عشق في بلاد حروبها لا تنتهى 2 (طرابلس ياغارقة في الدم)

البارت 24

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
الحلقة 24
.
.
في الحلقة السابقة
رفع رائد يده وحطها علي يد رعد لحاطها علي جرحه وشد فيها بالقوة وخدي نفس وهوا يحاول يدوي:نح..بك ي..اخ.وي
حول محمد التام من علي وجهه وقلبه ينتفض من المنظر لشوف فيه وفي رعد لقال:حتي اني نحبك ياخوي
غمط رائد عيونه بس رجع فتحهم بسيف علي عياط رعد:لالالالالا باللهي عليا لااااا انم انم انم مش يانموتو مع بعض يانعيشو مع بعض مش عدل يارائد مش عدل ياخوي
ارتخت يد رائد من علي يد رعد مع دمعة نزلت من عينه وهوا يشبح لرعد لصيح:لاااااااا لااااا ياخوي لاااااااااا
طبس محمد وهوا يمسح علي وجهه:ان لله وان اليه راجعون ان لله وان اليه راجعون
حط رعد يده علي عيون رائد وسكرهمله وهوا يحط في راسه علي صدره ويبكي بالصوت علي خوه يبكي بحرقه علي توأمه لستسلم للموت ، لستسلم بكل رحابة صدر ، وبكل قناعة ، من غير مايقاوم فضل يرد لربه ويسيب لحياة لماشاف فيها يوم حلو يسيب لحياة اللي ضحكتله وفي عز فرحته بيها غرست سكين في وسط قلبه وخدت روحه بين يدين خوه .............

قراءة ممتعة
#البارت_الرابع_والعشرون

بفراقك ياأخي تركت بي جرح لن يشفي 💔
.
.
لا إله الا الله ، محمد رسول الله .....
نزل فاتح للقبر هوا ورعد اللي قعد يمسح في دموعة بكم تيشرته وشد جثت رائد اللي حطوها في مكانها واصلها ....
طلع فاتح ورعد ماقدرش يطلع وقعد يبكي وهوا يشبح لجثت خوه جثت توأمه ونصه ، طبس علي الجثه وقعد يبكي وماطلعش لعند مانزل محمد هوا والشباب وطلعوه ومحمد قعد يحاول يهديه وخداه قعمزه بعيد علي القبر شوي وخلا السفاو وفاتح يحطو عليه التراب والدموع في عيونهم ، تلفت فاتح لعلاء لجي خدي منه وقعد يحط علي جثت خوه في التراب والسفاو شبح لرعد لوقف بمساعدت محمد وقرب خدي منه وقعد يدير وصوت بكاه سموعه كل الحاضرين واللي مابكاش علي رائد بكي بحرقة علي حالت رعد .....
.
.
الكل طلعو من المقبرة وماقعدوش غير الخوت الاربعة مقعمزين عند قبر خوهم .....
قعد رعد يتحسس بيده علي تراب القبر ويتمتم:خليتني ياتوامي خليتني
حط السفاو يده علي كتف رعد ودموعة نزلو:كلنا ليها
تلفتله رعد بعيون حاقده وحوله يده باالقوة:كله منك كله من افعالك يا....... قتلت خوي قتلته انت وبوك
وطبس راسه وهوا يمسح في دموعه:بوك اللي حتي في دفينت ولده ماجاش ال..... ربي يلعنكم ياكلااااب ربي يلعنكم
وقف السفاو وماتكلمش ولا كلمه ودموعه بدو ينزلو بوجع وتلفت طلع من المقبرة وهوا حاس بالذنب بعداب بألم فضيع في قلبه ، هوا اليوم دفن خوه بديه ، دفن خوه الصغير اللي لطالما طول حياته يعتبر فيه هوا ورعد ولاده الصغاره وكبده مش مجرد خوت بس ، واهو اليوم دفن ولده بديه وكان هوا السبب في موته ، فعلا كلام رعد حق كلامه كله مزبوط لو خلاه يمشي ويكون روحه بعيد عليهم ره ماكانش هدا مصيرة ، لو هوا بداته رفض يمشي في طريق بوه الوسخه ره خوته ماكانوش هكي ، كان مشي في الطريق الصح ره قدر يبعدهم من مصير يشبه مصير بوهم اللي حتي دفينت ولده ماقدرش يحضرها ، اللي خايف لو جي يلحقوه بولده او يشدوه ووروه الويل 💔
.
