وشن
رنيم:تهبل وكل شي حلو
رعد:غيرهم
رنيم:اوووف شن غيوهم
رعد:يا
وسكر فمه وهوا يشد ف روحه باش مايسبش ويسمع فيها تضحك عليه وقالت:ههههه ونحبك هلبااااااا
رعد:ماتقولي امها لين اطلعي الروح
رنيم:امالا شن
رعد:راجي يومين بس 48 ساعه وتو نوريهالك لمالا شن هدي
ضحكت رنيم وسكتت ورعد رجع قال:رنين
رنيم:عيونها
رعد:اني نبيك جنبي ديماااا
بتسمت رنيم وتحشمت:حتي اني
رعد:سامحيني ماقدرتيش تفرحي بعرسك زيك زي غيرك
رنيم:مايهمنيش مهم نقعد جنبك
بتسم رعد:انتي ملاك ربي بعتهولي وربي ملاك
رنيم:اني رنيم مش ملاك ياخاين مزال يومين ونتزوجو وتتلخبط في اسمي ياكلب
ضحك رعد:اشي كيف بدي اللسان لقرج يطول اشي اشي
ضحكت رنيم عليه وهيا تبي تغيرله جوه .....
.
.
__
.
بعد يومين .....
سمعت رنيم صوت التزغريط من برا ، ضحكت وهيا حاطه يداها علي قلبها وتسمع فيهم ينادو عليها برا ، طلعت وهيا متحشمه وتسلم عليهم وهما يباركولها ويهنو فيها وبعد ماكملو كلهم قربت نور منها وحضنتها وهيا تبكي بالصوت العالي لين رنيم ماعاش تحملت وقعدت تبكي معاها ....
ميسون مسحت دموعها وقربت منهم:خلاص وانتي تبكي تقول مسافره وهيا في فم الباب خلاص ياسر بكي
بعدت نور من رنيم وهيا تحاول تبطل بكي وتمسح في دموعها:اصلا اني مانبكيش علاها غر بطني توجع
رجاء:اي اي صدقناك جيبي لبعدها
ضحكو علاها ورنيم نتبهت علي تليفونها اللي يهز في جيبها ، بعدت من جنب العيله ومشت تسللت لدار وأول ماردت سمعت صوت صياح رعد:حلااااااااالي وليااااا ومررررررتييي ياااانااااس
ضكت رنيم من بين دموعها لقعدين ماجفوش:اس ياحماو اس
رعد قعد يضحك ويصيح:تي مرررررتي مرتي قدام الكل شن تسكتي فيااا اه
رنيم:تي يامهبول اس عيب هههههه
رعد تنهد وقال:انتي لهبلتيني نبي قربك اليوم قبل غدوه وربي هي
رنيم:ستنه شوي بس وغدوه نكون عندك
رعد رفع حاجبه ب بتسامه:تي اما غدوه حتي عرس مافيش علاش نراجو لغدوه كلمت بوك وقتله بنجي في الليل ناخدك وهوا وافق
فتحت رنيم فمها:تبصو يااااااحشمتي قدام بابا
رعد:لما وافقتي عليا ماتحشمتي وتوا جايه بتتحشمي
رنيم:اوووووف ياوبي اووووف متزوجه واحد بخششني في عقلي ويطلعني
ضحك رعد عليها وهيا قعدت تنكرز عليه ...
.
.
__
.
.
تمنيتك ياوطن تزها وتروق البال ، ماضنيت بيزيد خرابك ويضياق بيك الحال 💔
.
.
باس معتز راس امه لدموع ماليه عيونها:اتصلو بيا لما توصلو سلم وليدي مربوحه قدامكم ان شاءالله
بعد معتز وقربت فرح حضنتها وسلمو علي العيله وطلعو لسيارة خو معتز لبوصلهم للمطار...
كان معتز طول الطريق لاهي يهدرز مع خوه وفرح قعدت سارحه مع افكارها وهيا تشبح  لطريق ، فكرت في كل شي في الغربه ، في حياتها الجايه لبتعيشها من غير عيلتها بعيده علي امها وبوها وخوتها ، كيف بتقعد بروحها كيف بتعيش بعيده علي عيلتها وارضها ، كيف بتربي صغارها بروحها في بلاد مش بلادها ، كيف بتتأقلم وتتعود علي عيشة الغربه الصاعبه .
تنهدت وتلفتت شبحت لمعتز ليهدرز مع خوه ، بتسمت بحب ونست كل تفكيرها السلبي وخوفها من الغربه حست انه يستاهل انه تغامر علي خاطره وتمشي معاه وين مايبي مهما يكون هوا وفيء بكلمته وخداها وكان راجل معاها ف تضحيه صغيره زي انه تمشي معاه وتتغرب مش خساره فيه .
