الحلقه السابعه عشر
.
.
كنت انظن انه حياتي ولت مثاليه بس كنت غلطانه خشيت في حاله اكتئاب حاد بسسب اللي صارلي كنت نحساب انه بنرمي كل شي وراء ظهري وبنفتح صفحه جديده بس عبس الماضي قعد يلاحق فيا وجوه ومواقف كل يوم نحلم بيها كل ليله انوض مفزوعه حسيت بالوحده اكثر من اي وقت اخر توحشت هديل توحشت ضحكتها عيونها حركاتها دوشتها كل يوم نطلع على السطح نراقب النجوم الجو هنا يختلف باررررد وكئيييب ومفيش حضن دافي يسهر معاك الليل كله،تميت عالحال هذا شهر كل يوم انقول بكرا حنتحسن بس كل يوم يزيد اكتئابي اكثر مقدرتش انسجل في كليه الطب في وضعي هذا وهذا اللي زاد اكتئابي وكاني في متاهه ومش قادره انلاقي المخرج ،،
حاطه راسي على فخذ ماما وراقده او هذا اللي كانو يضنوه
فاطمه ودموعها على خدها: لازم انلاقو حل البنت بتضيع من بين يديا ياسالم
سالم: لاحول ولاقوه الا بالله حتى لما نقرا عليها تتحسن شوي وتولي
فاطمه: شن الحل امالا البنت حالتها كل يوم للاسوء
سالم: في حل بس ان شاء هي نقتنع بيه
فاطمه: شنو بالله قول
سالم: دكتور نفسي
فاطمه: دكتور نفسي!!! والله جبتها احتمال كبير هند تستفاد منه
سالم: بكرا الصبح باذن الله نازل نسأل عن احسن دكتور
فاطمه ؛ اي والله يريت فاقرب وقت
دكتور نفسي!!يعني اني مريضه نفسيه يعني مجنوووونه لالا اني مش مجنونه مش مجنونه علي من تكذبي باهند اللي اديري فيه كل يوم شن يسمو فيه اه حسبيا الله في اللي وصلني لهذا الحد خليتلكم البلاد مره وحده بس حتى في احلامي املاحقيني....
.
.
.
.
.
مشيت مع ماما وعمي سالم للعياده بعد ماستفسر عمي وعرف أنه فيها احسن دكتوره عربيه خشينا وكان رحمه شوي قعدنا نستنو عالكراسي
من وقته هذا خيره مايتسكر
مؤيد: تجيني انساعدك
: اه منتبهتلك وانت خشيت من امت وانت هنا
مؤيد: من لما اتسبي عالنسنسله خليني انساعدك قرب عليا وحوش شعري على جنب وسكر السنسله
مؤيد: الاحمر طالع عليك يجنن
: شكرا
مؤيد: شكرا هاذا اللي قدرتي عليه
؛ ايه وشن تبي آخر ياطماع
مؤيد: منعرفش الكلام اللي يقولو فيه الأزواج لبعض
: ما نعرف مش متزوجه من قبل
مؤيد: بس اني نعرف قولا وفعلا
: خلاص ادرب عليهم لمرتك
مؤيد: عادي ندرب عليكم وبعده نطبق عليهآ
: لالا حتى بلاها الفكره الجهنميه هادي
مؤيد: تي غير استني بس خليني انجرب بش بعدين مانتلبك غير هيا بس
: به هي بسرعه
مؤيد: هي خليني نوقف الوقفه المزبوطه
قعد يشوف فيا من فوق للوطه بنظره رومانسيه وابتسامه ؛ الأحمر طالع عليك يجنن :لارد
مؤيد: خيييرك
: شنووو
مؤيد: قوليلي عيونك الحلوه حبيبي اي حاجه :عيونك الحلوه
مؤيد: حبيبي
: خطاااني ماشاء الله عليك رومنسي درجه اولى
مؤيد: وانتي ماتعرفي الرومانسيه
: إيه منعرفش ومانبيش نعرف فرحانه بروحي هكي
: هند هند نوضي
: ها شن فيه
فاطمه: غفيتي واحني نستنو هذا كله من قلت النوم
: شنو جي دوري
