عشق في بلاد حروبها لا تنتهى 2 (طرابلس ياغارقة في الدم)

البارت 18

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
البارت 18
.
.
في الحلقة السابقة
طبس رعد خدي تليفونه الطايح من علي الارض وجبد طاقيته وتجيبوطيه وطلع وخلا احلام مستغربه ودموعها علي خدودها وساجده اتبع فيه بعيونها لين طلع من الحوش وقربع الباب ، مسحت علي وجها وهيا تفكر لصار هدا كله بسبب لدراته ، زعما غلطت بدل ماناخد رقم البنت ليكلم فيها رعد خديت الرقم حبيبت رائد ، بس خديته من تليفون رعد شن جاب رقم لكلم فيها رائد لتليفون رعد ...
نفخت وهيا تشد في راسها بيداها ، ياربي ماكنش قصدي نكسر رائد ماكنتش نبيه هوا لينجرح ويتعدب .....

قراءة ممتعة
#البارت_التامن_عشر

الحاج فتحي قرب من نادين وباس علي راسها وبعد:ان شاءالله ربي يسعدك ويفرحك يااارب
بتسمت نادين بخجل وفي نفس الوقت بفرح وهيا تتلفت لأمها لحضنتها و الدمعة في عينها:في خاطري بكرتي وفرحتي الاولي نبي نديرلك عرس كبير ونفرح بيك لكن الله غالب الوقت وعمايله
الحاج فتحي:المهم كسبنا الراجل ياحنان مش مهم الباقي ، وانتي يابنتي وتي حاجاتك وكان ناقصاتك حاجه غر نطلعو غدوة باش تاخدي لناقصك كله ان شاءالله يوم الاربعاء الصبح طيارتكم لتركيا
هزت نادين راسها والفرحه لكانت حاسه بيها ولت رهبة وخوف ، خوف انه كل شي ولا واقع ولت مرت فارس مرت الشخص لكانت تحلم بيه في عز يقضتها في الشخص لتمناته من طفولتها من نعومة اطافرها وتوا ولا ليها ، بس بكسبه هوا ح تخسر شوفت عيلتها لشهور ومرات لسنين طوااااال .......
.
.
__
مسح آسامة ع جبهته وهوا يسمع في باب الحوش لتسكر ، طلع من داره وهوا يتأكد انه بوه طلع من الحوش ، واول ماتأكد خش لدار بوه طول وقعد يفتش بين حوايجه لين لقي فلوس في قطعة قماش بيضه ، وكانو حوالي 6000 سحب منهم 2000 ورجع الباقي في مكانهم واول ماتلفت انفتح الباب ، درق لفلوس ورا ضهرة طول برهبة خوف وهوا يشبح لبوه لضيق عيونه:شن ادير هني
آسامة تلخبط وقعد يتأتأ في الاول:هوا اني هوا ندور علي تيشرتي ماعاش لقيته شوفهولي بالك مع حوايجك
عبدالله قرب وفتح الدولاب بحسن نيه:تو ندورهولك تبيه توا
آسامة حس بوجع في قلبه بوجع انه وصلت بيه الحالة انه يخنب بوه ، بوه اللي تخلا علي الدنيا ومافيها باش يربيه باش يكبرة ويعلمه ويوصله لمكانه يفتخر بيها فيه ، بس صار عكس مايتمني ، عكسها نهائيا .....
.
.
