ثلاثتهم بين حب وجحيم لهجة عراقية وتتوفر فصحى على مكتبة نور بأجزاءها جميعا

الفصل التاسع

تصويتكم ضروري حبايب  والبنات سألوني اذا جانت هاي القصة حقيقية الجواب هو نعم قصة حقيقية بس اني مغيرة بيها .

ثلاثتهم بين حب وجحيم

كتابة رؤى صباح مهدي

الفصل التاسع

ما جان مختار مصدك لان هو ديخطط حتى يشوفها بس الله بدون تخطيط جابها اله حتى يسعد قلبه التعبان. كال لام سهاد:

"تعالي وياي اني اوصلج"

سد المحل بساع والنسوان التلاثة ينتظرنه برة وبعدين مشة كدامهم وعينه بالكاع وهنة يمشن ورا حتى يوديهن لبيته. جانت سهاد تباوع عليه بكل حرية لان هو ما يكدر يشوفها همست رنا لسهاد:

"لج سهاد نيالج شوفي طولة ولحيته خطيبج يخبل"

وكالعادة من رنا تحجي متلكة رد على دعاباتها. وسل للبيت وطلع المفتاح فتعجبت ام سهاد وحست بخجل لان افتهمت هذا الرجل بالصدفة طلع مرتبط بهاي العائلة وهي حجت ويا بخشونة كلش وحست من شكلة ووضعيته هو اكيد مختار مو سرمد لان سرمد اصغر وبالجامعه. صاح مختار من باب البيت لامه:

"يوم اجو زوارج"

بعدين وخر حتى يفسحلهن المجال يفوتن للبيت فكالت اله ام سهاد وهي دتمر من بصفة:

"انت ابن حجية فتحية؟"

رد وعينه مركزة على سهاد وقلبه يخفق وايدي بدت شوية ترجف لان مرت من بصفة دتفوت للبيت وحسها داست على قلبه من فاتت:

"اني مختار تفضلوا البيت بيتكم"

ارتبكت سهاد رغم هي من تشوف مختار تحس بدغدغة صغيرة بس ما حست بوميض الحب المفاجئ اللي قرت عنه بالروايات وحتى دغدغة معدتها عالجتها بالعلج اللي جانت تعلجة بهدوء حتى متطلع صوت. حست ا ن هاي الخطبة راح تكون بالنهاية خطبة تقليدية مابيها حب بس مشاعر اعجاب عادية تتمنى الأمور تكون زينة وتحاول تبهر خطيبها وتسوي مثل أي بنية تعيش بالتي هي احسن بين اهل زوجها. وبنفس الوقت جان مختار يتخيلها طابة لهذا البيت بالثوب الأبيض وحس بالانتعاش لهاي الفكرة وباوع عليها جانت عينها تستطلع المكان تحاول متلتقي نظراتها بنظرات مختار. ورة ما انتهى دروه بتوصيل العائلة سلم عليهم وطلع مرتاح البال همس بينه وبين نفسه :

"لازم اتزوجها أي لازم اتزوجها"

بالبيت ام مختار جانت دتحاول قدر الإمكان تحسس ضيوفها بالسكينة والراحة كالت الهن ورة ما قدمت الهن الضيافة:

"اخذن راحتجن مختار بالشغل وسرمد بالجامعه وماكو بالبيت بس احنة"

نزعن الاحجبة وحسن بالراحة شوية وظلت سهاد تباوع على البيت. بسيط طابقين مبني من زمان بناء قديم حتى اقدم من بيتهم بس رغم هذا مرتب ونظيف وحيطانة حلوة ما بيها فطور ومصبوغه ومابيها رطوبة معلقة عليها صور للعائلة منها صورة ابيض واسود محطوط عليها شريط اسود ومكتوب جواها (الشهيد ابطل ناجي عبد السلام) وتوقعت هذا هو رجل فتحية وبصف الصورة هاي محطوطة صورة حديثة لشاب صغير مكتوب جواها(المهندس سرمد ناجي عبد السلام) وبصفها صورة لمختار وبلا متقرة الكليشة الجواها عرفته وحتى ما جان اكو أي لقب كدامها.