الحلقه الحادي عشر
بالله شن اللي يخليني نطبخله خليه يحرك يديه بروحه لالا ليش الانانيه مش هو اللي عشاك باهي معقوله بنقعد انطيبله كل يوم قصه يحمد ربه اني انحب انطيب
المطبخ واسع ويفتح النفس للتطيب وكل المكونات موجوده قررت انساوي كذا اكله شمرت سواعدي وقلت بسم الله
،
،
،
،
،
ماريا: مانبيش انسكر خايفه تمشيلها واني ننحرق بالتفكير
: ليا ساعتين نحكي معاك وخاطري اكثر نقعدو بس اكيد تو وقت دوامك رد باللك تتهاوني فيه
ماريا : ايه ايه دور سبله حتى تقعد مع معاها ولا
: انتي هكي ماتساعديش فيا حبيبتي وعدتم اني ولا
ماريا : زي ماوعدتني انك مش حتكون الا ليا
: ماريا اني مضطر انسكر توا باي
لامتى هالحاله مدرناش ثلاثه ايام وهكي تتصرف ربي يستر من بعدين
شفت الساعه فيدي لقيتها الواحد طلبت غدا من حياخذ ساعه في على مايجي جاني فضول انشوف شن قاعده ادير اكيدر راقده مغلا عليها النوم
خشيت للحوش وريحه حلوا تسللت لخشمي تبعت الريحه للمطبخ
منتبهتش علي وجودي كانت منهمكه في التطيب تحرك هنا وهنا وتدندن بما انتبهت سكتت
ليش تعبتي روحك وصيت على غدا اني
هند : امطيبا لروحي في المقام الاول بما انك شريك حياتي يعني شريك اكلي
: ماشاء الله امركزا في كل كلمه انقولها شكلك متخذتني قدوه
هند : ماشاء الله كلامك كله حكم ومواعض
: امممم تتسهوكي كنت بنلغي الجاهز لكن احتمال كبير مايعجبني تطييبك
هند : لااااا ماتكلف نفسك عناء التذوق مره وحده كان تبي
: ممكن حتى شكل الاكل مايساعد
هند بدت اتعصب: اوكي عنك ماكليت
مشيت عنها واني نضحك يالله قديش نفرح لما نقدر انعصبها
،
،
،
،
،
حرقلي اعصابي مفروض اني مابين اني معصبه مفروض بينتله اني مش معدله علي كلامه شفته من الشباك يهرول حول المسبح باين عليه رياضي ماشاءالله نتفكر اخر مره جريت قبل كم سنه بنت جرانه ضربت هديل جتني تبكي نتفكر اني لحقتها لهند نهايه المنطقه بعده مرغدها طريحه منظري يضحك ببدله الاعادي والمحرمه وقاعده نبطح في البنت ،،،،اه زعم هديل شن ادير تو توحشتها الفرخه لازم انكلمها لاكن بعد للغدا
كملت كل شي وابتسمت ابتسامه رضا علي شكل السفره ساويت مكرونه ودجاج محمر وطاجين خضرا وشربه وسلطه تلفتت لقيته داخل الباب وفي يده اكياس بعده وقف متصنم من اللي درته
: ها شنو المنظر
مؤيد : مش شين بعدين الطعم اهم
: اممم به تفضل ياشيف مؤيد
بدي ياكل واني امددقه في ملامحه مفيش اي تعبير : انشوف فيك تاكل بدون تعليقات
مؤيد : لاكلام على الطعام التعليقات بعد الاكل
: ا اها
قعدنا ناكلو واحنا ساكتين وشوي شوي انشوف فيه وهو كل مايجرب حاجه يرفع حواجبه دليل انه عجبه وحسيت اخيرا بالانتصار
،
،
،
،
،
اني شن اللي خلاني اندير الفلاحه تكسر ظهري من ضم المطبخ طلعت بعده للصاله كان متمدد عالصالون وامركز في التلفزيون قررت انخرب عليه راحته وانتكلم في الصاله
طلعت النقال وكلمت هديل علي نقال رنا
رنا : ايوا
: السلام عليكم
رنا : وعليكم السلام من
