ثلاثتهم بين حب وجحيم لهجة عراقية وتتوفر فصحى على مكتبة نور بأجزاءها جميعا

الفصل ال40

تصويت حبايب

ثلاثتهم بين حب وجحيم

كتابة رؤى صباح مهدي

الفصل 40

انصدمت كريمة من شافت الورم على خد سهاد ومشيتها مأرجحة ركضت الها تسندها وقالت:

"عزة شبيج يمة شبي وجهج هيج مورم"

ردت سهاد الكوة:

"اني ومختار راح نتطلك يمة"

انصدمت كريمة اعرفت شترد عليها صرخت سهاد تبجي:

"راح يتزوج عليه يمة"

ماصدكت كريمة الي سمعتها من بنتها قالت رنا وهي هم مصدومة:

"مستحيل!"

سالتها كريمة وهي دتكعدها على القنفة:

"احجيلي شصار؟"

كلتلهم سهاد بالقصة كلة وكريمة انجنت من سمعت قالت بخيبة امل:

"معقولة لهاي الدرجة يتمادى مختار حتى ينقذ سرمد؟ يضحي بنفسه وهو عدة طفل جاي بالطريق ولا همة هالشي"

قالت سهاد بالم:

"تعبت يمة تعبت كل ما تصادف مختار مشكلة اني اخر الي يفكر بيه يعوفني باخر القائمة وقت التضحية اني اول من يضحي بي وكل وعوده الي كذب واني تعبت من الوضع ببيتهم وتعبت من التحكم بحياتي تعبت"

نزلت كريمة راسها متوجعه على بنتها وحضنتها رنا وهي تبجي بلعت كريمة ريقها وقال لسهاد:

"يابنتي اصبري على رجلج وقت صعب ويمر راح احاجي امه حتى افتهم منها البير وغطاه وماراح اعوفج بهذا الوضع لتخافين"

صرخت سهاد وهي تحرك راسها يمنة ويسرة رافضة الموضوع كلة وقالت:

"احس راسي راح ينفجر يوم جسمي كلة ديوجعني تعبانة واحس عمري كبر فوك عمري"

وبدت تبجي بالم وامها تمسد راسها وتباوع على خدها المورم بحسرة قالت لرنا:

"اخذيها لاختج للغرفة خل تتمدد"

كامت سهاد وية رنا ولزمت كريمة سماعة التليفون ودكت على فتحية وجاوبتها فتحية بعصبيه وسالت على سهاد فردت كريمة:

"وصلت للبيت خدها مورم ووجهها ازرك وبقلبها غصة وهي حامل شديصير عدكم بس لا عبالكم ابوها مات تكدرون تذلوها بهل الشكل بلا حساب وشلون مختار كدر يمد ايده عليها؟"

ردت فتحية تدافع عن مختار:

"مشكلة بين الرجال ومرته فليش اني وانت نتدخل بيها يا حجية ولو اني سمعتها تصيح بوجهه وتدعي علية وعليه فضربها لان تجاوزت"

كملت:

"الصراحة اني جنت موجودة من تعاركوا سهاد كلش تمادت ويا ولا قدرت الوضع الصعب اللي هو بي اكيد كلتلج بالوضع الي دنمر بي احنة ومختار وحدة بكل هذا واعصابه متشنجة وهي اجت تصرخ وتحجي عليه فصراخها واستهتارها وصلنة لهاي النتيجة"