.
.
__
.
.
في الليل .....
حط محمد راسه علي المخده وهوا حاس بالم في قلبه بالم الخدلان ب وجع علاش ياربي ماخليتاش لين وفيت بوعدي معاه ، علاش ماجتش الرصاصه فيا علاش قتلته هوا علاش قتلت ليستحق انه يعيش ...
غمط عيونه بالقوة وهوا يمسح علي وجهه بيديه الزوز:استغفرالله ياربي استغفرالله
نهض روحه وقعمز وهوا يحاول ينسي بس مش قادر في شي يقوله كله منك ، لو شديته لو ماخليتاش يتسرع ويمشي ....
وقف وخدي دخانه وتليفونه وطلع للبلكونه ، ولع دخانه لحطه بين شفايفه وفتح تليفونه وتصل ب رنا ....
.
.
.
بتسمت رنا:ارقد ارقد سلم وخيي دوتك هلبا
ضحك جلال:سكري الضي
سكرت رنا الضي وسكرت عليه الباب وهيا اطلع في تليفونها لشرين من جيبها واول ماشافت رقمه رفعت حواجبها بصدمه وبعدم تصديق ...
ضحكت ومشت لدارها تجري ومن فرحتها بتصاله ماعدلتش حتي علي حناها لقعدت تنادي لما شافتها تجري ....
سكرت باب دارها عليها وردت عليه:الو
جبد محمد من السبسي متعه ونفخه :كيف الحال
بتسمت رنا:الحمدالله وبدات بعد اتصالك
محمد:كويس
رنا:وانت شن جوك وشن مداير
محمد:شي انتي شني مدايره
رنا قعمزت علي سريرها وردت:شي كساد وماله هلباااا هلبااات
محمد:اممم
ضيقت رنا عيونها:اممم اي شكله جوك اخي
محمد:وشين بكل
رنا:علاش خيرك ، قصدي لو تبي تحكي كان هدا علي راحتك
محمد سكت شوي وحس روحه يبي يشكي يبي يبرر لحد انه هوا كان بجد يبي ينقد رائد وحسبه زي خوه سالم وأعز ، قعد ساكت لين رنا رجعت قالت:الو محمد
محمد تحمحم:تما ، تما عندي صاحب معزته كبيرة امس مات قدام عيوني
رفعت رنا حواجبها:ياروحي الله يرحمه ويغفرله
محمد قال بتأتر ووجع واضح من صوته:كله مني نا لمعرفتش كيف نتصرف كان هضا ره قعد بينا وقعد عايش
تنهدت رنا وهيا تحس ب وجعه:ماتقولش هكي حرام هدي ساعته لو ساعته مزال ره كان لو ابصر شن يصير ره عاش عاش بس هدا قضاء وقدر وكلنا للموت ره كلنا بندوقو نفس الكاس لشرب منها صاحبك
تنهد محمد:صح
رنا:ماتزعلش روحك توا ادعيله في صلاتك ودعي لربي يكون مكانه الجنه ويسامحه ويغفرله دنوبه صدقني هدا لبساعده توا
بتسم محمد:كلامك سمح
ضحكت رنا:شكرا هههه
.
.
.
__
علي الساعة 12 فليل كانت ام مريم رافعة يداها وتدعي والدموع علي خدودها تنزل بحرقة ، ودعواتها تطلع من كل قلب موجوع ، قلب فاقد ضناه ، قلب مكسور من وحشيت اكلام الناس لمايرحم ......
سمعت اطقطيق الباب مسحت دموعها ورفعت راسها لساعة لمعلقه في وسط الحوش ، ووقفت وهيا تشبح في سامح لطلع من الدار هوا و رانيا لقالت:مني جاي في الليل
طلع بو مريم حسين وهوا مستغرب وقال:اللهم اجعله خير والصلاة علي النبي
ومشي يجري فتح الباب اللي اول مافتحه انصدم وهوا يشبح في مريم لواقفه قدام الباب ودموعها في عيونها وتشبحله واول ماشفاته صوت بكاها تعلا وقالت:بابااا
جو سامح ورانيا يجرو وامها اللي لما سمعت صوتها طاحت في مكانها وهيا تبكي .......