__
شبح محمد لتليفونه وبتسم لما شاف الصقر يتصل ، قعد يشبح للمكالمه لين حس انه قريب تتسكر فتح الخط طول:ها
الصقر تحمحم:ها شن لخبار محمد
محمد:ماشيه علي الكيف علي قولتكم
الصقر بتسم:كويس كويس
محمد:اي تفضل ان شاءالله خير
الصقر:اااا شن رايك بعدين تجي مداير سهرية مع الشباب في ستراحتي
محمد:كأنك مش فاطن نحنا متعاركين ره
الصقر ضحك:ههههه تي فوتها ياراجل ياما بيصير بينا
محمد:وعليش نخلي الوضع يتأزم نفكها من تو وخلاص
الصقر:شكلك واخد علي خاطرك مني لانم تي حقك عليا ياسيدي ومافيش حد مايغلطش السموحة منك غر تعالا وتو نتفاهمو ومايصير غير الطيب
رفع محمد حاجبه:تمام يصير خير
الصقر تلفت بكرسيه للباب لنفتح وقال:اراجي فيك
سكر الصقر من محمد وشبح لزياد لوقف قدام مكتب الصقر وضربله التحية:سيدي
الصقر:ها شن فيه
زياد:الافندي حامد انصاب وتو هوا في المستشفي
رفع الصقر حواجبه ووقف وهوا يبتسم:يارسوله هههههه لا عاد لازم نمشوله
لف الصقر من علي مكتبه وهوا ياخد في تليفونه ومفاتيحه وشبح لزياد:في اما مستشفي
زياد:في الفتح
الصقر:تعالا وراي انت وزوز سيارات كحماية
زياد:تمام سيدي ، بس هوا فيه حاجه تانيه
تلفتله الصقر ورفع حاجبه:شني
زياد بتسم بثقه:عرفت انه غدوة في اليل جايين طانطات شحن مخدرات لسفاو في طريق ####
الصقر ضحك:هههه تي وحق الله مافي زيك تمام وين آسامة لازم نوتو باش نداهموهم وأكيد خوته موجودين كان طيحنا واحد من خوته نطيحو السفاو ونجيبوه هوا وخوته الباقيين ناديلي آسامة بسرعة
زياد:الأفندي آسامة قعد ماجاش ومايردش علي تليفونه
ضيق الصقر عيونه وهوا يشبح لتليفونه وخش يتصل بيه:كيف مايردش كيف.....
__
.
.
قعمزت رنيم قدام نور لتبكي وهيا تشبح لتليفونها ولشاشته لتعلن انه رائد يتصل بيها ...
رنيم:علاش تبكي باهي يمشي يملح اعتبويه نزوه في حياتك وبعدين اختهم اللي هيا اختهم نفسها حدوتنا منهم شن تبي اكتو من هكي
مسحت نور دموعها:نعرفش لكن ...لكن تعلقت فيه يارنيم ...ص..ح صح مانعرفاش ليا هلب..ا لكن حسيته كأني نعرفه ليا هلبا خلاني نتعلق فيه هلبا
تنهدت رنيم وهيا تجبد في التليفون من يدها وحطاته علي الكمادينو وقربت حضنتها ، ودموعها خانوها ونزلو ، كانت تواسي في اختها وهيا تبي من يواسيها حاسه قلبها يوجع يوجع علي شخص مايستاهل علي شخص براني شخص غريب والمفروض ماتزعلش عليه لانه هوا ولا شي هوا لا حبيب ولا حتي صديق ، تنهدت وهيا تلعن في هداكا اليوم لخلاها تتعرف عليه تلعن فيه وتلعن في توأمه .......
.
.
.
ضرب رائد الكرسي برجله بالقوة وهوا يعيط:ردي ردييييي
تنهد وهوا يهدا ويوقف في مكانه وحاس في المشاكل والعراقيل بدت تتأزم عنده ، والسبب نفسه السبب خوته وخدمتهم ، اول مشكله وتعرقيله كانت في خدمته كانو كل مايسمعو بلقبه طول يرفضو ويتسبلو انه مايبوش موضفين ، حتي صحاب ماعنداش كان لما يقرا في الجامعة مايجيشي الا المحشش وخوه ويبو مخدرات منه لانه عارفين خوته من ،واللي ماعندهمش في الموضيع هدي يتبعدو عليه ويتفادو فيه باش مايجيبوش لروحهم الشبها ، بدي يبعد علي الكل وديما بروحه حتي لي يبي يتعرف ويكون معاه صحبه بحسن نيه يقعد يفكر لما يعرف خوته شن يخدمو ولا يسمع لقبه ويعرفني من ح يكسر بصحبتي ، ف قطع سريب الصحبه وكتفي بصحبة خوه ، خوه اللي برغم صحبته لقويه معاه وتوأمه ورفيق دربه الا انه فضل طريق خوته طريق لحرام وخلاه يكافح فيهم بروحه وخلاه يبدا يكافح فيه حتي هوا ....
