الحلقه الثالثه والعشرون
😀😀😀
.
.
.
..
مر اسبوع على اخر مره قالتي فيها نهى على الدكتور شهاب وبعده نهى خدت اجازه ومعش عرفت شي ومتحشمه انكلمها ونسالها شن صار والاكبر من هكي خايفه يطلع كل اللي في راسي توهم
: هنننننند
انتبهت على صوت هديل اتكلم فيا: خيرك اتلعلعي
هديل: فوتنا الروضه
انتبهت انه فوتنا الروضه ولت بالسياره للروضه ونزلتهم
نتفكر لما كلمتني سهى وقالتلي انه مفيش مشكله لو قليت وروحت ليوسف لما يكون مؤيد ولا وحده منهم مشغولات ابصر شن غيرله رايه
وصلت للمستشفى وبديت الشغل واني بالي مشغول على الدكتور شهاب اللي ليه يومين ماداوم زعم مريض عنده ظرف او شنو وفجأه جت فكره في بالي وقلبي قعد يدق بقوه زعم عرف اني مطلقه لالا شهاب مش من هالنوع من الرجاله اللي عقلهم صغير هوا واعي ومثقف يارب يارب الطف بحالي اني شن دخلني في هالدوامه كنت سنقل فى حالي وبالي
تم دوامي وقررت نقعد دوام اضافي لليل بلكي يجي شهاب وكلمت أمي خبرتها بش ماتنقلش الحيره استنيت للعشيه ماجاش فكرت نسال رجاء اللي في الاستعلامات بلكي تعرف شي مشيتلها
: اهلين رجاء شن الجو
رجاء: أهلا دكتوره هند الحمد لله بخير كيف حالك وحال الشغل
: الحمد لله سلمك اا شن بنقولك بنسالك عن دكتور شهاب وينه ليه ثلاث ايام ماداوم تعرفي انه رئيسي منقدرش اندير عمليات معينه الا تحت علمه
رجاء ؛ غريبه كيف ماتعرفي وانتي تعتبري ذراعه اليمين
خفت من الكلام اللي جاي: شن فيه مانعرف شي اني
رجاء: الدكتور شهاب طلب نقله لمصراته وقبلو طلبه بعد جهد جهيد لانه المدير عز عليه يفرط في دكتور شاطر زيه
استكيت بعد الكلام الي قالتله ليا ومشيت عنها بدون حتى مانشكرها نزلنا دمعتين ومسحتهم بسرعه خلاص وضح كله شي هرب مني لمآ عرف بوضعي الله يسامحك ياشهاب واني اللي امفكراتك غير طلعت زيك زي غيرك
خشيت لحجرتي كملت بكيتي غادي بس فكرت ممكن مش مني اني مرات سبب ثاني
قمت النقال ورنيت على نهى
ردت من اول رنه: يااهلا وسهلا اهلا وسهلنا بست البنات الدكتوره هنوده
: اهلين بيك وييينك يازفته قالو واخده اجازه وخيرك متقلتيليش قبل بالك محتاجتلك او شي
نهى: اه اسفه جدا دكتوره بس صرلي زرف مستعجل وكمان عتبانه عليكي
: تعبانه عليا وهوا اني عملتلك ايييه
نهى: كدا يدكتوره تتخطبي وماتقوليش وانا اللي دايما معاكي
: انخطبت؟؟؟؟ من قالك
نهى: وفي غيرو خطيبك هوا عارفه انو عالسكيتي بس عاقليله خبرني انا بس يلا الف الف مبروك ياعروس
مش مصدقه الكلام اللي ينقال توا وكنت محتاجه حد يقرصني بش انفيق من الوهم اللي انا فيه
: نننهىى سكري تو عندي حاله
سكرت منها وني يابسه في الكرسي ماقدرتش اندير اي ردت فعل معرفتش نبكي نضحك على حظي ولا شنو
حطيت يدي علي راسي نفكر ونربط في الأحداث وفجاه نضت من مكاني زي اللي ضربه الضي وطلعت من حجرتي وناويه انحط حد للمهزله هاذي ريت الممرض نادر مساعد مؤيد
: نادر دكتور مؤيد وين
نادر: تو كان هنا خدي قهوه وطلع شكله في الحديقه
: تمام
طلعت ماشيه للحديقه وكويس انه برا منبيش اندير دوشه داخل
طلعت لقيتها متكي عالكرسي ويشرب وسارح
مشيتلها واني راقيتلي للمليون وقف قدامه خديت الطاسه ما يده ولوحتها بعيد ناضلي بعده
مؤيد عصب وناض: خييير همي انتي
: خير همي ها خير همي بالله قولي خيرك معاي امتى بتفكني من شرك بس
هو ساكت
: ساكت ولا عارف سواد الوجه اللي درته معاي