فاطمه: اييه نوضي هي
خشيت لحجره الدكتوره متردده بس ابتسامتها الهاديه شجعتني انخش داخل
د.سوسن :انسه هند تفضلي خيرك واقفه
اللي ريحني اكثر انها ليبيه
قعدت عالكرسي
د.سوسن: كيف حالك هنوده عادي اناديك هكي
:على راحتك الحمد لله كويسه
د.سوسن: هنوده خبرني عن نفسك شوي كم عمرك دراستك اهلك وهكي
: اااا عمري 19 وتقرأ طبي بشري
د سوسن: ماشاء الله دكتوره هند معناها
دغدغني هذا الشعور دكتوره هند بعيييييد هذا الحلم ان شاء الله نقدر نوصلله يوم من الايام
د.سوسن: به كملي خبريني اكثر عن حياتك
عن عيلتك وعن اصدقاءك
: اصدقاءي معنديش لكن من فتره تعرفت على بنت طيبه وخشت خاطري وقعدنا اصحاب لين بكل.. وعائلتي هي امي بس وكانت عندي اخت صغيره بس توفت قريب
د.سوسن: الله يرحمها ويغفر لها
: امين
سكتنا شوي واني صفنت ومانلقاها الا في الكرسي اللي قدامي ومسكت يدي الاثنين وشدت فيهم: هنوده حبيبتي لازم تفضفضيلي عن كل شي حتى نقدر انساعدك
هزيتلها راسي بالموافقه
د.سوسن :تمام تعالي بكرا بكري شوي اوكي
: تمام 👌
.
.
.
.
طلعنا من العياده ولفينا في شوراع منشستر ومشينا لحديقه خاصه بالازهار ومنظر الازهار والورد من كل الالوان يفتح النفس ويمتع النظر قعدت في مساحه بروحي علعشب
ونشبح لامي وعمي سالم قاعدين عالكراسي وهدرزو ومبتسمين قديش حسيت بالفرحة لامي والا تساهل كل خير حسيت اني حمل ثقيل عليها مهما تحبني بس يبقى البنى ادم ثقيل على غيره وخاصه لو عنده مشاكل زييي اني لازم نتحسن مش معقوله نبقى هكي خطر عليا مهند وتخيلت مهند وانه قاعدين جنب بعض على الكراسي وراسي على كتفه بس سرعان ماعندت الفكره وجي مؤيد في خاطري هالايام ميروحش عن بالي ممكن لانه كان اكثر شخص تعاملت معاه بعد مافقت من الغيبوبه نبي نطلعه من راسي ومش قادره وممكن هوا سبب اللي انا فيه
.
.
.
.
.مسحت دموعي اللي نزلو بغزارة
د.سوسن: كويس هذا انجاز عظيم اللي قدرتي تفضفضي علي حاجات حساسه اكيد تو اتحسي انك أقوى
: ايه انحس في روحي أقوى بس انحس بتعب وصداع
د.سوسن: هذا دليل على انك بدلتي مجهود
: دكتوره باهي شن تفهمي من كلامي يعني من خلال الكلام اللي قلته كيف نقدر ننسي وكيف قاعد ياثر فيا ليتو
د.سوسن: حبيبتي خلينا صريحين حتى نقدرو نوصلو لمرحله كويسه
: اكيد حنكون صريحه معاك
د.سوسن: تمام انتي قلتيلي ان بعد موتت هديل خشيتي في حاله صدمه وقعدتي على إثرها اشبه بالمشلوله صح ولا
: اها هذا اللي قلته
د.سوسن بس قلتيلي انك تحسنتي بعده وماطولتي بس لما جيتي هنا تازمت حكايتك
: صح
د.سوسن: اني انقولك شن تفسيره
: شنو تفسيره دكتوره
د.سوسن: لما كنتي في مرحله صدمه وكنتي في المستشفى كان في شخص معاك علي طول يساعد فيك ومهتم طول الوقت بيك ويسهر على راحتك بوقت ماخر ولما روحتي ظل معاك لعند تحسنتي شوي
: اكيد امي قصدك
د.سوسن: لا قصدي زوجك السابق
: مؤيييد!!