مسح رائد علي وجهه وأول ماتلفت شبح رعد واقف قدام باب السطح ، قرب منه وقعد يشبحله لدقايق بصمت وبعدها قال بضحكه:تعرف لوجعني مش حالتي لا لواجعني حالتك
وزادت ضحكت رائد لكمل :وقعد تبي تمشي في طريق خوتك الطريق لخسراتك هلبا واخر شي خسراتك انسانه خلت قلبك يلين علي جنس حواء ، انت خسرت وخسرتني معاك بدي حالنا زي حال السفاو طول عمرنا بنقعدو بروحنا لين نموتو لا صحاب لا حب لا مستقبل ، شكرا ياخوتي شكرا علي السمعه وعلي المستقبل الجميل لقدمتوهولي
وتخطاه ونزل وخلا رعد واقف في مكانه وهوا يفكر في كلام رائد ، اللي عارف انه صح بس بعد شن بعد ماولا ملوث ولا مجرم ولا سالب اروح بعد ماعود يسقي في ضميرة بالفلوس لحرام ويقول هما يبو يموتو هما لطلبو يدمنو مش اني لنعطي فيهم ونقولم موتو ، تعود علي التفكير هدا تعود لدرجه بدي متأكد انه كدب وعنده عادي ....
رفع رعد راسه لسماء وهوا يناجي من اعماقه ومن غير صوت ... يااااااااارب .... وهوا حاس بالدنب حاس بالخسارة ، بخسارة انسانه لخلاته يتعلق فيها في مده قصيرة بكل ، وخسارة خوه وخسارة روحه ...
نزل راسه وفتح تليفونه وهوا يحط في رقمها ويقرب علي حاشية السور ويتصل وهوا يشبح لزحمة الناس وقعد مركز علي خوه علاء اللي يسلم في بضعة لشاب باين عليه صغييير وواضحه عليه ملامح الادمان ، غمط عيونه وقعد يستني ويدعي ترد رنيم عليه ، المكالمة الاولي التانيه التالته السابعة وفي نهايتها انفتح الخط وهوا يسمع في صوتها:انت ماتفهمش ماتفهمش قتلك ماعاش نبيك تتصل بيا اختفي من حياتي لو سمحت اختفي
زمط رعد ريقه وقال:رائد ماليشي دخل فينا ماتخليش اختك تكسره هوا يبيها بالحلال ومايكدبش علاها
رنيم:وهيا ماتبيش واحد ماعنداش ضميو ويقتل في الناس بسم الهوي لتبيعو فيه
رعد:انمم قتلك هوا مادخلاش هوا ماليشي دنب في اللي نديرو فيه ، دنبه الوحيد انه انخلق في عيلتنا
رنيم ضحكت ودموعها نزلو:لو سمحتو بعدو علينا حتي لو مش زيكم لكن هوا منكم ، و ود باله يتصل بيها ود باله ياسر ماصايو فيها من تحت واسه
رعد:باهي خليها ترد عليه مره وحده بس باللهي عليك مرة بس ماتعقبوشي علي حاجه هوا ماليشي دنب فيها ماتخليش عصبيتك مني تفرق بينهم
صحيت رنيم :لااا و....
قص عليها رعد بصياح زيها بس بترجي:باللهي عليك يارنيم مرة وحده بس ترد مره وحده عليه
سكتت رنيم وهيا تمسح في دموعها وهيا تسمع في صوته لهدي وكمل:وبنسبه ليا وربي ماعاد شايفه رقمي علي شاشة تليفونك ولاك سامعة صوتي في حياتك كلها غر خليها ترد عليه مرة
تلفتت رنيم علي صوت تليفون نور لغامة روحها باليرغان وتبكي ، تنهدت رنيم وركزت في رعد لماعاش تكلم وهوا يسمع في صوت نفسها اللي مش منتظم وباين انها تبكي ، وهيا حست بنفسه انه متعصب ، قعدو لتواني ساكتين وبعدها قالت رنيم:ياويتني ماعوفتك ولا شوفتك
وسكرت في وجهه ومسحت وجها بيداها وطلعت من الدار وسكرت الباب وهيا واثقه انه نور ح ترد علي رائد لما تقعد بروحها.....