وبديت اندمع: حرام عليك ليه هكي ساويت ليش بشن ضريتك اني ليش بعد لقيت نصيبي توقف بوجهه ليش واني اللي عملت المستحيل بش جمعتك انت وحبيبتك بعد ماعشت حياتك جاي اتخرب حياتي ليش
مؤيد وبدأ يعصب: انتي ماتعرفي شي ماتعرفي باللي صار معاي وحتعذرني لما تعرفي
عصبت وانتبهت اني منرفعش صوتي: نعذرك نعذرك انت واثق اني نعذرك انييييي شن دخلني باللي صار معاك فهمني ليش تخرب حياتي بعد مابدت حلوا فهمني ليش هكي ليش كان فشلت في زواجك اتجي اتخرب عليا ليش
مؤيد: تبي تعرفي ليش تبي تعرفي ليش تعالي معاي
جرني من يدي ومشاني معاه للسياره وركبني بالقوه ومشي
: مهبول انت ناوي اتكلم عليا ولا كيف
مؤيد: مش تبي تعرفي السبب اللي خلاني اندير هكي اصبري شوي
: منبيش نعرف ولي بيا يامجنون شن بيقولو الناس اللي شافونا تو
مؤيد: متخافيش من واكلك بعدين هم يعرفو إني خاطبك
مشينا لمكان اللي اول ماوصلناله تدكرته نزلنا
: انت بتنهي مسيرتي المهنيه باللي درته تو ياويلي لو عرفو هلي
هو ساكت بس يشوف للبحر بعد شوي تكلم: انت كنتي امفكرا ان بعد ماسافرتي ان حياتي ولت احسن هه حتى اني كنت امفكر هكي
سكتت نبيه يكمل كلامه
مؤيد: بعد ماختفيتي من حياتي كلمتني ماريا وقلتلي انك كلمتيها ووافقت انجي نخطبها مشيت خطبتها واني بنطير من الفرحه بس بردو حسيت شي ناقص بس ماهتميت خطبتها وقعدنا فتره قصيره وتزوجنا وعشنا في نفس الجناح اللي عشنا فيه اني وياك
عشنا يومين زي العسل لعند ماصار قصه الشركه وخسرنا كل شي بدت ماريا اتنق على السفر اللي كنت واعدها انه لما نطلع انكمل انقل امها معاها بس بعد مشاكلنا ماقعدلي بويش انسافرو نضغط علي نفسي في سبيل انكمل التخصص وطلعت قرشين داسهم وسافرت بيهم وقليت معانا امها تعبت في اول شهرين كنت نقرا ونشتغل في المستشفى وفي مطعم في الليل كله بش انطلع مصروفي ومصروف قرايتي ومصروف ماريا وامها الكبير وتكاليف الجامعه كانت كبيره فلهذا جت ايامات مانروحش للبيت ونولي من شغل لشغل ولا في الجامعة نقرا وطلباتهم متخلصش بكل بس كنت انقول انه مفيش شي يغلى على حبيبتي ماريا بس مع هذا بدت تنق وتشكي اهمالي ليها بس متبليد حيله وصدمتني انها مكنتش اتحس بيا ولا واقفه جنبي
جت فتره تبعدنا عن بعض وخصوصا لما روحت امها وقعدت بروحها في البيت زادن المشاكل والبعد بيناتنا حتى حملت فرحت انه في شي بيرجع يقربنا بس في نفس الوقت مش وقته في وضعنا هذا ومش كنا امخططين بكل لعند انولو لليبيا بعد ماجابت يوسف تغيرت حياتنا للاحسن عالاقل من ناحيتي لانه كان يوسف وجه خير عليا وتحسن وضعي شوي وتفوقت في دراستي وقعدت قدر الأمكان انفضي نفسي ليه وكنت ليالي نسهر عليه ونهتم بيه اكثر من امه بس جي اليوم اللي خلاني نكره فيه ماريا ويوسف في وقت واحد في الوقت اللي كنت نشتغل ونقرأ ونكد عليهم تبين انه انه ماريا كانت في علاقه غير شرعيه مع واحد اخر
انصدمت وحطيت يدي علي فمي
وهو وجهه جامد وكمل: حقك تنصدمي اني اللي تعب قلبي وخشيت للمستشفى بس بعد طلعت مشيت للبيت ودقيتها طريحه خليتها اسبوع في العنايه وخشيت على إثرها للسجن بس بعد عرفو القصه وطلعو فيه شهود يشوفو في واحد خاش طالع من بيتي لما انكون مش قاعد افرجو عني بس اللي زاد صدمني انه كانت هاذي العلاقه قبل لاحتي تحمل
اني مازلت مصدمه وحاطه يدي علي فمي
