ثلاثتهم بين حب وجحيم لهجة عراقية وتتوفر فصحى على مكتبة نور بأجزاءها جميعا

الجزء الثاني من الفصل 50

تصويت للفصل من فضلكم واحب اعرف رايكم اكيد بالرواية. الرحلة جانت كلش حلوة صراحة صراحة اني حسيت نفسي جزء من العائلة واتمنى كدرت اوصل الكم احساسهم وحياتهم بشكل احترافي ومميز وبعيد كل البعد عن الاسفاف او التشهيربيهم لان هذا مو الغرض ابدا من طرح قصتهم.

ثلاثتهم بين حب وجحيم

كتابة رؤى صباح مهدي

الجزء الثاني من الفصل 50 والاخير

وكعت سهاد على القنفه متحجي ولا كلمة مصدومة تماما ابنها بايدها وراسه على صدرها يسمع دقات قلبها الي زادت قالت كريمة وهي بعدها ما مصدكة :

"يمة شدتكول؟ مختار ترة مات ودفناه سوة وبجينا عليه اشهر لحد ما ابيضت عيونا وتعدينا مرحلة موته بالقهر والموت ومرته هسة صارت مرتك . تريد تكلي ورة كل هذا رجع فهمني شلون مات وشلون رجع احجي!"

كللها كل الي كاله اله عبد الواحد وهنة يسمعن ما مصدكات سهاد حست الكاع دتلف بيها واعصار من الألم ضرب راسها خلت مختار الصغير على القنفه وباوعت لسرمد وسالته:

"صدك مختار عايش؟"

نزلت دمعه من عينها متعرف شتسميها دمعة حزن لو دمعه فرح لرجعه مختار. اكو شي غريب بهذا الخبر موجة من الراحة صابتها من سمعته راحة حزينة !

قالت لسرمد ورة ما اكد الها رجعة مختار:

"يعني اني وانت لازم ننفصل مختار رجع"

بلعت ريقها وسدت عيونها وهي تبجي وكملت:

"اني فرحانة كلش لرجعته اريد اشوفه هسة وأريد ابجي يمة اريده يسامحني على هواي شغلات الله سبحانه انطاني فرصة ثانية ودعائي طول الفترة الي فاتت الحمد لله الله استجابله اخذني اله سرمد فدوة اروحلك"

هز سرمد راسه وقال:

"بدلي خل اخذج"

بدلت هدومها وعافت ابنها يم رنا وراحت وية أمها وسرمد من وصلوا للمستشفى حست رجليها كامن يرجفن وجسمها كلة مو على بعضه من وصلوا لغرفة مختار جان بعدة نايم وعبد الواحد ما جان موجود من سأل سرمد عليه تبين واحد من المخطوفين رجعله الوعي فاستجوبه عبد الواحد واضطر يرجع للقسم.

الممرضة راحت للطبيب علمود تساله اذا يكدرون يزورون مختار وانطة الاذن بشرط ميضايقون المريض ابد دخلت سهاد ما مصدكة عيونها ولاحظت نفس الشئ الي شافه سرمد اول ما دخل على مختار وبدت تبجي بمرارة وتزعزعت مشيتها اله شوية وتوكع فلزمتها كريمة الي جانت هي هم دتبجي همست سهاد:

"عساية متت ولا اشوفه بهاي الحال"

وظلت تبجي وسرمد هم يبجي وراها طلعوا تلاثتهم من الغرفة كعدوا على كراسي قريبة من المكان وكل واحد يبجي بوحدة مر على خاطر سهاد كل حياتها وية مختار وكل الليالي الي كضوها سوة وكل الكلام الي جان يكولة الها وكل شيء جانت تتذكرة وتبجي.