ما تخبئه لنا الأيام ( روايات ليبية )

حلقة 10🔥

الحلقه العاشره

دخلنا الجناح وتنهدت تنهيده راحه انه الجناح مش حجره بس ،كان حجره وصاله ،كان حامل شنطتي حطها عالارض ودخل الغرفه وسكرها عليه
اما اني قعدت عالصالون وبديت انفك في السريحه واني انفكر ( به الحمد لله اللي فاهم الوضع حتى هو لكن بيصير تو الحمام داخل الحجره كان خلاني انخش الاول ونبدل به يحتلها الحجره حي حي انسيت العشي ماقلتلها عليه ماما والتلاجه داخل ياربي كيف اندير مانبيش انشوف خلقته الليله والجوع يقرص فيا يريت تعشيت في الحفله وخلاص شن هالتفصيله الغبيه للحجرات اللي عندهم )
مرت ساعه ساعتين واني خلاص نبي الحمام ماعنديش حل الااني نخش بشوي اكيد راقد
فتحت الباب بشويش لقيته متمدد وفاتح يديه ورجليه على كبر السرير(نومه اهل الكهف ان شاء الله ) خشيت للحمام وحاولت اني مانديرش صوت نحييت الفيلو بعد جهد جهيد غسلت وطلعت نجر في الفيلو ورايا لقيته علي نفس وضعيته كويس
مشيت فتحت التلاجه لقيتها قاضيه الا من ميه وعصير تلفتت لقيت عالطوله اللي جنب السرير اطباق واكياس اكل ،الحيوان واكل كل الاكل اللي في التلاجه ومش مخليلي شي طلعت من الحجره وتمددت على الصالون الغير مريح في النومه وقعدت على وضعي لعند اذن الفجر طلعت بدله الصلاه والصلايه وصليت ورجعت تمددت على الصالون
،
،
،
،
،
صحاني طرق عالباب نضت انشوف منو وجسمي متكسر من نومه الصالون كانت خدمه الغرف جايبين الفطور دخلته وصنته اتفحفح عليا هذي فرصتي انردله حركته
،
،
،