وهو تفلتلي واطلق العنان لدموعه: تعرفي شعور الشخص لما يولي شاك في نسب ولده ها؟ تعرفي شعوره لما يقل ولده وساوليه تحليل إثبات نسب تعرفي؟ عمرك تتخيلي انه يصير لاي حد في ليبيا هكي يصيره ولده اللي في حضنه شاك انه ولده وحتى بعد ماتاكدت انه ولدي هالشي خلى فجوه كبيره سوده بيني وبينه حتى بعد ماطلقت ماريا قررت انه انولب ليبيا بس ضغطت علي روحي لانه مزال شهر واحد ونتخصص جبت مربيه ليوسف وقعدت بالايام منشوفش فيه روحت لي ليبيا وادمرت نفسيتي قعدت سنه في حاله صدمه ماحكيتش اللي صار لاي حد وولدي لوحته لخواتي يهتمو بيه حتى لما نبي نتقرب منه نشوف في ماريا فيه ونزيد نتبعد عنه
اني وعيوني دموع: عارفه انه اللي صارلك صعب ياسر ماحد يتمنى يشوف اللي شفته بس حتى أني عانيت ايام صعبه لما سافرت خشيت في حاله اكتئاب وماقدرتش انكلم دراستي وقعدت نتعالج منها وجاهدت وضغطت علي روحي حتى قدرت نوصل للي اني فيه تو بس اني ماخليتش اللي صارلي ياثر في اللي حوليا ليش انت خليتني نتحمل نتائج خيانه ماريا ليك كله على شان اني ساعدتك تتزوجها؟
مؤيد بدا يعيط؛ انتي مش فاهمة مش فاهمه تمشي تنحرق ماريا في ستين جهنم. انت ياهند انتي السبب اللي خالاني اندير الي درته وانبعدك عن شهاب تتفكري لما قلتلك انا مع فرحتي كنت حاس بنقص كنتي انتي اللي تنفصيني ياهند انتي خليتي اثر في حياتي ومشيتي وكان صعب عليا نتاقلم على بعدك فجا حتي لما كنت في مشاكل مع ماريه قالتي انه اني مش قادر ننساك ومرات نهذي باسمك في منامي
قعدت ساكته ونشوفله وهو منفعل
مؤيد: اول ماريتك في المستشفى ماصدقتش عيوني وفرحت بس بعدها خفت نولي لحالت اليأس االي كنت فيها لمده سنه وقررت نتجاهلك بس مقدرتش وخاصه لما شهاب قاللي انه يبيك مقدرتش انخليه يطولك اني ياهند من لما كنا مع بعض حبيتك وني مكنتش نندري ومنبيش نفرط فيك مره آخرا
حسيت نبضي ضعف ودموعي ولو شلال: مؤيد مؤيد اني مش قادره نسمع اكثر ولي بيا للمستشفى خليني انروح بسيارتي
مؤيد وهدا: سامحيني ياهند نتمني من كل قلبي اتسامحيني ماتخليش حياتي تسود اكثر ماهي سوده ارجوك
مرديش عليه ورجعت للسياره ركب السياره حتى هو وبدون اي كلمه ولينا للمستشفى ركبت سيارتي وروحت وتحاشيت نتكلم مع اي حد
قعد ثلاث ايام في حجرتي نبكي بس نش عارفه على شني نبكي بالزبط على شهاب ولا على مؤيد وكنت نتحجج انه وحده ماتت بين يديا في العمليه هذا ليش حالتي هكي
وبعد نوبت البكى والصدمه طلعت من جديد للحياه بس بياس مركز عدلت جدولي بحيث متنتلاقاش اني ومؤيد في نفس المناوبه
طلعته من المستشفى بنروح بهديل وقفت قدام الروضه نستنى فيها تطلع طلعت هيا ويوسف وماسكين بيدين بعض وفرحانين ولما روني جرو لعندي وفرحانين اني اليوم بنروح بيهم نزلتهم ونزلت لمستوى يوسف مسكته بين يدي نتامل فيه مسكين هذا الطفل البرئ كان ضحيته خذعه كبيرة من طرف امه نتمنى اندير اي شي ونخليه سعيد بحياته ونتمني انه مؤيد يحن عليه ويداريه خديته لحضني
يوسف: هنووووده خيرك تبكي
هديل: حييي هنوده ليش تبكي وقعدت تبكي حتى هيا وحتى يوسف كان بادي يبكي
: لالا حبايبي ماتبكو اني بس تعبانه شوي وبطني توجع فيا هذا ليش نبكي وتو لما ناخذ دوا نولي كويس ونرجع نضحك
يوسف: ان شاء الله اطيبي هنوده واني إليوم كله ندعيلك أنه اطيبي
: ابتسمتله بس انتبهت الشخص اللي يشوفلنا
نضت علي حيلي: يوسف حبيبي بابا جي بروح بيك
يوسف زم شفايفه: نبي انروح معاك انتي
: لالا ميجيش بابا جاي من الشغل يبي يروح بيك متزعلاش راهو بابا يحيك غير هوا مشغول ديما يلا متخلنيش نزعل
يوسف: به بس غدوا خميس اتقليني اني وهديل للملاهي باهي
: من عيوني حبيبي بسته ومشي لبوه
ركبت السياره اني وهديل وروحنا
.