: ( حركات علي اساس ماتعرف من اني) هند اني
رنا : اه اهلين ماعرفتك شكله رقمك امتسح تو انكلملك اختك
(لا كيف حالك لاشن امدايرا طول تو انكلملك اختك احسن اختصرت عليا الطريق تافهه زي خوها )
هديل : الووووو هنوده شن الجو
: تمام هدوله شن اخبارك انتي
هديل : الحمد لله وييين ياعروس معاش تفكرتينا شكله الافندي لحس مخك
: زفته كل منه يوم ماريت خلقتك
هديل : شن جوك انتي وياه اكيده طاير فيك وهو يحصل زيك
: اكيد طبعا ومش مصدق
هديل : هههه انت ياالعبد الواثق
: هههههه قوليلي شن صار في النتيجه
هديل : بالله ماتفكريني قالو الاسبوع الجاي بطني اتلوي فيا
: متخافيش ناجحه ان شالله
هديل : لالا السنه هاذي مش زي اللي قبل واللي صارللي قبل اثر. علي مستواي
: يابنت تفائلي خيرك ناجحه غير ماتحطي في بالك هالكلام
هديل : ان شاء الله يختي من فمك لباب السمي
قعدنا حصه واحني انهدزوا
هديل : حي عليا اكيد مؤيد كرهني واني شاداتك ساعه انكلم فيك
: ههههههه لاخويتي خوذي راحتك في اي وقت
هديل : اووووو في اي وقت
: اييييه اي وقت يازفته هي مع السلامه
هديل : مع السلامه
بعد سكرت منها فطنتله انه نقص الصوت
: شكلك كنت كاسر وذنك
مؤيد : لاوالله مايهمنيش تبربير البنات نقصته بش تاخدي راحتك
: اممممممم
مؤيد : غريبه محد هالايامات عنده بيله
: الحمد لله مكتفيه بالبيله هم شي نتكلم حتي الانترنت والشي الثاني ماعندي عليه
مؤيد : من اي قرن جايه انتي
: خليت التحضر ليك ياباشا
،
،
،
،
،
،
بعد العصر ضميت الدار وطلعت نتمشى لكن وليت غيرت لبسي لبست شورت لكن مش قصير وكت في الا ول ترددت به قلت مادخلنيش فيه شن يفكر يملح لبست سبيدرو وفكيت شعري وطعلت نتريض بديت نهرول بعده قعدت نجري بس تعبت مشيت للمسبح ناويه انحط رجلي فيه حسيتهم انتفخو لقيت مؤيد يعوم فيه كنت ناويه نولي علي طريقي وخاصه انه مش لابس شي من فوق
مؤيد :هي انتي استني
: هيي عندي اسم ره
مؤيد : كنتي جايه اتعومي
: لالا منعرف اصلا بس جايه نقعد حذاه غير لقيتك
مؤيد : واني شن دخلني قولي خايفه اطيحي فيه زي قبل
: مانطيحش بروحي الا اذا كان حد طلق عليا كلبه
مؤيد : ههههههه باهي خليك كان مش خايفه
: اصلا بنقعد قبل لاتقترح عليا
مؤيد : ههههههههه به
كان يغطس مره مره ويطول في الغطسه لين مرات انخاف كيف حد يقدر يطول في الغطس لما ميكونش منتبه عليا انشوف في جسمه الرياضي والمفتول خطر عليا مهند حتي هو مفتول العضلات وممكن اكثر وغصت حتي اني لكن مش في الميه غصت في خيالي مع مهند
،
،
،
،
،
انبهتلها وهيا شارده وتتبسم زعم في من تفكر اكيد في حبيبها : ااااه ااااه
هند فزعت : خيرك شن صارلك
: اااااه مش عارفه ااااه شكلها رجلي تقلصت مش قادر انحركها
هند : مدلي يدك قبل لاتغرق
: اااه هاك امسكي
اول مامدت يدها سحبتها معاي قعدت تصرخ وتنافض
هند :بنغرق بنغرررررق
مسكتها بسرعه وهي تعلقت برقبتي
هند :اني الغبيه كيف مافكرت انها نذاله من نذالاتك