،
،
فقت من النوم لقيتها الساعه ١ تعاود عليا يوم العرس كانه حلم ويريته كان حلم ،،شوي لما صحصحت تذكرت هند امس ابتسمت لما ريتها مخلوعه بعد فتحت التلاجه ومالقت شي ههههههه باهي اللي مافلقتها ضحك قدامها ،،،
خشيت للحمام غسلت وطلعت صليت بعده جبت النقال وكلمت ماريا
: صباح الورد ياورده
ماريا : لاصباح الورد ولاصباح البصل ليش ماكلمتني امس
: حبي روحنا تالي قرابه الاثنين طول رقدت وتو كيف نضت كلمتك
ماريا :انت وعدتني انك اتكلمني اول ماتوصل اعترف لهيت مع عروستك ولا
: شن لهيت مع عروستي تي واالله ماريتها من امس
ماريا : اممممم احلف انه ماصار شي
: وحق الله ماصار شي هي ههههههههههه
ماريا : شن فيه يضحك تو
: انتي كيف عصبتي
ماريا : خري عليك الحق عليا اللي نتاكل امس طول الليل يلا سلام ورايا شغل
: باي هههههعع
اكثر شي يجنني فيها صوتها ونبرتها لما اتغار عليا كيف ينبح ويختفي
تفكرت المصيبه اللي برا طلعت بشوي لقيتها راقده عالصالون وعاقده حواجبها باين انها مش مرتاحه في النوم (تو شن ذنبها انبهدلها من اول يوم لالا تستاهل خليها تتحمل في سبيل مصلحتها اللي تبيها ) انتبهت للطاوله اللي عليها صحون فاضيه شكلها وحده بوحده
: هيييي انتي نوضي
فتحت عيونها مستغربه بعده تغيرت ملامحها للامباله بعد ماستدركت الواقع
هند : همممم هلك مش معلمينك اتقول صباح الخير بدل هيييي نوضي؟
: وانتي اللي ماعلموك هلك اداب اللاكل تستني الناس الاول ؟
هند : والله هلسؤال موجه ليك اللي ماستنيتني امس عالعشي
: وللله وين نندري عنك قاللولي ماخليتي مادرتي في العرس رقص وتصوير قلت اكيد العشي متعشيه واني من اليوم الي قبله علي لحم بطني
: كان فيك تسال وطبيعي بما اني حتي اني من اليوم اللي قبله ماحطيت شي في فمي اندير زيك
:  من اول يوم هكي شكله بنتفقو اني وياك وطلاقنا بيجي بالريح
هند : صدقني نستنى في هذا اليوم على احر من الجمر
،
،
،
،
،
،
،
،
انتهى نقاشنا بعده رجع دخل للحجره تفكرت اللكلام اللي قاله ( اكيد وحده من اللسينات قالتله عليا امس وانشك انها ندى ،
لحظه بس مفكرتش قبل شن بعد الطلاق شن بيصير في تهديد عيشه ولا لم اتشوف مفيش امل تتراجع عنه باهي لو كان دافع هالزواج هو انه عيشه متبيش ولده ياخذ هذيك البنت شن فايده زواج اذا مؤيد حيعاندهم وياخذها انحس انه في شي اكبر من هكي )
،
،
،
،
،
،
،
حسيت بملل فضيع فتحت التلفزيون وقعدت نتفرج شوي فتح الباب
مؤيد : وتي روحك بنمشو نتغدو بعده بنخطمو علي هلي ومنهم بنمشو للحوازه
نضت بدون كلمه رفعت شنتي ودخلت الحجره وسكرت الباب بالمفتاح خليني ناخذ دوري هالمره مشكله تو لازم نلبس شي يبين اني عروس فرحانه
،
،
،
،
،
تجهزت اخيرا بعد تفكير ارتسيت علي بدله عررايسه ابيض وذهبي ماكنت نبي يشوفني بهاللبس من بيقنعه بعده انه مش ليه كل هذا التزيين لبست عبايتي وطلعت لقيته حاط يده على خده 
: اني واتيه
مؤيد : لابدري كان  خديتي وقت مزال
: المفروض لكن قلت حنتاخرو عالعيله
عطلني هاذيكيه النظره البارده بعده طلعنا
،
،
،
،
،
لما كنا في المطعم محد كان عنده خلق يكلم الثاني فالتزمنا الصمت احنا الاثنين لعند وصلنا لبيت عمي وطبعا زي اي عريس وعروس لازم الاستقبال الحافل والتزغريت وحركات مالها داعي بس فتت كل شي ومشيت لامي واختي وحضنتهم وبعده سلمت عليهم وعلي عيشه سلام بارد
هديل : اقري علي روحك ياهند شوفي النساوين عيونهم قريب تاكلك
ندى : كان عيون النساوين همي شن دار خوي هههههههخ
شديتها من وذها : انتي ياام لسان طويل من قاللك اتقوليله اني رقصت
ندى : اححح وذني من قاللك انه اني
: نعرفك اني لسانك اطول منك
ندى : وليش حامقه مال قاللك ارقصيلي
: انجيك يابنت انقص لسانك
ندى: هههههههه
،
،
،
،
،
،
،
،
فاطمه :شنو مشت الامور
ارتبكت وتحشمت : اممممم ااااا
فاطمه : عادي ماتتحشمي من امك قولي
: ايه ايه مشت الامور كيف ماتبيها تمشي ؟
فاطمه : يابنت ليش حاسه انك تكذبي
: ليش لحتي نكذب كان ماصار انقولك ماصار
فاطمه : اه به ريحتيني ،
: خليك يوم اخر معانا
فاطمه : منقدرش مع شغل عمك بعدين مابتتوحشيني وانت عندك  من يلهيك هههههههه
: محد يقدر يحل مكانك انتي ياست الكل
،
،
،
،
سيف ولد عمتي : الف مبروك ياراص
: الله يبارك فيك والعقبا ليك ياراص
سيف: شنو يامهند حرك روحك شوف خوك اللي اصغر منك دارها قبلك وانت قاعد
مهند : كانت بين يدي فرصه وضيعتها عليا
سيف : فوتها الف وحده تتمناك غر اشر بس طول نمشي نخطبلك 
مهند: منور ياقدر عارفك ماتقصر
مافاتتش عليا نضرت الحزن اللي في عيون مهند بعده كلمتني امي انخش داخل
،،
،
،
،
خش علينا مؤيد وسلم
عيشه:تعال اقعد بحدانا مافي حد غريب
خشيت سلمت وقعدت جنب امي
فاطمه: خيرك ماقعدت جنب عروستك مال شبعت منها
مؤيد:حضن هند ماينشبع منه بس مافي كيف حضن الام
اول مره نتحشم لهدرجه متوقعتش هكي رده قعدن البنات يتسرسن ويضاحكن
،
،
،
،
،
،
،
طلعنا من عند دار  عمي ومشينا للحوازه اللي بنقعدو فيها لعند رمضان يكون الدور الثالث جاهز لينا هذا احسن شي صارلي في هالبلاد فرحت لما عرفت انه بنقعدو فيها عالاقل نفسيتي ترتاح شوي
،
،
،
،
: كان فيك اتمثل دور الزوج السعيد بدون احراج
مؤيد :ليش انتي تعرفي تنحرجي مكنتش نحساب
: كان الناس اللي تعرفهم ماينحرجو مش معناها كل الناس هكي
مؤيد : والله نعرف تمثيلك ممتاز ليش ماسايرتيني
: تمثيلك البارع غطى عليا
مؤيد : امممم شهاده هادي من ممثله بارعه
: بالله محلاك وانت ساكت تراه
مؤيد : انت مش حلوا لا ساكته ولا متكلمه
مبيتش انزيد كلمه اخرا
،
،
،
،