.
.
.
.
نزلت من حجرتي للصاله لقيت سهى شاده كتاب وتقرا
: بالتوفيق ان شاء الله
سهى ؛ امين يارب شن مسهرك للوقت هدا
: مافياش النوم
سهى: مؤيد: انت هالايام مش علي بعضك لانومك ولايكالك زي الناس قولي شن فيه فضفضلي بلكي نقدر انساعدك
تنهدت وقعدت جنب سهى فعلا كنت بحاجه اني انفضفض لحد وقلتلها كل اللي صار من ماريا لهند وهى طبعا انصدمت بكل شي
سهى: مش عارفه شن انقولك بس اللي نقدر انقوله انه اكثر وحدين انظلمو في القصه يوسف وهند شن ذنبهم هما الاثنين
: واني اني شن ذنبي قوليلي شو ذنبي بعد كل الصبر والحرب اللي درتها بش خذيتها وكل الحب اللي حبيتها ليها ادير معاي هكي
سهى: لانه اللي كان بينكم حب وهمي هدا فكرت انها حتعيش حياه ورديه معاك ومافكرتش أنه حتكون فيه ايام صعبه وتخلت عنك من اول محطه، بصراحه ياخوي اني قبل لما عرفت انك تطلقتو انت هند استغربت لانكم كنتو لايقين على بعض وواضح الانسجام بيناتكم وتمنيت تميتو مع بعض
: حتى اني اكتشفت الشي هذا اماخر يريت يريت لو تعطيني فرصه انعرض عن كل شي اني محتاج لبداية جديده في حياتي
سهى: اني نعرف انه هند قلبها طيب وحتسامحك بس نتمني انها تعطيك فرصه بس قبل هذا كله عطي فرصه لروحك انت ويوسف راهو ربي يعاقب فيك لانك امخلي هاملايكه وهامله بدون حنان وعطف محتاجلك ياخوي راهو محتاجلك اكثر من اي شخص اخر في الدنيا
: ان شاء الله حتتغير معاملتي معاه من اللحضه هيا سهى ارجوك خلي الكلام بيناتنا منبيش حد يعرف
سهى: تمام الله يهدي سرك ياخوي
طلعت من البيت مش عارف وجهتي بش قررت نمشي للبحر ونفس المكان اللي تكلمنا فيه اني وهند
واني ماشيه طلعي واحد يزر فيا بالسياره حاولت نتجاوزه بس مقدرتش وتم يزرني لعند.....
.
.
.
.
.
.
.
قاعده في حجرتي وجنبي سحر اللي تحاول تستنطقني بعد عرفت بالخبر الوهمي اللي طلقه مؤيد مقدرتش انقوللها باللي قاله ليا ياست مني وطلعت واني قعدت في حجرتي كانت مناوبه ليل والمكان فاضي قررت نطلع للكفرتيريا لعند يجي شغل وفجأة...
.
.
.
.
.
.
.يتبع
أنت تقرأ
ما تخبئه لنا الأيام ( روايات ليبية )
عاطفيةرواية تحاكي كل العشاق الذين يكافحون من اجل حبهم وسط كل الاحدات المحبطة من حولهم ؟ فهل ينتصر حبهم ؟ و ما مصير علاقتهم ؟ 🔥🔥🔥