وصلو للمطار علي وقت الطياره بضبط نزلو فرح ومعتز لسلم علي خوه وخشو للمطار وكان معتز مره مره يتلفت وراه ، حتي لما ركب لطياره عيونه مافارقتش الروشن وهوا يملي في عينه بوطنه ببلاده لبفارقها ، بلاده لكنلها مشاعر الوطنيه بس ناسها ركلاته بعيد وظلاماته هلبااا ، سترجع جميع دكراياته من فرحها لا حزنها ، من ضحكته فيها لا دموع القهر والعذاب لشافه فيها ، بوده يصبر ويقعد يعيش فيها بس ضميره وانسانيته ووطانيته مستحيل يهنوه لانه متأكد لو بيقعد هني مستحيل ح يسكت علي الكوارت لصايره واخرته ح تكون ابشع موته .
تلفت لفرح اول ماحس بيدها فوق يده ، بتسم وشبك صوابعه بين صوابعها ورفع يدها وباسها:نحبك
فرح ضحكت:حتي اني نحبك هلباا
.
.
عندي وطن محروم من شوفت رايت سلامه مرفوعة ، عندي وطن مجروح وماعنده من يضمدله جروحه 💔
عندي وطن بنفارقه ، الخيال في البعد بس مصعبه ، عندي وطن مشدوده روحي بروحه ، ببعدي عنه بينكسر قلبي وبتنفتح جروحه 💔
#الياقوت
.
.
__
.
راك غالي عليا ياالحبيب ، بقربك انت مانبي حد تاني مني قريب 💛😍
.
.
حضنت رنيم نور ودموعها في عيونها وهيا تسمع في صوت خالتها:هيا يارنيم الراجل يراجي برا
شدت نور يد رنيم وقالت:غر يراجي قعده نبي نتغمرها اني
ضحكت عليها ميسون لشبحت لأسماء لجت هيا ورجاء لقربت من رنيم ودموعها في عيونهاا ، بتسمت رنيم من بين دموعها وقالت:تعالي ياحماوه
قربت رجاء وحضنت اختها بالقوه وماقطعش عليهم غير صوت أسماء:هيا بوك من امبكري يتصل اطلعي عيب الراجل يراجي
هزت رنيم راسها وسلمت علي خالتها وحناها وطلعت وهيا مش عارفه تفرح ولا تزعل حست انه خلت اختها بروحها وفرطت فيها ، واول ماطلعت وشافت رعد واقف مع بوها ويهدرز مسحت دموعها وبدت تتوثر وتعرق من الخجل ، قربت وراسها لوطه :السلام عليكم
تلفتلها بوها لقرب منها وقال وهوا يرجع يشبح لرعد:مانوصيك عليها
رعد بتسم وعيونه فيها:من غير ماتوصي ياعمي
سلمت رنيم علي بوها وركبت السياره وهيا تحاول تهدي شوي ، ركب رعد وشبحلها وهوا يولع في السياره وقال:قرجتي
رنيم:اس اس بابا يشبح
ضحك رعد وتحرك ب السياره وطول الطريق وهوا يحارب فيها بالدوه وهيا شي شي حاطه راسها لوطه ومتحشمه وماتكلمتش لين وقف رعد السياره .
رفعت رنيم راسها وهيا تتلفت لرعد لنزل وفتح باب الحوش ورجع ركب دخل السياره لجنان وشبحلها كيف رافعه حواجبها وتشبح للحوش .
نزل سكر الباب ورجع لسياره وفتح عليها الباب وقال:في شن تراجي انزلي
نزلت رنيم وقالت:مش علي اساس بنسكنو في نفس عماوة عيلتك
رعد:تحسابيني مهبول باش ندخلك في وجيجهم
وقرب شد يدها وجبدها باش تمشي وراه وخشو للحوش ، حط رعد مفاتيحه علي الطاوله وقال:بنطلع نجيبلك شناطيك
وأشر لدار في اخر الممر:هديكا دارنا
وطلع وخلاها تشبح للحوش وبعدها مشت لدار النوم لأشرلها عليها رعد وهيا تفك في وشاحها وحاسه روحها متوثره هلبااااا قعدت سارحه وواقفه في النص ، وفي عز سراحانها حست بيد تلفت علي خصرها وأول ماتلفتت نزل رعد علي قد طولها وباسها علي خدها وهوا يرفعلها في يديها علي كتافه ، بعد شوي وتكي جبهته علي جبهتها وقال:واخيرا وليتي حلالي
فتحت رنيم عيونها بشويه واول مارفعت راسها ميل رعد راسه وبتسم:محلا عيونك
ضحكت رنيم ورفعت يدها حطتهم علي عيونها بس رعد حولهالها ورجعها ورا ضهرها وقرب باس عيونها الزوز:نبي بنتنا تطلع عيونها زي عيونك
رنيم:والله
هز رعد راسه وبتسم وهوا يقرب يبوس فيها من خدها التاني:ونبي خدودها زيك هكي
تحشمت رنيم من قربه وحطت يدها علي صدره وهيا تحاول تبعده:رعد