وصلنا ودخلنا للحوش اللي كانت متغيرا من ناحيه الديكور اللي كان حلوووو ياسر ويفتح النفس واهم شي ان فيه اكثر من دار يعني نلقا وين نتريح في النومه استغليت طلعته وخشيت انشوف دار النوم كانت حلوا وبسيطه بس مش ليا خذيت دار بعيده عنها  فيها سرير فردي رميت عبايتي وارتميت عالسرير ببدلتي ومانوض الا لليوم اللي بعده الليل  الله من زمان ماذقت نوم طيب هكي بدلت حاجه مريحه وطلعت لبرا لقيت مويد يشوي
مؤيد : حتي الدجاج مايرقد كل هالوقت
: راقده علي قلبك ومانندري وبعدين انت اخر واحد تتكلم بعد ماخليتني نرقد عالصالون اليابس
مؤيد : نقصي من الكلام وتعالي كان بتتعشي ولا بتفطري
: امممم سبحان مغير الاحوال من ماتخلي شي لين تحضر العشي لروحك
مؤيد : درته ليا في الدرجه الاولي وبما انك شريكه حياتي يعني انك شريكه اكلي
: هههههههههههههه اول مره نسمعها المقوله هيا
مؤيد : ليش مال متزرجه من قبل
: بارد وتنكيتك ابرد
مؤيد : واضح من ضحكك انه ماعجباتك النكته رغم اني مكنتش انكت ،عالعموم تقدري تنحي وشاحك مفيش عمال الفتره هيا
بعد تعشينا كنت نبي نتمشي بس كانت الدنيا ظلام فخفت نمشي بروحي اما هوا مشي بعيد شوي وقعد يتكلم بالنقال من تبسمه عرفتها انها هيا 

خشينا داخل هوا قعد يدير بالاب توب واني نتفرج عالتلفزيون وكل واحد في حاله
خشيت لداري وتمددت عالسرير خطر عليا مهند مفيش فرق بيني وبين مؤيد هوا بعدوه عن حبيبته لكن مازال متمسك بيها ويكلم فيها اما اني كل السبل انقطعت بيني وبين مهند ومن الهم البكي رقدت مزال
،
،
،
،
،
طلعت في الصبح كان الجو هوا قوي شوي فخطرت في بالي حاجه فكيت شعري وخليته يطاير زي مانشوف فيه في التلفزيون
وقفت حذا المسبح وتفكرت هذاك اليوم ونظن كان طحت فيه يخليني نغرق مايعبرني المره هيا
تسآءلت وين ممكن يكون مؤيد تو شوي نلقاه جاي في اتجاهي وراكب علي فرس
مؤيد : انشوف فيك مبتسمه شكلك اتحبي الفرس
: طبعا انحبهم ياسر ياسر رغم اني منعرفش نركبهم مره علمتني سهي وماعرفت
مؤيد : لو تحبي نقدر انعلمك
بدون تفكير ياريييت والله
مؤيد : مدي يدك هي
ساعدني في الركوب فكرت اني حنكون وراه لكن خلاني قدامه واحرجت من الموقف اللي انحطيت فيه قاعده قدامه ويدي على السير ويديه فوق يدي وبدينا نمشو بشوي بشوي بعده مؤيد خبط الفرس وشد السير وقعد يجري
واني قعدت انعيط : ووقققققف تربحك وقققف بنموووووت وققققييييييف
مؤيد : هههههههههههههخيرك والله جو
: مفيش جو بكل ووقففف والله انموت وتخش الحبوس من ورايا
مؤيد : ههههههه لا عاد كله  ولا تموتي هي وقفت
نزلت وشديت في الارض : اه الحمد لله نزلت بسلام الحمد لله
مؤيد : خزي خوافه معش امركبك عليه
: لا وراسك اصلا اني اللي معاش انوافق علي عروضك
،
،
،
،
،
،
يتبع