الحلقه الرابعه
: معقوله هكي بعد ماامنتني امكن عليكن تسيبني واتعدن لدار عمكن
: ماهو قلتلك ياخالتي انوفرو حق المواصلات عل الاقل لهديل لانها قريبه من دار عمي بعدين انحس امضيقين عليكم شقتكم صغيره وعمي علي قداش بيصرف مع حق الاجار
فايزه: معقوله هكي اتقولي ياهنوده متى شكيتلك علي قعدتكم عندي بالعكس والله متونسه بيكم
: عارفاتك ياخالتي ماقصرتي لكن هكي الواقع يقول بعدين دار عمي ملزومين بينا وبسكنتنا
فايزه : باهي وامك شن بنقوللها
: امي خليها عليا مابتقولش لا
فايزه: ودار عمك شنو وضعهم
: دار عمي يفرحو فرحه بينا لانهم لما جيناهم شدو فينا وغير اقعدو معانا
فايزه : والله شن بنقول اللي يريحكم اهم شي ماتقطعوني
: وهو احني نقدروا بلاك
،
،
،
،
هديل: هي شنو صار قلتيلها كيف ماتفقنا
: ايه يارب سامحني علي الكذب
هديل : ودار عمي شن بنقولولهم
: تو انكلمهم خليك جنب الباب وماتخليش خالتك تسمعنا ،،،:
،
،
،
: الو وعليكم السلام اه موجود مين يقول اوكي لحزه ،،، مدام مدام في وهده يبغى انت يقول هند
عيشه : زعما نفسها هذيك البنت مدي التلفون الو
: السلام عليكم
عيشه : وعليكم السلام
: شن حالك ابله عيشه شن حال صحتك وصحه عمي
عيشه : الحمد لله كلنا كويسين
: شن حال البنات كلهم والاولاد طيبين
عيشه : ايه الحمد لله وانتي شن حالك انتي واختك وشن حال خالت وامك
: الحمد لله يسلمو عليك
عيشه: الله يسلمك ويسلمهم
: كيف ماتعرفي خالتي وراجلها يسكنو بالاجار وصاحب الشقه معاش يبي ياجرها وتو بينتقلو لدار اهله لين يلقو سكن جديد ولو يعني بعد اذنكم انجو انقعدو عندكم هذي الفتره
عيشه: اكيد تفضلو في اي وقت بس خليني انقول لعمك وفي الليل انقوللكم
: ان شاء الله اللي اتشوفيه بارك الله فيك هي مانعطل عليك تو مع السلامه
هديل : شنو قالت
؛ قالت بتقول لعمي بعده اترد علينا
،
،
،
،
عيشه : اني ماتحملت بوهن وامهن بتحملهن هنا بالله يشوفو مكان ثاني
موسى: والناس الناس شن بيقولو عننا بنات خوي سايبات في الشوارع واني مش فاتحلهم بابي
عيشه: اني مادخلني بيهن يعدين لامهن ماعندي بال انأوي حد عندي
موسى: مش قلتي امي تبي رعايه ومش متقبله الممرضات وانك مش قادره علي خدمتها
عيشه: ايه
موسى: ومش قلتي انه امي تسال علي هند هلبا
عيشه : ايه به وشن دخل هذا في هذا
موسى: خلاص معناها بجيتهم بتنحل هالازمه ونقلو من يهتم بيها
عيشه : حتي هي فكره بعدين مش لمطولين هنا هم
موسى : ايه ايه كيف ماقلتلك
،
،
،
،
،
،
بعد ماكلمتنا مره عمي في الليل واكدت علي عمي قلتها انه بنجو بكرا لانه صاحب الشقه بعد بكرا يبيها فاضيه
وفي اليوم اللي بعده في العشيه وصلتنا خالتي لدار عمي ،ندى وسهى كانو فراحنين بينا وبهديل خاصة
نقلنا دبشنا لدار سهى وندى بطلب منهن بعد رتبنا حاجاتنا نزلنا في الصاله مشيت اني وهديل سلمنا علي حني
: حني كيف حالك عرفتيني اني هند
الجده : اي اي عرفتك بنت عيسى شن حالك يابنيتي شن اخبارك وينك انقطعن اخبارك من اخر جيه
: كانت عندي قرايا اهو جينا توا وبنقعدو معاك ،هذي اختي هديل ياحني
الجده: ماشاء الله ماشاء الله تبارك الرحمن
هديل : شن حال صحتك حني
الجده : الحمد لله يابنتي تو وليت احسن بعد شوفتكم