.
.
.
تنهد رائد وتكه بضهره علي كرسي السيارة وهوا يحاول لأخر مرة يتصل بيها وكل خليه في جسمه تدعي انها ترد ، واول مانادي الخط فتحت نور الخط لين نبضات قلب رائد زادو وهوا يحط في التليفون علي ودنه:نور
تعلو شهقات نور لقالت من بين دموعها:علاش كدبت عليا اه علا..ش قتل.ي نخدم في شر...كه وانت ..وانت
قص رائد عليها بسرعة وبتبرير:وربي ماكدبت عليك وحق الله نخدم في شركة محاسبه يانور اني ماخصنيش فيهم اني مش معاهم وربي الشاهد عليا ماعمري بعت مخدر واحد في حياتي كلها
نور:ل..كن خوك
رائد:تي...... اني ماخصنيش فيهم اني مش معاهم مادنبيش في شي مش دنبي لديرو فيه اني دنبي الوحيد طلعت ولد واحد سكار وخوت تجار دنبي وعيبي انه اني خوهم وولدهم
مسحت نور دموعها وهيا تساوي في تقعميزتها وتسمع في صوت رائد لملاته العبرة:اني خسرت هلبا يانور هلبا لا عندي صحاب لا علاقات خدمه حتي خدمتي ماقبلوني فيها الا بستين كدبه وكدبه بسبت لقبي بسبت خوتي وخدمتهم وربي لا حولت نستقل بروحي حولت نبعد عليهم ونظف سيرتي منهم لكن ماخلونيش
وسكت وهوا يمسح في دمعة نزلت منه بالخونه:ماتخسرينيش فيك حتي انتي باللهي عليك ماتخسريني فيك الشهر لعرفتك فيه حاسه وكأنه 30 سنه مش 30 يوم حسيتك قريبه مني وتعلقت فيك هلبا حبيتك يانور حبيتك وربي لا حبيتك ومانبيش نخسرك بسببهم مانبيش نخسرك علي حاجه اني مالياش فيها دنب
غمطت نور عيونها:حتي اني نحبك لكن ... لكن
رائد:خليها من غير لكن باللهي عليك خليك معاي نبي نطلع من العيلة هدي ونكون معاك انتي عيلة نظيفه وبعيده علي لوسخ لعايش فيه باللهي عليك يانور صدقيني و اوتقي فيا اني نحبك ونبيك
.
.
__
.
حط معتز يده علي جبهت سفيان:حرارتك خير من امبارح الحمدالله
هز سفيان راسه وهوا يساوي في تقعيزته وحول تيشرته:اي لكن قعد حاس بحرارة نار داخلي
معتز بتسم:لا هوا كلنا عندنا حرار بتموتنا من غير الضيق لبودينا لجنات الخلد لكن تو تتعود ماتخافش حتي اني اول يومين صار فيا هكي
سفيان ضحك:لا ماتخافش متعود علي النو اني ومتعود علي أضيق من هكي
معتز:قصدك في الشيلا
هز سفيان راسه:تعرف شهر عشت فيه اسوء ايام عمري في الشيلات من غير التابوت لنقعد فيه بساعات لين نتمني في الموت
ساوي معتز تقعميزته:كيف تابوت
سفيان:تابوت شن كيف تابوت
معتز:لا حولي ولا قوة الا بالله هدا غير يعاملو في المسجين كويس مهما كانت تهمتهم
ضحك سفيان:اي عز المعاملة لكويسه
هز معتز راسه:تعرف ياراجل تاريته كله ليطلعو فيه في التلفزيون كدب معقوله فيه ليهم اسنين هني هواء ربي ماشموه امالا علاش مدايرين ساحة هك كبريتها
سفيان:جت علي هدي تي هوا فيه ناس ليها خمس ولا سته سنين هني ماشافوش اهاليهم
معتز:اي نعرف هدا ابسط حق لينا مانعرفش كيف مانعينه علي الاقل اتصال باهي
وتنهد وهوا يشبح حولينه وتكه بظهره علي الحيط:تعرف هدا وين اقتنعت انه ليبيا خلاص عليها كان طلعت من هني اول حاجه بنديرها بنصلح لغلطت فيه وبنطلع منها بنسافر خلاص
شبح سفيان لمعتز لقعد سارح في الارض ويفكر في حال امه وشن لصاير فيها وشن لصاير في حبيبت قلبه زعما قعده مدكراته زعما عرفت شن صارله .....