د.سوسن: ايه مؤيد صح انه امك اهتمت بيك ورعاتك بس ماكانتش معاك اوقات بسبب انشغالها مع زوجها بس مؤيد على حسب كلامك قطع فتره شغله عشان يضل معاك
وقلتيلي انك بعد ماكنتي ماطيقيش تقعدي جنبه قعدتو ترقدو مع بعض في نفس السرير
: بس اني قلتله انه معش يهمني شي حتى لو رقد جنبي معش انحس بشي
د،سوسن: لا انتي توهمي في نفسك بهذا الكلام
: اه شن قصدك دكتوره يعني انا كنت انحبه ومش من حزني على هديل
د.سوسن: لا مش هكي هنوده بس انتي حسيتي بالامان معاه وحسيت ايضا بالانتماء وانه في يد حانيه عليك وسند ليك في الاوقات الصعبه ومنقولكش انه هو السبب الرئيسي بس هوا واحد من الاسباب ولما جيتي لهنا فقدتي هذا النوع من الحنان اللي يختلف عن حنان الام فهمتي عليا ولا لا
: ايه فهمت عليك دكتوره بس اني نبي ننساه وننسا كل اللي كنت فيه حتى تتحسن نفسيتي
د.سوسن: وهذي المرحله الجايه اللي بنخشولها بعده ماصارحيتينيي بكل شي حنجو للخطوه اللي بعدها التغيير، انتي مش لازم تنسى اللي صار او بالأحرى تجهدي روحك على نسيانه بس حاولي تلهي روحك في حاجات أخرى تساعدك انه لما تتفكري اللي فات متحسيش باي شي وشوي شوي تنسيهم مره وحده
: اوكي تمام بس خايفه انطول
د.سوسن: مستحيل اطولي انتي بديتي في التحسن من ثالث جلسه وهذا شي نادر وهذا دليل على انك مش مريضه نفسيا وهذا ليش ماوصفتلكش ادويه
:شن الحاجات اللي انديرهم اتساعدني في النسيان
د.سوسن: هوايه موهبه حاجه زي هكي شي تبي تتعلميه من زمان وملقيتيش فرصه
.
.
.
.
.
بديت نتعلم في الرياضه اللي من زمان خاطري نتعلمها وخايفه منها... السباحه كانت إحدى مخاوفي وبما اني تخلصت من اكبر مخاوفي من فتره لازم منخليش اي شي يخوفني بعد اليوم مشيت وقتي بالسباحه وسجلت في نادي رياضي وكان هو سبيل حتى انفرغ غضبي بعد فتره تحسنت شوي وقدرت انسجل في كليه الطب وكنت نجهد في روحي حتى ننسى اللي فات بس ومع هذا من مزال متعافيتش بشكل كلي ومزال فيا شعور الوحده واليأس قاعد بس جزء بسيط ومازال نوض مرعوبه في نص الليل بس قالتلي الدكتوره انه هدا يبي وقت ومايتعلقش بتحسنك،
في يوم كنت نقرا لامتحانت النهائيه وجاهده روحي وفاتحه الانترنت نتكلم مع بنات ليبيات تعرفت عليهم في الكليه وفرحت بيهم واني قاعده منهمكه في القرايا تدخل عليا ماما وحامله سفره فيهت كاكاو وتوست
: الله عالريحه جي فوقته الكاكاو
أنت تقرأ
ما تخبئه لنا الأيام ( روايات ليبية )
عاطفيةرواية تحاكي كل العشاق الذين يكافحون من اجل حبهم وسط كل الاحدات المحبطة من حولهم ؟ فهل ينتصر حبهم ؟ و ما مصير علاقتهم ؟ 🔥🔥🔥