زاد رعد شد فيها وهمس في ودنها:ياعيونه انتي
رجعت رنيم قالت بصوت أهدي:رعد
رعد:ياقلبه
رنيم سكتت شوي وهيا بتموت من الخجل وبعدها همست بصوت يادوب مسموع:نحبك اني
بتسم رعد لرفعها في حضنه ولفها بالقوه لين رنيم قعدت تضحك ورجع حطها علي الارض وشبحلها:تي وربي اني لنحبك ونموت في حبك ياقرجتي
زادت ضكت رنيم اول ماقرب رعد منها وقعد يضغضغ فيها:ارخي روحك انم وانتي متشنجه ارخي ارخي
قعدت رنيم تضحك وهيا اتبعد فيه:رعددددددد هههههههههه بطللللل خلاااص رعد هههههههههههههه
قعد رعد يضغضغ فيها لين طاحو علي السرير وهوا جي فوقها وهيا تضحك وتعيط:هههههههههه رعدددد حبيبي خلاااص باللهي عليك واااااااه ههههههه
وقف رعد وهوا يضحك ويبعدلها في شعرها من علي وجها:حبيبتي انتي اني وبس
فتحت رنيم عيونها وشبحتله كيف قريب منها هلبااااا ، وكمل رعد كلامه و قال:رد بالك تسيبيني ديما خليك جنبي
رنيم:مستحيل نسيبك اني
رعد ضيق عيونه وقال بطفوليه:وعد
بتسمت رنيم وقربت باساته من خده:وعد وعد
ضحك رعد وقرب حضنها ليه ....
.
.
.
.
__
سعيت بك للإنتقام ، وسعيتِ بي للنور 💛
.
.
وقفت مريم ورا الباب المطبخ وهيا تسمع في امها لتتكلم في التليفون:ان شاءالله ربي يكتب لي فيه الخير ، ان شاءالله ربي يجمعهم علي خيره ووده ، وبنيتنا ليكم والدوه عاد عند الرجاله توا
نزلت دمعت مريم لتلفتت وهيا تتكه علي الباب وتدكر في كلام بوها ... ""....:من طلب موافقتك انتي حني ماصدقنا حد جي وخطبك وموافق عليك بعد لصار معاك ، الراجل تبارك الله وعاجبني تاخديه وفمك ساكت اني خلاص ماعاش نقدر نتحمل كلام الناس ونظراتهم ليا نبي نسكتهم بزواجك ونرتااااح من همك لجبتيهولي "" ...
.
.
.
__
.
#بعد_مرور_شهر
طلع علاء من البلكونه وهوا يشبح في سيارات الشرطه لحاوطو العمارات تلفت طلع من البلكونه وهوا يصيح:فااااااااتح
طلعت امه من المطبخ:خيرك
علاء:فاتح وين
احلام:قبل شوي نزل لوطه
سيب علاء امه ونزل يجري واول ماوقف قدام باب العماره شبح فاتح لقلب الطاولة لتشرتعت منها البودرة والحبوب الكوكاين والهروين والتريمادول والحشيش علي الارض وهوا يسحب في سلاحة لطلعه من خصره واول ماتلفت شبح علاء لواقف مدرق ب باب العماره أشرله بيده ، هز علاء راسه وشبح لجيها التاني وصفر بالقوه لشباب لطلعو يجرو ويطلقو في الرصاص ويحدفو في البودرة لـ غبشت الرؤية علي البوليس اللي وقف اطلاق النار ب صيحة من الضابظ:وقفوووووو ضرب
واول ماوقفو البوليس ضرب طلع فاتح من ورا الطاولة جري وهوا ياشر لعلاء اللي قدام العمارة بمعني كلمني بالتليفون وقعد يجري بين زناقي الحي من شارع لا زنقه لين وصل لسيارة لتستني فيه في بداية الطريق الرئيسي ، ركب وهوا يلبس في برنوسه وقال:امشي بسرعة
شبحله رعد من لمرايا ومشي بسرعه وهوا يشبح لتليفونه لحاطه جنب الفودره يشرين ، شده وسكر الصوت وهوا يزيد في سرعة السياره ...
.
.
.
سكرت رنيم وهيا تحذف في تليفونها علي السرير وتنفخ:ياااااوبي خيوه مايودش خيوه
وهيا قعده تدوي اتصل تليفونها تلفتتله بسرعه وهيا تجبد فيه من علي السرير تحسابه رعد بس اول ماشافت رقم نور نفخت وردت بتنهيده:ها نور
نور:جدي مات
حطت رنيم يدها علي فمها بصدمه وقعمزت علي السرير بكل هدوء.........
.
.
حين تضن ان كل شي علي مايرام ، تتفجأة بأن ذالك فقط الهدؤ الذي ماقبل العاصفه 🤚🏻💔
.
.
.
.
.
.
.
#الي_الليقاء_لجزء_اخر
من رواية #عشق_في_بلاد_حروبها_لا_تنتهي
#كتابة_الياقوت

________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3