.
.
.
.
.
(حبيبي ستاحشتك هلباااااا هيا امتي بترد عليا امتي بتقولي راني ستاحشتك يافرحت حياتي ، راني قعده نتوجع علي فراقك ، والله قعده نموت في كل لحظه لانه مسامحتكش وماعطيتكش فرصه تتكلم ، عزو حبيبي اني بنموت من غيرك حاسه روحي بنموتتت)..
بعتت فرح الرسالة من ظمن العشرات لقبلهم وهيا تمسح في دموعها وتتلفت لأختها فدوي لقعمزت جنبها:لا امتي بتقعدي هكي اه
فرح:لين يطلع وقلبي يرتاح عليه
تنهدت فدوي وهزت راسها بأسف وزعل علي اختها لحالتها من سيء لاسوء من لما سمعت بخبر سجن معتز ......
.
.
.
__
.
.
بتسمت آيات لشبحت لسهي لمقعمزة قدامها لتلفتت لامها وقالت:واي شن قالتلك
سعاد:قالت الاحد ان شاءالله جايين بنخطبو آيات
قعدت آيات ترمش في عيونها وتشبح لأمها لكملت:والله بنسبه ليا ولي بوك موافقين عمر عشرت عمر ونعرفوه هوا وعيلته ونعم الناس ونعم الراجل ان شاءالله يكون من نصيبك يابنيتي
سهي ضحكت:لالا بأذن الله نصيبها ياامي هههه خلاص طاح الفاس في الراس وبتلي الراجل في بنتك ياناري
ضحكت آيات لحدفت علي سهي لمخده:خزي ههههه
.
.
.
__
.
رفعت اسماء حاجبها:الناس عجبتهم رنيم وقالو يبي الراجل يجي يشوفها شن امتي نقولهم يتفضلو
عبدالمجيد:اسئلاها هيا قبل مرات ماتبيش
اسماء:لالا تبي نعرفهم اني بناتك يرعشو علي الراجل رعش وعاد كبرو خلاص لا امتي تبيهم حاصلين في رقبتك غر هيا قولي امتي نقول للمراة تجي للمقابلة الشرعية
عبدالمجيد:شوفي روحك امتي وقوليلهم يتفضلو
اسماء:ان شاءالله خير امالا تو نتصل بيها ونقولها يجو بعد غدوة ولا الاحد....
.
__
.
.
تاني يوم الصبح كان يوم جمعة واغلب الجوامع يكبرو في العاصمه طرابلس اللي ملو مدنها بتكبير بسم الله عز وجل ....
يكبرو بأسم الله ويوحدو فيه وهم مش مدايرين بقوله ، مجتمع ينافق في روحه كيف تبيه ماينفق بعضه ✋
.
.
شح رائد البطنيه من علي رعد لنخلع وهوا يفتح في عيونه ويحس بصقع لخش من الروشن لفتحه رائد وهوا يتلفت لرعد:هي نوض برا معاي لصلاة الجمعة
قعد رعد يرفع في حواجبه ويفتح في عيونه زين ويحك فيهم:تي ال..... انت عندك انفصام في الشخصيه ولا....... مش متعاركين النم وماتكلمش فيا
ضحك رائد:سامحتك خلاص هي نوض
رعد جبد البطنيه عليه:باه بارك الله فيك ياودي اطلع وخليني نتمرقد
شد رائد البطنيه ورجع جبدها من علي رعد لصيح:تي خيرك ال.......