.
.
__
.
قلبي علينا ، افترقنا حين ألتقينا 💔
.
.
رنيم قعمزت قدام نور لمسحت دموعها:باهي هيا اتصلي
رنيم:بطلي بكي وامسحي دموعك كان هدا وه مانتصلش
مسحت نور دموعها وهزت راسها:هيا باه هيا
نفخت رنيم وحطت علي رقم اخت رعد ساجده وخدت نفس وتصلت: واااك تو بتحطيني في موقف اخي عليه اووف
قعد ينادي ينادي بس ماردتش ، نفخت رنيم ورفعت عيونها في نور لرجعو دموعها نزلو لين خلت رنيم تصيح:بطلي دموع وتوتيني
حطت نور يداها علي فمها ورنيم قعدت تحاول تحاول وبعد خمس مكالمات ردت ، رفعت رنيم عيونها وشبحت لنور لمسحت دموعها وقربت من رنيم لقالت:الو
جاها صوت ساجده لتبكي:من ..من معاي
ضيقت رنيم عيونها وبعدت التليفون:اني مني شن بنقوللها انم
فكت نور التليفون منها وقالت من بين دموعها:اني ..ح.بيبت رائد ..لو سمحتي طمنيني عليه هوا كويس ووينه توا
قعمزت ساجده لكانت راقده وزاد صوت بكاها تعالا لين خلت نور تخاف وهيا تقول:علاش تبكي فيه حاجه لو سمحتي اعطيهولي لو كان في الحوش لو سمحتي
ساجده نطقت من بين بكاها:اني اسفه .. اسفه علي خاطر فرقتكم ...
وقفت نور وصيحت بعياط:وينه هوا وينه
ساجده:رائد مات خوي مات
هدت نور وهيا تشبح لرنيم لواقفه قدامها وتسأل:شن فيه خيوك
رخت نور التليفون من بين يداها وخلاته يطيح علي الارض وحست بالدنيا بدت تلف بيها وتولي سوده ، وطاحت اغمي عليها .....
عيطت رنيم لقربت منها طول:نوووووور
.
.
__
.
.
بعد يومين ......
.
.
رنا:يعني ماعاش بتولي هني
محمد:كان ربي كتبلي عمر اكيد امولي تما عندي ثار قعد ماصفيته
ضيقت رنا عيونها:بس بطول
محمد تلفت وهوا يشبح في علاء لنازل من العمارة وقال:مانعرفش
رنا تنهدت وسكتت شوي وبعدها قالت:عادي نتلاقو في مكان
محمد:لا
رنا سكتت وماعاش ردت لين محمد رجع وقال:تبي تشوفيني
رنا ردت بسرعة:اي
محمد بتسم:بكرا جايكن عشان نعطيكن الجوازات
رنا ضحكت وقالت بفرح:طلعو
محمد:اي
رنا:تمام نستني فيك
ضحك محمد:تمام مع السلامه توا
رنا:خيرك مزال
محمد:عندي شغل
رنا:تمام غدوة نراجي فيك
سكر محمد من رنا وتلفت مشي جيهت علاء لواقف قدام العمارة:السلام عليكم
رفع علاء راسه:وعليكم السلام شن جو محمد
محمد:تمام شن جو رعد
سكت علاء شوي وبعدها قال بالمعت عيون مكسورة:حالته من سيء لأسواء كل مايشوف واحد منا يبدا يعيط ويصيح
هز محمد راسه وقال:عنده الحق انتم ظلمتو ورائد دفع الثمن
ورفع يده طبطب علي كتف علاء ومشي وخلاه يفكر في جملته كويس ودموعه نزلو علي خوه اللي فعلا دفع ثمنهم ، بموته خسرهم هلبا بس في نفس الوقت ولع في قلوبهم النااار ......
.
.
.
.