: ههههههههه القانون لايحمي المغفلين
هند : والله مافي مغفل غيرك طلعني تو
: شن دخلني فيك اطلعي بروحك
هند : تستهبل انت طلعني هيا
كانت متعلقه فيا كويس وجهها قريب من وجهي وترتجف واني بصراحه عجبني الوضع ههههههه
هند : خلاص طلعني بنموت من السقع الميه امتلجه
مؤيد: تعرفي اول مره ننتبه علي لون عيونك شكلهم عدسات ولا اعترفي
هند : حتي لو عدسات شن نبي نلبسهم ليك طلعنييييي
ازعجتلي طبله وذني طلعتها من الحوض
هند : اه كان بتجيني السكته فمنك انت حسبي الله فيك ما في منك امان
بعدت عن المسبح وهي تتحسب وتبربر وني ميت ضحك عليها
،
،
،
،
،
،
: حسبه الله عليك ثاني مره في يوم واحد هذا بعد اسبوع بجيب مسدس وبيقتلني
غسلت ولبست شي ثقيل لن حسيت ان السقع خش لعظامي شكلي بنمرض
طلعت عطر لافندر هداته ليا امي وركبته في جهاز يوزع الريحه في الصاله وشوي الا ريحه الافندر عبت الدنيا وريحتلي اعصابي
خشيت تمددت علي سريري ماقدرتش نرقد راسي يوجع فيا شكله بدايه زكمه طلعت ندور في بنادول في المطبخ وفي الحمام ملقيتش قلت خنخش لدار مؤيد نشوف كان فيها بندول بما انه مش قاعد خشيت اندور في لادراج واني ندور في الكمدينو نقاله كان فوقه وكان يضوي باسم ماري وصوره وحده اكيده هاذي حبيبته شوي نسمع في صوت الباب انفتح
مؤيد : شن اديري هنا
لفتت وجهي لانه كان لاف منشفه علي خصره بس
: اااا راسي يوجع فيا لين لين بكل دورت بندول مالقيت
مؤيد : استني شوي
دخل للحمام وطلع قرب عليا واني بعدت
مؤيد ؛ خيرك خايفه مابناكلك تفضلي خودي حبه بس لانه قوي
: شكرا
جيت بنطلع استوقفني
مؤيد: بنسالك الريحه اللي في فايحه ريحه شنو
: معطر جو لافندر
مؤيد: اها حلوه ريحته
: تبي شي بنمشي نرقد
مؤيد: خيرك ماتعييش من الرقاد
: ليك عن تتكلم بعد ماخليتني نزكم
مؤيد ؛ باهي باهي خلاص امشي ارقدي تصبحي علي خير والليل ماجي ههههههه
.
.
.
.
بعد طلعت رديت علي ماريا
: نعم
ماريا: حبيبي زعلان مني
: شن رايك انتي
ماريا: حبيبي والله مش بايدي انغار عليك هلبا اني
: عارفك والله عارفك بس نبيك توقفي معاي مش ضدي
ماريا ؛ حاضر ميمو بس انت روق
: من لما سمعت صوتك روقت.
.
.
.
مشيت للمطبخ شربت ميه مع الدوا وليت لسريري ورقدت ديما لما راسي يوجعني ولا لما نزكم نقعد انهلوس
هلوست بالبنت اللي في نقال مؤيد جيتني لسريري بعدين قعدت تخنق فيا وتقول قليتي حبيبي مني بنقتلك كيف ماقتليني واني حيه خذيتي حبيبي مني.... فقت من هلوستي
.
.
لاحقيني حتى في احلامي حسبي الله عليك انتي وحبيبك.
البندول دار مفعوله بديت نتحسن شوي على اثر الدوا
مرن باقي الايام بكشل روتيني ممل وكنت نتجنب الكلام مع مؤيد بعد النذاله الي دارها رمضان قرب ولمينا حاجاتنا وانطلقنا لبيت عمي.
.
.
.
.
يتبع
أنت تقرأ
ما تخبئه لنا الأيام ( روايات ليبية )
Romanceرواية تحاكي كل العشاق الذين يكافحون من اجل حبهم وسط كل الاحدات المحبطة من حولهم ؟ فهل ينتصر حبهم ؟ و ما مصير علاقتهم ؟ 🔥🔥🔥