رائد:قتلك نوض بنمشو نصلو الجمعة مع بعض
رعد:تي برا كب تصلي ولا لوح ال..... خليني بنرقد
رائد:استغفرالله ياربي تي نوض
رعد نفخ:استغفرالله ماتخلينيش نقعد نسب في صلاة ربي برا في حالك يارائد
رائد:لا نوض هيا وربي ماني ماشي لين تنوض معاي
رعد:تي خير ....... من امتي متعود نصلي اني تي خليني في حالي .....
وقعد يصيح:بنرقد بنرررررررقد بنرقد
ضحك رائد وقعد ينق وهوا يجبد في البطنيه ورعد يجبد وبدو يتعركو ويضاربو وهما يصيحو لين لمو الحوش عليهم ههههه ، وفي الاخير ستسلم رعد وناض بدل حوايجه وهوا يسب ويلعن ويصيح ويعارك في دبان وجهه ههههه
صيح رائد:تي هيا بالحقو الاقامه قريب
طلعله رعد وهوا يلبس في طاقيته:برا..... اقلب وجهك قدامي
شبحله رائد من فوق لا لوطه:تبصر وله امالا بتمشي تصلي بسروال طايح والطاقيه تي برا غيرهم ياراجل من غير عار
رعد:انت تبيني نولي نرقد وله
ضحك رائد:هههه باه حول الطاقيه
رعد تلفت:تصبح علي خير
شده رائد من يده:ههههه خلاص خلاص تمام حتي هكي
طلعو هما الزوز وهداكا رائد يدف في رعد بسيف في الطريق واصر يمشو علي رجليهم ....
.
.
.
لا توجد اعمق واجمل واصدق من صداقة الاخوه ، فكل مايعطي من خوف وقلق وريبه وحب في هدي الصداقه تكون نابعة من القلب وليس مزيفه ابدا 💛
.
.
حني البشر عندنا النسيان بالفطرة زي مانولدنا مسلمين بالفطرة انولدنا ننسو بالفطرة ، ومش النسيان النهائي لا النسيان المؤقت يعني كلنا نعرفو شن هيا نهيتنا نعرفو ومتأكدين انه يوم من الأيام بنموتو ومش ح يقعد ورنا غير السمعة الطيبه وشوية دكريات للناس لعشنا معاهم ، لكن برغم معرفتنا بالحقيقه المره هدي قعدين نتناسو ونضحكو ونلعبو ، برغم متأكدين من انه بنموتو في يوم من الأيام
الانسان فاني من الدنيا اللي تبي لفلوس وتبي هلبا حاجات اللي مش ح نرفعوها معانا لأخرتنا لكن برغم هكي يقعد لاهي في الحاجات اللي مش حتفيده في اخرته وينسي الحاجات الاهم زي العمل الصالح الصلاة اللي من قطعها ربي يقطعه من الجنه والعيد بالله ، والسمعة الطيبه لبتقعد وراه ولبتجيبله الدعوة الباهيه ولبتنفعه بعد موته ، الله مااروعها لما حد يدكرك بعد موتك ويقول كان انسان مشاءالله عليه كان كريم او كان طيب او كان حسن اللسان او كان بشوش الوجه ، وطيب السمعة مايموتش ابدا يعني حتي لو هوا تحت التراب وبين يدين ربي قعده سيرته تنجبد من حين لأخر من اعمالة الصالحة وسيرته الطيبه بين ناسه وعيلته واصحابه ، مش زي خارب السمعة واللي لسانه عفن بين الناس هدا حتي بعد موته يقعدو يتعودو من سيرته وحتي الرحمه عليه ماتطلع من القلب ، رد بالكم يابشر رد بالكم اعرفو وين تحطو رجليكم ابنو لروحكم السمعة الطيبه لبتقعد وراكم ابنو لروحكم حياش في الجنه بالعمل الصالح ره الموت مايستأذن في حد الموت تنهب في  اصحابنا وجيرانا واحبابنا كل يوم ، خافو وستعجلو في نهب الاعمال الصالحة والسمعة الحسنه .....
.
.
.