__
تلفتتلها حنين ودموعها نزلو:مات حتي قبل مايفرح بيها
هزت ساجده راسها:اي كان تسمعي صوتها كيف تعيط تقولي وينه وهيا تترجاء فيا نعطيه التليفون قلبي وجعني هلباااااا وجعني انه حولت نفرقهم من غير قصد
وشبحت لحنين وكملت:كنت نبي ننتقم من رعد بس من غير قصد خربت علي رائد
مسحت حنين دموعها وقالت:اعطيني التليفون نبي نكلمها
ساجده:اعلااش
حنين:غير اعطيني
وقفت ساجده وطلعت التليفون وطلعت رقم رنيم وعطاته لحنين لتصلت......
.
.
.
مسحت ميسون دموع نور لمقعمزه قدامها وقالت:خلاص بطلي بكي مش قالك ادموعك يعدبو ويوجعو فيه ترضي تعدبيه باهي ترضي توجعيه وهوا بين يدين ربه
هزت نور راسها ومسحت دموعها طول:لالالا خلاص ماعاش بنبكي هااا
نزلو دموع ميسون علي حالت بنت اختها وقربت حضنتها وهيا تشبح لرنيم لمقعمزه جنبهم وتبكي وهيا تفكر في رعد ، من لما سمعو بموت رائد وهيا خايفه انه حتي رعد مات ولا صايرتله حاجه ، واللي زاد خوفها انه تليفونه مقفل ، ومن خوفها ماتجرئتش انها تتصل بساجده تسأل خافت تقولها عليه حاجه تقتل قلبها الموجوع عليه ....
تنهدت وهيا تمسح في دموعها وتتلفت لتليفونها لشرين وخداته واول ماشافت رقم ساجده وقفت طول لين نور وميسون شبحولها وهيا ترد علي ساجده:الو
حنين:اهلين
ضيقت رنيم عيونها وسغربت الصوت:اهلين فيك
حنين مسحت دموعها وقالت:انتي حبيبت رائد
رنيم:لا...اني اختها
حنين:ممكن تعطيهالي
رنيم:اكيد
وسكتت شوي وقالت:بس لو سمحتي هوا...
وسكتت وهيا مرتبكه لين حنين قالت:نعم تفضلي
رنيم:هوا رعد كويس
حنين:توأمه مات كيف تبيه يكون كويس
رنيم تعلا صوت بكاها وقالت من بينهم:ا..ختي معاك
ومدت التليفون لنور لخداته بستغراب وهيا تحط فيه في ودنها وتشبح لرنيم لمشت طلعت للبلكونه...
نور:من معاي
حنين:اخت رائد
رجعو دموع نور نزلو وسكتت ماعاش قدرت تدوي لين حست بيها حنين لحتي هيا دموعها قعدو ينزلو وقالت:عندك علم خوي كان يحبك هلبا علي خاطرك تعارك هوا ورعد هداكا اليوم لما اختي اتصلت بيك
نور زاد صوت بكاها يعلي وقالت:ح..تي ان.ي نحبه هلباااا ت..تمنيت نشوفه ..ياريت ربي خداني اني بداله
حنين:هدي ساعته هدي الحياة غدارة ماتخد غير الطيب
نور:ياريته ظالم زي خوته ياريته كان شرير وعاش ، ربي خداه مني زي ماخدي ماما خداه مني حتي قبل مايخليلي دكره منه
وقعدت تبكي وحنين قعدت تبكي معاها لين هدو هما الزوز....
حنين رشفت دموعها وقالت:شن اسمك
نور مسحت دموعها:ن.ور
حنين:تقدري تجي لحوشنا يانور
مسحت نور دموعها وهيا تحاول تبطل بكي وشبحت لخالتها لقدامها:كيف
حنين شبحت لساجده لجت قعمزت قدامها وقالت:قولي لعيلتك نبي نعزي صاحبتي وتعالي نبي نعطيك حاجات يخصو رائد
نور:بس اني مانعرفش وين تسكنو
حنين:اعطيني لي جنبك واني ندله وين بضبط
.
.
.
__
تاني يوم الصبح
.
.