قعدت شوي مع حني هذرزتلي علي حياتها زمان وعلي الخمس ،حبيتها هالعزيز رغم انها مش ام بابا بس حسيت اني قريبا ليها اكثر من الكل
مر اليوم بسلام عل الكل
في الصبح جهزت روحي للكليه هديل وبنات عمي مشن للمدرسه قبلي بعد جهزت روحي طلعت نستنى في الباص برا ،شوي طلع عمي صبحت عليه وطلعن وراه رنا وريما ،انحس في روحي شبحوني واني فاتحه فمي من المفاجئه ملابسهم كانت انيقه جدا وبين عليهن انهم ماركه بينما ملابسي كانت بسيطه جدا يالله اهم شي العلم
موسى : تعالي انوصلك في طريقنا
: لالا الباص تو جاي بعدين منبيش انعطل عليكم جامعتهم في جيهه واني في جيهه
موسى: خلاص اللي يريحك
طلعو بعده جي الباص وطلعت وصلت عالجامعه وبدينا القرايه علي اصولها تعبت من اول يوم بس كنت فرحانه انه حلمي ما ضاع وحنتحمل كل شي في سبيله
روحت هلكانه للبيت سلمت عليهم واستاذنت منهم اني مابنتغدا صعدت لدار البنات صليت الظهر ورتميت علي الفراش وماحسيت الا والدنيا مغرب حسيت روحي من زمان ماتريحت هكي في الرقده ،بعد مانضت حسيت بجوع فضيع وماعرفت كيف تنصرف ومتحشمه حتي من الخدامات انقوللهم يديرولي شي ،نزلت للصاله ماكانش فيها حد شبحت من الروشن لقيتهم في الحديقه فدخلت بسرعه للمطبخ مالقيتش شي من الغدي فكرت اندير نص بالجبنه وخلاص
: صح النوم
ارتبكت لدرجه طيحت الخبزه من يدي
مهند: شكلي خلعتك معليش
: هههه عادي اني ننخلع من اي حاجه
مهند: من بدري انشوف فيك ادوري في المطبخ بالك تبي انساعدك في شي
: الحق فوتت الغدي وتو بعد مانضت جعت
مهند : حتي اني جعان تو اندير حاجه اني وياك
: لالا عادي درت نص بالجبنه
مهند : مايشبع نص الجبنه تو انديرلك حاجه ماتفهم شي بدون فخر قدامك احسن شيف في العيله
:هههههه علي راحتك ياشيف
قعدت انراقب فيه طلع لحم هبورقه جاهز من الفريزه وحطه في مقلايه وطلع خبز دوائر وسخنه ،( الله كل بنت شن تتمنى اكثر من هكي راجل جمال ومال واخلاق ويعرف يطيب ههههه) ،كمل الشيف الهمبورقا وحطها عالطاوله واني صبيت عصير في كيسان وقعدت ناكل قدامه بلا اي حشم هههه
وني قاعده مشغوله بالاكل وفعت راسي فجئه لقيته متامل فيا
: من حقت تستغرب مني وحق الله جيعانه
مهند : رغم اني ايام بس نعرفك بس انحسك بنت مميزه ياهند
تحشمت ماعرفت شن انقول بعدين قلتله : انحس انه مافي اي ميزه تفرقني عن اي وحده وبالعكس انحس روحي اقل من البنات العاديات وماعشت عيشتهم
مهند : بس اني انشوف فيك مميزه من لما جيتينا عجبني موقفك مع حني وحنانك معاها خلاها تميزك عن الكل
حسيت اني لازم نتحرك من مكاني لاني اني بننفجر من حشمه استاذنت وسحبت روحي بهدوء من المكان
الله علي كلامه محلاه
معقول هوا يبادل فيا نفس الشعور
.
.
: هههه شنو اتغاري ياحبي
ماريا: كيف تبيني مانغار حبيبي يسكنو معاه بنتين مش خواته والله انموت كان خداتك وحده منهم مني
مؤيد: ههههههه عادي الشرع حلل اربعه
ماريا: مؤيييييد بلاش حركات
مؤيد: هو انا نقدر انشوف لغيرك
ماريا: امممم زعما حق هالكلام
مؤيد :وعد مني مش حنكون الا ليك
.
.
.
.
.
أنت تقرأ
ما تخبئه لنا الأيام ( روايات ليبية )
Romanceرواية تحاكي كل العشاق الذين يكافحون من اجل حبهم وسط كل الاحدات المحبطة من حولهم ؟ فهل ينتصر حبهم ؟ و ما مصير علاقتهم ؟ 🔥🔥🔥