تلفت رائد لرعد لكان منتبه لخطبة الشيخ بكل حواسه ، بتسم رائد وتمني انه تكون الخطبه أثرت في نفس رعد لزمط ريقه ورهبت الخوف سرت في كل جسمه الخوف من الحقيقه الوحيده لي في حياتنا حقيقة انه حني ضيوف فوق هدي الدنيا ومكانا هوا تحتها اصلنا هوا ترابها ، خاف من جملت الشيخ الاخيرة انه الموت مايستأذن من حد ياخد الروح امتي ماتم ساعتها امتي ماربي مقدر وكاتب نهايتها ، خاف وضميرة وجعة ووجع قلبه لحس بنبضاته زادو ، لانه عارف كويس لا عنده عمل صالح ولا عنده سمعة طيبه بين الناس ولا عنده عروة يستمسك بيها في اخرته زي الصلاة والزكاة وغيره ...
حس بيد رائد علي كتفه وهوا يقوله:هيا نموشو ولا شني
رعد وقف:هيا
طلعو من الجامع ورعد قعد يفكر في كلام الشيخ لين خلا رائد يحس انه تأثر ، قعدو يتمشو للحوش وماقالوش ولا حرف ولا تنابشو زي عادتهم لا كان كل واحد فيهم يمشي وساكت واحد مبتسم علي الفرصه لجاته ومتفائل انه ح تتغير حياته ويبعد علي الوسخ لعايش فيه ، والتاني حاس بضيق حاس بقلبه يوجع وصوت داخله يقوله انت مجرم انت قلبك حجر انت قتلت هلبا ناس وقتلتني اني ضميرك وقتلت قلبك معاي....
كسر رائد الصمت وكسر تفكير رعد:كلمت نور
تلفتله رعد ورفع حواجبه وهوا يشبح في بتسامت رائد لكمل:نبي نكلم امي علاها وان شاءالله اول ماتكمل السنه هدي وتتخرج من الثانوية بناخدها
بتسم رعد وطبطب علي كتف رائد بصمت ...
شبحله رائد ولف يده علي رقبت رعد:وانت حاول مع رنيم
رعد حول يد رائد:شن بنحاول
رائد:حاول تصلح من روحك علي خاطر روحك اولا وبعدها علي خاطرها كان تباها بالحق
مسح رعد علي جبهته:اني لا نبيها لا ملزوم باها كنت نضيع في شوية وقت معاها وتم واصلا دوتها فاضيه
رائد:متأكد
شبحله رعد:انم ماتعشش فوق راسي
رائد ضحك:هههه تمام المهم اليوم بنمشوه صياعة مع بعض ماخصنيش
رعد طلع تليفونه لشرين من جيبه وهوا يشوف في السفاو هوا المتصل:اني عندي خدمه اليوم مش فاطي ل....
رائد خبطه علي ضهرة:رجلي علي رجلك
ردله رعد الضربه برجله ورد علي السفاو:الوو
السفاو:راك تنسي لبطعة توصل مع الساعة 10 برا انت وفاتح
رعد:تمام تو نتصل بفاتح ونتفاهم معاه
السفاو:شوف روحك هي
رعد سكر من السفاو وشبح لرائد ليخبط علي ضهره دفه من عليه وصيح:ياعن شكلك ياولد الكلب
رائد:ياكلب تسب في بوك ره
رعد:ياعن ..... انت وياه باهيووو اقلب وجهك عندي خدمه اني
رائد:رجلي علي رجلك قتلك اني
رعد:انممم راني ماشي نستقبل في شاحنة حشيش بتجي تعالا
رائد رفع حاجبه:بنمشي معاك عادي
رعد ضحك:خير..... معاي اليوم
رائد:ههههه نزلت فيك الحليوه
زادت ضحكت رعد لقرب من رائد وهوا يلف في يده علي رقبته لين رائد انخنق وهوا يضرب فيه بيده علي راسه:تي ح.ول ياراج..ل خن.قتني
قعد رعد يضحك ومشي وهوا قعد لاف يده علي رقبة رائد لحاول يفكله يده بصياح وعياط......
.
.
__
.
.