حط محمد السلاح علي المكتب وشبح لزياد:هضا السلاح
وطلع امفاتيح السيارة وحطهم جنب السلاح:وهضم مفاتيح السيارة
زياد شبح لسلاح ورجع شبح لمحمد:قصدك خلاص بتسيب ماعاش بتولي
محمد:كان مامتش راجعلكن
هز زياد راسه:هو الصقر قال يبي يشوفك قبل ماتمشي
محمد:تو نعدي نحقه
زياد:تمام يافندي
طلع محمد واول ماطلع من المكتب شاف آسامة لخش وهوا لابس الطاقيه لمنزلها باش مايبينش ارهاق عيونه ودبلان وجهه ..
محمد:اووو ليك وحشه ياشامخ
رفع آسامة راسه لمحمد وبتسم:ليك اكتر ياطقه
ضحك محمد وقعد يشبح لملامح وجهه زين:لنقنك طحت وطيحتك واعره
ضحك آسامة:شكلني ياطقه
محمد:اصحه علي روحك مازال فيك الرجي
وقرب طبطب علي كتفه ومشي وخلاه يطلع في تليفونه ويتصل علي رقم لاول مافتح لخط قال:امتي بتجب لتطلبته منك
جاه صوت علاء لقاله:جيب لفلوس وبضعتك واتيه
.
.
.
.
طلع محمد من المقر ومشي لسيارة لتراجي فيه برا واول ماركب تلفت لرؤوف وقال:السلام عليكم
رؤوف:وعليكم السلام خيرك ماتردش علي مبايلك
محمد طلع تليفونه من جيبه وشافه:لنقنه صامت ونا مدري عنه
رؤوف:شن صار
محمد:سلمت امانتهن وبس
رؤوف:خلاص يعني بتمشي
محمد هز راسه ورؤوف رجع كمل:راك ماشي للموت برجليك
محمد:شن تبي مني نسيب مدينتي وهلها في النار هضا واجبي مش نحنا ولاد الوطن
رؤوف:لكن انت وراك عيلة وانت سندهم الوحيد
محمد:فيه جدي وخوالي وعمامي نا بنغازي اولي بيا
تنهد رؤوف وقال:شن رايك نمشو نتغدو في مكان
محمد:لا عندي مشوار
رؤوف:نمشو نتغدو وبعدها نوصلك وين ماتبي
محمد:تمام عدي هي
.
.
.
__
عشقي محرم ، فقد عشقت في بلاد حروبها لا تنتهي 💔
.
.
شبحت رنيم لخالتها لدرست السيارة وقالت:اني متحشمه الصواحة علي الاقل ستنينا اسبوع مش جايين من وابع يوم
نور قعدت تشبح للعمارة ودموعها نزلو:اني بننزل
تنهدت ميسون:اااه ياربي اني شن قعد مصبرني وشن لمخليني منهبلش عليكم مانعرفش
تلفتت رنيم وشبحت للعمارة...
ميسون:هيا انزلو غر نفوتو لفضيحه هدي وروحو
.
.
.
.
طلعت حنين ومدت لرعد جيبوطيه:خود صقع فوق
خدي رعد منها الجيبوطي وتلفت بيركب بس حنين قالت:رعد
رجع تلفتلها وهز براسه بمعني نعم ، نزلو دموع حنين لقربت منه وحضناته:حرام عليك لدير فيه في روحك كان رائد حي ره اضايق هلبااااا منك
بادلها رعد الحضن وبعدها وباس علي راسها:خشي صقع
حنين مسحت دموعها:وانت البس جيبوطيك
هز رعد راسه وركب وخلاها كيف تلفتت بتخش بس انفتح الاسنسير وجت عين رنيم علي رعد لراكب فوق ، خدت نفس كبيييييير وغمطت عيونها طلعاته براحه ، راحة انه مافيه شي انه سليم ومش ميت ولا مصاب .....
طلعو من الاسنسير وحنين قعدت تشبح لرنيم لدموعها نزلو وهيا تشبح فوق ، تلفتت شبحت لدروج ورجعت شبحت لميسون لقالت:هدا حوش ####
هزت حنين راسها وشبحت لنور لقعدت تبكي وهيا حاطه يدها علي فمها وتلفتت لرنيم لشدتها ...
نزلو دموع حنين لقالت:مني نور
تلفتتلها نور وهيا ترشف في دموعها:ا..ني
قربت حنين وحضنتها طول وقعدو يبكو هما الزوز وبعدها بعدت حنين شدت يد نور ودخلتها ...
