BECOMING MRS. ACOSTA (Love in the Mountains)(COMPLETED)

CHAPTER FORTY-SIX

Gustong-gustong magtanong ni Amber sa doctor na kasama kung tatalagang tama ba ang file ng pasyente na dala nila. Hindi siya mapakali na Taylor Swift ang pangalan ng patient tapos ang edad naman nito ay doble ng edad ng sikat na international singer. Pasulyap-sulyap siya kay Dr. Marzan at seryoso lang itong nagmamaneho. Mukhang suplado talaga. Nakakatakot pero kaysa naman magkamali siya, magtatanong pa rin siya.

"D-doc, puwedeng magtanong?" Kahit kinakabahan ay tanong niya.

Sumulyap lang ito sa kanya at muling itinutok ang tingin sa kalsada. "What?"

Napangiwi siya dito at bahagyang umirap. Ang suplado talaga. Baka kapag ganito ng ganito ang doctor na ito, hindi siya magtatagal na magtrabaho dito.

"Itatanong ko lang kung tama ba talaga ang patient's chart na dala ko? Baka kasi doon 'nyo ako pagalitan dahil mali ang nabitbit ko. Talagang Taylor Swift ang pangalan ng patient?"

May bahagyang ngiti ang sumilay sa labi nito. Cute naman palang ngumiti ang doctor at puwede naman palang ngumiti pero bakit ito laging nakasimangot?

"Yeah. Weird ba?" Napahinga ito ng malalim. "You know rich patients. They have weird requests. "Last time nga, Jennifer Lopez pa ang ginamit niyan. But I know the patient personally kaya walang problema diyan."

Napatango-tango lang siya at ngumiti ng pilit tapos ay inabala kunwari ang pagtingin sa hawak na file.

"How's your stay in the Philippines so far?"

Nagtatakang tumingin siya sa doctor. Siya ba ang kinakausap nito? Nakita niyang tumingin na ito sa kanya at ang masungit na mukha kanina ay naging malambot na. Hinihintay ang sagot niya.

"A-ako ba?"

Tuluyan na itong natawa. "Dalawa lang naman tayo dito sa kotse so, siguro ikaw nga ang tinatanong ko. Well, your dad keeps on talking about you kapag nagkakasama kami and basically, I know about you already."

Ngumiti siya ng mapakla.

"Nai-chismis na pala ako ni daddy." Parang nahiya siya bigla. Naisip kung ano kaya ang mga pinagsasabi ng daddy niya tungkol sa kanya.

"Your dad was always proud of you. He keeps on telling me how you're strong, opinionated, tough. And you always do whatever you want. I like that."

"Daddy ko ba talaga ang nakausap mo na sinasabi ang mga 'yan?" Hindi siya maniwala na sasabihin iyon ng daddy niya. Alam niyang mula umpisa failure na siya sa daddy niya.

"Yeah. He also told me that you were once a model for artists. Painters. That's cool. I love paintings. I love art."

"Ah." Nahihiyang napatawa siya. "Oo. Nagmo-model ako sa friend ko na artist. But that was before. Ngayong may anak na ako, hindi na. Hindi na puwede."

"Bakit naman hindi? I think you are a perfect model. Are you dating someone?"

Napatitig siya sa lalaki. Hindi ito nakatingin sa kanya pero halatang naghihintay ito ng sagot niya.

Nagpapa-cute ba si Doctor Marzan sa kanya? Wala pa silang kalahating araw na magkasama pero ito na ang tinatanong sa kanya. Hindi kaya babaero ang doctor na ito at lahat ng mga nagiging nurse ay ginagawang babae? O dahil sa may anak na siya kaya iniisip nitong madali siyang makuha? Tumigas ang leeg ni Amber at bahagyang umusog palayo sa kasama.

"Matagal na kitang kilala, Amber. I saw your picture once when your dad was showing pictures of his grandson to us. What's the name of your kid? Arrow. Nice name. I saw you and you got me that instant." Tumingin na sa kanya ang doctor. "Kaya ng sabihin ng daddy mo na nandito ka na and you are looking for a job, sinabi kong puwede ka sa aking magtrabaho."