ضيق محمد عيونه:من هوا هضا عبد الكريم وكيف يدير هكي نحنا ناقصنا
جاه رد صاحبه لي علي التليفون:تي يامحمد بنغازي مقلوبه فاطن معني شن مقلوبه الدواعش في كل مطراح ومن غير التفجير لبدي كل مره في مسجد
محمد مسح علي شعره:لا حولي ولا قوة الا بالله نا الاحد جاي غادي ونبي ننظم معاكم
صاحبه:لكن خطر يامحمد وانت وراك هلك
محمد:هلي عندهن من يحميهن من بعدي لكن بلادي وبنغازي ماعندهاش غيرنا
صاحبة:راجل وربي راجل
.
.
.
__
.
.
نبض المؤمن بالله اقصر من العاصي به ، ف الله يحب يعجل ليلتقي بعبده المؤمن ، ويحب ان يأجل اللقاء مع العاصي كي يثوب له 💛
.
.
في الليل وعلي الساعة 9:30 ...
كانو رعد ورائد وفاتح واقفين في طريق خالية من الناس وعلي حدود اطراف طرابلس وهما يستنو في الشاحنة ...
قرب فاتح من رعد وقال بصوت واطي:غريبه رائد جاي شن بدي يحب خدمتنا ولا شن هههه
رائد تلفتله وقال برفعت حاجب:لا نحبها لا تحبني
زاد فاتح ضحك وخبطه علي ضهره:مكبر ودانك
بتسم رائد لقرب من رعد لشبح لفاتح:رد علي التليفون بالك السفاو قوله خيرهم تعطلو ال..... هدو فديت اني انم
رد فاتح وبعد من جنب رائد ورعد لقال:نموت ونعرف علاش لاصق في امي اليوم
رائد شبح لرعد وقال:مانعرفش لكن قلبي مش مطمن
رعد:احلام هدي روحك
ضحك رائد:ههههه احلام في العرس تهيص
رعد هز راسه بضحكه ، ورائد طلع تليفونه لشرين من جيبه ورد وهوا يبعد من جنب رعد:الو حبي
سمع ضحكتها الخجولة:اهلين ههه
رائد:ههه خيرك تضحكي
نور:مش عارفه بس حاجه جديده عليا حبي وجو هدا
رائد:هههه قعده ماشفتي شي ياقلبي ههه اي شن ادير حبيبتي ونور عيوني
نور تحشمت:شي وانت
رائد:قعد نستاحش فيك وبس
قعدت نور تضحك وماعاش عرفت شن ترد وهيا تسمع في رائد لكمل:وقسم بالله يابنت الناس كأني نعرفك ليا سنين خشيتي لقلبي طول ومن غيى استأذان
نور تنهدت بفرح وبخجل:حتي انت
رائد رفع حاجبه:حتي اني شني
نور:وااااك ماتبداش عاد في سحب الدوة
ضحك رائد:ههههه وربي نحبك يانور تي نموت فيك راني هههه
نور:ههه حتي اني نحبك هلباااا
بتسم رائد وهوا يتلفت وراه بس اول ماشاف الشاحنه جايه وكانو وراها هلبا سيارات عاليات ومصفحات وطالعين منهم شباب شادين اسليحه فيسع ما حاوطو المكان لكانو فيه هوا وخوته لتلفت بسرعة وهوا يشبح لرعد بنفس مقطوع وبرهبت خوف سري في كل مكان في جسمه وهوا يسمع في عياط رعد:اجرررررري يارااااااائد اجررررررري
قعد رائد يشبح لرعد لصيح وهوا يبي يجيه بس فاتح كان شاده ويجبد فيه باش يركب لسياره وهوا يدف ويصيح:راااااااااائد تي حول راااااااائد
طاح التليفون من يد رائد وهوا مش قادر يتحرك من مكانه ويشبح لمجموعة الشباب لحاوطوه وهما رافعين اسلحتهم في وجهه وفي مجموعه قعدو يلحقو في رعد وفاتح لدف رعد في سيارة بسيف وهرب هوا وياه...
قرب واحد من رائد لاول ماتلفتله رائد خبطه علي جبهته بالمسدس وكان هدي اخر شي يشوفه رائد لطاح علي الارض وغمي عليه..................
.
.
.
#يتبع_للبارت_لبعده

________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3