تلفتت ميسون لرنيم:هيا تعالي
نتبهت رنيم علي خالتها:خشي انتي برد علي صاحبتي ونلحقك
ميسون:ماتتعطليش
هزت رنيم راسها وتلفتت حطت التليفون في ودنها لين تأكدت انه خالتها خشت ، نزلت التليفون وشبحت فوق وقعدت تردد في داخلها ، مرات مش فوق الحيط ، اووف يارنيم خشي خشي ....
تنهدت وماقدرتش ماتغامر وتركب وتشوفه كان هوا فوق الحيط ولا لا زي ماديما يقوللها ......
.
.
.
.
ركب علي حاشيت سور العمارة وحط السبسي في فمه وهوا يشبح لوطه وكان البعد والعلو يهز القلب ويخوف ، كان يشبح لوطي للناس والسيارات وولا شعرة تهزت منه من العلو كان ينفخ في الدخان وهوا يحس بقطرات لمطر لخلاته يشبح لسماء وغمط عيونه ودكر "".....:تركب لحاشيه السور وتمشي لا غادي وحق الله لتبيه لما نعطيهولك
ضحك رعد بستهزاء:ونبي تي نوض اقلب ام وجهك وانت تحدياتك زي ........
ضحك رائد:هههههه خواااااف خوااااف
ضربه رعد علي راسه:وهدي باش تعرف اني مش خواف
ووقف وهوا يشد في السور وركب علي الحاشيه ورفع يديه:خواف قلتلي اه خواف
رائد ضحك وشبح لسماء:ههههه من هول مااري لين لمطر بدت تصب
رعد:باش تعرف بس هي ياجبان ورينا فلاحتك وركب
رائد رفع يده لرعد لشدها وساعده يركب وقعدو يمشو علي الحاشيه ويضحكو وهما يحاربو في بعض ويدفو في بعض ....
رائد:تي حول يدك ياراجل اني قطرت مطر زايده بطيحني ههههه
رعد:هههههه ياهش انت
رائد:تي حوووووول
قعد رعد يضحك ويحارب في رائد لصيح من بين ضحكاته........""
فتح عيونه مع دموعه لنزلو وهوا قعد يشبح لسماء سارح لين سمع الصوت لجي من وراه:رعد
ضيق رعد عيونه ومسح دموعه بكم تيشرته وهوا يتلفت يبي يتاكد من الصوت لسمعه واول ماتلفت شبحها واقفه وراه وهيا تبكي بخوف وتقرب وهيا تحاول اطلع كلامها لطلع بنبرت صوت ترعش:ش..شديو انزل باللهي عليك انزل
قعد رعد تابت في مكانه وهوا مش مصدق انها قدامه ، وماستوعبش وجودها الا لما صيحت:رعد انزل انزل انزل
مسح رعد علي وجهه بديه الزوز ونزل وهوا يقرب منها:جيتي
قربت رنيم منه ورفعت روحها ولفت يديها علي رقبته وحضناته وقالت من بين دموعها:خفت هلبااااا عليك خفت هلبااا
لف رعد يديه حولين خصرها وهوا يحضن فيها ويشم في ريحتها لأول مرة يشمها ، حضنها وكان يلقي يدخلها لي داخل جسمه بالحضن هدا ، حضنها بأحتياج بوجع بفقدان ، ستاقضت رنيم بروحها ورخت روحها بس رعد زاد ضغظ عليها باش ماتبعدش رجعت رنيم حضناته وهيا تحس بحضنه قداش هوا متألم قداش موجوع قداش هوا ضعيف من بعد توأمه....
بعد رعد شوي وهوا يشبح لوجها ، ورنيم اول مافتحت عيونها وشبحت ادموعه ، قلبت شفايفها ورفعت يداها لخده وقالت ودموعها زادو نزلو بوجع من شوفت دموعه:رعد
زمط رعد ريقه ونزل لمستوي طولها وقرب طبع بوسه علي جبهتها ورجع حضنها ليه بكل حواسه من بين صدمت رنيم لنزلت يداها لصدره وسيبت روحها ليه من غير ماتبعده او تحاول ترفض حضنه .............
.
.
.
.
#يتبع_للبارت_لبعده

________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3